Lēsoni 15

Fakahinohinoʻi ʻo e Fānaú ʻi Heʻenau Fakahoko ʻEnau Ngaahi Filí

Taumuʻá

Ke akoʻi ʻa e ngaahi tefitoʻi moʻoni ʻe lava ke tokoni ki he ngaahi mātuʻa ʻi heʻenau feinga ke fakahinohinoʻi ʻenau fānaú ʻi heʻenau ngaahi filí.

Teuteú

ʻI hoʻo teuteu ko ia ke faiakó, fekumi ki ha ngaahi founga ʻe lava ke ke muimui ai ki he ngaahi tefitoʻi moʻoni ʻi he konga “Ko Ho Fatongia ʻi Hoʻo Hoko ko e Faiakó” (peesi x–xi ʻo e tohi lēsoni ko ʻení.)
Lau ʻa e ngaahi ʻuluʻi fakamatala ʻi he lēsoní ʻoku tohiʻi mataʻāʻā atú, ʻa ia ʻokú ne toʻo kongokonga lalahi atu ai ʻa e ngaahi tokāteline mo e ngaahi tefitoʻi moʻoni ʻi he lēsoní. ʻI hoʻo teuteu ko ia e lēsoní, fakakaukau loto ki he ngaahi tokāteliné mo e ngaahi tefitoʻi moʻoní ʻi he lolotonga ʻa e uiké, pea fekumi ke maʻu e tataki ʻa e Laumālié ke ke fakapapauʻi ʻaki e meʻa ʻoku totonu ke tō ki ai hoʻo fakamamafá ke feau ʻaki e ngaahi fie maʻu ʻa e kau akó.
Kapau ʻoku maʻu ʻa e Ngaahi Maʻuʻanga Tokoni Ki he Efiafi Fakafāmili ʻi ʻApí (31106 900), peá ke vakai ki he “Ko e Tauʻatāina ke Filí—Ko e Kī Ia Ki he Tupulakí” ʻi he peesi 284–285 pea mo e “Ko Hono Toe Fakafoki Mai ʻo ha Tamasiʻi pē Taʻahine ʻoku Hē meí he Totonú” peesi 300–301. Fakakaukau ke ke fakaʻaongaʻi ʻa e ongo maʻuʻanga tokoni ko ʻení lolotonga e lēsoní.
ʻOmi ha kiʻi foʻi maka ki he kalasí. Te ke fakaʻaongaʻi ia ʻi he konga fakaʻosi ʻo e lēsoni ko ʻení.

Fokotuʻu ki he Founga Fai ʻo e Lēsoní

ʻOku fie maʻu ʻe he fānaú ha fakahinohino ʻi heʻenau fai ʻa ʻenau ngaahi filí.

Lau ange ʻa e foʻi maau ko ʻení naʻe vavevahe mai ia ʻe Palesiteni Tōmasi S. Monisoni ʻo e Kau Palesitenisī ʻUluakí:

Naʻá ne tuʻu tokotaha pē ʻi he ngaahi manga-halá,
Pea ulo mai ʻa e laʻaá ki hono fofongá.
Naʻe ʻikai te ne fakakaukau ki he maama taʻeʻiloá ni–
Pea loto-toʻa ʻi he fehangahangai mo e ngaahi palopalema ʻi he moʻuí.
Ka ʻoku aʻu ʻa e ngaahi halá ki he hahaké mo e hihifó,
ʻI he ʻikai te ne ʻilo ʻa e ʻa e hala ʻoku lelei tahá;
Peá ne fili ki he hala ʻoku ʻalu hifó,
Pea mole meiate ia ʻa e kalauni ʻo e ikuná.
Pea tupu ai ʻa ʻene loto mamahí,
He naʻe ʻikai ha taha ʻi he ngaahi manga halá ke tokoní,
Ke fakahinohinoʻi ia ki he hala ʻoku leleí.

Naʻe ʻi ai ha ʻaho ʻe taha, ʻi he manga hala tataú,
Naʻe tuʻu ai ha talavou mo haʻane ʻamanaki lahi faú.
Naʻá ne ʻamanaki mo ia ke ne kau ki he fakapuepué;
Peá ne fekumi ki he ngaahi meʻa ʻoku lelei angé;
Ka naʻe ʻi ai ha taha kuó ne ʻilo ki he halá,
ʻO ne fakahinohinoʻi ia ki he hala ke ne fouá.
Peá ne tafoki ai mei he hala ki he ʻauhá,
Peá ne ikuna ʻa e fakapuepué mo e kalauni ʻo e ikuná.
ʻOkú ne ʻaʻeva ʻi he ʻahó ni ʻi he hala ʻoku leleí,
Koeʻuhi ko ha tokotaha naʻe tuʻu ʻi he hala ke tokoní
Ke fakahinohino ia ki he hala ʻoku leleí.

