Leksiyon 21 Materyal sa Pagpangandam sa Klase: Pagpaminaw sa Tingog sa Ginoo sa Ulahing mga Adlaw
“Leksiyon 21 Materyal sa Pagpangandam sa Klase: Pagpaminaw sa Tingog sa Ginoo sa Ulahing mga Adlaw,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 21 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Imahe
malipayon nga young adult
Leksiyon 21 Materyal sa Pagpangandam sa Klase
Pagpaminaw sa Tingog sa Ginoo sa Ulahing mga Adlaw
Daghang mga tawo ang naghunahuna kon ang Dios nagpadayon ba sa pagpakigsulti kanato. Usahay tingali maghunahuna ka kon Siya makigsulti ba kanimo. Tungod sa atong kahibalo bahin sa Pagpahiuli, kita makasinggit og kusog nga “Oo!” Ang Ginoo nagpadayon sa paggiya kanato samtang kita magkat-on sa pagpaminaw Kaniya. Samtang magtuon ka niini nga leksiyon, tan-awa kon sa unsang paagi nga si Joseph Smith ug ang uban sa atong panahon karon nagkat-on sa pag-ila sa tingog sa Manluluwas. Paggahin og panahon sa pagpalambo sa imong kapasidad sa pagpaminaw Kaniya diha sa imong kaugalingong kinabuhi.
Seksiyon 1
Sa unsang paagi nga ang pagpamatuod ni Propeta Joseph Smith makatabang kanako nga mas maminaw ug makaila ni Jesukristo?
Sa iyang kabatan-on, si Joseph Smith nabalaka gayod mahitungod sa kaayohan sa iyang kalag ug kon asa siya nga simbahan moapil. Ang “kalibog ug kagubot taliwala sa nagkalain-lain nga mga tinuohan” diha sa iyang komunidad ang hinungdan nga dili siya sigurado “kinsa ang tinuod ug kinsa ang sayop” (tan-awa sa Joseph Smith—Kasaysayan 1:8–10).
Nadasig sa tambag diha sa Biblia nga “mangutana sa Dios” (Santiago 1:5), si Joseph miadto sa kakahoyan aron mag-ampo. Agi og tubag, siya nakadawat og usa ka mahimayaong panan-awon. Si Joseph miingon, “Ako nakakita og usa ka dako nga gilis sa kahayag ibabaw gayod sa akong ulo, labaw sa kahayag sa adlaw, nga nag-anam og paubos hangtod kini midapat kanako. … Ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan, ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).
Si Presidente Gordon B. Hinckley mihisgot bahin sa pagsaksi ni Joseph Smith sa Manluluwas:
Imahe
Presidente Gordon B. Hinckley
Siya mao ang sulugoon sa Ginoo sa ulahing mga adlaw nga gipili aron mohatag og bag-ong pagsaksi bahin sa nabanhaw nga Kristo.
Ngadto sa kalibotan nga napuno sa pagduhaduha mahitungod sa katinuod sa Pagkabanhaw, si Joseph Smith mipamatuod sa walay pagduhaduha bahin sa nabanhaw, buhi nga Kristo. … Si Propeta Joseph Smith usa ka dili hitupngan nga saksi sa buhi nga Kristo. (“What Hath God Wrought through His Servant Joseph!,” Ensign, Ene. 1997, 2)
Imahe
icon, pamalandong
Pamalandong agi og Pagpangandam alang sa Klase
Sa imong hunahuna unsay nakapahimo ni Joseph Smith nga “usa ka dili hitupngan nga saksi sa buhi nga Kristo”? (Ang dili hitupngan nagpasabot nga labaw sa tanan.) Sa unsang paagi nga ang pagsaksi ni Joseph sa Manluluwas nakaimpluwensya sa imong pagpamatuod? Kon mibati ka nga dili sigurado mahitungod sa imong pagpamatuod ni Jesukristo, sa unsang paagi nga ang mainampoong pagtuon sa mga pagpadayag ni Joseph Smith makatabang nga mapalig-on ang imong hugot nga pagtuo? (tan-awa sa D. Todd Christofferson, “3 Ways Joseph Smith Reveals Jesus Christ to Us,” New Era, Mar. 2020, 2–5).
Seksiyon 2
Sa unsang paagi nga akong mapalambo ang akong kapasidad sa pagpaminaw sa tingog sa Ginoo?
Hinumdomi ang unang mga pulong sa Langitnong Amahan ngadto ni Joseph, “Kini mao ang Akong Hinugugmang Anak. Paminaw Kaniya!” (Joseph Smith—Kasaysayan 1:17). Si Presidente Russell M. Nelson miingon, “Niining duha ka pulong—“Paminaw Kaniya”—Ang Dios mihatag nato og sundanan alang sa kalamposan, ug hingpit nga kalipay niini nga kinabuhi” (“Paminaw Kaniya,” Liahona, Mayo 2020, 89).
Dili gayod sayon sa kanunay ang pag-ila kon ang Ginoo nakigsulti ba kanato. Si Joseph Smith ug ang unang mga lider sa Simbahan nagkat-on kon unsaon sa pag-ila sa Iyang tingog. Apan sa mahigugmaong paagi, ang Manluluwas mitudlo nila—ug motudlo nato—samtang kita magtinguha sa pagpaminaw Kaniya.
