Leksiyon 20 Materyal sa Pagpangandam sa Klase: Pagkaplag sa Akong Luna diha sa Panon sa Maayong Magbalantay
“Leksiyon 20 Materyal sa Pagpangandam sa Klase: Pagkaplag sa Akong Luna diha sa Panon sa Maayong Magbalantay,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo (2023)
“Leksiyon 20 Materyal sa Pagpangandam sa Klase,” Materyal sa Magtutudlo alang sa Si Jesukristo ug ang Iyang Walay Kataposang Ebanghelyo
Imahe
The Lord Is My Shepherd [Ang Ginoo ang Akong Magbalantay], by Simon Dewey
Leksiyon 20 Materyal sa Pagpangandam sa Klase
Pagkaplag sa Akong Luna diha sa Panon sa Maayong Magbalantay
Kon ikaw mibati nga nag-inusara, nawala, naguol, o nakalimtan, asa ka modangop alang sa kahupayan? Si Elder Gary E. Stevenson sa Korum sa Napulog Duha ka Apostoles miingon, “Nakakita ko og malungtarong kalinaw sa pagkasayod nga ‘ang Ginoo mao ang akong magbalantay’ [Salmo 23:1] ug nga ang matag usa kanato nailhan Niya ug ubos sa Iyang pag-atiman” (“Pagbantay sa mga Kalag,” Liahona, Nob. 2018, 111). Samtang magtuon ka, hunahunaa kon sa unsang paagi nga ikaw makakaplag og “malungtarong kalinaw” pinaagi sa pagkahibalo nga ang Maayong Magbalantay adunay personal ug malahutayon nga gugma alang nimo.
Seksiyon 1
Unsaon nako pagkahibalo nga ang maayong Magbalantay nagpangga nako?
Sa panahon sa biblia ang tinuod nga magbalantay sa karnero nahigugma ug nag-atiman sa iyang mga karnero. Matag karnero inihap ug adunay ngalan. Ang magbalantay sa karnero mogiya sa iyang mga karnero matag adlaw paingon sa pagkaon ug sa tubig. Kon ang iyang mga karnero mahisalaag, ang magbalantay sa karnero mangita niini. Sa gabii ang mga karnero ibutang sa protektado nga koral nga gitawag og toril sa mga karnero. Ang magbalantay sa karnero mohigda dapit sa pultahan aron protektahan ang iyang mga karnero gikan sa mga manunukob.
Sa sukwahi, ang usa ka sinuholan mobantay sa panon sa karnero tungod lamang kay siya gisuholan sa paghimo niini. Siya wala mahigugma niini. Kon adunay timailhan sa kakuyaw, ang sinuholan mobiya sa iyang mga karnero (tan-awa sa Juan 10:12–13).
Gamit niining matahom nga paghulagway, si Jesus mitudlo nga Siya mao ang Maayong Magbalantay.
Imahe
icon, pagtuon
Pagtuon agi og Pagpangandam alang sa Klase
Basaha ang Juan 10:11, 14–16” ug hunahunaa kon unsay atong makat-onan mahitungod ni Jesukristo isip ang Maayong Magbalantay.
Sa dihang si Jesukristo mipakita sa mga Lamanite ug sa mga Nephite human sa Iyang Pagkabanhaw, Siya misulti kanila nga sila mao ang “lain nga karnero” nga Iyang gihisgotan ngadto sa mga tawo sa Jerusalem (3 Nephi 15:21). Siya mipasabot nga aduna pay “lain nga karnero” nga kinahanglan usab nga makadungog ug makakita Kaniya (tan-awa sa 3 Nephi 16:1–3). Ang Manluluwas namahayag, “Ako nasayod sa akong karnero, ug sila inihap” (3 Nephi 18:31).
Ang gugma sa Maayong Magbalantay alang sa Iyang mga karnero maayong pagkatudlo diha sa Salmo 23. Si Elder Jeffrey R. Holland sa Korum sa Napulog Duha ka Apostoles miingon, “Kining minahal nga salmo nagpahinumdom kanato nga ang Dios sa kanunay mao ang Dios sa mga indibidwal ug ang Iyang mabinantayong pag-atiman hilabihan ka personal” (For Times of Trouble [2012], 206).