[quoted from Central Christian Monitor, Tūhulu, Sānuali 1994, 66]

Fakamatala ange ko e taimi lahi ʻoku fehangahangai ai ʻa e fānaú mo e kau toʻutupú mo ha ngaahi fili ke fai … ko ha ngaahi fili te ne uesia ʻa e toenga ʻo ʻenau moʻuí. ʻOku totonu ke tokoniʻi kinautolu ʻe he ngaahi mātuʻa kuo nau taukeí ke fai ha ngaahi fili ʻoku totonú. Aʻu pē ki he taimi ʻoku ʻikai ke nau fakataha aí, ʻoku totonu ke maʻu ʻe he fānaú ha tataki pea fakafalala ki he ngaahi ueʻi ʻa e Laumālie Māʻoniʻoní ʻi heʻenau manatuʻi ʻa e ngaahi akonaki ʻenau ngaahi mātuʻá.

ʻOku lava ʻe he ngaahi mātuʻá ʻo tokoniʻi ʻa e fānaú ke nau fakaʻaongaʻi ʻa ʻenau tauʻatāina ke filí ʻi he māʻoniʻoni.

Fakamatalaʻi ange ko e tauʻatāina ke filí ko ha meʻa ʻofa ia mei he Tamai Hēvaní kia kitautolu pea ʻoku ʻikai ke totongi ia. Ko e tauʻatāina ke filí ko ha mālohi ia ke tau fili mo ngāue pē maʻatautolu. ʻOku ʻomi ʻe he fili tauʻatāina ko ʻení ʻa e founga te tau lava ke muimui ai ki he Fakamoʻuí pea maʻu ai ʻa e ngaahi tāpuaki ʻo e moʻui taʻengatá (vakai, Nīfai 2:25–28).

Lau fakataha mo e kau akó ʻa e Tokāteline mo e Ngaahi Fuakava 58:27–28 .

ʻOku tokoni fēfē ʻa e veesi ko ʻení ki he mātuʻá ʻi heʻenau feinga ke tokoniʻi ʻenau fānaú ʻi he ngaahi fili ʻoku nau faí?
Ko e hā ha ngaahi lelei ʻe maʻu mei hono tuku pē ʻo e fānaú ke fai ʻenau ngaahi filí?

ʻOku hanga ʻe he ngaahi nāunau ko ʻení ʻo ʻomi fakakongokonga lalahi ʻa e ngaahi tefitoʻi moʻoni ʻe lava ke muimui ki ai ʻa e ngaahi mātuʻá ke tokoniʻi e fānaú ke fakaʻaongaʻi totonu ʻa ʻenau tauʻatāina ke filí. Mou talanoa ki he ngaahi tefitoʻi moʻoni ko ʻení mo e kau akó.

Akoʻi e fānaú ki he palani lahi ʻo e fiefia ʻa e Tamai Hēvaní.

Mou lau fakataha mo e kau akó ʻa e ʻAlamā 12:32:

“Ko ia ai naʻe fakahā ʻe he ʻOtuá ha ngaahi fekau kiate kinautolu hili ʻa ʻene fakahā kiate kinautolu ʻa e hala ʻo e huhuʻí.”

Ko e hā ʻoku mahuʻinga ai ʻa e pehē naʻe toki foaki ʻa e ngaahi fekaú kia nautolu hili ʻa ʻene fakahā kia kinautolu ʻa e palani ʻo e huhuʻí? ʻE tokoni fēfē ʻa e ngaahi tefitoʻi moʻoni ko ʻení ki he feinga ko ia ʻa e mātuʻá ke fakalotolahiʻi ʻenau fānaú ke tauhi ʻa e ngaahi fekaú?

Naʻe akonaki ʻa ʻEletā Poiti K. Peeka ʻo pehē:

“ ʻOku faʻa fehuʻia ʻe he kau talavoú pe” ko e hā hono ʻuhingá ? ‘—Ko e hā hono ʻuhinga kuo fekauʻi ai kitautolu ke tau fai e meʻa ko eé, pea fekauʻi ke ʻoua naʻa tau fai ʻa e meʻa ko eé? ʻI heʻenau ʻiloʻi ʻa e palani ʻo e fiefiá te nau maʻu leva ʻa e ʻuhingá….

“Heʻikai ke ke ofi maʻu pē ki hoʻo fānaú ʻi he ngaahi ʻaho honau ʻahiʻahiʻí. ʻI he ngaahi taimi faingataʻa pehení kuo pau pē ke nau fekumi ki ha ngaahi maʻuʻanga tokoni. Kapau te nau ʻilo ʻa e ngaahi palani ʻo e ongoongolelei, ʻe lava ke fakamālohia ai kinautolu.

“Ko e palani ʻeni ʻoku totonu ke toutou fakamanatua maʻu pē. Pea te nau manatuʻi leva ʻa e ʻuhinga ʻo e moʻuí ni, mo e moʻoni ʻoku ʻi ai ʻa e Huhuʻí, pea mo e ʻuhinga ʻo e ʻi ai ʻa e ngaahi fekaú.

