Ngaahi Maʻuʻanga Tokoni ʻa e Fāmilí
Lēsoni 16: Ko e Lotu Fakafāmilʻi, Ako Fakafāmili ʻo e Folofolá pea mo e Efiafi Fakafāmili ʻi ʻApí

LĒSONI 16

Ko e Lotu Fakafāmilʻi, Ako Fakafāmili ʻo e Folofolá pea mo e Efiafi Fakafāmili ʻi ʻApí

Taumuʻá

Ke fakalotolahiʻi ʻa e ngaahi fāmilí ke nau fai maʻu pē ʻa e lotu fakafāmilí, ako fakafāmili ʻo e folofolá pea mo e efiafi fakafāmili ʻi ʻapí, pea akoʻi ʻa e ongoongoleleí ʻi he ngaahi taimi ko ʻení.

Teuteú

  1. Fakakaukau ki ha ngaahi founga ʻe lava ke ke fakaʻaongaʻi ai ʻa e ngaahi tefitoʻi moʻoni ʻi he konga “Ko Ho Fatongia ʻi Hoʻo Hoko ko e Faiakó” (vakai ki he peesi x–xii ʻo e tohi lēsoni ko ʻení).

  2. Lau ʻa e ngaahi ʻuluʻi fakamatala ʻi he lēsoní ʻoku tohiʻi mataʻāʻā atú, ʻa ia ʻokú ne toʻo kongokonga lalahi atu ai ʻa e ngaahi tokāteline mo e ngaahi tefitoʻi moʻoni ʻi he lēsoní. ʻI hoʻo teuteu ko ia e lēsoní, fakakaukau loto ki he ngaahi tokāteliné mo e ngaahi tefitoʻi moʻoní ʻi he lolotonga ʻa e uiké, pea fekumi ke maʻu e tataki ʻa e Laumālié ke ke fakapapauʻi ʻaki e meʻa ʻoku totonu ke tō ki ai hoʻo fakamamafá ke feau ʻaki e ngaahi fie maʻu ʻa e kau akó.

  3. Kapau ʻoku maʻu ʻa e ngaahi nāunau ko ʻení pea ha konga pe kotoa kinautolu ki he kalasí. Teuteu ke fakaʻaliʻali ange kinautolu ʻi hoʻomou aleaʻi ʻa e efiafi fakafāmili ʻi ʻapí.

    1. Ngaahi Folofolá.

    2. Tohi ki he Ngaahi Maʻuʻanga Tokoni Ki He Efiafi Fakafāmili ʻi ʻApí (31106 900).

    3. Tohi Fakahinohino Maʻá e Fāmilí (31180 900).

    4. Ko e Ngaahi Tefitoʻi Moʻoni ʻo e Ongoongoleleí (31110 900).

    5. Ngaahi makasini ʻa e Siasí.

    6. Ko Hotau tukufakaholó : Ko ha Hisitōlia Nounou ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ní (35448 900).

    7. Tohi lēsoni ʻa e Lakanga Taulaʻeiki Faka-Melekisētekí mo e Fineʻofá.

    8. Tohi fakahinohino ako ʻa e mēmipá ki he kalasi Tokāteline ʻo e Ongoongoleleí.

    9. Ki Hono Fakamālohia ʻo e Toʻutupú (34285 900).

    10. Ngaahi tahi talanoa kuo faʻu ʻe he Siasíʻo hangē ko e Ngaahi Talanoa mei he Tohi ʻa Molomoná (35666 900).

    11. Ngaahi Fakatātā ʻo e Ongoongoleleí (34730 900).

  4. Kapau te ke ngāueʻaki ʻa e fakamanatu lēsoni ʻi he peesi 102 peá ke haʻu mo ha laʻi pepa mo ha peni pe peni-vahevahe ke takitāuhi e kau akó.

Fokotuʻu ki he Founga Fai ʻo e Lēsoní

Kuo pau ke fakamuʻomuʻa ʻe he fāmilí Siasi kotoa pē ke mahuʻinga ʻa e lotu fakafāmilí mo e ako ki he folofolá pea mo e efiafi fakafāmili ʻi ʻapí.

