Leksiyon 1 Materyal sa Pagpangandam sa Klase: Pagdawat sa Imbitasyon sa Manluluwas sa Pagkat-on mahitungod Kaniya
“Leksiyon 1 Materyal sa Pagpangandam sa Klase: Pagdawat sa Imbitasyon sa Manluluwas sa Pagkat-on mahitungod Kaniya,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 1 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Imahe
ang Manluluwas nagpahiyom sa usa ka babaye diha sa nagpundok nga katawhan
Leksiyon 1 Materyal sa Pagpangandam sa Klase
Pagdawat sa Imbitasyon sa Manluluwas sa Pagkat-on mahitungod Kaniya
Welcome dinhi sa Si Jesukristo ug ang Iyang Walay Kataposang Ebanghelyo (Relihiyon 250). Ang Unang Kapangulohan ug ang Korum sa Napulog Duha ka Apostoles misulti mahitungod sa Manluluwas, “Walay lain nga adunay labaw ka mahinungdanon nga impluwensiya diha sa tanan kinsa nakapuyo ug magpuyo pa dinhi sa yuta” (“Ang Buhi nga Kristo: Ang Pagpamatuod sa mga Apostoles,” , ChurchofJesusChrist.org). Kini nga kurso magtanyag kanimo sa sagradong oportunidad sa pagkat-on og dugang mahitungod ni Jesukristo aron imong mapalambo ang Iyang impluwensiya sa imong kinabuhi.
Ang materyal sa pagpangandam niini nga kurso gidesinyo aron sa pagtabang nimo nga makapaduol sa Manluluwas pinaagi sa pagpalambo sa imong personal nga pagtuon ug pag-andam kanimo nga makabaton og makapalig-on nga mga diskusyon ngadto sa uban. Naglakip kini sa makahuloganong mga kasulatan, nagsuporta nga mga pamahayag gikan sa mga lider sa Simbahan, may kalabotan nga mga video, ug mga imbitasyon sa pagpamalandong ug paggamit sa unsay imong nakat-onan. Ang matag leksiyon adunay opsiyon nga “Gusto pa og Dugang?” nga seksiyon nga naglakip og dugang nga mga kapanguhaan nga makatabang nimo sa pagkat-on og dugang pa ug sa paglig-on sa imong hugot nga pagtuo kang Jesukristo.
Seksiyon 1
Sa unsang paagi nga ang pagkat-on kang Jesukristo ug sa Iyang walay kataposang ebanghelyo makausab sa akong kinabuhi?
Hunahunaa nga nagpuyo ka sa Palestina sa kapanahonan sa pagpangalagad sa Ginoo. Nakadungog ka og daghan nga makapatingalang mga butang mahitungod sa usa ka magtutudlo nga ginganlan og Jesus sa Nazaret ug nakabaton og lig-on nga tinguha sa pag-adto ug sa pagpaminaw Kaniya nga ikaw mismo. Sa adlaw nga imo Siyang nakita, si Jesus nagtudlo sa dakong pundok sa katawhan. Gipamahayag Niya ang katalagsaon ni Juan Bautista ug mibadlong sa mga tawo sa ilang pagkadili matuohon (tan-awa sa Mateo 11:7–24). Siya dayon mihimo og pagdapit nga lagmit makausab sa kinabuhi.
Basaha ang Mateo 11:28–30, ug pamalandongi kon sa unsang paagi nga ang pagdawat sa iyang imbitasyon nakausab o makausab sa imong kinabuhi.
Si Jesukristo mipadangat sa sama nga imbitasyon sa atong panahon. Human makapamatuod sa dili masabot nga bugti sa Iyang gibayad sa pagtubos sa atong mga sala aron kita makahinulsol, ang Manluluwas miingon, “Pagkat-on kanako, ug paminaw sa akong mga pulong; lakaw diha sa kaaghop sa akong Espiritu, ug ikaw makabaton og kalinaw ngari kanako” (Doktrina ug mga Pakigsaad 19:23).
Naghisgot bahin niini nga imbitasyon, si Elder Kim B. Clark sa Seventy mitudlo:
Imahe
Elder Kim B. Clark
Ang imbitasyon sa Manluluwas sa “pagkat-on kanako” adunay duha ka may kalabotan nga kahulogan nga mitukma sa matahom nga paagi ngadto sa pamaagi sa Ginoo sa mas lawom nga pagkat-on.
