Leksiyon 24 Materyal sa Pagpangandam sa Klase

Pagsalig diha ni Jesukristo isip ang Atong Maghuhukom

Handurawa ang inyong mga hunahuna ug mga pagbati nga kamo mahimong aduna kon kamo gidapit karong adlawa ngadto sa presensya sa Ginoo. Pila ka adlaw,“matag usa kanato mobarog aron pagahukman Kaniya sumala sa atong mga buhat ug sa mga tinguha sa atong mga kasingkasing” (“Ang Buhi nga Kristo: Ang Pagpamatuod sa mga Apostoles,” https://www.churchofjesuschrist.org/study/scriptures/the-living-christ-the-testimony-of-the-apostles/the-living-christ-the-testimony-of-the-apostles?lang=ceb; tan-awa usab sa 2 Nephi 9:15). Unsaon nato sa pagsinati kon maanaa sa presensya sa Manluluwas mag-agad kon giunsa nato pagpangandam ang atong mga kaugalingon (tan-awa sa Alma 5:16–25). Samtang kamo magtuon, hunahunaa kon unsa ang inyong mamahimo aron kamo mobati og ka komportable ug ka masaligon diha sa Iyang presensya sa Kataposang Paghukom (tan-awa sa Doktrina ug mga Pakigsaad 121:45).

Seksiyon 1

Nganong ako makasalig ni Jesukristo nga mahimo nakong maghuhukom?

Tungod sa balaanong kinaiyahan sa Manluluwas ug sa Iyang Walay Kinutubang Pag-ula, makasiguro kita nga Siya mahimong usa ka “matarong nga Maghuhukom” (Moises 6:57) kon kana nga adlaw moabot nga mobarog sa Iyang atubangan sa paghatag og subay sa atong mga kinabuhi (tan-awa sa Mga Taga-Roma 14: 10–12). Hingpit Siya nga motino sa matang sa himaya nga sarang natong dawaton. Diha sa basahon sa Mga Salmo atong mabasa, “Sa pagkamatarong magahukom siya sa kalibotan, sa katul-id magapahamtang siya ug paghukom sa mga katawhan” (Mga Salmo 9:8; tan-awa usab sa 96:13).

Maghisgot sa mga kwalipikasyon sa Ginoo nga mahimo natong maghuhukom, si Elder Richard G. Scott sa Korum sa Napulog Duha ka Apostoles miingon:

“Naangkon ni Jesukristo ang mga katakos nga walay laing tawo ang posible nga makaangkon. Siya usa ka Dios, Jehova, sa wala pa ang Iyang pagkatawo sa Betlehem. Ang Iyang hinigugmang Amahan wala lamang mohatag Kaniya sa Iyang espiritu, apan si Jesus mao ang Iyang Bugtong Anak diha sa unod. Ang atong Ginoo mipuyo og hingpit, walay sala nga kinabuhi ug busa gawasnon gikan sa mga gipangayo sa hustisya. Siya hingpit sa kada hiyas, lakip sa gugma, pagkamaloloy-on, pagkamapailubon, pagkamasulundon, pagpasaylo, ug pagkamapainubsanon. …

Ako mopamatuod nga sa dili mahulagway nga pag-antos ug panghingutas sa dili makalkulo nga bili, ang Manluluwas nakaangkon sa Iyang katungod nga mahimo natong Manunubos, atong Tigpataliwala, atong Kataposang Maghuhukom. (“Ang Pag-ula Makasiguro sa Inyong Kalinaw ug Kalipay,” Liahona, Nob. 2006, 42)

Si Presidente Dallin H. Oaks sa Unang Kapangulohan, kinsa kanhi usa ka Maghuhukom sa Korte Suprema sa Utah, miingon kabahin sa talagsaong posisyon sa Manluluwas sa paghukom kanato:

Ang Iyang pagkasayod sa tanan naghatag Niya og hingpit nga kahibalo sa tanan natong mga buhat ug mga tinguha, kadtong mga wala pa mahinulsoli o wala pa mausab ug kadtong nahinulsolan na o matarong. Busa, human sa Iyang paghukom kitang tanan mokumpisal “nga ang iyang mga paghukom mga makiangayon” (Mosiah 16:1). (“Ang Dako nga Laraw,” Liahona, Mayo 2020, 96)

Palandonga agi og Pagpangandam alang sa Klase

Paghunahuna og hiyas ni Jesukristo nga nagdugang sa inyong pagsalig nga Siya mahimong usa ka matarong nga maghuhukom. Sama pananglitan, mahimo ninyong hunahunaon kon unsa Siya ka mahigugmaon, nahibalo sa tanan, gamhanan sa tanan, maalamon, maloloy-on, manggiangayon, mapuanguron, mapailubon, maaghop. o mapasayloon. Pangandam sa pagpakigbahin sa hiyas nga inyong gipili uban sa inyong klase.

