Lesona 1

“O le Aiga o le Totonugalemu lea i le Fuafuaga a Le Foafoa”

Auala mo le Faatinoga

E tusa ai ma ou lava tulaga manaomia ma tulaga o i ai, ia mulimuli i se tasi po o mea uma o loo ta’ua i nei fautuaga.

Toe faamanatu le “O le Aiga: O se Folafolaga i le Lalolagi” (itulau iv). Ia filifili i ni auala o le a sili atu ona outou mulimuli lelei ai i lenei fautuaga valoia.
Aumai se pepa lautele o loo tusia ai le “O le Aiga: O se Folafolaga i le Lalolagi” (35602 po o le 35538) mai se faletusi a le Ekalesia. Ia matilatila le faapipiina i totonu o lo outou fale.

Faamatalaga Faatonuina e Faitauina

Suesue i le faamatalaga tusia o loo i lalo. Afai ua e faaipoipo, ia faitau ma talanoaina le faamatalaga tusia ma lou to’alua.

Mo le Taimi nei ma Le Faavavau Atoa

Elder Boyd K. Packer
O le Korama a Aposetolo e Toasefululua

O le Ala Sili o le Fiafia

Uso e ma tuafafine, o tusitusiga paia ma aoaoga o le Talalelei ma perofeta o loo tautala e uiga ia i tatou i le muai olaga e faapea o ni atalii ma afafine, fanau faaleagaga a le Atua.¹ O atalii ma afafine sa i ai muamua, ma e le i faapea na amata mai ina ua fanauina i le olaga faaletino.²

I le fono sili i le lagi,³sa tuuina atu ai le fuafuaga a le Atua:⁴ o le ata lea o le faaolataga,⁵ o le fuafuaga o le togiola,⁶ o le fuafuaga sili o le fiafia.⁷ O lea fuafuaga e maua ai se avanoa e faataitai ai; e tatau i tagata uma ona filifili i le va o le lelei ma le leaga.⁸ O Lana fuafuaga ua saunia ai se Togiola, o se taulaga laveai, o le Toetu, ma, afai tatou te usitai i ai, o le a tatou toe foi atu i le afioaga o le Atua.

Sa fouvale le fili ma faia sana lava fuafuaga.⁹O i latou o e na mulimuli ia te ia sa le maua se avanoa e maua ai se tino faaletino.¹⁰ O lo tatou i ai iinei ua faamaonia ai sa tatou talia le fuafuaga a lo tatou Tama.¹¹

O le faamoemoega e tasi o Lusifelo o le fouvale atu lea i le fuafuaga sili o le fiafia, ia faaseseina e ua sili ona mama, sili ona matagofie ma faatosina i mea e fai e tagata i le olaga: alofa i le va o le alii ma le tamaitai, alofa, faaipoipoga, ma le avea ma matua.¹² Ua mulimuli solo ia te ia agaga leaga o le lotomomomo ma le nofosala ¹³. Ua na o le salamo lava e mafai ona faamaloloina ai mea na te faaleagaina.

O le Fuafuaga a le Atua e Manaomia Ai Le Faaipoipoga Ma Le Aiga

O le fuafuaga o le fiafia e manaomia ai le tu’u faatasia ma le amiotonu o le alii ma le tamaitai, tamatane ma le fafine, tane ma le ava.¹⁴ Ua aoao mai mataupu faavae ia i tatou i le ala e tali atu ai i faatosinaga malolosi o le olaga nei o lo o masani ona manumalo i le ala tatou te amio ai.

O se tino ua gaosi faatatau i le faatusa o le Atua sa foafoaina lea mo Atamu,¹⁵ ma sa faafeiloai atu o ia i le Faatoaga.¹⁶ I le taimi muamua lava, sa na o Atamu. Sa umia e ia le perisitua,¹⁷ peitai, i le na o ia, e le mafai ai ona ia faataunuuina faamoemoega o lona foafoaga.¹⁸

E leai se isi tagata e mafai ona fesoasoani ia Atamu i le faataunuuina o faamoemoega o lona foafoaga. E le mafai foi i le na o ia po o le faatasi foi ma isi alii ona alualu ai i luma Atamu. E le mafai foi i le na o Eva ma se isi tamaitai. O le tulaga lea sa i ai i lea taimi. Ua faapea foi i aso nei.