Ang unang kahulogan sa “pagkat-on kanako” mao ang: Pagkat-on sa pagkaila kanako.
… Ang pagkaila Kaniya mao ang pagpakatawo sa espirituhanong paagi diha Kaniya, makasinati og dako nga kausaban sa kasingkasing, mamahimo nga Iyang mga anak nga lalaki ug babaye. …
Ang ikaduhang kahulogan sa “pagkat-on kanako” mao ang: Pagkat-on gikan kanako.
…Samtang isubsob nato ang atong kaugalingon diha sa mga kasulatan, makakat-on kita gikan sa Iyang hingpit nga ehemplo. … Kinahanglan nga molihok kita uban sa hugot nga pagtuo kang Jesukristo sa pagbuhat sa atong bahin, apan samtang kita nagbuhat sa ingon, … Siya misaad nga dugangan ang atong kapasidad alang sa matarong nga buhat ug tabangan kita nga mas mahisama Kaniya. (“Learn of Me” [pakigpulong nga gihatag ngadto sa mga relihiyosong mga tigtudlo sa CES, Ene. 26, 2018], ChurchofJesusChrist.org)
Usa ka mahinungdanon kaayong paagi sa pagkat-on bahin sa Manluluwas mao ang pagtuon ug pagsunod sa Iyang walay kataposang ebanghelyo. “Ang Griyego nga pulong alang sa ebanghelyo nagpasabot og ‘maayong mga balita’” (Ang Giya ngadto sa mga Kasulatan, “Ebanghelyo, Mga”). Busa unsa ang maayong balita sa ebanghelyo?
Sa hapit na ang kataposan sa Iyang pangalagad ngadto sa mga Lamanite ug mga Nephite sa yuta sa Bountiful, ang Manluluwas mipasabot gamit ang yano ug tin-aw nga mga termino sa kahulogan ug katuyoan sa Iyang ebanghelyo.
Imahe
icon, pagtuon
Pagtuon agi og Pagpangandam alang sa Klase
Basaha ang 3 Nephi 27:13–16, 20–21, ug pangitaa ang mga hinungdan nganong ang ebanghelyo usa ka maayong balita.
Si Elder Jeffrey R. Holland sa Korum sa Napulog Duha ka Apostoles mitudlo:
Imahe
Elder Jeffrey R. Holland
Ang “maayong balita” mao nga ang kamatayon ug ang impyerno mahimo nga malikayan, nga ang mga kasaypanan ug mga sala mahimong mabuntog, nga adunay paglaom, nga adunay tabang, nga ang dili masulbad nasulbad, nga ang kaaway nalupig na. Ang maayong balita mao nga ang lubnganan sa tanan ugma damlag wala nay sulod, nga ang kalag sa tanan mahimong putli pag-usab, nga ang matag anak sa Dios mahimong makabalik pag-usab ngadto sa Amahan kinsa naghatag nila og kinabuhi, (“Missionary Work and the Atonement,” Ensign, Mar. 2001, 8–10)
Imahe
icon, irekord
Irekord ang Imong mga Hunahuna
Hunahunaa ang mahitungod sa imong kasamtangan nga panabot ug pagpamatuod kang Jesukristo ug sa Iyang ebanghelyo. Unsa nga mga tumong ang gusto nimong itakda aron makat-on pa og dugang bahin Kaniya ug sa Iyang ebanghelyo? Unsay imong mabuhat aron ang Iyang impluwensiya molambo diha sa imong kinabuhi? Ikonsiderar ang pagsulat sa imong mga tumong ug sa regular nga pagrebyo niini sa moabot nga mga semana.
Seksiyon 2
Sa unsang paagi nga akong mapalambo ang akong abilidad sa pagkat-on bahin sa Manluluwas ug sa Iyang walay kataposang ebanghelyo?
Nagpuyo kita sa kalibotan nga ang dako nga bahin gihulma sa sekular nga kahibalo. Ang sekular nga kahibalo nagtutok sa kalibotanong mga butang nga wala ikonsiderar nga pang-relihiyon o espirituwal. Sama pananglit, ang siyentipikanhong pagkat-on magbunga og sekular nga kahibalo. Kini nga kahibalo importante ug naghatod ngadto sa talagsaong mga kalamboan sa teknolohiya, medisina, agrikultura, transportasyon, ug komunikasyon. Kauban niining sekular nga pagkat-on mao ang mas lawom pa, espirituwal nga paagi sa pagkat-on sa kamatuoran.