Fakamatalaʻi ange naʻe ʻi ai e tohi naʻe ʻoatu meí he Kau Palesitenisī ʻUluakí ʻi Fēpueli ʻo e 1999 ki he mēmipa kotoa ʻo e Siasí pea naʻe kau ai ʻa e fakahinohino ko ʻení:

“ ʻOku mau tapou atu ki he mātuʻá mo e fānaú ke nau fakamuʻomuʻa taha muʻa ʻa e lotu fakafāmilí, efiafi fakafāmilí, ako ʻo e ongoongoleleí mo e ngaahi fakahinohinó, kaeʻumaʻā ʻa e ngaahi ʻekitivitī fakafāmili ʻoku langaki moʻuí. Neongo pē ko e hā hano mahuʻinga mo hano lelei ʻo e ngaahi ʻekitivitī kehé, ka kuo pau ke ʻoua naʻa tuku ke nau fetongi e ngaahi fatongia fakalangi ko ia kuo vaheʻi maí, ʻa ia ko e mātuʻá pē mo e fāmilí te nau lava ʻo fakahoko leleí” (Tohi ʻa e Kau Palesitenisī ʻUluakí, 11 Fēpueli 1999).

  • Ko e hā ʻoku mahuʻinga makehe ai ʻa e naʻinaʻi ko ‘eni ʻi he ngaahi ʻaho ní?

Fakamatala ange ko e lēsoni ko ʻení te mou lave ai ki he ngaahi meʻa ʻe lava ke fai ʻe he mātuʻá ke fakahoko ai ʻa e lotu mo e ako folofola fakafāmilí, mo e ngaahi efiafi fakafāmili fakauiké.

ʻOku maʻu ʻe he ngaahi fāmilí ha ngaahi tāpuaki mahuʻinga lahi ʻi he taimi ʻoku nau lotu fakataha aí.

Lau mo e kau akó ʻa e 3 Nīfai 18:21. Vahevahe ange leva ʻa e faleʻi ko ʻeni naʻe fai ʻe Palesiteni Kōtoni B. Hingikelí ko e Palesiteni hono hongofulu mā nima ʻo e Siasí:

“Tuku ke lotu fakataha ʻa e fāmili kotoa pē ʻi he Siasí ni. Pea ko ʻeni, ʻoku mahuʻinga ke fai ha lotu fakafoʻituituí ka ko e meʻa fakaʻofoʻofa ʻa e lotu fakafāmilí. Lotu ki hoʻomou Tamai ʻi Hēvaní ʻi he tui. Lotu ʻi he huafa ʻo Sīsū Kalaisí. Heʻikai te ke lava ʻo fai ha meʻa ʻo toe lelei ange maʻa hoʻo fānaú ka ko hoʻo tuku kinautolu ke nau maʻu ha faingamālie ke lotu ʻi he taimi lotu fakafāmilí ʻo nau fakahā ai ʻa ʻenau fakafetaʻi koeʻuhí ko e ngaahi tāpuaki ko ia ʻoku nau maʻú. Kapau te nau fai ʻeni ʻi heʻenau kei īkí te nau tupu hake pē ʻoku nau maʻu ʻa e laumālie ʻo e houngaʻiá ʻi honau lotó” (Tūhulu, ʻAokosi 1997, 7)

  • Ko e hā ha meʻa ʻe lava ʻo fai ʻe he ngaahi fāmilí ke nau ʻulungāanga ʻaki maʻu pē ʻa e lotu fakafāmilí ʻi he ʻaho kotoa pē? Ko e hā ha ngaahi meʻa kuo mou aʻusia ʻi hoʻomou feinga ko ia ke fakahoko ʻa e lotu fakafāmilí ʻi he ʻaho kotoa pē, pea ko e hā e founga naʻa mou veteki ʻaki iá?

  • Ko e hā ha ngaahi meʻa ʻe ala fai ʻe he ngaahi fāmilí ke toe mahuʻinga mālie ange ai ʻa e taimi lotu fakafāmilí kia kinautolu? (Fakalahi atu ki he tali ʻa e kalasí ʻa e ngaahi fokotuʻu ko ʻení.)

    1. Ki muʻa pea fai ʻa e lotu fakafāmilí tomuʻa ʻeke ange pe ʻoku ʻi ai ha ngaahi meʻa makehe ʻoku totonu ke nau fakamālō ai ki he Tamai Hēvaní pe ko ha ngaahi meʻa makehe ʻoku totonu ke manatua ʻi heʻenau lotú.

