Walay sulod nga lubnganan ni Jesukristo

Leksiyon 17 Materyal sa Pagpangandam sa Klase

Pagkaplag og Paglaom diha sa Kadaogan ni Jesukristo batok sa Kamatayon

Ang atong mga lawas usa ka panalangin! Bitaw, sayon ra kanang bation kon himsog kita. Apan unsa kaha kon kita makasinati og mga butang sama sa kagutom, sakit, kasakit, o kakulangan? Nakita ba nimo ang usahay makapaluya nga mga epekto sa edad diha sa usa ka sakop sa pamilya o gani nakasinati nga namatay ang usa ka minahal? Samtang maghunahuna ka sa pisikal nga pag-antos ug sa kamatayon, hunahunaa kon sa unsang paagi nga ang pagpalawom sa imong pagtuo diha ni Jesukristo ug sa Iyang Pagkabanhaw makahatag nimo og paglaom ug kalinaw.

Seksiyon 1

Sa unsang paagi nga ang pagtuon sa mga asoy bahin sa Pagkabanhaw sa Manluluwas makapalig-on sa akong hugot nga pagtuo?

Human gilansang sa krus si Jesukristo, ang Iyang lawas gipahimutang sa usa ka lubnganan. Sa buntag sa ikatulong adlaw, si Maria Magdalena nakadiskobre nga ang iyang lubnganan walay sulod, ug siya mihilak. Ang duha ka anghel nangutana kaniya kon nganong naghilak siya. Siya mitubag, “Ila man gud nga gikuha ang akong Ginoo ug wala ako mahibalo kon hain nila ibutang siya” (Juan 20:13).

Si Maria nga naghilak sa gawas sa lubnganan

icon, pagtuon

Pagtuon agi og Pagpangandam alang sa Klase

Basaha ang Juan 20:14–18, ug hunahunaa kon unsa kaha ang bation nga mahimong labing una nga nakakita sa nabanhaw nga Manluluwas. (Ang hugpong sa mga pulong nga “Ayaw kog hikapa” nagpasabot nga “Ayaw og gunit kanako” sa Hubad ni Joseph Smith. Si Elder Bruce R. McConkie sa Korum sa Napulog Duha ka Apostoles misugyot nga ang Ginoo tingali nag-ingon kang Maria, “Dili ka mahimong mogunit nako dinhi, kay moadto pa ko sa akong Amahan” [The Mortal Messiah: From Bethlehem to Calvary (1981), 4:264].

Isip kabahin sa Iyang Pag-ula, ang Manluluwas mao ang unang tawo dinhi sa yuta nga nabanhaw. Ang iyang espiritu mihiusa sa Iyang hingpit, imortal nga lawas. Ang Apostoles sa ulahing mga adlaw mipamatuod: “Isip Nabanhaw nga Ginoo, Siya miduaw niadtong Iyang gihigugma dinhi sa kinabuhi. Siya usab nangalagad taliwala sa Iyang ‘laing karnero’ (Juan 10:16) sa karaang Amerika. Sa kalibotan karon, Siya ug ang Iyang Amahan nagpakita ngadto sa batang lalaki nga si Joseph Smith” (“Ang Buhi nga Kristo: Ang Pagpamatuod sa mga Apostoles,” ChurchofJesusChrist.org).

Ang Pagkabanhaw ni Jesukristo mao ang usa sa labing mainampingong gidokumento nga mga panghitabo diha sa mga kasulatan (tan-awa sa Russell M. Nelson, “Life after Life,” Ensign, Mayo 1987, 8–10). Aron mapalawman ang imong pagpamatuod bahin sa Pagkabanhaw sa Manluluwas, basaha ang usa o daghan pa sa mosunod nga mga asoy sa mga nakakita:

• Basaha ang Lucas 24:36–40.

  Behold My Hands and Feet [Tan-awa ang Akong mga Kamot ug mga Tiil], ni Harry Anderson

• Basaha ang Lucas 24:13–33.

  ang nabanhaw nga Manluluwas nga naglakaw uban sa Iyang mga disipulo

• Basaha ang Juan 20:24–29.

  ang nabanhaw nga Manluluwas nga nagpakita ngadto ni Tomas

• Basaha ang 3 Nephi 11:12–17, o tan-awa ang Basahon ni Mormon nga video “Jesus Christ Shows Himself at the Temple [Si Jesukristo Nagpakita sa Iyang Kaugalingon diha sa Templo]” (5:43).

  Tinagsa-tagsa, ni Walter Rane

• Basaha ang Joseph Smith—Kasaysayan 1:16–17; Doktrina ug mga Pakigsaad 76:22–24; 110:1–4.

