“Leksiyon 28 Materyal sa Pagpangandam sa Klase: Pagbarog isip mga Saksi ni Jesukristo,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 28 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Leksiyon 28 Materyal sa Pagpangandam sa Klase
Pagbarog isip mga Saksi ni Jesukristo
Sa unsang paagi nga ang inyong pagpamatuod ni Jesukristo na-impluwensya pinaagi sa pag-apil niini nga kurso? Unsay inyong nakat-onan gikan sa Espiritu Santo samtang kamo naglihok diha sa hugot nga pagtuo pinaagi sa pagtuon sa materyal sa pagpangandam, pag-apil sa mga panaghisgotan sa klase, ug sa pagtubag ngadto sa espirituhanong mga pag-aghat? Samtang kamo mangandam alang sa inyong kataposang klase, palandonga kon unsay kahulogan sa pagbarog isip usa ka saksi ni Jesukristo (tan-awa sa Mosiah 18:9).
Seksiyon 1
Unsaon nako pagpalig-on ang akong pagpamatuod sa Manluluwas?
Samtang kamo maghunahuna mahitungod sa inyong pagpamatuod ni Jesukristo, ibutang sa hunahuna nga kita tagsatagsa makaangkon og usa ka pagpamatuod sa personal nga paagi. Si Presidente Dieter F. Uchtdorf, nga kanhi magtatambag sa Unang Kapangulohan, mitudlo:
Dunay ubang mga miyembro sa Simbahan kansang pagpamatuod sigurado ug nagdilaab gayod sulod kanila. Ang uban naningkamot pa nga mahibalo sa ilang kaugalingon. Ang Simbahan usa ka panimalay aron mag-abot ang tanan, sa walay pagtagad sa kadako o kataas sa atong pagpamatuod. (“Pagdawat og Usa ka Pagpamatuod sa Kahayag ug Kamatuoran,” Liahona, Nob. 2014, 22)
Kon gibati ninyo ang walay kasigurohan sa inyong pagpamatuod sa Manluluwas o gibati nga kini dili kaayo lig-on, hinumdomi nga ang “pagpamatuod nagtubo sa inanay pinaagi sa mga kasinatian. Walay usa nga nakadawat og hingpit nga pagpamatuod dihadiha dayon” (Gospel Topics, “Pagpamatuod,” topics.ChurchofJesusChrist.org).
Hinumdomi ang kasinatian ni Alma nga Batan-on. Isip usa ka batan-ong lalaki siya milibot naningkamot aron sa paglaglag sa Simbahan sa Ginoo. Human ang usa ka anghel mipakita ngadto kaniya, mihinulsol siya ug mipili sa pagsunod ni Jesukristo (tan-awa sa Mosiah 27:8–24). Samtang kining pagpakita sa tinuod mi-impluwensya ni Alma, dili kini ang pundasyon nga tinubdan sa iyang pagpamatuod. Sa kaulahian sa iyang kinabuhi, samtang nagtudlo sa katawhan diha sa yuta sa Zarahemla, mipakigbahin si Alma kon giunsa niya pagbaton og pagpamatuod ni Jesukristo.
Pagtuon agi og Pagpangandam alang sa Klase
Basaha ang Alma 5:46–48, ug pangitaa ang tinubdan sa pagpamatuod ni Alma.
Samtang kamo naghunahuna sa inyong pagpamatuod, paglipay sa unsay inyong nahibaloan, gilaoman, o gituohan mahitungod sa Manluluwas. Dayon hunahunaa sa mainampoong paagi kon unsay inyong mahimo sa pagtukod diha niana nga pundasyon, hangtod kini mahimong usa ka siguradong saksi. Si Elder Uchtdorf mitudlo:
Ang tinubdan niining sigurado nga kahibalo ug lig-ong pagtuo mao ang balaanong pagpadayag, “kay ang pagpanghimatuod ni Jesus mao man ang espiritu sa propesiya” (Pinadayag 19:10).
