Lesona 16

Tatalo Faaleaiga, Suesuega i Tusitusiga Paia a le Aiga, ma Afiafi Faaleaiga

Auala mo le Faatinoga

Mulimuli i se mea e tasi po o mea uma o nei fautuaga e tusa ai ma ou tulaga manaomia ma tulaga e i ai.

Afai e faia e lou aiga tatalo faaleaiga e le aunoa, suesuega i tusitusiga paia a le aiga, ma afiafi faaleaiga, ia mafaufau ma le agaga tatalo i ala e mafai ona outou faaleleia atili se mea e tasi po o le sili atu o nei mea. Afai e le faia e le tou aiga nei mea, ia mafaufau po o le a se mea o le a outou faia e fesoasoani ai i le faamautuina o nei gaoioiga i lo outou aiga.
I le avea o se aiga, fuafua se gaoioiga e mafai ona outou faia faatasi. Ia mafaufau i le sue i manatu o lo o i le itulau 299–364 o le Tusi Faavae o Afiafi Faaleaiga (31106).
Suesue i faamatalaga tusia o loo i le itulau 145-47 o le O le Aoao Atu, e Leai se Isi Valaauga e Sili Ai (36123).

Faamatalaga Faatonuina e Faitauina

Suesue i le faamatalaga tusia o loo i lalo. Afai ua e faaipoipo, faitau ma talanoaina faamatalaga tusia ma lou toalua.

O Faamanuiaga o Tatalo Faaleaiga

Peresitene Gordon B. Hinckley
Fesoasoani Muamua i le Au Peresitene Sili

Na tautino atu e le Aposetolo o Paulo ia Timoteo:

“Ia e iloa e oe lenei mea, o ona aso e gata ai e oo mai ai aso faigata.

“Aua e avea tagata ma e alolofa i latou ia i latou , o e mananao i tupe, o e loto vii, o e faamaualuga, o e upu leaga, o e le faalogo i matua, o e le faafetai, o e amio leaga,

“O e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei,

“O e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua” (2 Timoteo 3:1–4).

Ua manaomia ona toe faamamafaina atu le taua o le faamaoni, uiga lelei, ma le amio sa’o i o tatou vaitaimi. Na o lo tatou toe atiina a’e lava i le a’a o o tatou olaga o uiga lelei na e taua i tagata malamalama moni, o le a mafai ai ona suia tulaga o o tatou vaitaimi. O le fesili ua faafetaiaia i tatou ua faapea, O fea ea tatou te amata atu ai?

Ou te talitonu e tatau ona amata atu i lo tatou iloa o le Atua o lo tatou Tama lea e Faavavau, ma o i tatou o ana fanau; ma e tatou te talanoa ma Ia, ma tatou te iloa lona tulaga pule aoao; ma e tatou te aioi atu i aso taitasi mo lana taitaiga i a tatou mea e fai.

Ou te fautua atu o le toe foi i le faia o tatalo faaleaiga, o se tasi lea o vaifofo faapitoa e taofia ai le salalau solo o le faamai ua a’atia uiga o o tatou tagata. E le mafai ona tatou faamoemoeina se vavega ia tupu mai i se aso e tasi, peitai o se tupulaga o le a maua ai e i tatou se vavega.

E tusa o se tupulaga e tasi pe lua ua mavae sa avea ai tatalo faaleaiga i totonu o aiga o tagata Kerisiano i le lalolagi atoa, ma vaega o mea e faia i le aso e pei lava foi o le taumafa. A o faasolosolo ina faaitiitia lena masani, o le iuga ua oo i ai, o le faiifo o amioga lelei lea sa ta’ua e le Aposetolo o Paulo.

Ou te talitonu lava a’u e leai se mea e mafai ona suitulaga i le tootutuli faatasi i le taeao ma le afiafi o le tama, tina, ma le fanau. O se mea lelei e sili atu le taua i lo kapeta taugata, sili atu i lo pupuni mananaia, sili atu i lanu ua faapaleni lelei ma le poto, o se mea lea na te faaleleia ma faamatagofieina atili aiga.

O loo i ai se mea e uiga i le tootutuli lena e matua eseese lava ma uiga na faamatala e Paulo: “o le faamaualuga, …soona fai, ma le faafefeteina.”

O loo i ai se mea e uiga i le tootutuli faatasi o le tama ma le tina ma le fanau, lena na te aveesea isi uiga ia sa faamatala mai e Paulo: “o le le faalogo i matua, …ma le le lotoaiga.”