Sa foafoaina Eva, o se fesoasoani. Sa faavaeina le faaipoipoga,¹⁹ aua sa poloaiina Atamu ina ia faatasi ma lana ava (e le na o le faatasi ma se fafine) a ia “le o se isi.”²⁰

Sa tuuina atu ia Eva se filifiliga, e mafai ona ta’ua ai faapea.²¹ E tatau ona viia o ia mo le mea na ia filifilia. Aua “na pa’u Atamu ina ia iai le tagata.”²²

Sa faamatalaina e Elder Orson F.Whitney le pa’u e faapea “e lua ona itu—o le agai i lalo, peitai e agai i luma. Na avea lea mea ma mea na aumaia ai le tagata i le lalolagi ma faatuina ona vae i le ala agai i luma.”²³

Sa faamanuia e le Atua Atamu ma Eva “ma ou fai atu ia i laua: Ia lua fanafanau ma uluuluola.”²⁴ O le mea lea sa faavaeina ai le aiga.

E Tutusa le Faatauaina e le Atua o le Tane ma le Fafine

E leai se mea o i ai i faaaliga o loo ta’u mai ai e faapea e sili i le silafaga a le Atua le alii na i lo le tamaitai, po o le faasilisilia foi e Ia atalii na i lo afafine.

O uiga lelei uma o loo tusia i tusitusiga paia— alofa, olioli, filemu, faatuatua, amio atua, agalelei—e fetufaai ai alii ma tamaitai,²⁵ ma o le sauniga o le perisitua e sili ona maualuga i le olaga nei ua na o le alii ma le tamaitai ua tuuina atu i ai.²⁶

Ina ua mavae le Pa’u, sa pule le tulafono faalenatura i le fanau mai o le tagata i le ola faaletino. O loo i ai mea e pei ona sa ta’ua e Peresitene J. Reuben Clark Jr. o ni “ulaga” o le natura,²⁷ e mafua ai le tele o faaletonu, mea leaga ma tulaga le atoatoa. Ae ui i lea e ui ina e le o ni mea sa’o i le filifiliga a le tagata, ae ua foliga mai ua talafeagai ma faamoemoega o le Alii i le faataitaiina o le tagata.

O le mulimuli i mea uma ua ta’uaogaina, o le tali atu i uunaiiga amiotonu uma, faapea ma le faatinoina o fegalegaleaiga lelei i le va o tagata o mea ia ua saunia ma ua faamaonia i mataupu faavae o le Talalelei a Iesu Keriso ma ua puipuia i ni poloaiga ua faaalia i Lana Ekalesia.

O Le Tiute O Alii Ma Tamaitai

Se’i vagana ona eseese le tulaga e i ai Atamu ma Eva i le natura, e le mafai ona la uluuluola ma faatumuina le lalolagi.²⁸ O le tulaga o le eseese o i laua o le mea autu lea i le fuafuaga o le fiafia.

O nisi tiute ua talafeagai mo le alii a’o isi mo tamaitai. Ua tautino mai i tusitusiga paia ma tulaga o le natura e faapea o le tane o le e puipui, e saunia mea e ola ai.²⁹

O tiutetauave o le perisitua e faatatau i le taitaiiga o le Ekalesia o tulaga ia e manaomia i fafo atu o le aiga. O ia tiute ua poloaiina mai le lagi ina ia tuuina atu i alii. Sa faapena ona fai talu mai le amataga, aua sa faaalia e le Alii e faapea “o le faatulagaga a lenei perisitua na faamauina e tuufaasolo mai le tama i le atalii. … Na faatuina lenei faatulagaga i aso o Atamu.”³⁰

Ua le faapea e sili se alii e umia le perisitua na i lo se fafine i le agavaa mo le faaeaina. O le fafine, i lona lava natura, o se tagata e galulue faatasi ma le Atua i le foafoaina o agaga ma o le tagata autu e fafagaina le fanau. O uiga lelei ma amioga lelei e pei ona faalagolago i ai le atoatoa ma le faaeaina e oo mai lava i se tamaitai ma e faaleleia ia uiga e ala i le faaipoipoga ma le avea ma tina.