Imahe
icon, pagtuon
Pagtuon agi og Pagpangandam alang sa Klase
Basaha ang Salmo 23:1–4, ug pangitaa kon sa unsang paagi nga ang Maayong Magbalantay gustong moatiman kanimo ug niadtong imong gimahal.
Imahe
icon, pamalandong
Pamalandong agi og Pagpangandam alang sa Klase
Unsa ang pipila ka paagi nga ang Maayong Magbalantay mipakita sa Iyang pagpangga ug pagpakabana kanimo? Samtang mamalandong ka bahin sa Iyang gugma, ikonsiderar ang pagbasa o pagpaminaw sa himno nga “Ang Dios ang Akong Magbalantay” (Mga Himno, nu. 61).
Seksiyon 2
Sa unsang paagi nga ako makaabag sa buhat sa Maayong Magbalantay?
Sigurado gayod nga ang mga Apostoles mibati nga nag-inusara human nga ang ilang Magbalantay mibiya nila ug misaka ngadto sa langit. Mahanduraw nimo ang ilang kasurprisa ug kalipay sa pagkakita Kaniya pag-usab sa wala madugay diha sa baybayon samtang sila nangisda. Sa pagdunggo na nila sa daplin, nangaon sila uban Kaniya. Nianang higayona, si Jesus nangutana ni Pedro sa tulo ka higayon kon siya nahigugma ba Kaniya. Matag higayon si Pedro mitubag og oo. Ug matag higayon ang Ginoo mimando ni Pedro sa pag-atiman sa Iyang mga karnero o mga nating karnero (tan-awa sa Juan 21:15–17).
Si Presidente Bonnie H. Cordon, Kinatibuk-ang Presidente sa Young Women, misulti bahin niini nga kasinatian:
Imahe
Presidente Bonnie H. Cordon
Nagpunting ngadto sa Iyang karnero, ang Manluluwas nagtinguha nga si Pedro mobuhat kon unsa ang Iyang buhaton kon Siya anaa didto. Iyang giawhag si Pedro nga mahimong usa ka magbalantay.
… Si Presidente Russell M. Nelson mipaabot og samang pagdapit kanato sa pagpakaon sa karnero sa atong Amahan sa mas balaan nga paagi ug pagbuhat niini pinaagi sa pagpangalagad [tan-awa sa Russell M. Nelson, “Pagpangalagad,” Liahona, Mayo 2018, 100].
Aron epektibong madawat kini nga pagdapit, kinahanglan kitang mopalambo og usa ka kasingkasing sa magbalantay ug makasabot sa mga panginahanglan sa karnero sa Ginoo. Sa unsang paagi nga kita mahimong mga magbalantay nga gikinahanglan sa Ginoo nga kita mahisama?
Sama sa tanang mga pangutana, makatan-aw kita sa atong Manluluwas, si Jesukristo––ang Maayong Magbalantay. (“Pagkahimong usa ka Magbalantay,” Liahona, Nob. 2018, 74–75)
Sa usa ka higayon atol sa mortal nga pangalagad sa Manluluwas, ang Judeo nga mga lider sa relihiyon misaway ni Jesus nga mikaon uban sa mga makasasala. Agi og tubag, Siya mipaambit og sambingay bahin sa nawala nga karnero.
Imahe
icon, pagtuon
Pagtuon agi og Pagpangandam alang sa Klase
Basaha ang Lucas 15:4–7, mangita kon unsay matudlo nimo mahitungod sa pagpalambo og usa ka kasingkasing sa magbalantay.
Mga kaigsoonan, ang atong kinadak-ang mga hagit ug kinadak-ang mga ganti mahimong moabot samtang mangalagad kita sa nawala nga mga karnero. Ang mga miyembro sa Simbahan diha sa Basahon ni Mormon “[mi]bantay ibabaw sa ilang mga katawhan, ug nag-amuma kanila sa mga butang kabahin sa pagkamatarong” [Mosiah 23:18]. Atong masunod ang ilang ehemplo samtang atong hinumdoman nga ang pagpangalagad kinahanglang “giniyahan sa Espiritu, … flexible, ug … gipahaom ngadto sa mga panginahanglan sa matag miyembro” [“Pagpangalagad pinaagi sa Gipalig-on nga mga Korum sa Melchizedek Priesthood ug mga Relief Society,” ministering.ChurchofJesusChrist.org]. (“Pagbantay sa mga Kalag,” Liahona, Nob. 2018, 112)
Imahe
icon, irekord
Irekord ang Imong mga Hunahuna
Hunahunaa ang usa ka tawo nga imong kaila nga tingali mibati nga nasakitan, nag-inusara, o naguol o tingali nahisalaag gikan sa panon sa Maayong Magbalantay. Unsa ang imong mabuhat aron matabangan kini nga tawo gamit ang usa ka kasingkasing sa magbalantay?