  Unang Panan-awon, ni Walter Rane

icon, irekord

Irekord ang Imong mga Hunahuna

Paggahin og pipila ka minuto sa pagrekord kon unsay imong gihunahuna ug gibati sa usa o daghan pa niini nga mga asoy.

Seksiyon 2

Sa unsang paagi nga ang mas lawom nga pagsabot sa Pagkabanhaw makapalambo sa akong hugot nga pagtuo diha sa Langitnong Amahan ug ni Jesukristo?

Ang imong lawas adunay mahangtorong bili ug mao ang yawe sa imong kalipay niini nga kinabuhi ug sa sunod. Ang Ginoo misulti ni Propeta Joseph Smith nga “ang espiritu ug ang elemento [lawas], dili gayod mabulag, makadawat sa kahingpitan sa himaya; ug kon magkabulag, ang tawo dili makadawat sa usa ka kahingpitan sa himaya” (Doktrina ug mga Pakigsaad 93:33–34). Diha sa usa ka panan-awon bahin sa kalibotan sa espiritu, si Presidente Joseph F. Smith miingon nga ang patay “nagtan-aw diha sa dugay nga pagkawala sa ilang mga espiritu gikan sa ilang mga lawas ingon sa usa ka ulipon” (Doktrina ug mga Pakigsaad 138:50). Hunahunaa kon unsa ka importante ang Pagkabanhaw ngadto sa plano sa Dios alang sa Iyang mga anak.

Sa iyang sulat ngadto sa mga Santos nga taga-Corinto, si Apostol Pablo mitudlo nga kon si Jesukristo wala pa mabanhaw gikan sa mga patay, “kawang lamang ang among giwali ug kawang usab ang inyong pagtuo” (1 Mga Taga-Corinto 15:14).

icon, pagtuon

Pagtuon agi og Pagpangandam alang sa Klase

Basaha ang 1 Mga Taga-Corinto 15:17–22 ug 2 Nephi 9:8–9 ug hunahunaa kon unsa kaha ang mahitabo kanato kon si Jesukristo wala mabanhaw.

Jesus Appearing to the Five Hundred [Si Jesus Nagpakita sa Lima Ka Gatos], ni Grant Romney Clawson

Si Elder D. Todd Christofferson sa Korum sa Napulog Duha ka Apostoles nagtabang nato nga masabtan ang pipila ka dugang nga doktrinal nga mga pagpasabot bahin sa Pagkabanhaw:

Elder D. Todd Christofferson

Hunahunaa sa makadiyot ang kamahinungdanon sa Pagkabanhaw sa pagsulbad gay[o]d sa tinuod nga pagkatawo ni Jesus sa Nazaret ug sa dagkong pilosopikanhong panagbangi ug mga pangutana sa kinabuhi. Kon si Jesus tinuod gay[o]d nga nabanhaw, mosunod dayon niini nga Siya usa ka balaanong binuhat. Walay mortal nga tawo nga dunay gah[o]m sa iyang kaugalingon nga mabuhi og balik human mamatay. Tungod kay Siya nabanhaw, si Jesus dili mahimong usa lang ka panday, magtutudlo, rabbi, o propeta. Tungod kay Siya nabanhaw, si Jesus usa gay[o]d ka Dios, gani ang Bugtong Anak sa Amahan.

Busa, unsay Iyang gitudlo tinuod; ang Dios dili magbakak.

Busa, Siya ang Tiglalang sa yuta, sama sa Iyang gisulti.

Busa, ang langit ug ang impyerno tinuod, sama sa Iyang gitudlo.

Busa, dunay usa ka kalib[o]tan sa mga espiritu, nga Iyang gibisita human sa Iyang kamatayon.

Busa, moanhi Siya pag-usab, sama sa giingon sa mga anghel, ug “mohari dinhi sa yuta” [Mga Artikulo sa Hugot nga Pagtuo 1:10.

Busa, dunay pagkabanhaw ug katap[o]sang paghukom alang sa tanan. (“Ang Pagkabanhaw ni Jesukristo,” Liahona, Mayo 2014, 113)

He Lives [Siya Buhi], ni Simon Dewey

Nagtan-aw sa Pagkabanhaw sa Manluluwas gikan sa usa ka mahangtorong panglantaw, si Presidente Ezra Taft Benson mitudlo:

Presidente Ezra Taft Benson

Ang labing dako nga panghitabo sa kasaysayan mao kadtong nakaapekto sa labing daghan nga bahin sa katawhan sulod sa labing taas nga mga panahon. Pinaagi niini nga sumbanan, walay hitabo nga mas importante ngadto sa mga indibidwal o mga nasod kaysa Pagkabanhaw sa Agalon. (“The Meaning of Easter,” Ensign, Abr. 1992, 2)

icon, pamalandong

Pamalandong agi og Pagpangandam alang sa Klase

Naghunahuna sa kaimportante sa Pagkabanhaw ni Jesukristo, unsay imong buhaton aron mapalig-on ang imong pagsabot ug pagpamatuod bahin niini?