“ ʻE hoko ʻa ʻenau ako ki he ongoongoleleí mo e ngaahi meʻa ʻoku nau aʻusia ʻi he moʻuí ni ko ha meʻa ia te ne tānaki ki heʻenau fakamoʻoni ki he Kalaisí, ʻa e Fakaleleí pea mo hono toe fakafoki mai ʻo e ongoongoleleí” (The Great Plan of Happiness [ʻi ha lea naʻe fai ki he kau ako fakalotú, he ʻaho 10 ʻo Aokosi 1993], 3).

ʻOange ki he fānaú ha ngaahi fakahinohino mahino ʻo makatuʻunga ʻi he ngaahi tefitoʻi moʻoni ʻo e ongoongoleleí.

Fakamatala ange ʻoku totonu ke ʻoange ʻe he mātuʻá ha fakahinohino mahino ke muimui ki ai ʻa e fānaú ʻi he taimi ʻoku nau fai ai ha ngaahi filí. ʻE kau ai hono akoʻi ʻo e ongoongoleleí pea fokotuʻu mo ha ngaahi tuʻunga ʻulungaānga ʻi ʻapi. Naʻe akonaki ʻa ʻEletā Siō J. Kulisitianesoni ʻo e Kōlomu ʻo e Kau Fitungofulú ʻo pehē:

“ ʻOua ʻe manavahē ke fokotuʻu ha ngaahi tuʻutuʻuni mo ha ngaahi fakahinohino mahino fekauʻaki mo e anga-maʻá. Manatuʻi ke mou ʻikai ʻi he taimi ʻoku fiemaʻu ai ke mou ʻikaí. ʻOku totonu pē ke ke fakahā ki [hoʻo fānaú] ʻoku ʻi ai ha ngaahi meʻa ʻe niʻihi ʻe ʻikai te nau lava ʻo fai ʻi heʻenau hoko ko e mēmipa homou fāmilí. ʻOku ʻi ai ha mātuʻa ʻe niʻihi ʻoku nau fuʻu hohaʻa ʻaupito ki hono manakoa ʻa ʻenau fānaú ʻe he toʻutupú mo tali lelei kinautolu ʻi heʻenau feohi fakasōsialé ko ia ʻoku nau hanga ai ʻo poupouʻi ha ngaahi meʻa lahi naʻe totonu pē ke ʻoua te nau poupouʻi, hangē ko e vala mo e ngaahi sīpinga fakamole paʻanga lahi ʻo e kuongá, kaeʻumaʻā ʻa e ngaahi vala taʻefeʻungá, ko e ʻeva poʻuli ʻo fuʻu fuoloá, ʻeva fakakaumeʻa ʻoku teʻeki taʻu hongofulu mā onó mo e ngaahi heleʻuhila taʻefeʻungá mo e ngaahi alā meʻa pehē. ʻOku ʻi ai ʻa e taimi ʻe niʻihi ʻe hoko ai ha tuʻu ʻa e fānaú mo e mātuʻá ʻo taukapoʻi ʻa e meʻa ʻoku totonú, ko ha meʻa ia ke fehiʻanekina ai kinautolú. Kuo pau pē ke ʻi ai ha pō ʻe niʻihi te nau nofo tokotaha pē pea ʻikai ke nau ʻalu ki ha ngaahi paati, pe sio ʻi ha ngaahi heleʻuhila, ʻe ʻikai fakafiefia ia ʻi he taimi kotoa. Ka ko e fatongia fakamātuʻá ʻoku ʻikai ko ha feʻauhi ia pe ko hai ʻe manakoa tahá” (ʻi he Conference Report, ʻOkatopa 1993, 13; pe Tūhulu Sānuali 1994, 14).

Ko e hā ʻe lava ke fai ʻe he mātuʻá ke fokotuʻu ai ha fakahinohino pau fekauʻaki mo e moʻui anga-maʻá maʻa honau fāmilí?

Mou lau fakataha mo e kau akó ʻa e Molonai 7:15–19.

Ko e hā ha faleʻi ʻoku ʻomai ʻe he veesi ko ʻení fekauʻaki mo e lava ko ia ke tau ʻilo ʻa e leleí mei he koví? ʻE lava fēfē ke fakaʻaongaʻi ʻe he mātuʻá ʻa e faleʻi ko ʻení ke fokotuʻu ha ngaahi fakahinohino ki heʻenau fānaú?
Ko e hā ha ngaahi tafaʻaki ʻo e moʻui ʻa e toʻutupú te nau fie maʻu ai ha tokoni ʻi hono fakafaikehekeheʻi ʻo e leleí mei he koví? ʻE fakaʻaongaʻi fēfē ʻe he mātuʻá ʻa e akonaki ʻoku hā ʻi he Molonai 7:15–19 ke tokoniʻi ʻa e fānaú ke fai ha fili ʻoku māʻoniʻoní?

Tokoniʻi e fānaú ke nau ʻilo ʻa e mālohi ʻo e Laumālie Māʻoniʻoní ʻi heʻenau moʻuí.