Atong madawat kini nga pagpamatuod kon ang Espiritu Santo nagsulti ngadto sa espiritu nga anaa kanato. Madawat nato ang usa ka malinawon ug walay pagduhaduha nga kasiguroan nga maoy mahimong tinubdan sa atong pagpamatuod ug lig-on nga pagtuo nga dili magsapayan sa atong kultura, kaliwat, pinulongan, o sa sosyo-ekonomikanhon nga kahimtang. Kini nga mga pag-aghat sa Espiritu, imbis nga tawhanong pangatarongan lamang, mao ang mahimong tinuod nga pundasyon diha diin ang atong pagpamatuod matukod.
Ang kinauyokan niini nga pagpamatuod kanunay mao ang hugot nga pagtuo ug ang kahibalo kabahin ni Jesukristo ug sa Iyang balaanong misyon, kinsa diha sa mga kasulatan misulti mahitungod sa Iyang Kaugalingon, “Ako mao ang dalan, ang kamatuoran, ug ang kinabuhi” (Juan 14:6). (“Ang Gahom sa Personal nga Pagpamatuod,” Liahona, Nob. 2006, 38)
Paghisgot agi og Pagpangandam alang sa Klase
Paghisgot uban sa usa ka tawo kinsa nagtuo ni Jesukristo kon giunsa sa matag unsa kaninyo sa pag-angkon sa inyong pagpamatuod sa Manluluwas. Kon gibati ninyo ang pagduhaduha diha sa inyong kasingkasing mahitungod sa inyong gituohan tutok diha sa unsay inyong tinguha nga mahibaloan mahitungod sa Manluluwas ug paghisgot kon unsaon niining yano nga tinguha makagiya ngadto sa nagtubo nga hugot nga pagtuo ug pagpamatuod (tan-awa sa Alma 32:27–28).
Seksiyon 2
Unsaon sa akong pagpamatuod ni Jesukristo pagpanalangin sa uban?
Paghunahuna mahitungod sa imong pagpamatuod ni Jesukristo. Ang inyo bang mga higala, pamilya, ug uban nga inyong gikauban nahibalo kon unsay inyong gibati mahitungod Kaniya? Andam ba kamo sa pagtubag og mga pangutana mahitungod sa Manluluwas uban sa hugot nga pagtuo ug pagpamatuod? (tan-awa sa 1 Pedro 3:15). Nadapit ba ninyo ang uban sa pag-anha ug pagkat-on ni Jesukristo alang sa ilang mga kaugalingon? (tan-awa sa Juan 1:39).
Samtang kamo naghunahuna mahitungod sa impluwensya sa inyong pagpamatuod ni Jesukristo diha sa uban, hunahunaa ang mosunod nga tambag gikan ni Elder Neil L. Andersen sa Korum sa Napulog Duha ka Apostoles:
Uban niadtong anaa sa atong palibot, mas magmatinuoron kita, mas andam nga maghisgot bahin ni Kristo. Si Presidente [Russell M.] Nelson miingon, “Ang tinuod nga mga disipulo ni Jesukristo andam nga mobarog, motingog, ug magpalahi gikan sa mga tawo sa kalibotan.” …
… Mabination natong saksihan ang atong pagtuo diha kang Kristo. Kon dunay mopaambit og problema sa iyang personal nga kinabuhi, mahimong moingon kita, “John, Mary, kahibalo mo nga nagtuo ko ni Jesukristo. Naghunahuna ko og butang nga Iyang gisulti nga makatabang ninyo.”