Seksiyon 2

Unsaon ako paghukom?

Maghunahuna mahitungod sa Kataposang Paghukom makapahingangha ug makasanap. Usahay kita maghunahuna kon mobati ba gayod kita nga andam nga pagahukman sa atong Ginoo. Ang basahon sa Pinadayag naghatag og importanting mga kamatuoran mahitungod kon sa unsang paagi ang Ginoo mohukom kanato.

Pagtuon agi og Pagpangandam alang sa Klase

Basaha ang Pinadayag 20:12, mangita og usa ka paagi kon sa unsang paagi kita pagahukman.

Si Presidente Harold B. Lee mitudlo:

Ang “mga basahon” nga gisulti nagpasabot ngadto sa mga talaan [sa atong mga binuhatan] nga gihuptan ibabaw sa yuta. … Ang basahon sa kinabuhi mao ang talaan nga gihuptan sa langit. (Mga Pagtulun-an sa mga Presidente sa Simbahan: Harold B. Lee [2000], 281)

Sa usa ka panan-awon sa celestial nga gingharian, si Propeta Joseph Smith nakaangkon og panabot ngadto sa Kataposang Paghukom. Miingon Siya, “Kay Ako, ang Ginoo, mohukom sa tanan nga mga tawo sumala sa ilang mga buhat, sumala sa tinguha sa ilang mga kasingkasing” (Doktrina ug mga Pakigsaad 137:9). Ang propeta Alma mitudlo nga kita usab manubag alang sa atong mga pulong (tan-awa sa Alma 12:14).

Si Presidente Oaks mitudlo nga ang Kataposang Paghukom mas labaw, hinoon, kay sa usa ka paghatag og bili sa atong mga hunahuna, mga pulong, ug mga buhat:

Ang Kataposang Paghukom dili lamang usa ka pagtimbang-timbang sa gidaghanon sa maayo ug sa daotan nga mga buhat—unsa ang atong nahimo. Kini maoy usa ka pagdawat sa kataposang sangputanan sa atong mga buhat ug mga hunahuna—unsa ang atong dangatan. … Ang mga sugo, mga ordinansa, ug mga pakigsaad sa ebanghelyo dili listahan sa mga nahimo isip kinahanglanon aron adunay mapundo didto sa langit. Ang ebanghelyo ni Jesukristo usa ka plano nga nagpakita kanato kon unsaon nga mamahimo sa unsay gitinguha sa atong Langitnong Amahan nga kita mamahimo. (“The Challenge to Become,” Liahona, Ene. 2001, 32)

Kini importante sa paghinumdom nga walay pagsapayan kon unsa kakugi kita maninguha sa pagpuyo sa ebanghelyo, nga walay pagtabang sa Ginoo, dili gayod kita mahimo unsay gitinguha sa Langitnong Amahan kanato nga mamahimo. Mapasalamaton, si Jesukristo dili lamang ang atong maghuhukom apan usab ang atong “manlalaban ngadto sa Amahan” (Doktrina ug mga Pakigsaad 110:4; tan-awa usab 1 Juan 2:1).

Si Presidente Russell M. Nelson mitudlo nga ang manlalaban nagpasabot og “usa ka tingog alang” o “usa kinsa nagpakilooy alang sa lain” (“Jesus the Christ––Our Master and More” [debosyonal sa Brigham Young University, Peb. 2, 1992], 4, speeches.byu.edu). Isip atong Manlalaban, si Jesukristo “nasayod sa kahuyang sa tawo ug unsaon sa pagtabang kanila kinsa natintal” (Doktrina ug mga Pakigsaad 62:1). Mopakilooy Siya sa atong kaayohan ug mangamuyo alang kanato samtang atong gigamit ang hugot nga pagtuo diha Kaniya (tan-awa sa Moroni 7:28; 2 Nephi 2:9; Mga Hebreohanon 4:15–16).

Si Elder Dale G. Renlund sa Korum sa Napulog Duha ka Apostoles misulti sa tahas ni Jesukristo isip atong Manlalaban:

Ang paglaban ni Kristo ngadto sa Amahan alang kanato dili pakigbatok. Si Jesukristo … dili mosuporta og bisan unsa gawas sa unsay gusto sa Amahan gikan sa sinugdanan. Walay duda nga ang Langitnong Amahan moabiba ug magmaya sa atong mga kalamposan.