Fakamatalaʻi ange ʻoku fakamatala ʻa e Molonai 7:15–19 ki he Maama ʻa Kalaisí, ʻa ia ʻokú ne tokoniʻi kitautolu ke tau ʻilo ʻa e leleí meí he koví. ʻE lava ke toe tānaki atu ki he muimui ki he Maama ʻa Kalaisí, ʻa e lava ko ia ke tau maʻu ha fakahinohino mei he Laumālie Māʻoniʻoní ʻa ia te ne “fakahā mai ʻa e meʻa kotoa pē ʻoku totonu ke [tau] faí” (2 Nīfai 32:5) pea te ne tokoni mai ke tau “ ʻiloʻi ʻa e meʻa kotoa pē” (Molonai 10:5). ʻI he taimi ʻoku ako ai ʻa e fānaú ke nau fakatokangaʻi pea muimui ki he ngaahi ueʻi ʻa e Laumālie Māʻoniʻoní te nau maʻu leva ha tokoni makehe ʻi he taimi ʻoku nau fai ai ha ngaahi filí. Hili hano hilifakinima kinautolu ke maʻu ʻa e Laumālie Māʻoniʻoní, ʻe lava ʻe he mātuʻá ʻo tokoniʻi e fānaú ke nau feinga maʻu pē ke moʻui taau pea nofoʻia kinautolu ʻe he Laumālie Māʻoniʻoní.

Naʻe fakamatala ʻa ʻEletā Lōpeti D. Heili fekauʻaki mo hono tokoniʻi ia ʻe heʻene faʻeé ke ne ʻiloʻi ʻa e ngaahi ueʻi ʻa e Laumālie Māʻoniʻoní:

“Hili hono papitaiso aú, ne puke atu au ʻe heʻeku fineʻeikí ki he tafaʻakí peá ne pehē mai “Ko e hā hoʻo ongoʻí? Ne u fakamatalaʻi ki ai ʻi he lelei taha naʻá ku lavá ʻa e faʻahinga ongo māfana ʻo e nonga, fiemālie pea mo e fiefia ne u maʻú. Ne toki fakamatalaʻi mai leva ʻe heʻeku fineʻeikí ko e meʻa ʻoku ou ongoʻi ko e meʻa foaki ia ʻo e Laumālie Māʻoniʻoní. Naʻá ne talamai leva kapau te u moʻui taau mo ia, ʻe hoko atu ai pē ke u kei maʻu ʻa e meʻa foaki ko iá. Ko ha momeniti ako ia kuó u moʻuiʻaki ʻi he kotoa ʻo ʻeku moʻuí” (ʻi he Conference Report, ʻEpeleli 1999, 42; pe Liahona Siulai 1999, 39).

Ko e hā e meʻa ʻe lava ke fai ʻe he mātuʻá ke tokoniʻi ʻenau fānaú ke ongoʻi mo ʻiloʻi ʻa e ngaahi ueʻi ʻa e Laumālie Māʻoniʻoní? ( ʻE lava ke kau ʻa e ngaahi tali ko ʻení, ʻa hono fakalotolahiʻi kinautolu ke ako ʻa e folofolá, fanongo ki he ngaahi hiva toputapú, tauhi ʻa e ngaahi fekaú, pea lotu ʻi he loto fakamātoato moʻoni. ʻE lava ke nau vahevahe mo ʻenau fānaú ha ngaahi meʻa fakalaumālie kuo nau aʻusiá pea fakahaaʻi ange ʻa ʻenau ʻofá).

Fakamamafaʻi ange ʻa hono mahuʻinga ko ia ke hanga ʻe he mātuʻá ʻo fakalotolahiʻi ʻenau fānaú ke ʻi ai haʻanau taimi lotu makehe ʻo hangē ko e lau folofola fakafoʻituituí, lotú mo e ʻaukaí. ʻOku lelei pē ʻa e kau ki he ngaahi polokalama fakalotu ʻa e fāmilí ka ʻoku ʻikai ke feʻunga ia.

ʻOange ki he fānau īkí ha faingamālie ke nau fai ai ha fanga kiʻi fili iiki.

Fakamahinoʻi ange ʻe lava ke ʻoange ʻe he mātuʻá ha faingamālie ki he fānau īkí ke nau fai ha ngaahi fili. ʻE lava ke nau fakafaingofuaʻi ʻeni ʻaki haʻanau ʻoange pē ha meʻa ʻe ua ke fili mei ai ka e ʻai ʻa e ongo filí ke na fakapotopoto lōua. Hangē ko ʻení, ʻe pehē ange ʻe he mātuʻá “ ʻOkú ke fie tui ho sote lanu puluú pē kulokulá he ʻahó ni?” pe ko e “ ʻOkú ke fie fanongo nai ki ha foʻi talanoa pe ʻokú ke fie vaʻinga pē koe ia kae ʻoua kuo hoko ho taimi mohé?” Ko e taimi ko ē ʻoku ʻoange ai ʻe he mātuʻá ha ngaahi fili peheni pea ʻoku totonu ke nau tali leva ʻa e fili ko ia ʻa e fānaú.

