Ngaahi Fakahinohino Fakalukufuá

Ko e hā e founga totonu ki hono fakaʻaongaʻi ʻo e kalasi ki he Ngaahi Fetuʻutaki ʻi he Nofo-malí mo e Fāmilí?

ʻOku fokotuʻutuʻu e kalasi ko ʻení ke tokoni ki he kāingalotú ʻi hono fakamālohia ʻo e nofo malí mo e ngaahi fāmilí pea ke nau maʻu foki ha fiefia ʻi heʻenau ngaahi feohi fakafāmilí. Ko e fatongia ia ʻo e kau pīsopelikí pe kau palesitenisī fakakoló ke fakapapauʻi ʻoku fakahoko lelei e kalasí ni.

Koeʻuhí ʻoku kehekehe pē e ngaahi fie maʻu ʻa e kāingalotú pea haʻu e ngaahi fie maʻu ko iá mei ha ngaahi tuʻunga fakafāmili kehekehe, ko ia ʻoku vahevahe ai e kalasí ki ha konga ʻe ua. Konga A, “Ko Hono Fakamālohia ʻo e Nofo-malí,” pea ʻoku fakatefito ʻene ʻaongá ki he ngaahi mātuʻa malí pea mo kinautolu ʻoku teuteu ke malí. Ko e konga E, “Ngaahi Fatongia ʻo e Mātuʻá ki Hono Fakamālohia ʻo e Ngaahi Fāmilí,” ʻoku tokoni ia ki he ngaahi mātuʻá mo e ngaahi kuí ʻi heʻenau feinga ke “tauhi ʻa kinautolu ʻi he akonaki mo e [naʻinaʻi ʻa e] ʻEikí” (ʻEfesō 6:4). ʻOku totonu ke mahino ki he kāingalotu ʻoku kau ki he kalasí ni ʻoku nau fili pē pe ke kau ki ai ʻo fakatatau mo ʻenau ngaahi fie maʻu fakafoʻituituí. Hangē ko ʻení, mahalo naʻa fie kau ha ongo meʻa mali ia ʻoku ʻikai haʻana fānau ki he konga A kae ʻikai ko e konga E. Pea mahalo naʻa fie kau ha mātuʻa tāutaha ia ki he ngaahi lēsoni pē ʻo e konga E.

ʻE lava ke fakafaingofua pē ʻa e kau taki ʻo e uōtí mo e koló ʻi heʻenau fakaʻaongaʻi e kalasí ni ʻo fakatatau mo e ngaahi ueʻi ʻa e Laumālié pea mo e ngaahi fie maʻu fakatāutaha ʻa e kāingalotú. ʻOku totonu ke nau fakakaukauʻi e ngaahi meʻá ni:

ʻE lava ke fakataimi-tēpileʻi ʻe he kau pīsopelikí mo e kau palesitenisī fakakoló ke fakahoko ʻa e kalasi ko ʻení ko ha kalasi Lautohi Faka-Sāpate. ʻE lava ke fakaafeʻi ʻe he kau takí ha kāingalotu tukupau ke kau ki ai, ʻo fakatatau mo e fakahinohino ʻa e Laumālié.
ʻE lava ke ngāueʻaki ʻe he kau kulupulita ʻo e taulaʻeiki lahí, kau palesitenisī ʻo e kōlomu ʻo e kaumātuʻá pea mo e kau palesitenisī ʻo e Fineʻofá, e ngaahi lēsoní fakatāutaha lolotonga e ngaahi lēsoni he Sāpate ʻuluaki ʻo e māhina takitaha. ʻO ka feʻunga, pea te nau lava ʻo fakaʻaongaʻi ʻa e ngaahi lēsoní ʻi ha ngaahi faeasaiti mo ha ngaahi faingamālie ke nau faiako ai he lolotonga ʻo e uiké pe ngaahi ʻaho Tokonakí.
ʻE lava ke fakaʻaongaʻi ʻe he kau pīsopelikí mo e kau palesitenisī fakakoló ʻa e ngaahi lēsoní tāutaha ʻi he Sāpate nima ʻoku fakatahaʻi ai e Lakanga Taulaʻeiki Faka-Melekisētekí—Fineʻofá. Te nau lava foki ʻo fakaʻaongaʻi e nagahi lēsoní ʻi ha ngaahi faeasaiti maʻá e kau talavoú mo e kau finemuí.
ʻE lava ke fakaʻaongaʻi ʻe he kau taki ʻo e Lakanga Taulaʻeiki Faka-ʻ‰loné mo e Kau Finemuí ʻa e tohi lēsoní ko ha maʻuʻanga tokoni ʻi he pō Mutualé. Te nau lava ʻo fakaʻaongaʻi ʻa e ngaahi lēsoní ke akoʻi fakataha ai ʻa e kau talavoú mo e kau finemuí pe ʻi heʻenau takitaha houalotu.
ʻE lava ke kau fakafoʻituitui ʻa e kāingalotú ki he kalasí pe fakataha mo honau ngaahi malí.

Ko hai ʻoku totonu ke ne maʻu e ngaahi nāunau ki he kalasí?

ʻOku totonu ke maʻu ʻe he kau mēmipa ko ʻeni ʻi he uōtí pe koló ha tatau ʻe taha ʻo e Ngaahi Fetuʻutaki ʻi he Nofo-malí mo e Fāmilí: Tohi Lēsoni ʻa e Faiakó pea mo ha tatau ʻe taha ʻo e Ngaahi Fetuʻutaki ʻi he Nofo-malí mo e Fāmilí: Tohi Fakahinohino Ako ʻa e Kau Akó

Pīsopé pe palesiteni fakakoló
Kulupulita ʻo e kau taulaʻeiki lahí
Palesiteni ʻo e kōlomu ʻa e kaumātuʻá
Palesiteni ʻo e Kau Talavoú
Palesiteni ʻo e Fineʻofá
Palesiteni ʻo e Kau Finemuí
Faiako ʻo e kalasi ki he Ngaahi Fetuʻutaki ʻi he Nofo-malí mo e Fāmilí

ʻOku totonu ke maʻu ʻe he tokotaha kotoa pē ʻe kau ki he kalasí ha tatau ʻo e tohi fakahinohino akó.