“Leksiyon 25 Materyal sa Pagpangandam sa Klase: Pagpaningkamot nga Mahimong usa ka Matinud-anong Disipulo ni Jesukristo,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 25 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Leksiyon 25 Materyal sa Pagpangandam sa Klase
Pagpaningkamot nga Mahimong usa ka Matinud-anong Disipulo ni Jesukristo
Matag adlaw, kita adunay oportunidad sa pagpasidungog sa atong pakigsaad sa bunyag pinaagi sa pagkatinuod nga disipulo ni Jesukristo. Ingon nga Iyang mga disipulo, kita nagpasalig sa pagsunod sa Manluluwas ug sa pagpuyo pinasubay sa Iyang mga pagtulon-an (tan-awa sa Doctrina ug mga Pakigsaad 41:5). Maayo gani, ang pagka-disipulo dili usa ka lumba o usa ka bangga. Hinoon kini usa ka tibuok kinabuhi nga panaw nga atong gihimo uban sa pag-abag ni Jesukristo ug sa ubang mga disipulo. (tan-awa sa Mosiah 18:8–10). Samtang inyong tun-an ang mga kamatuoran nga gitudlo dinhi niining kataposan nga yunit, hunahunaa ang tabang ug mga panalangin nga kamo makadawat samtang kamo nagtinguha nga magmatinud-anon nga disipulo ni Jesukristo.
Seksiyon 1
Unsa ang akong makat-onan mahitungod sa pagka-disipulo gikan sa ehemplo sa Manluluwas?
Ang usa ka disipulo usa ka matinguhaong sumusunod. Ug walay usa nga naghulagway sa pagka-disipulo sama ka maayo ni Jesukristo. Ang Iyang pagka-disipulo samtang Siya misunod sa kabubut-on sa Iyang Amahan ug sa Iyang gugma alang sa uban mga nindot kaayo nga mga ehemplo alang kanato. Pipila ka oras sa wala pa mag-antos ang Manluluwas diha sa tanaman sa Getsemani aron sa pagtuman sa kabubut-on sa Iyang Amahan, Siya mihunong og kadiyot aron sa paghugas sa mahigugmaong paagi sa mga tiil sa Iyang Apostoles. Si Elder Jeffrey R. Holland sa Korum sa Napulog Duha ka Apostoles mihulagway niini nga okasyon:
Samtang ang sagradong panihapon nianang kataposang Pagpalabay giandam, si Jesus ubos sa pagpanlibasog sa kusog ug lawom nga pagbati. Siya lamang ang nahibalo kon unsa ang mahitabo sa dili madugay. …
Sa tunga-tunga niini nga pagpangaon ug sa ingon niana nga mga hunahuna mibarog si Kristo sa hilom, mihimo sa buluhaton sa usa ka ulipon, o sulugoon, ug miluhod aron sa paghugas sa mga tiil sa Apostoles. … Siya mopadayon hangtod sa kataposang takna sa Iyang mortal nga kinabuhi—ug lapas pa—nga ilang nagpaluyo nga sulugoon. (“He Loved Them unto the End,” Ensign, Nob. 1989, 25)
Human niining sagradong serbisyo, gitudloan ni Jesus ang Iyang mga Apostoles og mga kamatuoran nga makagiya kanatong tanan samtang kita magtinguha nga mahimong Iyang mga disipulo.
Pagtuon agi og Pagpangandam alang sa Klase
Basaha ang Juan 13:14–17, 34–35; 14:15, ug hunahunaa ang pagmarka kon unsay inyong nakat-onan mahitungod sa pagka-disipulo ni Jesukristo.