ʻE hanga fēfē ʻe he fanga kiʻi fili iiki pehení ʻo tokoniʻi ʻa e fānaú ʻi he taimi te nau fai ai ha ngaahi fili ʻoku toe mahuʻinga ange pe mamafa ange ʻi heʻenau moʻuí?

Tokoni ki he fānaú ke nau ʻilo ʻoku ʻi ai ʻa e ngaahi fili ʻe niʻihi ʻoku taʻengata ʻa hono nunuʻá.

Fakamatala ange ko e taimi ʻoku fehangahangai ai ʻa e fānaú mo ha ngaahi fili ʻoku faingataʻa ʻo hangē ko e ngaahi ʻekitivitī ke fai ʻi he ʻaho Sāpaté, fili honau ngaahi kaungā-meʻa ofí, pe ko e palani ʻenau akó pe fokotuʻu ha ngaahi taumuʻa ki heʻenau ngāué, ke nau ʻilo ʻoku mahuʻinga ʻa e founga ke nau fai ʻaki ʻa e ngaahi filí, ʻo fakatatau mo e ngaahi tefitoʻi moʻoni ʻo e ongoongoleleí. ʻOku mahuʻinga foki ke nau ʻilo ʻe uesia ʻa e toenga ʻenau moʻuí ʻi he fili ʻoku nau faí. Kuo pau ke tuku taimi ʻa e mātuʻá ke akoʻi ʻa e fānaú ʻi heʻenau kei īkí ke nau talanoa ai ki he ngaahi tefitoʻi moʻoni ko ʻení.

Ko e hā ha ngaahi founga ʻe lava ai ke fakahinohinoʻi ʻe he mātuʻá ʻa ʻenau fānaú ʻi he taimi ʻoku nau talatalaifale ai mo kinautolú? (ʻE lava ke kau ʻi he ngaahi talí ʻa e ngaahi meʻa ko ʻení, ʻe lava ke vahevahe ʻe he mātuʻá ʻa e ngaahi meʻa kuo nau aʻusiá, fakamanatu ki heʻenau fānaú ʻa e ngaahi fekau ʻa e ʻEikí, pea tokoniʻi e fānaú ke nau fakakaukau maʻu pē ki he ngaahi ola taʻengata ʻo ʻenau ngaahi filí.)
Ko hā ha ngaahi meʻa ʻe hoko ʻe fie maʻu ai ke ala mai ʻa e mātuʻá ʻo tokoniʻi ʻa e fānaú ʻi ha ngaahi fili taʻemāʻoniʻoni te nau faí?

Kole ange ki ha taha ʻo e kau akó ke ne lau ʻa e lea ko ʻeni naʻe fakahoko ʻe ʻEletā M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá: (peesi 77 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí):

“Ko e fatongia ia ʻo e mātuʻá ke hū mai ʻo kau ʻi he taimi ʻokú na mamata ai ʻoku fai ha ngaahi fili halá. ʻOku ʻikai ʻuhinga ia ke toʻo ai ʻe he mātuʻa mei he fānaú ʻa e meʻaʻofa ʻo e tauʻatāina ke filí. Koeʻuhi ko e tauʻatāina ke fili ko ha meʻaʻofa faka-ʻOtua ia ʻoku foaki mai, ko hono moʻoni toputapu tahá ko e fili ko ia ki he meʻa te nau faí, anga ʻo ʻenau tōʻongá pea mo e meʻa ko ia te nau tui ki aí, ʻe tuku maʻu pē ia kia kinautolu. Ka ʻi heʻetau hoko ko e ngaahi mātuʻá, ʻoku fiemaʻu ke tau fakapapauʻi ʻoku mahino kia kinautolu ʻa e tōʻonga tāú mo e ngaahi nunuʻa ʻe hoko kapau te nau tūlifua ai pē ʻi he ngaahi meʻa ʻoku halá. Manatuʻi ʻoku ʻikai ke ʻi ai ha meʻa ia ko e kau fai sivi taʻe fakalao ʻi ʻapi. Ko e ngaahi heleʻuhilá, makasiní, ngaahi polokalama ʻi he televīsone, ngaahi vitiō, ʻInitāneti mo e ngaahi mītia kehé ko ha kau fakaafe pē kinautolu ki ho ʻapí pea ʻoku totonu ke toki talitali pe kinautolu ʻi he taimi ʻoku nau taau ai ki he fakafiefia ʻa e fāmilí. ʻAi ke hoko ʻa ʻapi ko ha taulanga ū ʻo e melinó mo e anga māʻoniʻoní. ʻOua naʻa tuku ʻa e tākiekina koví ke ne fakaʻuliʻi ho ʻātakai fakalaumālie makehé. Anga-ʻofa, fakaʻatuʻi, anga-lelei mo faʻa fakakaukau ʻi he meʻa ʻokú ke lea ʻakí mo e founga ʻoku ke fai ki he niʻihi kehé. Pea ʻe hanga leva ʻe he ngaahi taumuʻa fakafāmili ʻoku fakavaʻeʻaki e ngaahi tuʻunga ʻulungāanga ʻo e ongoongoleleí ʻo fakafaingofuaʻi ai hono fai ʻo e fili ʻoku leleí” (ʻi he Conference Report, ʻEpeleli 1999, pe Liahona Siulai 1999, 103).