Si Elder Paul V. Johnson sa Seventy mitandi tali sa espirituwal ug sa siyentipikanhong pagkat-on sa ingon niini nga paagi:
Imahe
Elder Paul V. Johnson
Ang pagkat-on og espirituwal nga mga butang … nagkinahanglan og lahi nga pamaagi kay sa pagkat-on sa siyentipikanhong mga butang. Ang siyentipikanhong pamaagi ug ang salabotan makatabang kaayo, apan kon kini lamang dili gayod makahatag og espirituwal nga kahibalo. Ang pagkat-on og espirituwal nga mga butang maglakip sa salabotan, apan dili pa kana igo. Makat-onan lamang nato ang espirituwal nga mga butang pinaagi sa Espiritu. (“A Pattern for Learning Spiritual Things” [Seminaries and Institutes of Religion satellite broadcast, Ago. 7, 2012], ChurchofJesusChrist.org)
Sa paghisgot mahitungod sa espirituwal nga pagkat-on, ang Ginoo mipadayag ngadto ni Propeta Joseph Smith nga “ingon sa tanan nga walay hugot nga pagtuo, pangitaa ninyo nga makugihon ug magtudlo sa usag usa sa mga pulong sa kaalam; oo, pangitaa ninyo gikan sa labing maayo nga mga basahon ang mga pulong sa kaalam; pangitaa ang pagtulon-an, gani pinaagi sa pagtuon ug usab pinaagi sa hugot nga pagtuo.” (Doktrina ug mga Pakigsaad 88:118).
Kadaghanan nato nasayod unsaon sa pagkat-on pinaagi sa pagtuon. Apan unsaon man nato sa pagkat-on pinaagi sa hugot nga pagtuo? Si Presidente Russell M. Nelson mipasabot:
Imahe
Presidente Russell M. Nelson
Kita molig-on sa atong hugot nga pagtuo diha ni Jesukristo samtang kita maningkamot sa pagtuman sa Iyang mga sugo ug sa “kanunay mahinumdom Kaniya” [Moroni 4:3]. Dugang pa, ang atong hugot nga pagtuo madugangan matag higayon nga kita mogamit sa atong hugot nga pagtuo Kaniya. Mao kana ang gipasabot sa pagkat-on pinaagi sa hugot nga pagtuo.
Pananglitan, matag higayon nga kita adunay hugot nga pagtuo nga magmasulundon sa mga balaod sa Dios—bisan kon ang inila nga mga opinyon nagtamay kanato—o sa matag higayon nga kita mobatok sa kalingawan o mga ideyolohiya nga nagsaulog sa pagsupak sa pakigsaad, kita nagpakita sa atong hugot nga pagtuo, nga maoy makapadugang sa atong hugot nga pagtuo.
Dugang pa, pipila lang ka butang ang mas mopalig-on sa pagtuo kay sa kanunay nga pagbasa sa Basahon ni Mormon. Walay laing basahon nga nagpamatuod ni Jesukristo uban sa gahom ug kaklaro. …
Dayag lang, ang atong labing maayong seguridad magagikan sa atong pagyukbo sa atong kaugalingon ngadto sa Langitnong Amahan ug ni Jesukristo! Ang kinabuhi nga walay Dios usa ka kinabuhi nga puno sa kahadlok. Ang kinabuhi uban sa Dios usa ka kinabuhi nga puno sa kalinaw. Tungod kini kay ang espirituhanong mga panalangin moabot ngadto sa matinud-anon. Ang pagdawat og personal nga pagpadayag usa sa labing nindot niadto nga mga panalangin. (“Hangupon ang Umaabot Uban sa Hugot nga Pagtuo,” Liahona, Nob. 2020, 75)
Imahe
icon, irekord
Irekord ang Imong mga Hunahuna
Paghunahuna og mga tawo diha sa mga kasulatan o mga tawo nga imong nailhan kinsa nagpakita og ehemplo sa baroganan sa pagkat-on pinaagi sa hugot nga pagtuo. Paglista og pipila ka ehemplo aron andam ka nga mopaambit sa klase. Mahimo usab nimong irekord ang unsay imong nakat-onan pinaagi sa paggamit og hugot nga pagtuo ni Kristo.