    2. ʻOku totonu ke tokanga ʻa e mātuʻá ke ʻoange ha faingamālie ki he kiʻi taʻahine pē tamasiʻi kotoa pē ke lotu.

    3. ʻE lava pē ke lotua ʻe he fāmilí ʻa e kau taki ʻo e Siasí, kau faifekaú, mo e kau mēmipa kehe ʻo e fāmilí ʻoku nau fie maʻu ha ngaahi tāpuaki makehé.

    4. ʻE lava ke fakaʻaongaʻi ʻe he mātuʻá ʻa e taimi lotú ko ha faingamālie ia ke akoʻi ai. Hangē ko ʻení, ko e taimi ʻoku nau fakahā ai ʻenau loto houngaʻiá, te ne fakatupu ha ngaahi ongo tatau pē ʻi heʻenau fānaú.

    5. Ko e taimi ʻoku fakakau fakafoʻituitui atu ai ʻe he mātuʻá ʻa e hingoa ʻo e fānaú ʻi he lotú ʻoku nau ongoʻi leva ʻa e ʻofa ʻa e Tamai Hēvaní mo ʻenau mātuʻá ʻia kinautolú.

  • Ko e hā ha tāpuaki kuo mou maʻu koeʻuhí ko hoʻomou lotu fakafāmilí?

ʻOku tokoni e ako fakafāmili ʻo e folofolá ke toe ofi ange ai ʻa e fāmilí ki he ʻOtuá.

Hiki ʻa e ngaahi lea ko ʻení ʻi he palakipoé pe ko hoʻo lau leʻo lahi ia ke mou fanongo kotoa ki ai:

  • Lahi ange ʻa e loto ʻapasiá

  • Lahi ange ʻa e fakaʻapaʻapá mo e feveitokaiʻakí

  • Siʻisiʻi ange ʻa e fekeʻikeʻí

  • Malava ke faleʻi ʻa e fānaú ʻi he ʻofa mo e poto ʻoku lahi angé.

  • Toe tali lelei ange ʻa e faleʻi ʻa e mātuʻá

  • Lahi ange ʻa e anga-tonú

  • Lahi ʻa e tuí, ʻamanaki leleí, mo e ʻofa faka- Kalaisí

  • Nonga, fiemālie mo fiefia.

Kole ange ko he kau akó ke nau fakakaukau loto angé ki he fehuʻi ko ʻení pea ʻoua naʻa nau tali leʻo lahi atu ia:

  • Ko e hā te ke lava ʻo fai ke ʻomai ai ʻa e ngaahi tāpuaki ko ʻení ke toe lahi ange ko homou ʻapí?

Fakamatalaʻi ange naʻe fakamoʻoniʻi ʻe Palesiteni Melioni G. Lomenī ʻe toe lahi ange ʻa e ngaahi tāpuaki ʻe maʻu ʻi hotau ngaahi ʻapí ʻo kapau te tau ako ʻa e folofolá kae tautautefito ki he Tohi ʻa Molomoná :

ʻOku ou ongoʻi fakapapau ʻe hanga ʻe he ngaahi mātuʻá ʻo lau ʻi honau ngaahi ʻapí ʻa e Tohi ʻa Molomoná pea nau faʻa lotu maʻu pē ke nau malava ʻe kinautolu mo ʻenau fānaú ʻo maʻu ʻa e laumālie ʻo e tohi mahuʻinga ko iá pea te ne nofoʻia hotau ngaahi ʻapí pea mo kinautolu kotoa pē ʻoku nofo aí. ʻE tupulekina ʻa e laumālie ʻo e loto-ʻapasiá; ʻe tupulaki ʻa e fefakaʻapaʻapaʻakí; mo e fefakaʻatuʻiʻaki. ʻE mavahe atu leva ʻa e laumālie ʻo e fekeʻikeʻí. ʻE akoʻi ʻe he ngaahi mātuʻá ʻenau fānaú ki he ʻofa ʻoku toe lahi ange mo e poto ʻoku toe lahi angé. ʻE tokanga lahi ange ʻa e fānaú pea nau fie fanongo ki he akonaki ʻenau mātuʻá. ʻE tupulaki ʻa e anga-tonú. ʻE nofoʻia ʻe he tuí, ʻamanakí mo e ʻofá – ʻa e ʻofa haohaoa ʻa Kalaisí, ʻi hotau ngaahi ʻapí mo ʻetau moʻuí, pea te nau paotoloaki ke tolonga ʻa e melinó mo e fiefiá mo e nēkeneká” (Tūhulu ʻOkatopa 1980, 112)