ʻOku totonu ke tukuange ʻe he mātuʻá ke ako ʻenau fānaú mei he ngaahi nunuʻa ʻo e ngaahi fili ʻoku taʻefakapotopotó.

Fakamahinoʻi ange neongo ʻoku totonu ke kau atu ʻa e mātuʻá he taimi ʻe niʻihi ki hono tokoniʻi e fānaú ke nau fai ha ngaahi fili ʻoku māʻoniʻoní ka ʻoku ʻikai totonu ke nau ala atu koeʻuhí ke taʻofi ʻa e ngaahi nunuʻa ko ia ʻo e fili taʻefakapotopoto ʻa e fānaú.

Ko e hā e meʻa ʻe hokó kapau ʻe maluʻi ʻe he mātuʻá ʻa e fānaú meí he nunuʻa ʻo ʻenau ngaahi filí? Ko e hā ha lelei ʻe maʻu mei hono tukuange ko ia ke aʻusia ʻe he fānaú ʻa e nunuʻa ʻo ʻenau ngaahi filí? (Fakalotolahiʻi hoʻo kau akó ke nau vahevahe atu ha ngaahi meʻa kuo nau aʻusia ʻi heʻenau moʻuí. Hili iá peá ke lau ange ʻa e ongo lea ko ʻení.)

Naʻe pehē ʻe ʻEletā Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá: “ ʻE ngaahi mātuʻa ʻoua naʻa mou halaia ʻi he fehālaaki ko ʻení ʻo mou feinga ke mou fakasiʻisiʻi pe taʻofi ʻa e ngaahi nunuʻa fakanatula ʻo e ngaahi fili ʻa hoʻomou fānaú ke maumauʻi ʻa e ngaahi fekaú. ʻOku hanga ʻe he ngaahi meʻa peheé ʻo poupouʻi ʻa e ngaahi tefitoʻi moʻoni halá, pea fakaava mai mo e matapā ki ha angahala ʻoku mamafa angé, pea fakasiʻisiʻi ai mo e faingamālie ke fakatomalá”(ʻi he Conference Report, ʻEpeleli 1993, 43; pe Tūhulu, Siulai 1993, 44).

Naʻe ako ʻa ʻEletā Lōpeti D. Heili ʻo pehē: “ ʻOku fakamanavahē ke tuku ʻetau fānaú ke nau ako mei he ngaahi fehalaaki ʻoku nau fakahokó, ka ʻoku maʻongoʻonga ange ʻenau fie fili ki he hala ʻo e ʻEikí pea mo e ngaahi tuʻunga ʻulungāanga mahuʻinga ʻo e fāmilí, ʻi he taimi ʻoku fai ai ʻenau filí mei honau lotó ka e ʻikai ko ʻetau fakamālohiʻi kinautolu ke nau fai ʻa e ngaahi tuʻunga ʻulungāanga ko iá. ʻOku lelei ange ʻa e founga ʻo e ʻofá mo e tali ʻa e ʻEikí ʻi he founga fakamālohi ʻa Sētané, ʻo tautautefito ki hono ohi hake ʻo e toʻutupú (ʻi he Conference Report, ʻEpeleli 1999, 43; pe Liahona Siulai 1999, 40).

ʻOku totonu ke fakahā ʻe he ngaahi mātuʻá ʻa e ʻofa taʻetūkua ki he fānau ʻoku hē atú.

Fakamahinoʻi ange neongo e feinga ʻa e mātuʻá ʻe kei fai pē ʻe he fānaú ha ngaahi fili ʻoku fakatupu loto-mamahi kiate kinautolu mo ha niʻihi kehe. Kuo pau ke ʻoua naʻa tuku hono ʻofaʻi ʻe he mātuʻá ʻa e niʻihi kuo nau heé. Naʻe pehē ʻe ʻEletā Lisiate G. Sikoti:

“ ʻOku ʻi ai hamou niʻihi ʻoku ʻikai fanongo atu hoʻomou fānaú kiate kimoutolú, pea nau fili ʻe kinautolu ia ha ngaahi hala kehe. Kuo lahi ʻaupito e fehangahangai ʻa e Tamai Hēvaní mo ha ngaahi meʻa pehē. Neongo kuo ngāueʻaki ʻe ha niʻihi ʻo ʻEne fānaú ʻa ʻEne meʻaʻofa ʻo e tauʻatāina ke filí, ʻo nau fili ai ke ʻoua te nau muimui ki Hono finangaló, ka ʻokú Ne kei ʻofa pē ʻiate kinautolu. Ka ʻoku ou ʻiloʻi pau, naʻe ʻikai te Ne tukuakiʻi Ia ki he ngaahi fili taʻe fakapotopoto naʻa nau faí” (ʻi he Conference Report, ʻEpeleli 1993, 43; pe Tūhulu Siulai 1993, 44).