E faaee atu le perisitua i alii agavaa ina ia o gatasi ma le fuafuaga a le Tama e uiga i le fiafia. O tulafono o le natura ma le afioga faaalia a le Atua e galulue faatasi, ma e sili lava ona galulue faatasi lena auala.

O le perisitua o loo i ai se tiutetauave ofoofogia. “E le mafai ona faatumauina se mana po o se uunaiina i le pule o le Perisitua, tau lava i le tauanau atu, i le faapalepale, le agalelei, ma le agamalu, ma le alofa faamaoni; i le agalelei, ma le malamalama mama.”³¹

Afai o se tagata na te “faatonuina, pe pulea pe faamalosia…i soo se faiga lava o le amioletonu,”³² o lona uiga ua solia e ia “le tautoga ma le feagaiga lea e a le perisitua.”³³ Ona “punitia (lea) o le lagi; e tiga le Agaga o le Alii.”³⁴ Afai na te le salamo, o le a le maua e ia ona faamanuiaga.

Talu ai ona ua ta’u mai i ni lapataiga mai le lagi le eseese o le tiute o le tane ma le fafine, o le mea lea ua sili ai ona faataitaiina i mea lelei e faia i le olaga faaleaiga.

Sa ou faalogo talu ai i se failauga i le sauniga faamanatuga o faitio mai e faapea ua le malamalama o ia i le pogai e ta’ua soo ai e fanau a lana fanau le o atu i le fale o tina matua, ae le mafai lava ona faapea mai e o atu i le fale o tama matua. Sa ou foia lena mea lilo mo ia: E le taoina e tama matua ni pai!

O Tulafono Faalenatura Ma Le Faaleagaga E Faavavau

O tulafono faalenatura ma le faaleagaga e pei ona pulea ai le olaga na faavaeina a’o le i foafoaina le lalolagi.³⁵ O ia tulafono e faavavau, e pei foi ona i ai i taunuuga o le usiusitai po o le le usiusitai i ai. Ua le faaautuina ia tulafono i fegalegaleaiga po o upu fai. E le mafai ona suia ia mea. E leai se uunaiiga, po o se tetee, po o upu fai o le malo e mafai ona suia ai ia mea.

I le tele o tausaga ua mavae sa ou vaaia Seminare a tagata Initia. Ina ua ou asiasi atu i se aoga i Alburqueque, sa ta’u mai e le pule o lea aoga ia te a’u se mea na tupu i se vasega tausaga muamua.

I le faagasologa o se lesona, sa savalivali solo mai i totonu o le potu se tamai pusi ma tosina ese ai mafaufau o le au laiti. Sa aumaia lea tamai pusi i luma o le vasega ina ia mafai ona iloa atu e tamaiti uma.

Sa fesili se tasi tamaitiiti, “pe o se tamai pusi po’a po o se tamai pusi fafine?”

Sa faapea atu le faiaoga ma le le saunia mo lena talanoaga, “e le afaina; ua na o se tamai pusi.”

Ae sa tauanau mai lava tamaiti, ma sa faapea mai se tasi tama laitiiti, “ua ou iloa le auala e mafai ai ona tatou iloa po o se tamai pusi po’a po o se tamai pusi fafine.”

Sa faapea atu le faiaoga ma lona popole, “ua lelei, ia e ta’u mai ia i matou le ala e mafai ona matou iloa ai pe o se tamai pusi po’a po o se tamai pusi fafine.”

Sa tali le tama, “e mafai ona tatou palota i ai!”

E le mafai ona suia nisi mea. E le mafai ona suia mataupu faavae.