ʻI ha lea naʻe fai ʻe Palesiteni ʻEselā Tafi Penisoni ko e Palesiteni hono hongofulu mā tolu ʻo e Siasí ʻo kau ki he palōmesi ʻa Palesiteni Lomenií, naʻá ne pehē ai : “ Ko e ngaahi palōmesí ni – ʻa e tupulaki ʻa e ʻofá mo e uouangatahá ʻi he ʻapí pea lahi ange ʻa e fefakaʻapaʻapaʻaki ʻi he vā ʻo e fānaú mo e mātuʻá, fakalakalaka ange foki mo e tuʻunga fakalaumālié mo e anga-tonú – ʻoku ʻikai ko ha ngaahi palōmesi laulaunoa pē, ka ko e meʻa pē ia naʻe ʻuhinga ki ai ʻa e Palōfita ko Siosefa Sāmitá ʻi heʻene pehē ʻe tokoniʻi kitautolu ʻe he Tohi ʻa Molomoná ke tau toe ofi ange ai ki he ʻOtuá” (Tūhulu Sānuali 1987, 2 ).

Kole ange ki he kau akó ke nau fakamatala ki ha tāpuaki kuo nau aʻusia koeʻuhí ko ʻenau ako fakafāmili ʻa e folofolá.

  • Ko e hā ha meʻa kuo mou fai ke manakoa ai ʻa hono ako fakafāmili ʻo e folofolá? Ko e hā ha ngaahi palōpalema ʻoku mou fehangahangai mo ia, pea naʻa mou veteki fēfē ia? (Tānaki atu e ngaahi fokotuʻu ko ʻení ki he ngaahi tali ʻa e kau akó).

    1. Mou ngāue fakataha ke palani ha taimi ke mou lau folofola fakaʻaho ai. Ko e konga faingataʻa taha ʻeni ʻo e ako folofola fakafāmilí ka ʻe lava pē ʻe he ngaahi fāmilí ʻo kole ke tokonia kinautolu ʻe he Laumālié ke nau fai ʻa ia ʻe lelei taha kia kinautolú.

    2. Fokotuʻu ha taimi pau pe vahe, veesi pe peesi kuo pau ke lau fakaʻaho.

    3. Kapau ʻoku lava pea ʻai ke takitāuhi kotoa ʻa e mēmipa ʻo e fāmilí ʻi he folofola. ʻE lava pē foki ke fakalakalaka heni ʻa e fānau ʻoku teʻeki lava ʻo lau tohí. ʻOku totonu ke ʻoange ʻe he mātuʻá ki he fānaú ha folofola ʻi he taimi ʻoku papitaiso ai kinautolú, hoko honau ʻaho fāʻeleʻí, pe ko ha ngaahi ʻaho makehe pehē. Pe ʻe lava pē ʻe he fānaú ʻo ngāueʻi haʻanau sēniti ke kumi ʻaki ʻenau folofolá.

    4. Mou lau tautaufetongi pea tokoniʻi ʻa e fānau ʻoku teʻeki ke lau konga leleí. ʻOsi haʻamou lau ha veesi pea mou vahevahe ʻa e meʻa naʻa mou toki laú pea fakamatalaʻi ia ʻi ha founga mahinongofua ki he fānau iiki angé.

    5. ʻE lava ʻe he fānaú ʻo fai ha ngaahi tā valivali fekauʻaki mo e folofolá ʻo hangē ko haʻanau tā ʻa e misi ko ia ʻa Līhai ki he ʻakau ʻo e moʻuí.

    6. Ako maʻuloto fakataha ha ngaahi potu folofola.

    7. ʻI he hoko ha ngaahi taimi mahuʻinga mou lau ha ngaahi potu folofola fekauʻaki mo ia ʻo hangē ko e Pekiá, Kilisimasí, papitaiso, fakanofo lakanga fakataulaʻeikí pe ko e tāpuakiʻi ʻo ha temipale.

    8. Tauhi ha kiʻi tohinoa fakafāmili ke hiki ai ha ngaahi fehuʻi, taumuʻa pe ngaahi ongo ʻoku mou maʻu lolotonga hoʻomou ako ʻa e folofolá.

