“Leksiyon 22 Materyal sa Pagpangandam sa Klase: Pag-apil uban ni Jesukristo sa Nagpadayon nga Pagpahiuli,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 22 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Leksiyon 22 Materyal sa Pagpangandam sa Klase
Pag-apil uban ni Jesukristo sa Nagpadayon nga Pagpahiuli
Nakahunahuna ka ba kon nganong ang Langitnong Amahan mipadala nimo dinhi sa yuta niining panahona? Si Presidente Dieter F. Uchtdorf, kanhi magtatambag sa Unang Kapangulohan, mitudlo nga ang Pagpahiuli nagpadayon sa atong panahon karon ug kita nagpuyo sa “usa sa labing talagsaon nga panahon sa kasaysayan sa kalibotan!” (“Wala Ba Kamo Nalambigit sa Buhat sa Pagpahiuli?,” Liahona, Mayo 2014, 59). Ang Manluluwas nagpadayon sa aktibong pagdumala sa Iyang Simbahan ug sa pagtrabaho alang sa kaluwasan sa tanan dinhi sa yuta. Samtang magtuon ka niini nga leksiyon, hunahunaa kon sa unsang paagi nga makaapil ka uban Kaniya sa Iyang mahinungdanon nga buhat.
Seksiyon 1
Unsa ang akong bahin sa nagpadayon nga Pagpahiuli?
Pinaagi ni Propeta Joseph Smith, ang Ginoo mipahiuli sa Iyang ebanghelyo ug giestablisar pag-usab ang Iyang “tinuod ug buhi nga simbahan” dinhi sa yuta (Doktrina ug mga Pakigsaad 1:30). Si Elder LeGrand R. Curtis Jr. sa Seventy miingon:
Bisan nindot kaayo ang mga butang nga gipadayag sa Dios pinaagi ni Joseph Smith, ang Pagpahiuli wala makompleto sa panahon ni Joseph. Pinaagi sa mga propeta pagkahuman niya atong nadawat ang mga butang nga sama sa nagpadayon nga paglambo sa buhat sa templo; dugang nga mga kasulatan; paghubad sa mga kasulatan ngadto sa daghang pinulongan; pagdala sa ebanghelyo ngadto sa tibuok kalibotan; [ug] ang pag-organisar sa Sunday School, Young Women, Primary, ug mga korum sa pagkapari. …
“Mga saksi kita sa proseso sa pagpahiuli,” miingon si Presidente Russell M. Nelson. “Kon maghunahuna kamo nga hingpit na nga napahiuli ang Simbahan, ang sinugdanan pa lamang ang inyong nakita. Daghan pa kaayo ang moabot.” (“Ang Nagpadayon nga Pagpahiuli,” Liahona, Abr. 2020, 21)
Samtang ang Ginoo padayon nga nagpadayag sa Iyang buhat, importante nga ang matag usa nato maghunahuna kon sa unsang paagi nga kita makaapil. Si Presidente Uchtdorf nangutana:
Kon mahuman na ang atong panahon sa mortalidad, unsa nga mga kasinatian ang atong mapakigbahin kalabot sa atong kaugalingong kontribusyon niining importante nga panahon sa atong kinabuhi ug sa pagpalambo sa buhat sa Ginoo? …
Dako kaayo ang peligro alang kanato isip mga indibidwal, isip mga pamilya, ug isip Simbahan ni Kristo sa dili paghatag og kinasingkasing nga paningkamot niining sagrado nga buhat.
Ang pagkadisipulo ni Jesukristo dili usa ka paningkamot nga kausa lang sa usa ka semana o kausa sa usa ka adlaw. …
Kinahanglan kitang magmata ug dili maluya diha sa maayo nga buhat, kay kita “nagpahimutang sa tukuranan sa usa ka mahinungdanon nga buhat [Doktrina ug mga Pakigsaad 64:33],” gani mangandam alang sa pagbalik sa Manluluwas. (“Wala Ba Kamo Nalambigit sa Buhat sa Pagpahiuli?,” Liahona, Mayo 2014, 59, 62)
Pamalandong agi og Pagpangandam alang sa Klase
Paghunahuna og bag-ong mga pagtulun-an gikan sa mga lider sa Simbahan, giusab nga palisiya sa Simbahan, o kinatibuk-ang mga pahibalo sa Simbahan nga may kalabotan sa nagpadayon nga Pagpahiuli. Ikonsiderar ang mga butang nga gitudlo diha sa kinatibuk-ang komperensiya, nga gi-post diha sa website sa Simbahan (ChurchofJesusChrist.org), o gipahibalo diha sa Church’s Newsroom (newsroom.ChurchofJesusChrist.org). Unsay ipasabot niini nga mga pagtulun-an o mga kausaban alang nimo?