“O mataupu faavae ua faaalia mai,” o le tala lea a Peresitene Uilifoti Uitilafi, “mo le faaolataga ma le faaeaina o le fanauga a tagata… .o ni mataupu faavae ia e le mafai ona e suia. O ni mataupu faavae ia e le mafai ona faaumatia e ni tuufaatasiga o alii [po o fafine foi]. O ni mataupu faavae e le mafai ona mavae ese atu….O se tulaga e le au i ai le malosi o le tagata na te taulimaina pe faaumatiaina. …E le mafai foi e le malosi tuu faatasi o le lalolagi atoa ona faaumatia nei mataupu faavae….E leai se iota po o se mataitusi o nei mataupu faavae e mafai ona aveeseina.”³⁶

I le taimi o le Taua Lona II a le Lalolagi, sa valaauina alii e o atu e tau. Sa amata i lea lava taimi ona galulue ava ma fafine uma o le lalolagi i le galuega e tasi e sili atu nai lo se isi lava taimi muamua. O le mea sa sili ona aafia tele i le taua o le aiga. O loo tumau pea lea tulaga e oo mai i lenei augatupulaga.

Ia Fanafanau ma ia Uluola ma ia Tumu Ai Le Lalolagi

I le Konafesi Aoao ia Oketopa 1942, sa tuuina mai ai e le Au Peresitene Sili se savali i le “Aupaia o loo i laueleele uma mai ituaiga,” ma sa latou faapea ma ai, “ona o le pule ua tuuina mai ia i matou le Au Peresitene Sili o le Ekalesia, matou te lapataiina o tatou tagata.”

Ua latou faapea mai, “O se tasi o Ana poloaiga muamua ia Atamu ma Eva, na fetalai atu ai le Alii: ‘Ia fanafanau ia ma ia uluola ma ia tumu ai le lalolagi.’ Ua toe fetalai mai foi o ia i lena poloaiga i o tatou nei aso. Ua toe faaalia mai e ia i lenei augatupulaga mulimuli le mataupu faavae o le faavavau o le feagaiga o le faaipoipoga. …

“Ua ta’u mai e le Alii ia i tatou o le tiute o tane uma ma ava o le usiusitai lea i le poloaiga na tuuina atu ia Atamu ina ia fanafanau ma uluola ma ia tumu ai le lalolagi, ina ia mafai ai e le anoano o agaga o loo faatali mo o latou tino o aano ona o mai iinei ma agai i luma i lalo o le fuafuaga sili a le Atua o le avea lea ma agaga atoatoa, aua a aunoa ma nei tino o aano ma ivi e le mafai ona latou agai atu i lo latou taunuuga ua fuafua e le Atua. O le mea lea, e tatau ai i tane ma ava uma ona avea ma se tama ma tina i Isaraelu o ni fanau e fananau mai i lalo o le feagaiga paia ma le faavavau.

“O le aumaia o nei agaga filifilia i le lalolagi, ua faataunuuina ai e tama taitoatasi ma tina taitoatasi mo nei agaga faitino ma le Alii lava ia e ala i lo latou maua o le avanoa na ia ofo mai, se tiutetauave e sili ona paia, aua o le taunuuga o lena agaga i le faavavau o le a oo mai, o faamanuiaga po o faasalaga o le a faatali mai mo lena agaga mulimuli ane, e faalagolago lea, i se vaega tele, i le tausiga, aoaoga, o le a tuuina atu e matua i lena agaga.

“E leai se matua e mafai ona sola ese mai lena avega ma lena tiutetauave, ma le faataunuuina tatau o lena tiute, ma o le a matua tu’uaiina i tatou e le Alii. E leai se tiute sili atu ona lelei nai lo lenei e mafai ona tauaveina e tagata faaletino.”