Fakamahinoʻi ange kapau ʻe faingataʻa ke tānaki mai ʻa e fāmilí ke fai ʻa e lau folofolá ʻoku totonu ke manatuʻi ʻe he mātuʻá ʻe tolonga ʻi he manatu ʻa e fānaú e meʻa naʻe feinga ʻa e mātuʻa ke faí. Naʻe pehē ʻe Sūsana L. Uona, ʻa ia naʻe hoko ko e tokoni ua ki he palesiteni lahi ʻo e Palaimelí:

“Kuo mau feinga ʻi homau fāmilí ke fai ʻa e ako folofolá ʻi he pongipongí. Ka naʻa mau faʻa ʻita maʻu pē ʻi he taimi naʻe lāunga ai ha taha ʻo homa ngaahi fohá pea pau ke feingaʻi ke tuʻu hake mei he mohengá. Ka ʻi he taimi naʻá ne haʻu aí, ne punou pē ia ʻi he tēpilé ʻo mohe. ʻI ha hili ha ngaahi taʻu mei ai, ʻi he lolotonga ʻene ngāue fakafaifekaú, naʻá ne fai mai ha tohi. “Mālō ʻaupito hoʻomo akoʻi kiate au ʻa e folofolá. ʻOku ou loto pē ke mo ʻiloʻi ko e taimi kotoa pē ne hangē ai ne u mohé, naʻá ku matuʻaki fakafanongo kuikui pē” (Tūhulu Siulai 1996, 88).

ʻOku tokoni e efiafi fakafāmili ʻi ʻapí ke maluʻi ai ʻa e ngaahi fāmilí mei he ngaahi mālohi ʻo e māmaní.

Fakamatalaʻi ange naʻe fakahinohino ʻe Palesiteni Siosefa F. Sāmita mo hono ongo tokoní he ʻa e ngaahi mātuʻá ʻi he 1915 ke nau fakahoko maʻu pē ʻa e “Efiafi Fakafāmili ʻi ʻApí.” Ko e taimi ia ke akoʻi ai ʻe he mātuʻá ʻenau fānaú ki he ngaahi tefitoʻi moʻoni ʻo e ongoongoleleí. Naʻe tohi ai ʻe he Kau Palesitenisī ʻUluakí ʻo pehē: “Kapau ʻe talangofua ʻa e kau Māʻoniʻoní ki he faleʻi ko ʻení, ʻoku mau palōmesi atu ʻe tāpuekina kimoutolu. ʻE tupulaki ʻa e tuí ʻi he loto ʻo e toʻutupu ʻo ʻIsilelí, pea te nau maʻu ʻa e mālohi ke tauʻi ʻaki ʻa e ngaahi ivi tākiekina kovi kotoa pē mo e ʻahiʻahi te nau fepaki mo iá” (ʻi he James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 4:339).

Naʻe fakamatala ʻa Palesiteni Kōtoni B. Hingikelí ʻo kau ki he muimui ʻa ʻene ongomātuʻá ki he faleʻi ʻa Palesiteni Sāmitá ʻo ne pehē:

“Naʻe kole ʻe Palesiteni Siosefa F. Sāmita ki he kāingalotú ke nau fai ʻa e efiafi fakafāmili ʻi ʻapí. Naʻe fakahā mai ʻe heʻeku tamaí te mau fai leva ia, pea te mau fakamāfanaʻi ʻa e loki ʻoku tuʻu ai ʻa e fuʻu piano motuʻa ʻemau faʻeé pea mau fai ai ʻa e meʻa kuo kole mai ʻe he Palesiteni ʻo e Siasí kia kimautolú.

Naʻe ʻikai ke mau poto fakatāutaha heʻemau kei iikí. Naʻa mau lava ʻo fai fakataha ha ngaahi meʻa lahi ʻi he ngaahi taimi ʻoku mau vaʻinga aí pea naʻe hangē ha feinga ha taha ʻo kimautolu ke mau hiva solo ki ha kakaí, ko haʻate feinga ke tuku ha ʻaisikilimi ʻi ha funga sitoú ke ʻoua ʻe vaiá. Naʻa mau faʻa makiʻikiʻi mo fakaoliʻaki ha hiva ʻa ha taha. Naʻa mau lotu fakataha. Naʻa mau fakafanongo lelei lolotonga hono lau mai ʻe heʻemau faʻeé ha ngaahi talanoa mei he Tohi ʻa Molomoná. Naʻe fai maʻu loto mai pē ʻe heʻemau tamaí ha ngaahi talanoa ʻe niʻihi.