Si Sister Silvia H. Allred, kanhi Magtatambag sa Kinatibuk-ang Kapangulohan sa Relief Society, miingon:
Kita kinahanglan gayod maghinigugmaay sa usag usa ug mag-inalagaray sa usag usa. Kini mao, sa tinud-anay, ang tinuod nga kinaiya sa pagka-disipulo diha sa tinuod nga Simbahan ni Jesukristo. (“Ang Tinuod nga Kinaiya sa Pagka-Disipulo, Liahona, Mayo 2011, 84)
Palandonga agi og Pagpangandam alang sa Klase
Paghunahuna og usa ka tawo gikan sa mga kasulatan o gikan sa inyong kaugalingong mga kinabuhi kinsa nagpakita sa tinuod nga kinaiya sa pagka-disipulo. Pangandam sa pagpakigbahin sa inyong ehemplo diha sa klase.
Seksiyon 2
Unsay mahimong gikinahanglan gikan kanako isip usa ka disipulo ni Jesukristo?
Si Jesus mihan-ay sa mosunod nga sundanan alang sa pagka-disipulo, “Kon adunay buot mosunod kanako, kinahanglan magdumili sa iyang kaugalingon, ug magpas-an sa iyang krus matag adlaw ug magasunod kanako” (Lucas 9:23). Mipasabot Siya, “Alang sa usa ka tawo nga mopas-an sa iyang krus, mao ang pagdumili sa iyang kaugalingon sa tanan nga dili diosnon, ug sa tanan nga kalibutanong kahigal, ug paghupot sa akong mga sugo” (Hubad ni Joseph Smith, Mateo 16:26; tan-awa usab sa bersikulo 25 ) [diha sa Joseph Smith Translation appendix]).
Si Elder Ulisses Soares sa Korum sa Napulog Duha ka Apostoles mitudlo:
Ang pagpas-an sa atong krus ug pagsunod sa Manluluwas kinahanglan nga kita mosunod sa Iyang ehemplo ug maningkamot nga mahimong sama Kaniya, mapailubong moatubang sa mga sirkumstansya sa kinabuhi, maglimod ug masilag sa mga gana sa kinaiyanhon nga tawo, ug maghulat sa Ginoo. (“Magpas-an sa Atong Krus,” Liahona, Nob. 2019, 115–16)
Usa ka adunahan nga batan-ong magmamando makausa nangutana sa Manluluwas kon unsay kinahanglan niyang buhaton aron makapanunod sa kinabuhi nga dayon.
Pagtuon agi og Pagpangandam alang sa Klase
Basaha ang Mateo 19:16–21, mangita sa duha ka butang: (1) Unsa ang nakapadani kaninyo mahitungod sa mga pangutana sa batan-ong lalaki? (2) Unsa ang gitudlo sa Manluluwas sa batan-ong lalaki mahitungod sa pagka-disipulo?
Si Elder Larry R. Lawrence sa Seventy mitudlo kon unsaon nga makagamit kita niining eskriptuhanong asoy diha sa atong mga kinabuhi:
Mosugyot ko nga matag usa ninyo moapil unya sa espirituhanong buhat, bisan gani karong gabii samtang mag-ampo mo. Mapaubsanong mangutana sa Ginoo sa mosunod nga pangutana: “Unsay nakapugong sa akong pag-uswag?” Sa laing pagkasulti: “Unsa pa may akong kulang?” Dayon hilom nga maghulat sa tubag. Kon sinsero kamo, ang tubag magkaanam ka klaro. Pagpadayag kini nga alang ra gayod kaninyo. (“Unsa Pa May Akong Kulang?,” Liahona, Nob. 2015, 35)
Ang mga kasulatan nagtudlo kanato nga, sa kasubo, ang adunahan nga batan-ong lalaki sa istorya “mipahawa nga masulub-on: kay daghan man ugod siyag katigayonan” (Mateo 19:22). Kanunay adunay mga sakripisyo nga gikinahanglan nga mahimong usa ka disipulo sa Ginoo. Apan si Presidente James E. Faust samtang nagserbisyo diha sa Unang Kapangulohan, mipasabot:
Maghunahuna sa dakong saad sa Manluluwas alang sa kalinaw niining kinabuhia ug kinabuhing dayon sa umaabot, ang pagka-disipulo usa ka kantidad nga alang lang bayaran. Usa kini ka kantidad nga dili mahimo natong dili bayaran. Kon itandi, ang mga gikinahanglan sa pagka-disipulo gamay ra kay sa gisaad nga mga panalangin. (“Pagka-disipulo,” Liahona, Nob. 2006, 20)
Palandonga agi og Pagpangandam alang sa Klase
Paggahin og panahon ug palandonga sa mainampuong paagi ang pangutana “Unsa pa may akong kulang?” Samtang kamo naningkamot sa giya sa Ginoo, ibutang sa hunahuna ang mosunod nga mga pulong gikan ni Presidente Dieter F. Uchtdorf, kaniadto magtatambag sa Unang Kapangulohan: “Ang unang lakang diha sa pagka-disipulo nagsugod, swerte gayod kaayo, diha sa eksaktong dapit nga atong gibarogan! (“Ang Dalan sa Disipulo,“ Liahona, Mayo 2009, 77).