O Se Valaauga Paia Le Avea Ma Tina

Sa saunoa mai le Au Peresitene Sili e faatatau i tina e faapea: “O le avea ma tina o se valaauga e paia, o se valaauga paia lea mo le faataunuuina o le fuafuaga a le Alii, o se faamanuiaga o le tuuina atu i ai o le loto atoa mo le tausia ma le fafagaina, o le tino, mafaufau, ma le agaga, o i latou o e na tausia lo latou uluai tofi ma o e na omai i lenei lalolagi mo latou tofi lona lua ia iloa ai pe latou te faia mea uma o le a poloaiina ai i latou e le Alii lo latou Atua.’ (Aperaamo 3:25) O le taitaiina o i latou ina ia tausia lo latou tofi lona lua o le galuega lea a tina, ma ‘o i latou foi o e tausia lo latou tofi lona lua o le a faaopoopoina i luga o o latou ulu le mamalu e faavavau faavavau lava.’ [Aperaamo 3:26]

“O lenei auaunaga paia o le avea ma tina e na o tina lava e mafai ona tuuina atu. E le mafai ona faasafua atu i isi. E le mafai e tamaitai tausi mai ona faia; e le mafai foi ona faia i fale e tausi ai pepe; e le mafai foi ona faia e se fesoasoani e totogiina—ua na o le tina lava, ma fesoasoani i ai i se tulaga sili e mafai ai lima agalelei o le tama, uso, ma tuafafine, e mafai ona latou tuuina atu le fesoasoani atoatoa i le tausiga o ia agaga.”

Sa fautua mai le Au Peresitene Sili e faapea “O le tina o le na te tuuina atu lana tama i le tausiga a se isi, ina ia mafai ai ona faia e ia ni galuega e ese mai galuega a le tina, pe mo le auro, po o le ta’uta’ua, po o le auauna atu foi i le malo, e tatau ona manatua ‘o le tama ua tuulafoaiina, e tupu ai le ma o lona tina’ (Faataoto 29:15). I o tatou nei aso ua fetalai mai le Alii a le aoaoina e matua a latou fanau i mataupu faavae o le ekalesia ‘o le a pau lea agasala i matua’ (MFF 68:25).

“O le avea ma tina e latalata atu i le lagi. O se galuega sili lea ona maualuga ma paia e tauaveina e se tagata. E tuuina ai o ia o lå faamamalu i lona valaauga paia e aupito atu i agelu.”³⁷

O lena savali ma le lapataiga mai le Au Peresitene Sili o loo sili ona manaomia, e le faaitiitia i aso nei nai lo le taimi na tuuina mai ai. Ma e leai se siufofoga mai soo se faalapotopotoga o le ekalesia i soo se tulaga lava e tutusa ma le siufofoga o le Au Peresitene Sili.³⁸

Soo se tagata o lå ona o tulaga o le natura po o tulaga e oo i ai na te le maua ai faamanuiaga o le faaipoipoga ma le avea ma matua, po o se tasi foi ua tatau ona galue na o ia i le tausia o tamaiti ma galue e lagolagoina ai i latou, o le a leai se faamanuiaga e aveesea mai ia te ia i le faavavau—pe afai latou te tausia poloaiga.³⁹ E pei lava ona sa folafola mai Peresitene Lorenzo Snow, “o lena mea ua mautinoa ma o se mea lelei.”⁴⁰

O Le Faataoto E Uiga i Oa Ma Ki

Ou te faaiuina i se faataoto.

E i ai se taimi na maua ai e se tagata ni ki se lua e fai ma ona tofi. O le ki muamua, sa faatonuina ai o ia, e tatala ai se ana e tatau ona ia puipuia i soo se tulaga lava. O le ki lona lua o le ki lea o se sefe i totonu o le ana o loo teu ai se oa taua lava. E tatau ona ia tatala lenei sefe ma saoloto i le faaaogaina o mea taua sa teu ai. Sa lapataiina o ia e faapea e toatele tagata o le a taumafai e faoa mai ia te ia lona tofi. Sa folafola atu foi afai e faaaogaina tatau e ia le oa taua, o le a faateleina ma e le mafai ona faaitiitia, ma e le mafai lava i le faavavau atoa. O le a tofotofoina o ia. Afai na te faaaogaina e manuia ai isi tagata, o le a faateleina ona faamanuiaga ma le olioli.