“Naʻe tupu mei heʻemau fanga kiʻi fakataha ko ia naʻe fai ʻi homau fale motuʻá ni, ha ngaahi meʻa ‘oku ‘ikai te u lava ʻo fakamatalaʻi. Naʻe fakamālohia ai ʻa ʻemau ʻofa ki heʻemau ongo mātuʻá. Naʻe poupouʻi ai mo ʻemau ʻofa ki homau ngaahi tokouá mo e ngaahi tuofāfiné. Naʻe fakatupulekina ai ʻa ʻemau ʻofa ki he ʻEikí. Naʻe tupulekina ai ʻi homau lotó haʻamau fakahoungaʻi ʻa e ngaahi meʻa iiki ʻoku leleí. Naʻe hoko ʻa e ngaahi meʻa fakaofo ko ʻení tuʻunga ʻi he fakaongo ʻemau ongo mātuʻá ki he faleʻi ʻa e Palesiteni ʻo e Siasí. Naʻá ku ako ha meʻa lahi ʻaupito mei ai” (Tūhulu Siulai 1993, 68).

Fakamatalaʻi ange kuo hanga ʻe he Palesiteni kotoa pē ʻo e Siasí talu meia Siosefa F. Sāmita ʻo fakamamafaʻi ʻa e mahuʻinga ʻo e efiafi fakafāmili ʻi ʻapí. Kuo toe faleʻi kitautolu ʻe he Kau Palesitenisī ʻUluakí ʻi he ngaahi ʻahó ni ke fakahoko ʻa e efiafi fakafāmilí ʻi he pō Mōnite kotoa pē.

Fakamatalaʻi ange ʻoku totonu ke kau maʻu pē ʻa e lotu fakafāmilí, lēsoni ʻa ia ʻe lava ke fakahoko ʻe ha mēmipa pē ʻo e fāmilí ko e konga ʻo e efiafi fakafāmilí. ʻE lava ke tokoni ʻa e mātuʻá ki he fānau īkí ke teuteu mo fakahoko ha lēsoni.

Fakamatalaʻi ange kuo hanga ʻe he Siasí ʻo teuteuʻi ha ngaahi maʻuʻanga tokoni ki he ngaahi fāmilí ke nau lava ʻo fakahoko ʻaki ha ngaahi efiafi fakafāmili ʻoku ola leleí. Fakaʻaliʻali leva ʻa e ngaahi nāunau kuó ke ʻosi teuteuʻí (Vakai ki he Teuteu fika 3). Fakamamafaʻi ange ʻa e mahuʻinga ʻo e tohi ʻo e Ngaahi Maʻuʻanga Tokoni ki he Efiafi Fakafāmili ʻi ʻApí. Ko e tohi ʻeni ʻoku ngāue ʻaki ʻe he Siasí ke tokoni ki he ngaahi fāmilí ʻi heʻenau palani mo fakahoko ʻa e efiafi fakafāmilí. ʻOku ʻi ai foki mo ha ngaahi lēsoni mo ha ngaahi fakakaukau ke fai ʻaki ha ngaahi ʻekitivitī.

  • Ko e hā nai ha ngaahi meʻa te tau ala tānaki atu ki he lotú mo e lēsoní ʻi he efiafi fakafāmilí? (ʻE lava ke kau ai ʻa e fanga kiʻi vaʻinga, lau folofola, hivaʻi ʻo ha ngaahi himi pe hiva, fai ha alēlea fakafāmili pe ha kiʻi kai.)

  • ʻE lava ke fakaʻaongaʻi fēfē ʻe he mātuʻá ʻa e taimi efiafi fakafāmili ʻi ʻapí ko ha taimi ia ke tokoni ke feau ai ʻa e ngaahi fiemaʻu ʻa e fāmilí? (Tānaki atu e ngaahi fokotuʻu ko ʻení ki he tali ʻa e kau akó).