Seksiyon 3

Sa unsang paagi nga ang pagpamatuod bahin sa Pagkabanhaw makahatag nako og kalinaw ug paglaom?

Hunahunaa ang mahitungod sa pisikal nga mga hagit nga giatubang nimo o sa mga tawo nga suod nimo. Hunahunaa ang mahitungod sa mga sakop sa pamilya o suod nga mga higala nga namatay na. Si Elder Paul V. Johnson sa Seventy mihatag sa mosunod nga panglantaw mahitungod niining lisod nga mortal nga mga kasinatian:

Elder Paul V. Johnson

Ang matag usa kanato adunay pisikal, mental ug emosyonal nga mga limitasyon ug mga kahuyang. Kini nga mga hagit, diin ang pipila daw dili malupig karon, sa kataposan mahimong masulbad ra. Walay usa niining mga problema moabot nato human kita mabanhaw. …

… Ang milagro sa pagkabanhaw, ang labing mahinungdanon nga tambal, labaw pa sa gahom sa modernong medisina. Apan dili kini molabaw sa gahom sa Dios. …

… Alang sa tanang milubong og bata sa lubnganan o nagbakho tungod sa lungon sa kapikas o naguol sa kamatayon sa ginikanan o sa usa ka tawo nga ilang gihigugma, ang Pagkabanhaw tinubdan sa dakong paglaom. Pagkagamhanan nga kasinatian nga makita sila pag-usab—dili lang isip espiritu apan sa nabanhaw nga lawas. (“Ug Wala Nay Kamatayon,” Liahona, Mayo 2016, 122, 123)

mga kamot sa Manluluwas nga nagtuyhad ngadto sa usa ka babaye

Isip nakakita sa nabanhaw nga Kristo, si Apostol Pablo nalipay sa kadaogan sa Manluluwas batok sa kamatayon.

icon, pagtuon

Pagtuon agi og Pagpangandam alang sa Klase

Basaha ang 1 Mga Taga-Corinto 15:53–55, ug hunahunaa kon sa unsang paagi nga ang pagsalig diha sa Pagkabanhaw sa Manluluwas makakuha sa ikot sa kamatayon.

Hinumdomi: Ang pulong nga “dili madunot” dinhi nagpasabot nga ang atong lawas dili na madugta o mamatay.

icon, buhaton

Buhaton

Unsaon nimo paggamit ang imong nakat-onan mahitungod sa Pagkabanhaw aron mapalig-on ang imong pagpamatuod? Kinsay imong nailhan nga mahimong mapanalanginan pinaagi sa pagpaminaw sa imong mga hunahuna ug mga pagbati mahitungod sa Pagkabanhaw sa Manluluwas? Ikonsiderar ang pagpaambit sa unsay imong hunahuna ug gibati ngadto niana nga tawo.

Gusto pa og Dugang? (Opsiyonal)

Asa diha sa mga kasulatan nga ako makakat-on pa og dugang mahitungod sa Pagkabanhaw?

Ang Basahon ni Mormon naghatag og importanting doktrinal nga mga ideya mahitungod sa Pagkabanhaw diha sa mosunod nga mga tudling: 2 Nephi 9:6, 11–13, 22; Mosiah 15:20–26; Alma 11:43–45; 41:2–4; Helaman 14:15–17, 25.

Basaha ang Doktrina ug mga Pakigsaad 88:95–116 aron makakat-on sa han-ay sa Pagkabanhaw.

Unsay gitudlo sa mga lider sa Simbahan mahitungod sa Pagkabanhaw ni Jesukristo?

Adto sa “pagkabanhaw” diha sa pahina sa Mga Hilisgotan sa Kinatibuk-ang Komperensiya aron makita kon unsay bag-ohay lang nga gisulti sa mga lider sa Simbahan mahitungod sa Pagkabanhaw.

Sa unsang paagi nga ang usa ka pagpamatuod bahin sa pagkabanhaw naghatag og paglaom sa uban?

Sister Reyna I. Aburto

Sa pakigpulong nga “Ang Lubnganan Walay Kadaogan” (Liahona, Mayo 2021, 85–86), si Sister Reyna I. Aburto, usa ka magtatambag sa Kinatibuk-ang Kapangulohan sa Relief Society, mipamatuod kon sa unsang paagi nga ang Pagkabanhaw ni Jesukristo makahatag kanato og paglaom.