Seksiyon 2
Sa unsang paagi nga ako makaapil sa nagpadayon nga Pagpahiuli?
Si Presidente Nelson mitudlo nga ang usa ka paagi nga makaapil kita sa Pagpahiuli mao ang pagtabang sa pagpundok sa Israel. Miingon Siya:
Kana nga panagpundok mao ang labing importanting butang nga nahitabo sa yuta karon. Wala nay laing ikatandi sa gidak-on niini, wala nay ikatandi sa kaimportante, wala nay ikatandi sa kahalangdon. …
… Gusto ba ninyong mahimong dakong parte sa labing dako nga hagit, sa labing dako nga kawsa, ug sa labing dako nga buhat sa yuta karon?
Gusto ba ninyong motabang sa pagpundok sa Israel niining bililhong ulahing mga adlaw? Andam ba kamo, kinsa mga pinili, nga motabang sa pagpangita sa mga pinili kinsa wala makadungog sa mensahe sa gipahiuli nga ebanghelyo? (Russell M. Nelson ug Wendy Nelson, “Paglaom sa Israel” [tibuok kalibotan nga debosyonal sa kabatan-onan, Hunyo 3, 2018], dugang ngadto sa New Era ug Ensign, 8, ChurchofJesusChrist.org)
Ang pagpundok sa Israel mahinungdanon kaayo tungod kay pinaagi niini ang mga panalangin nga gisaad ngadto sa mga kaliwatan nila ni Abraham, Isaac, ug Jacob madawat sa tanang katawhan (tan-awa sa Genesis 26:3–4; 35:11–12; Abraham 2:8–11).
Sa karaang panahon, ang balay sa Israel, mga tawo sa pakigsaad, mipakyas sa ilang mga pakigsaad ug misalikway sa Ginoo. Sila nagkatibulaag “taliwala sa tanan nga mga kanasoran” (1 Nephi 22:3; tan-awa usab sa mga bersikulo 4–5). Bisan pa man, ang mga propeta nanagna nga sa ulahing mga adlaw ang Ginoo maghimo og usa ka “kahibulongan nga buhat” (1 Nephi 22:8) taliwala sa Israel ug sa tanang lumulupyo sa yuta. Iyang pundokan ang nagkatibulaag nga Israel ug ipaila ang Iyang mga pakigsaad (tan-awa sa 1 Nephi 15:12–16; 22:8–10).
Pagtuon agi og Pagpangandam alang sa Klase
Basaha ang 1 Nephi 22:11–12, ug pangitaa kon sa unsang paagi nga ang pagpundok sa Israel makapanalangin sa tanang katawhan.
Si Presidente Nelson misulti usab bahin sa pagpundok sa Israel:
Ang pagpundok sa Israel dili mao ang kataposan. Kini mao lamang ang sinugdanan. Ang tumong nga atong gitinguha sa paglahutay naglakip sa mga ordinansa sa endowment ug pagbugkos diha sa templo. Naglakip kini sa atong pagsulod sa relasyon sa pakigsaad sa Dios pinaagi sa kaliwat o sa pagsagop ug dayon magpuyo uban Kaniya ug sa atong mga pamilya sa kahangtoran. Mao kana ang himaya sa Dios—kinabuhing dayon alang sa Iyang mga anak. (“Ang Basahon ni Mormon, ang Pagpundok sa Israel, ug ang Ikaduhang Pag-anhi,” Liahona, Hulyo 2014, 31)
Samtang maghunahuna ka sa kalapad sa pagpundok sa Israel, tingali maghunahuna ka kon sa unsang paagi kaha nga makaapil ka. Si Presidente Nelson mipasabot, “Bisan kanus-a nga mobuhat kita og bisan unsa sa pagtabang ni bisan kinsa—sa matag habig sa tabil—sa paghimo ug pagtuman sa ilang mga pakigsaad sa Dios, nagtabang kita sa pagpundok sa Israel” (“Ipatigbabaw ang Dios Labaw sa Tanan,” Liahona, Nob. 2020, 92–93).
