Faatomuaga

Faamoemoega o lenei Aoaoga

O le aoaoga o le Faaipoipoga ma Fegalegaleaiga Faaleaiga ua fuafuaina lea e fesoasoani i tagata o le Ekalesia i le faamalosia o faaipoipoga ma aiga ma maua le olioli ia latou fegalegaleaiga faaleaiga. Ua vaevaeina lea aoaoga i ni vaega se lua. E aoga faapitoa lava le Vaega A, “Faamalosia o Faaipoipoga,” mo ulugalii faaipoipo faapea ma tagata o le Ekalesia o e o loo saunia mo le faaipoipoina. O le Vaega E, “Tiutetauave o Matua i le Faamalosia o Aiga,” e fesoasoani lea i matua ma matua o matua ia latou taumafaiga i le “tausi atu i…[fanau] i aoaiga ma apoapoaiga a le Alii” (Efeso 6:4).

O lea aoaoga e faaautu i mataupu faavae ma aoaoga o loo aoaoina i tusitusiga paia faapea ma perofeta ma aposetolo o aso e gata ai. O loo faamamafaina faapitoa lava i le “O le Aiga: O se Folafolaga i le Lalolagi,” e pei ona i ai i le itulau iv o lenei taiala mo suesuega.

Mo se vaaiga lautele i lenei aoaoga, tagai i le itulau vii-viii. Ia tagai soo i lenei vaaiga lautele mo le iloiloina ai o mataupu faavae ma aoaoga na e aoaoina ma ia saunia ai oe lava ia mo lesona o le a oo mai.

Auai i le Aoaoga e Tusa ma Ou Lava Tulaga Manaomia

Ua ia te oe le faitalia e auai e tusa ma o oe lava tulaga manaomia. Mo se faataitaiga, afai ua e faaipoipo ae leai sau fanau, e mafai ona e filifili e auai i uluai lesona e valu ae le o lesona mulimuli e valu. Afai o oe o se matua nofo to’atasi, e mafai ona e filifili ina ia e auai na o lesona i le Vaega E.

Auai i Mea e Fai o le Aoaoga

O le filifili e auai i mea e fai o lenei aoaoga, ua e faaalia ai se agaga naunautai ina ia faamalosia lou aiga. Ina ia maua le aoga atoatoa o le aoaoga, e tatau ona e fesoasoani atu i talanoaga a le vasega, faaaoga lenei taiala mo suesuega, ma ia taumafai e faatino mataupu faavae ma aoaoga e te aoaoina.

Faaalia o Manatu i Talanoaga a le Vasega

A’o faaalia ou manatu faapea ma manatu o isi tagata o le vasega i talanoaga a le vasega, o le a mafai ona e valaauina le faatosinaga a le Agaga Paia ma faamalamalama ai e le tasi le tasi. Sa fetalai mai le Alii, “Ia tofia mai ia te outou lava le faia’oga, ma ‘aua ne’i failauga uma fa’atasi, a ia tu’uina atu i tagata taito’atasi e lauga ma ia fa’alogo uma i ana upu, ina ia fa’amalamalamaina uma i lauga a tagata uma, ina ia tutusa le avanoa i tagata uma” (MFF 88:122).

O i latou uma o e auai i le aoaoga e mafai ona aoao mai le tasi i le tasi, e tusa lava po o le a le tele o lo latou poto masani i faaipoipoga po o le tausia o fanau. O lou auai i le vasega o le a sili ona tauia a’o outou fetufaai le poto masani e faatatau i lesona ma ia faalogo ma le faaaloalo a’o faapea foi ona faia e isi. A’o e molimau atu e uiga i mea moni o loo talanoaina, e mafai ona e faamalosia lau molimau faapea foi ma molimau a isi tagata. Ae ui i lea, e tatau ona e faaeteete ina ne’i talanoaina ni tulaga militino po o tulaga paia e le talafeagai ma talanoaga e fai i le vasega. E tatau foi ona e faaeteete i tapula’a o le taimi o le vasega ma ia manatu mamafa i le faiaoga ma isi tagata o le vasega.

Faaaogaina o Lenei Taiala mo Suesuega

I le vaiaso e sosoo ma lesona taitasi, ia faaaoga lenei taiala mo suesuega e toe faamanatu ai mea na e aoaoina. O loo i ai i le taiala “Manatu Mo Le Faatinoina,”o ni fautuaga ia e fesoasoani ia te oe ina ia ola e tusa ai ma mataupu faavae ma aoaoga na e aoaoina i lesona taitasi. E le gata i lea, o loo i ai foi ni faamatalaga se tasi po o le lua a le Au Pulega Aoao o le Ekalesia i lesona taitasi. Afai ua e faaipoipo, e mafai ona e maua mea aoga mai le faitau ma le talanoaina o faamatalaga faatasi ma lou toalua.