Samtang nagpuyo (nag-abang og lawak) sa panimalay ni Joseph Smith Sr., si Oliver Cowdery nakahibalo mahitungod sa buhat sa Propeta. Si Oliver nag-ampo mahitungod niini ug napuno sa kalinaw mahitungod sa unsay iyang nadunggan.
Bisan kon siya mipili sa pagbiyahe og 300 ka milya (mga 480 km) aron motabang sa Propeta, si Oliver walay usa nga gisultihan mahitungod sa iyang kasinatian samtang nag-ampo. Human sa paggahin og pipila ka adlaw isip tigsulat ni Joseph alang sa hubad sa Basahon Mormon, si Oliver aduna pay mga pangutana. Sama sa kadaghanan kanato, tingali naghunahuna siya kon ang iyang mga hunahuna o mga pagbati naggikan ba gayod sa Dios o sa iyang kaugalingon lamang. Si Joseph nakadawat og pagpadayag alang ni Oliver nga nagtudlo niya og matam-is nga kamatuoran mahitungod sa pagpaminaw sa tingog sa Ginoo.
Sama ni Oliver, ikaw mahimong mas makaila sa tingog sa Ginoo diha sa imong kinabuhi. Apan asa man kita moadto aron maminaw Kaniya? Si Presidente Nelson mihulagway sa pipila ka tinubdan diin kita makapaminaw sa tingog sa Ginoo:
Imahe
Presidente Russell M. Nelson
Kita makaadto sa mga kasulatan. … Samtang kita magbusog sa mga pulong ni Kristo matag adlaw, ang mga pulong ni Kristo mosulti kanato unsaon sa pag-atubang ang mga kalisod nga wala nato damha nga atong atubangon.
Kita usab [maka]paminaw Kaniya diha sa templo. … Didto kita makakat-on unsaon sa pag-abli sa tabil ug makigsulti sa langit sa mas klaro. …
Kita usab [maka]paminaw Kaniya nga mas klaro kon atong hashasan ang atong abilidad sa pag-ila sa mga hung-hong sa Espiritu Santo. …
… Kita [maka]paminaw Kaniya samtang kita mopatalinghog sa mga pulong sa mga propeta, mga manalagna, ug mga tigpadayag. Ang naordinahan nga mga Apostoles ni Jesukristo kanunay nga nagpamatuod Kaniya. (“Paminaw Kaniya,” Liahona, Mayo 2020, 89–90)
Bisan kon kita makabasa sa mga pulong sa Manluluwas ug makapaminaw sa Iyang mga propeta, ang Iyang tingog dili mao kanang atong nailhan gamit ang atong pisikal nga mga pagbati. Ang Manluluwas misulti nila ni Joseph ug Oliver, “Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo. … Tan-awa, kini mao ang espiritu sa pagpadayag” (Doktrina ug mga Pakigsaad 8:2–3). Ang Espiritu mao ang paagi nga mapaabot ang tingog Ginoo ngari sa atong hunahuna ug kasingkasing. Hunahunaa kon unsay imong buhaton aron sa pagdapit sa Ginoo nga makigsulti nimo ug unsa dayon ang imong buhaton aron makadungog sa Iyang tingog.
Si Sister Michelle D. Craig, usa ka magtatambag sa Kinatibuk-ang Kapangulohan sa Young Women, mihatag og pipila ka sugyot nga makatabang nimo nga mapalambo ang imong kapasidad sa pagpaminaw sa Ginoo:
Imahe
Sister Michelle D. Craig
Himoa nga Intensyon ang Pagmugna og Panahon ug Dapit aron Madungog ang Tingog sa Dios
Samtang imong gamiton ang imong kabubut-on sa pagkulit og oras matag adlaw aron mahiduol sa tingog sa Dios, ilabi na diha sa Basahon ni Mormon, sa ngadto-ngadto ang Iyang tingog mas maklaro nimo ug mas mapamilyar. …
Si Satanas ganahan nga kita mahilayo gikan sa tingog sa Dios pinaagi sa pagpahilayo kanato gikan sa mga hilom nga dapit. …
Lihok sa walay Langay
Kon makadawat ka og mga pag-aghat ug molihok uban sa katuyoan, gamiton ka sa Ginoo. Kon daghan ang imong paglihok, mas masinati nimo ang tingog sa Espiritu. …
Pagkuha og Buluhaton gikan sa Ginoo
Ang pag-ampo nga gusto kaayong tubagon sa Langitnong Amahan mao ang atong pangamuyo nga magiyahan ngadto sa tawo nga atong tabanganan. …
Motuo ug Mosalig
… Isip Iyang matinud-anong mga disipulo, makadawat ikaw og personal nga inspirasyon ug pagpadayag, nga uyon sa Iyang mga sugo, nga gipahaom alang kanimo. (“Espirituhanong Kapasidad,” Liahona, Nob. 2019, 19, 20, 21)
Samtang mamalandong ka sa tambag nila ni Presidente Nelson ug Sister Craig, hunahunaa kon sa unsang paagi nga ang Ginoo sa kasaga makigsulti kanimo. Pagrekord og kasinatian nga imong nasinati sa pagpaminaw sa tingog sa Ginoo. Mahimo usab nimong paminawon ang pipila ka ehemplo kon giunsa sa mga lider sa Simbahan sa “Pagpaminaw Kaniya!” (ChurchofJesusChrist.org).