Si Presidente Bonnie H. Cordon sa Kinatibuk-ang Kapangulohan sa Young Women mitudlo kon unsaon nimo pagdiskobre sa imong bahin diha sa pagpundok:
Mainampoong mangutana sa Langitnong Amahan kon unsay imong buhaton aron mahimong kabahin niini nga pagpundok, pagdala sa uban ngadto kang Kristo. Isulat ang imong mga hunahuna, ug dayon magmaisogon ug lihokon kini! Ang mga posibilidad managlahi ingon nga kita managlahi. Mapasalamaton ko alang sa usa ka propeta nga naghagit kanato sa pagsaka ngadto sa mas taas nga ang-ang. (Facebook, Hunyo 3, 2018, facebook.com/YWPresident)
Irekord ang Imong mga Hunahuna
Mainampoong maghunahuna og usa o duha ka paagi nga ikaw makatabang sa pagpundok sa Israel. Paghimo ug pagrekord og usa ka plano aron lihokon ang imong mga hunahuna.
Seksiyon 3
Makahimo ba gayod ako og kalainan?
Usahay mobati ka nga dili angayan samtang naningkamot ka sa paghimo sa buhat sa Ginoo. Kon ikaw mobati niini nga paagi, importanting hinumdoman nga wala ka mag-inusara sa paghimo sa Iyang buhat.
Diha sa sambingay sa mga kahoy nga oliba, si propeta Zenos mitandi sa ubasan ngadto sa kalibotan. Ang balay sa Israel girepresentahan sa usa ka maayong kahoy nga oliba, ug ang mga Hentil girepresentahan sa ihalas nga mga kahoy nga oliba. Sa duol na sa kataposan sa istorya, ang Ginoo sa ubasan, si Jesukristo, mibuhat sa tanan kutob sa Iyang mahimo aron sa pagtabang sa tanang kahoy nga magmabungahon (tan-awa sa Jacob 5:47).
Pagtuon agi og Pagpangandam alang sa Klase
Basaha og maayo ang Jacob 5:70–72, ug pangitaa ang relasyon tali sa Ginoo ug sa Iyang mga sulugoon samtang nagtrabaho sila sa ubasan.
Hunahunaa kon unsay ipasabot alang nimo nga motrabaho uban sa Ginoo. Ngadto sa mga Santos sa ulahing mga adlaw, ang Manluluwas miingon: “Ug kinsa kadto nga modawat kaninyo, didto atua usab Ako, kay Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libot kaninyo, aron sa pagtabang kaninyo” (Doktrina ug mga Pakigsaad 84:88).
Si Elder Kim B. Clark, samtang nagserbisyo isip usa ka sakop sa Seventy, misulti bahin sa suporta sa Manluluwas:
Palihog hinumdomi kini nga mga pulong sa Manluluwas: “Ako dili magainusara kay ang Amahan ania man kanako” [Juan 16:32]. Mao usab kita. Wala kita mag-inusara. Si Ginoong Jesukristo ug ang atong Langitnong Amahan nahigugma kanato, ug sila ania uban kanato. Tungod kay si Jesus nagtan-aw sa Iyang Amahan ug mikompleto sa mahinungdanong sakripisyo sa pag-ula, kita makatan-aw ngadto ni Jesukristo uban sa kasiguroan nga Siya motabang kanato. (“Tan-aw ngadto ni Jesukristo,” Liahona, Mayo 2019, 56)
Paghisgot agi og Pagpangandam alang sa Klase
Paghunahuna og usa ka higayon nga mibati ka nga ang Ginoo maitabang nimo samtang naghimo ka sa Iyang buhat. Ikonsiderar usab ang pagpangutana sa usa ka sakop sa pamilya o higala sa pagpaambit og ehemplo gikan sa iyang kinabuhi. Moadto sa klase nga andam sa pagpaambit.