O nisi o faamatalaga a taitai sa muai ona tuuina mai i se tulaga o ni lauga i konafesi aoao ma isi taimi, a’o isi sa tusia mo mekasini a le ekalesia. Talu ai ona o ia faamatalaga sa aumaia mai tusi eseese, o le mea lea e tatau ai ona fai ni nai suiga laiti ina ia talafeagai faamatalaga o lenei taiala mo suesuega. Mo se faataitaiga, o nisi o faamatalaga tomua ua aveesea mai lauga o konafesi aoao, ma o nisi o ulutala ma upu sii ua suia. O aoaoga e tumau pea lava e le suia.

Faatinoina o Mataupu Faavae ma Aoaoga e te Aoaoina

E le lava le na ona aoao o le talalelei. Ina ia aoga le talalelei i lou olaga, e tatau ona e ola e tusa ai ma mea e te aoaoina. Sa fautua mai Peresitene Harold B. Lee, le Peresitene lona 11 o le Ekalesia, e faapea:

“O mataupu faavae uma ma sauniga o le talalelei, a tuu i se isi itu, o se valaau atu ina ia aoao i le talalelei e ala i le faatinoina o ona aoaoga. E leai se tagata e iloa le mataupu faavae o le sefuluai se’i vagana ua totogi e ia le sefuluai. E leai se tasi e iloa le mataupu faavae o le Upu o le Poto sei vagana ua tausia e ia le Upu o le Poto. O tamaiti, po o tagata matutua ona o lea itu, e le mafai ona talitonu moni i le sefuluai, le Upu o le Poto, tausia o le Aso Sapati ia paia, po o le tatalo i le na ona faalogologo atu i se isi tagata o talanoa mai e uiga i nei mataupu faavae. Tatou te aoaoina le talalelei e ala i le ola ai. …

“… E le mafai ona tatou iloa se mea e uiga i aoaoga o le talalelei sei vagana ua tatou tofo i faamanuiaga e oo mai e ala i le ola i mataupu faavae taitasi” (Stand ye in Holy Places {1974}, 215).

O isi Mea e Maua ai le Fesoasoani

O mea o loo i lalo ua saunia e le Ekalesia, e maua ai isi faamatalaga e faatatau i mataupu o loo talanoaina i lenei aoaoga. E maua ia mea mai fale tusi o le Ekalesia. Atonu e te manao e aumaia ia tusi ma faaaoga i lou aiga.

Tusitaiala mo le Aiga (31180). O lenei tusitaiala o loo faamatala ai le faatulagaga o le aiga, maua ai faamatalaga e uiga i le aoaoina atu o le talalelei i le aiga, ma o loo otootoina atu ai le faasologa o le faiga o sauniga ma faamanuiaga a le perisitua.

Faamatalaga e uiga i le faaipoipoga ma le aiga i mekasini a le Ekalesia.
Tusi Faavae o Afiafi Faaleaiga (31106). O lenei tusi e fesoasoani ai i matua ma fanau i le saunia o lesona mo le afiafi faaleaiga (3–197, 213–268). O loo i ai auala mo le faamanuiaga o afiafi faaleaiga (201–210) ma o loo i ai fautuaga mo le aoao atu o mataupu faavae faapitoa atoa ma tiutetauave i fanau (271–296). O loo i ai foi ma auala e fai ai gaoioiga faaleaiga (299–364).
O le Aoao atu, e Leai se Isi Valaauga e Sili Ai (36123). O lenei tusi o loo i ai mataupu faavae ma fautuaga e mafai ona fai e fesoasoani ai i tagata o le Ekalesia ina ia alualu i luma i le avea ma faiaoga o le talalelei. E aoga faapitoa lava mo matua le Vaega O, “Aoao Atu i Totonu o le Aiga” (itulau 133-156).
Tusi Taiala Faafaiaoga (34595). O lenei tusitaiala o loo maua ai ni fautuaga mo le faaleleia o le aoaoina atu ma le aoaoina o le talalelei.
Mo le Malosi o le Autalavou (34285). O loo otootoina i lenei tamai tusi tulaga o le ekalesia mo tafaoga faamasani, ofu ma teuga, faauoga, faamaoni, tautala, faasalaulauga lautele, maloloina faalemafaufau ma faaletino, musika ma siva, mama mai le feuiai, Aso Sa, salamo, agavaa ma le auauna atu.
O se Taiala a Matua (31125). O loo i ai i lenei tusitaulima ni fautuaga e fesoasoani i matua i le aoaoina o a latou fanau e uiga i tulaga vavalalata o le tino.
Cornerstones of a Happy Home (33108). O loo i ai i lenei tamai tusi se lauga sa tuuina atu e Peresitene Gordon B.Hinckley a’o avea o ia ma Fesoasoani Lua i le Au Peresitene Sili.
One for the Money: Guide to Family Finance (33292). O lenei tusi itiiti, e pei ona sa tusia e Elder Marvin J. Ashton o le Korama a Aposetolo e Toasefululua, o loo tuuina atu ai ni fautuaga e mafai ona fai e tusa ma le pulea o tupe a le aiga.