Lolotonga ʻa e kei mēmipa ʻa ʻEletā Hauati W. Hanitā ʻi he Kōlomu ʻo e Kau ʻAposetolo ʻe Toko Hongofulu Mā Uá, naʻá ne fai ai e faleʻi ko ʻení ki he ngaahi mātuʻa kuo nau fai honau lelei tahá ka ʻoku nau mamahi ko e fehālaaki ʻa ʻenau fānaú:

“Ko e mātuʻa leleí, ko ha niʻihi ia kuo nau ʻofa, feilaulau, tokanga, akoʻi mo feau e ngaahi fiemaʻu ʻa e fānaú. Neongo ia, kapau kuó ke fai kotoa ʻeni pea kei ongongataʻa, hē atu pe anga fakaemāmani pē hoʻo fānaú ʻaʻau, ʻokú ke hoko pē koe ko ha mātuʻa lelei. Mahalo ʻoku ʻi ai pē ha fānau ia kuo omi ki he māmaní te nau ʻahiʻahiʻi ha ngaahi mātuʻa ʻi ha ngaahi tūkunga kehekehe pē. ʻI he taimi tatau foki, ʻoku ʻi ai ha niʻihi ia te nau tāpuekina e moʻui ʻa ha tamai mo ha faʻē pea nau hoko kinautolu ko ha fiefiaʻanga ʻo e mātuʻa ko iá” (ʻi he Conference Report, Oct. 1983, 94; pe Ensign, Nov. 1983, 65).

ʻOange ʻa e foʻi maka naʻá ke haʻu mo iá ki ha taha he kalasí (vakai ki he “Teuteú” fika 4), peá ke kole ange ke ne ʻai ʻa e foʻi maká ʻi muʻa ʻi hono mata ʻe taha. Kole ange ke ne fakamatalaʻi mai ʻa e meʻa ʻoku sio ki aí. Lau ange leva ʻa e fakatātā ko ʻeni naʻe fai ʻe ʻEletā Lisiate G. Sikoti ʻi heʻene mēmipa he Kau Fitungofulú:

“Kapau te u toʻo ha foʻi maka ʻo ʻohake ia ke ofi ʻaupito ki hoku matá, ʻe hangē ia ko ha fuʻu foʻi maka fōlahí. Ko e meʻa pē ia te u lava ʻo sio ki aí. ʻOku hoko leva ia ko ha meʻa fakaongosia, ʻo hangē ko e ngaahi palopalema ʻa ha taha ʻoku tau ʻofa ai, ʻa ia ʻoku tau fehangahangai mo ia ʻi he taimi kotoa pē ʻoku tau ʻā hake aí. Ko e taimi ko ia ʻe ʻosi kotoa ai ʻa e meʻa kotoa pē te mou lava ke fai ke tokoni aí, ʻoku totonu leva ke mou tuku atu ia ki he toʻukupu ʻo e ʻEikí, pea ʻoua te mou toe hohaʻa ki ai. ʻOua naʻa mou ongoʻi halaia ʻi ha ʻikai te mou lava ke fai ha tokoni ki aí. ʻOua naʻa mou fakamoleki homou iví ʻi haʻamou nofo ʻo hohaʻa taʻe ʻaonga ki ha meʻa. ʻE hanga ʻe he ʻEikí ʻo toʻo atu ʻa e kiʻi foʻi maka ko iá mei ho fofongá, peá ne liʻaki ia, fakataha mo e ngaahi palopalema te mou fepaki mo ia ʻi hoʻomou fakalakalaka taʻengatá. Te mou toki vakai leva ki ai ʻo fakatatau ki he ʻilo totonú. Pea te mou toki maʻu ai mo e ngaahi ueʻi fakalaumālie pea mou ʻiloʻi ʻa e founga ke mou fai ai ha tokoni lahi angé. Te mou maʻu ha melino mo ha fiefia ʻoku lahi angé, pea ʻe ʻikai te mou taʻe tokanga ki he niʻihi kehe ʻoku nau fie maʻu kimoutolú, pea te mou lava ai ke fai ha tokoni lahi ange tuʻunga ʻi he ʻilo taʻe ngata ko iá” (ʻi he Conference Report, ʻEpeleli 1988, 70; Tūhulu Siulai 1988, 68).

Ko e hā ha ngaahi founga ʻe lava ke fakahā ai ʻe he mātuʻá ʻenau ʻofa taʻetukua ki ha foha pe ʻofefine kuo hē atú? ʻE lava fēfē ke nau fakahaaʻi ʻa e ʻofa ko ʻení kae ʻikai fakalaloaʻi ai ʻa e meʻa kuo fai ʻe he fohá pe ʻofefiné?