Seksiyon 3
Unsay akong mabuhat kon ako mobati nga morag wala mahisakop sa panon sa Maayong Magbalantay?
Tingali adunay mga higayon nga ang usa ka tawo nga imong kaila mibati nga wala “mohaom” sa usa ka Santos sa Ulahing mga Adlaw o nga sila wala mahisakop sa simbahan. (Mahimong makita nimo ang imong kaugalingon niini nga kategoriya.) Ang uban mibati niini tungod kay bag-o lang sila nga mga miyembro, naulaw sa ilang nangagi nga mga pagpili, nagsul-ob o lahi tan-awon kaysa uban, naglisod sa panginabuhi o sa mga problema sa pamilya, nabalaka nga ang ilang pagpamatuod nagkakunhod, adunay mga hagit sa kahimsog sa pangisip, nakasinati og kaibog sa sama og sekso, o maulawon, dili kaayo aktibo, o diyutay ra og kaliwat.
Kon ikaw mibati nga gipakaubos, wala maapil, gihukman, o gibaliwala, dangop ngadto sa Manluluwas tungod kay ang Iyang pagpasalig nga ikaw bililhon Kaniya ug Siya gusto nga ikaw mahimong kabahin sa Iyang panon (tan-awa sa Doktrina ug mga Pakigsaad 18:10; Alma 31:35; Isaiah 43:4). Si Nephi mitudlo nga ang Manluluwas nagdapit sa “tanan sa pagduol ngadto kaniya ug sa pag-ambit sa iyang kaayo; ug siya wala maglimod kang bisan kinsa nga moduol ngadto kaniya, itom ug puti, ulipon ug gawasnon, lalaki ug babaye … ang tanan managsama ngadto sa Dios” (2 Nephi 26:33).
Si Sister Sharon Eubank, magtatambag sa Kinatibuk-ang Kapangulohan sa Relief Society, mitudlo kanato ngadto sa Manluluwas kon “kita mibati nga wala gidawat o dili madawat”:
Imahe
Sister Sharon Eubank
Ang Bag-ong Tugon nagpakita sa dakong mga paningkamot nga gihimo ni Jesus sa pagtabang sa tanang klase sa katawhan: ang mga sanglahon, mga maniningil sa buhis, mga bata, mga taga-Galilea, mga babayeng tigbaligya og dungog, mga publikano, kababayen-an, mga Pariseo, mga makasasala, mga Samaritano, mga biyuda, mga Romano nga senturyon, mga mananapaw, ang mga hugaw sa ritwal nga paagi. Sa hapit kada sugilanon, Siya mitabang sa usa ka tawo nga dili kasagaran gidawat sa katilingban. (“Kristo: Ang Kahayag nga Nagdan-ag sa Kangitngit,” Liahona Mayo 2019, 74)
Samtang maghunahuna ka nga imong kaugalingong luna diha sa panon sa Maayong Magbalantay, basaha ang pamahayag sa ubos ni Elder Robert D. Hales sa Korum sa Napulog Duha ka Apostoles.
Imahe
Elder Robert D. Hales
Kitang tanan sakop sa komunidad sa mga Santos, nagkinahanglan kita sa usag usa, ug kitang tanan naningkamot sa sama nga tumong. Bisan kinsa nato mahimong modistansya sa atong kaugalingon gikan sa ward nga pamilya sa katarongan sa atong mga kalahian. Apan kinahanglan nga dili nato ipahilayo o ipadistansya ang atong kaugalingon gikan sa mga oportunidad tungod sa mga kalainan nga atong nasabtan sa atong kaugalingon. Hinoon, atong ipakigbahin ang atong mga gasa ug mga talento ngadto sa uban, magdala og kahayag sa paglaom ug kalipay ngadto kanila, ug sa pagbuhat sa ingon mobayaw sa atong kaugalingong mga espiritu. (“Belonging to a Ward Family,” Ensign, Mar. 1996, 16)