    Ne ʻi ai ha tamai naʻá ne fokotuʻutuʻu ʻa e ngaahi lēsoni ki he efiafi fakafāmilí ʻaki ʻene talanoa tahataha mo ʻene fānaú. ʻI heʻene talanoa ko ia mo e fānaú naʻá ne fakafehuʻi kinautolu ki he ngaahi meʻa naʻe fai ki ai ʻene tokangá ʻo hangē ko ʻení, “Ko e hā ʻa e meʻa ʻoku talanoaʻi ʻe he tamaiki tangata ʻi ʻapi akó ʻo kau ki he tamaiki fefiné?” pe “ ʻOku faʻa talanoa atu ha taha kau ki he faitoʻo kona tapú?” Ne hanga ʻe he tali ʻa e fānaú ʻo fakahā ange ki ai ʻa e ngaahi meʻa ʻoku totonu ke nau talanoa ki aí. Ne toki tangutu hifo leva ia mo hono malí ʻo palani ha ngaahi lēsoni ʻo fakatatau mo ia. Ne fiefia ʻaupito ʻa e fānaú ke fevahevaheʻaki ʻenau ngaahi fakakaukaú pea naʻa nau mateuteu leva ke fehangahangai mo e ngaahi palopalema ʻo e moʻuí ni.

  • Ko e hā ʻe fai ʻe he mātuʻá ke fakamālohia ai ʻa e mēmipa kotoa pē ʻo e fāmilí ke kau ʻi he efiafi fakafāmilí?

  • Ko e hā ha ngaahi tāpuaki kuo maʻu ho fāmilí koeʻuhí ko hoʻomou fakahoko ʻa e efiafi fakafāmili ʻi ʻapí?

Fakaʻosí

Fakamamafaʻi ange ko e lotu mo e ako fakafāmili ʻo e folofolá pea mo efiafi fakafāmili fakauiké, te nau lava ʻo fakamālohia ange ai ʻa e ngaahi feohi fakafāmilí, ngaahi fakamoʻoni ʻa e fāmilí, pea teuteuʻi foki ai e fāmilí ke nau lava ʻo fehangahangai mo e ngaahi faingataʻa ʻo e moʻuí.

Fakamoʻoni ki hono moʻoni ʻo e ngaahi moʻoni ne aleaʻi ʻi he lēsoní ʻo fakatatau mo e ueʻi ʻa e Laumālié.

Vakai ki he peesi 82–87 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí. kinautolu ke nau toutou fakamanatu ʻa e ngaahi tokāteline mo e ngaahi tefitoʻi moʻoni kuo nau ako ki aí ʻaki haʻanau (1) fai ha taha ʻo e “Ngaahi Fokotuʻu Ki Hono Fakahokó” pea mo (2) lau ʻa e lea ʻa Palesiteni Kōtoni B. Hingikelí ko e “Ko e Ngaahi Tāpuaki ʻo e Lotu Fakafāmilí” pea mo e lea ʻa ʻEletā Tomu Peuli ko e “Ko ia Naʻe Akonekina Ai Au.” Fakamahino ange ʻe lava ke maʻu ʻe he ongo meʻa malí ha ngaahi lelei lahi mei haʻana ako mo aleaʻi fakataha ʻa e ngaahi fakamatala ʻi he tohi fakahinohino akó.

Ngaahi Maʻuʻanga Tokoni Kehé

Kau fakataha ʻi ha ngaahi ʻekitivitī fakafāmili ʻoku fakatupulaki mo fakafiefiá.

Fakamatalaʻi ange ʻoku kau fakataha atu ki he lotu fakafāmilí, lau fakafāmili ʻo e folofolá pea mo e efiafi fakafāmili ʻi ʻapí, ʻa e ngaahi ʻekitivitī fakafāmili ʻoku lelei mo fakafiefiá, ʻa ia ʻoku lava ke ne tokoniʻi e ngaahi fāmilí ke nau langaki e ngaahi haʻi mālohi ʻo e ʻofá mo e uouangatahá. ʻOku totonu ke palani ʻe he mātuʻá ha ngaahi ʻekitivitī ʻe lava ke kau kotoa ki ai ʻa e fāmilí. Naʻe faleʻi mai ʻa Palesiteni ʻEselā Tafi Penisoni ʻo pehē, “Kamata ha ngaahi tala tukufakaholo ʻo e ʻeveʻeva, mālōlō mo e kaimeʻakai fakafāmilí. He ʻikai toe ngalo ia ʻi he manatu ʻa hoʻomou fānaú” (Ensign, Nov. 1987, 51).