Lau ʻa Luke 15:11–32 mo e kau akó. Fakamatalaʻi ange ʻoku ʻiloa ʻa e ngaahi veesi ko ʻení ko e talanoa fakatātā ʻo e foha maumau koloá, ka ʻe lava pē ke toe pehē ko e talanoa fakatātā ʻo e tamai ʻofá.

Ko e hā ʻa e meʻa ʻoku tau ako mei he talanoa ko ʻení fekauʻaki mo e hanga ʻe he ʻofa ʻa e mātuʻá ʻo liliu ʻa e fānau kuo nau hē atú?

Lolotonga e hoko ʻa Palesiteni Kōtoni B. Hingikelí ko e Tokoni ʻUluaki ʻi he Kau Palesitenisī ʻUluakí, naʻá ne fai ai e akonaki ko ʻení:

“ ʻI he kotoa e hisitōlia ʻo e ngaahi toʻutangatá, kuo fakafonu ia ʻe he ngāue ʻa ha fānau ʻoku angatuʻu, fakamamahi mo fakatupu loto mamahí, pea neongo e ngaahi angatuʻu ʻa e fānaú ne hanga maʻu pē ʻe he haʻi mālohi ko ia ʻo e moʻui fakafāmilí ʻo puke mai ʻa e fānau ʻoku angatuʻú.

“ ʻOku ʻikai ha toe talanoa te u fakaʻofoʻofaʻia ange ai ka ko e talanoa ko ia ne fai ʻe he ʻEikí ʻa ia ʻoku hā ʻi he tohi ʻa Luke vahe nimá. Ko e talanoa ia ki ha foha taʻemanonga mo taʻefiemālie naʻá ne fie maʻu ʻe ia ʻa e konga ʻo e koloa tukufakaholo naʻe ʻaʻaná peá ne maumauʻi ia ʻo ʻosi. Naʻá ne foki mo e loto fakatomala ki heʻene tamaí pea ʻi he vakai atu ʻa e tamaí ʻokú ne kei mamaʻó naʻá ne lele ki ai ʻo fāʻofua mo ne ʻuma kiate ia” (ʻi he Conference Report, Apr. 1991, 95; pe Tūhulu, Siulai 1991, 72).

Fakaʻosí

Fakamamafaʻi ange ʻa e mahuʻinga ko ia hono fakahinohinoʻi ‘o e fānaú ki he fai ʻenau ngaahi filí pea tukuange kinautolu ke ako meí he nunuʻa ʻo ʻenau ngaahi filí. Fakamanatu ange ki he kau akó ʻe tāpuakiʻi ʻe he ʻEikí ʻa e ngaahi mātuʻá ʻi heʻenau hokohoko atu hono ʻofaʻi mo ngāue mo ʻenau fānaú. Hili iá peá ke lau ange ʻa e lea ko ʻeni naʻe fai ʻe Pīsope Lōpeti D. Heili lolotonga ʻene kei ʻi he Pīsopeliki Pulé:

“Kuo pau pē ke ʻi ai ha fehālaaki ʻa e mātuʻá ʻi heʻenau fakahoko ʻení, ka ʻo kapau ʻe maʻu ʻe he tokotaha kotoa pē ha loto-māʻulalo, mo ha tui, pea nau lotu mo ako te nau lava pē ʻo ʻilo ʻa e founga ʻoku lelei angé pea ʻi heʻenau fai iá te nau tāpuekina ai ʻa e moʻui ʻa honau fāmilí ʻi he taimí ni pea nau akoʻi ai ha ngaahi ʻulungāanga tukufakaholo totonu ki honau ngaahi toʻutangata ʻi he kahaʻú” (ʻi he Conference Report, ʻOkatopa 1993, 10–11; pe Tūhulu Sānuali 1994, 12).

Fakamoʻoniʻi e ngaahi moʻoni ne mou aleaʻi ʻi he lēsoní ʻo fakatatau mo e ueʻi ʻa e Laumālié.

Vakai ki he peesi 77–81 ʻo e Tohi Fakahinohino Ako ʻa e Kau Ako ki he Ngaahi Fetuʻutaki ʻi he Nofo-malí mo e Fāmilí. Fakalotolahiʻi ʻa e kau akó ke nau toutou fakamanatu ʻa e ngaahi tokāteline mo e ngaahi tefitoʻi moʻoni kuo nau ako ki aí ʻaki haʻanau (1) fai ha taha ʻo e ngaahi fokotuʻu ʻoku hā atu ʻi he “Ngaahi Fakakaukau ki Hono Fakahokó” pea mo (2) lau ʻa e lea ko ia naʻe fai ʻe ʻEletā M. Lāsolo Pālati ko e “Hangē ha Afi Taʻe Faʻa Maté.” Fakamahino ange ʻe lava ke maʻu ʻe he ongo meʻa malí ha ngaahi lelei lahi mei haʻana lau mo aleaʻi fakataha ʻa e ngaahi fakamatala ʻi he tohi fakahinohino akó.