Seksiyon 3
Unsaon nako pagkalig-on ug pagkalahutay samtang ako nag-atubang sa mga hagit sa pagka-disipulo?
Kon, usahay, kamo nagduhaduha kon ang gisaad nga mga panalangin sa pagka-disipulo takos ba sa bili, hinumdomi kini: “Ang [sa Ginoong] paagi mao ang dalan nga paingon ngadto sa kalipay dinhi niini nga kinabuhi ug sa kinabuhing dayon sa kalibotan nga moabot” (“Ang Buhi nga Kristo: Ang Pagpamatuod sa mga Apostoles,” https://www.churchofjesuschrist.org/study/scriptures/the-living-christ-the-testimony-of-the-apostles/the-living-christ-the-testimony-of-the-apostles?lang=ceb). Mipamatuod si propeta Jacob, “Ang matarong, ang mga santos sa Usa nga Balaan sa Israel, sila kinsa nagtuo sa Usa nga Balaan sa Israel, sila kinsa nakaantos sa mga kasakit sa kalibotan, … makapanunod sa gingharian sa Dios, … ug ang ilang hingpit nga kalipay mahingpit sa kahangtoran” (2 Nephi 9:18).
Tingali kamo mangutana sa inyong kaugalingon kon unsay gipangutana sa Manluluwas sa Iyang mga disipulo sa dugay na kaayong panahon: “Kay unsa may kaposlanan alang sa usa ka tawo, kon maangkon niya ang tibuok kalibotan, nga pagapildihan sa iyang kinabuhi? o unsa may ikahatag sa tawo nga arang ikabawi niya sa iyang kinabuhi?” (Mateo 16:26).
Wala lamang ang Ginoo nagsaad sa Iyang mga disipulo og mahangturong mga ganti, apan usab Siya nagpanalangin kanato samtang kita naningkamot sa pagsunod Kaniya. Usa niadtong mga paagi siya nagpanalangin kanato mao ang paghatag kanato og malungtarong hingpit nga kalipay niini nga kinabuhi. Apan adunay laing uban nga mga panalangin nga atong madawat, usab. Sa usa ka sulat ngadto sa mga taga-Roma, si Apostol Pablo namalandong sa pipila sa paagi ang Ginoo nagsuporta niadtong kinsa nagsunod Kaniya, bisan diha sa ilang mga hagit.
Pagtuon agi og Pagpangandam alang sa Klase
Basaha sa Mga Taga-Roma 8:16–18, 28, 35, 38–39, ug paghunahuna mahitungod kon sa unsang paagi ang Ginoo motabang kaninyo sa inyong mga paningkamot sa pagsunod Kaniya.
Irekord ang Inyong mga Hunahuna
Isulat ang usa ka piho nga hagit nga kamo karon nag-atubang––o kausaban nga kamo naninguha sa paghimo––samtang kamo naninguha sa pagsunod sa Manluluwas. Dayon irekord kon sa unsang paagi ang inyong gugma alang sa Manluluwas, ug sa Iyang gugma alang kaninyo, pagtabang kaninyo nga mahimong matinud-anon diha sa inyong pagka-disipulo.