  • Ko e hā ha ngaahi lelei ʻe maʻu mei heʻetau kau ʻi ha ngaahi ʻekitivitī fakafāmilíʻoku fakafiefia mo fakatupulakí?

    Fakakaukau ke ke ngāueʻaki ʻa e ngaahi fokotuʻu ko ʻení pe ko haʻo ngaahi fokotuʻu pē ʻaʻau ke kamata ʻaki haʻamou fealēleaʻaki:

    1. ʻE toe fakatupulaki e ʻofá mo e uouangatahá ʻi he fāmili ko ē ʻoku nau kau fakataha ʻi ha ngaahi ʻekitivitií.

    2. Te nau fiefia fakataha pea toe fakatupulaki ai ha feohi ʻe tolonga ʻi he toenga ʻo ʻenau moʻuí.

    3. ʻE fakafiefia ki he fānaú ʻenau feohi mo e mātuʻá pea te nau ongongofua ange ki he ngaahi faleʻi ʻa e mātuʻá.

  • Ko e hā haʻo manatu ki ha ngaahi ʻekitivitī fakafāmili ʻi hoʻo kei siʻí? Naʻá ne uesia fēfē hoʻo moʻuí?

Kole ange ki he kau akó ke nau vahevahe atu ha ngaahi ʻekitivitī ʻe fakafiefia, fakatupulaki pea manatua fuoloa ʻe he fāmilí, ka ʻoku ʻikai ke fuʻu fakamolé.

Fakamanatu ʻo e ngaahi lēsoni ʻi he konga e ʻo e Kalasi ko e Ngaahi Fetuʻutaki ʻi he Nofo- malí mo e Fāmilí.

ʻOku fakaʻosi ʻe he lēsoni ko ʻení ʻa e Konga e ʻo e kalasi ko e Ngaahi Fetuʻutaki ʻi he Nofo-malí mo e Fāmilí. Kapau naʻá ke fai kotoa ʻa e ngaahi lēsoni peá ke fakakaukau ke fai ʻa e ngaahi ngāue ko ʻení:

ʻOange ki he tokotaha kotoa ʻi he kalasí ha laʻi pepa mo ha peni. Kole ange ke nau fakaʻaongaʻi ʻa e miniti ʻe tolu ka hokó ke nau hiki ai ʻa e ngaahi tokāteline mo e ngaahi tefitoʻi moʻoni ʻoku nau manatuʻi meí he lēsoni 9 ki he 16 ʻi he kalasi ko ʻení. Kole ange ke nau laineʻi ʻa e ngaahi tokāteline mo e ngaahi tefitoʻi moʻoni ʻoku nau pehē ʻoku mahuʻingamālie taha kia kinautolú. Kapau te nau fie maʻu tokoni peá ke ngāueʻaki ʻa e tēpile ʻo e fakahokohoko ʻi he peesi v–viii ʻo e tohi lēsoni ko ʻení pe vakaiʻi fakalūkufua ʻo e kalasí ʻi he peesi vii–ix ʻi he Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí.

Hili ha miniti ʻe tolu peá ke kole ange ke nau lau mai ʻa e ngaahi meʻa naʻa nau hikí pea fakamatalaʻi mo e ʻuhinga ʻoku mahuʻingamālie ai kia kinautolú. Hiki ʻa ʻenau ngaahi talí ʻi he palakipoé peá ke fakatokangaʻi ange ʻa e mahuʻinga ʻo ʻenau talí. Vahevahe leva hoʻo ngaahi fakakaukaú. Kapau ʻe lahi ʻa e taimí pea toe fai pē ʻeni.

Fakahā hoʻo loto houngaʻiá ki he tokotaha kotoa pe ne kau ʻi he kalasí peá ke fakalotolahiʻi kinautolu ke nau hokohoko atu ʻa hono moʻuiʻaki ʻa e ngaahi tokāteline mo e ngaahi tefitoʻi moʻoni kuo mou ako ki ai lolotonga ʻa e kalasí. Fakalotolahiʻi foki kinautolu ke nau toutou lau ʻa e “Ko e Fāmilí: Ko Ha Fanongonongo Ki Māmani” fakataha mo honau fāmilí pea nau muimui ki he ngaahi faleʻi ʻoku hā aí ʻi honau ngaahi ʻapí.