Pagmadayganon diha sa social media sa paghisgot sa inyong pagsalig kang Kristo. …
Ang pipila sa atong isig ka mga Kristiyano, usahay, nagduhaduha sa atong gituohan ug mga motibo. Magmaya kita sa tinud-anay uban kanila sa atong giambitan nga pagtuo kang Jesukristo ug sa mga kasulatan sa Bag-ong Tugon nga ganahan natong tanan. …
Samtang ang kalibotan maghisgot og gamay ni Jesukristo, maghisgot kita og daghan bahin Kaniya. Samtang ang atong tinuod nga kinaiya isip Iyang mga disipulo mapadayag, daghan sa naglibot nato ang maandam sa pagpaminaw. Samtang kita mopaambit sa kahayag nga atong nadawat gikan Kaniya, ang Iyang kahayag ug ang Iyang balaan nga makaluwas nga gahom modan-ag niadtong andam nga moabli sa ilang mga kasingkasing. (“Kita Naghisgot kang Kristo,” Liahona, Nob. 2020, 90)
Irekord ang Inyong mga Hunahuna
Pagpili og usa sa mga sugyot sa ubos aron sa pagtabang kaninyo sa pagpalandong ug paghatag og bili kon giunsa sa inyong pagpamatuod ni Jesukristo ug sa Iyang mahangturong ebanghelyo pagtubo atol niini nga kurso. Adto sa klase nga andam mopakigbahin sa inyong kasinatian.
-
Basaha ang “Ang Buhi nga Kristo: Ang Pagpamatuod sa mga Apostoles” (sa https://www.churchofjesuschrist.org/study/scriptures/the-living-christ-the-testimony-of-the-apostles/the-living-christ-the-testimony-of-the-apostles?lang=ceb), ug hunahunaa kon giunsa sa inyong pagpamatuod sa Manluluwas pagtubo. Isulat ang inyong pagpamatuod ni Jesukristo o ang inyong mga hunahuna o mga pagbati mahitungod Kaniya.
-
Kon inyong namemorya ang “Ang Buhi nga Kristo,” irekord kon giunsa niini nga paningkamot pag-impluwensya sa inyong pagsabot ug pagpamatuod sa Manluluwas.
-
Basaha ang 3 Nephi 27:13–21, ug palandonga kon unsay kahulogan sa ebanghelyo sa Ginoo nganha kaninyo. Irekord kon sa unsang paagi ang pagpaningkamot sa pagpuyo sa Iyang ebanghelyo nagpausab sa inyong kinabuhi.
-
Rebyoha ang talaan sa mga sulod alang niini nga manwal ug ilha ang leksiyon nga dihay labing dako nga impluwensya nganha kaninyo. Rebyoha ang materyal sa pagpangandam alang niana nga leksiyon, ug irekord kon nganong kini mihimo og ingon nga kalainan sa inyong kinabuhi.
-
Paghunahuna mahitungod kon sa unsang paagi kamo nahimong mas nahisama sa Manluluwas samtang kamo migamit kon unsay inyong gibati ug nakat-onan atol niini nga kurso. Irekord ang mga kausaban nga inyong nakita sa inyong kinabuhi.
-
Pagpili og usa o daghan pa nga mga tudling sa kasulatan mahitungod ni Jesukristo nga nagdugang sa inyong pagsabot ug pagpamatuod Kaniya. Irekord kon unsay inyong nakat-onan gikan niini nga mga kasulatan ug unsa nga kalainan kini naghimo sa inyong kinabuhi.
-
Pagpili og himno o awit mahitungod sa Manluluwas nga nagpahayag sa inyong pagpamatuod Kaniya. Irekord ang mga hunahuna ug mga pagbati nga gidala niini nga himno o awit ngadto sa inyong hunahuna ug kasingkasing.
-
Pagsulat og sulat nga pasalamat ngadto sa Manluluwas. Irekord kon unsay inyong pagbati mahitungod sa Iyang kinabuhi ug unsay Iyang kahulogan diha kaninyo. Kon ikaw mahilig sa art, makadrowing ka og usa ka hulagway nga makasikop sa inyong mga pagbati alang sa Manluluwas ug ipakigbahin kini ngadto sa inyong klase.