Sa alu atu toatasi lenei alii i totonu o le ana. Sa matala mai le faitotoa i lana ki muamua. Sa taumafai e tatala le oa taua i le isi ki, ae sa le mafai, ona sa i ai ni loka se lua i le sefe. Sa le mafai i lana ki ona tatala ai. E tusa lava po o le a le tele o lona taumafai, sa le mafai lava ona ia tatalaina. Sa fiu lenei alii, ua uma ona tuuina mai ia te ia ki. Sa iloa e ia o lea oa o se oa ua tuuina lelei mai ia te ia. Sa usiusitai o ia i faatonuga, ae sa le mafai ona tatala e ia le sefe.

Sa sau se tamaitai i totonu o le ana. Sa umia foi e lea tamaitai se ki. Sa matua ese lava lea ki mai le ki na ia umia. Sa fetaui le ki a lea tamaitai ma le isi loka. Sa lagona e ia le lotomaualalo ina ua ia iloa e le mafai ona ia maua lona tofi e aunoa ma lea tamaitai.

Sa la osia se feagaiga o le a tatala faatasi e i la’ua le oa ma, e pei lava ona sa faatonuina, o le a ia vaaia lelei le ana ma puipui i ai; ae o le a puipuia e lea tamaitai le oa. Sa le i ai i lea tamaitai se popole ona, i le avea o ia ma leoleo o le ana, sa i ai i le alii ni ki se lua, aua o lona faamoemoe atoatoa o le vaai lea ua saogalemu le tamaitai a’o leoleo e ia le mea sili ona taua ia i la’ua uma. Sa tatala faatasi e i la’ua le sefe ma maua lo la tofi. Sa olioli i la’ua, aua, e pei lava ona sa folafola mai, e tului mai pea lea oa.

Sa fiafia tele i la’ua ina ua la iloa e mafai ona la tuu faasolo atu lena oa taua ia la fanau; e mafai e tamaiti taitoatasi ona maua le atoatoa o lea oa, e le faaitiitia se’ia oo lava i le augatupulaga mulimuli.

Atonu o nisi o lo la aiga o le a le mafai ona maua se soa o le o loo i ai le ki tatau, po o se tasi foi e agavaa ma naunau e tausia feagaiga e faatatau i le oa taua. E ui i lea, afai latou te tausia poloaiga, o le a le mafai ona faafitia faamanuiaga mai ia i latou e oo lava i le faamanuiaga aupito sili ona itiiti.

Talu ai ona sa faaosoosoina i la’ua e nisi e faaaoga sese le la oa taua, o le mea lea sa faaeteete ai i la’ua ina ia aoao atu i le la fanau ki ma feagaiga.

E i ai se taimi o le a oo mai ai i lo la aiga nisi o e o le a faaseseina pe loto leaga foi pe manatu faapito ona faapea ua tuuina atu i le isi ki e lua ae na o le tasi ua tuuina atu i le isi. O le a faitio mai å manatu faapito e faapea, “aisea, pe le mafai ea ona na o a’u e ona le oa e faaaoga i le mea ua ou loto i ai?”

O nisi sa taumafai e toe faafoliga ese le ki na tuuina atu ia i latou ina ia tutusa ma le isi ki. Sa manatu i latou, atonu o le a fetaui ai ma loka uma e lua. O le mea lea sa le mafai ai e i latou ona tatala le sefe. Sa le aoga a latou ki na toe faafoliga ese, ma sa le toe maua lo latou tofi.

O i latou o e na maua le oa ma le agaga faafetai ma usiusitai i tulafono e uiga i lea oa sa latou maua le olioli e le faatuaoia i le taimi nei ma le faavavau atoa lava.

Ou te molimau atu e uiga i le fuafuaga a lo tatou tama mo le fiafia, ma ou te molimau atu foi i le suafa o Le na aumaia le Togiola, ina ia ola ai.

Mai se lauga na saunia e Elder Packer i le Konafesi Aoao a le Ekalesia ia Oketopa 1993 (tagai Liahona, Ianuari 1994, 24–27).