Ang pag-awhag ni Kristo mao, sa usa ka bahin, ang pagpahinumdom kanato nga gibayaran na Niya ang atong mga sala ug nga walay tawo nga wala maapil sa impluwensya sa kalooy sa Dios. (“Magpili Kamo Niining Adlawa,” Liahona, Nob. 2018, 104–5)

Sa usa ka pagpadayag nga nadawat ni Propeta Joseph sa 1831, gihulagway ni Jesukristo ang tahas sa Iyang Pag-ula samtang Siya naglaban alang niadtong kinsa nagtuo Kaniya.

Pagtuon agi og Pagpangandam alang sa Klase

Basaha ang Doktrina ug mga Pakigsaad 45:3–5, mangita alang sa giunsa ni Jesukristo sa pagpakilooy alang sa atong kaayohan.

Palandonga agi og Pagpangandam alang sa Klase

Handurawa ang pagkadungog sa Manluluwas nga nagpakilooy sa inyong kaayohan sa atubangan sa Amahan. Unsa kaha ang inyong bation sa pagpaminaw Kaniya nga nagsulti alang sa inyong kaugalingon?

Seksiyon 3

Sa unsang paagi ako mas maayong makatimbang -timbang sa akong mga pagpangandam alang sa Kataposang Paghukom?

Si Presidente Oaks mitudlo, “Ang katuyoan niining Kataposang Paghukom mao ang pagtino kon ato bang nakab-ot ang unsay gihulagway ni Alma nga ‘dakong kausaban sa kasingkasing’” (“Nalimpyo pinaagi sa Paghinulsol,” Liahona, Mayo 2019, 93). Kini nga kausaban matuman pinaagi sa Pag-ula ni Jesukristo ug sinsero nga paghinulsol.

Sa dihang si Alma mitudlo sa mga katawhan sa Zarahemla, nangutana siya kanila aron siya makahibalo sa kahimtang sa ilang mga kasingkasing ug makatino kon unsa sila kaandam nga pagahukman sa Manluluwas (tan-awa sa Alma 5:14).

Pagtuon agi og Pagpangandam alang sa Klase

Basaha ang Alma 5:15–16, 19, 26–27, ug paggahin og pipila ka panahon alang sa matinuorong pag-eksamen sa kaugalingon samtang kamo naghunahuna sa inyong mga tubag ngadto sa mga gipangutana. Pag-ila og usa ka piho nga pangutana nga nagsugyot og dapit diin kamo makapalambo karon dayon.

Samtang kamo naghunahuna mahitungod kon unsay mas maayo ninyong mahimo sa pagpangandam alang sa Kataposang Paghukom, hinumdomi ang mosunod nga maalamong tambag gikan ni Elder Larry R. Lawrence sa Seventy:

Ang Espiritu makapakita nato sa atong mga kahuyang, apan makapakita usab Siya nato sa atong mga kalig-on. Usahay kinahanglan kitang mangutana kon husto ba ang atong gibuhat aron ang Ginoo makadasig ug makaawhag kanato. … Magmaya Siya sa matag higayon nga magpadayon kita. Para Niya, ang atong direksyon mas importante kay sa atong gipaspason.

Magmakanunayon, mga kaigsoonan, apan ayaw kawala sa paglaom. (“Unsa Pa May Akong Kulang?” Liahona, Nob. 2015, 35)

Irekord ang Inyong mga Hunahuna

Paggahin og pipila ka minutos sa pagsulat og usa ka tubag sa pangutana nga inyong giila gikan sa mga pulong ni Alma nga nagsugyot og usa ka butang nga inyong mabuhat karon dayon. Makaila usab kamo og usa ka pangutana nga nagsugyot og usa ka butang nga kamo nagbuhat og husto ug pagsulat usab og usa ka tubag alang niana nga pangutana.

Gusto pa og Dugang? (Mahimong Sundon o Dili)

Asa ako makakat-on pa og dugang mahitungod sa Kataposang Paghukom?

Ang video “Final Judgment” (3:50) naghatag og kinatibuk-ang pagpasabot niini nga bahin sa plano sa kaluwasan. Sa pagkat-on pa og dugang mahitungod sa mga gingharian sa himaya nga atong madawat human sa Kataposang Paghukom, basaha ang Doktrina ug mga Pakigsaad 76:50–111.

Ngano nga ang pipila ka mga tawo pagahukman pinaagi sa mas taas nga sumbanan kay sa uban?

Sa Lucas 12:41–48, gipasabot ni Jesukristo ang kahulogan sa sambingay sa matinud-anong sulugoon ug nganong ang pipila sa katawhan pagahukman pinaagi sa mas taas nga sumbanan sa Kataposang Paghukom (tan-awa usab sa Doktrina ug mga Pakigsaad 82:1–3). Makatan-aw usab kamo sa “Much Is Required” (1:45) aron sa pagkat-on pa og dugang.

Unsa nga matang sa paghukom nga ang Dios lamang ang makahimo?