O loo i ai se mea e uiga i le talanoa atu i le Atua, lena e fesoasoani e tuu ese le uiga o le upuleaga ma le avea ma “e ua tele le manao i mea faafiafia a e leai se manao i le Atua.”

O le a aveesea uiga amio leaga ma le le loto faafetai, pe afai o le a faafetai faatasi tagata o le aiga i le Alii mo le ola ma le filemu ma mea uma ua latou maua. Ma a o latou faafetai atu i le Alii mo le tasi ma le tasi, o le a faatupuina i lena aiga se agaga fou talisapai, se agaga fou faaaloalo, ma se agaga fou o le alofa o le tasi i le tasi.

Ua ta’u mai e tusitusiga paia: “Ia e faafetai i le Alii lou Atua i mea uma” (MFF 59:7). Ma lenei foi: “E leai se mea e faia e tagata e tausuai ai le Atua, pe faatupuina ai lona toasa i nisi, tau lava o e le tautino e i ai lana pule i mea uma” (MFF 59:21).

A o tootutuli atu faatasi aiga i luma o le Alii ma manatua e matitiva, e le tagolima, ma e puapuagatia, o le a faatupuina ia i latou se alofa mo isi e sili atu ia te ia lava, ma se faaaloalo i isi,ma se faanaunauga e auauna atu i mea e manaomia e isi. E le mafai e se tasi ona ole atu i le Atua e fesoasoani mai i se tuaoi o puapuagatia e aunoa ma lona lagona le faagaeetia o ia e fai se mea e fesoasoani atu ai i lena tuaoi. E maoae naua vavega o le a tutupu mai i olaga o tagata o le lalolagi pe afai o le a latou manatu faapito a e tuuina atu i latou lava e auauna atu i isi. O nei vavega e mafai ona amata atu i talosaga faaleaiga e faia i aso taitasi.

E leai se tasi auala pito sili ou te iloa e mafai ona faamausaliina ai le alofa mo se atunuu, i lo le tatalo o matua i luma o a latou fanau mo le nuu o latou nonofo ai, ma talosagaina faamanuiaga a le Silisili Ese ia oo mai i luga o lena nuu, ina ia puipuia le saolotoga ma le filemu. E leai se isi auala pito sili ou te iloa e mafai ona totoina ai i loto o a tatou fanau se faaaloalo e manaomia naua mo taitai, i lo le manatua i a tatou talosaga faaleaiga i aso taitasi o i latou o tauaveina avega mamafa o tofiga faalemalo.

Ou te manatua lo’u vaai o tusia i laupapa o faaaliga a nisi aai o se faamatalaga e faitauina faapea, “O se malo e tatalo o se malo lea e i ai le filemu.” Ou te talitonu i lenei mea.

O le tatalo faatasi e mafai ona faamamaina ai mafatiaga faaleaiga. E mafai ona maua ai le faaaloalo i matua lena e taitaiina atu i le usiusitai. E mafai ona aumaia ai le agaga salamo lea na te aveesea le faamai o le malepe o aiga. O le tatalo faatasi tatou te ta’uta- ’u atu ai faatasi o tatou vaivaiga i luma o le Alii ma talosagaina ai faamanuiaga a le Alii ia oo mai i luga o le aiga atoa ma e o mau ai iina.

Ua loa ona faagaeetia a’u i se saunoaga a se alii o le ua leva talu ona maliu. Sa tusi atu Iakopo H. Moila (James H. Moyle) i le fanau a lana fanau e uiga i tatalo faaleaiga a lona lava aiga. Na ia faapea atu: “Matou te le o lava i le moega e aunoa ma lo matou tootutuli i se tatalo e talosagaina le taitaiga mai le lagi ma se faamaoniga. E mafai ona tutupu feeseeseaiga i ni aiga e sili ona pulea lelei, a e o le a aveesea na feeseeseaiga e ala atu i le …agaga tatalo…O lona uiga moni lava na te faatupuina ni olaga amiotonu i tagata. E taitaiina atu i le lotogatasi, alofa, faamagalo, ma le auauna atu.”

O le 1872 na toe o mai ai ma lana ava ma ona atalii e toalua le alii taitai’au o Tomasi L. Keni (Thomas L. Kane), o se uo lelei tele a o tatou tagata i aso o o latou puapuaga i Aioua (Iowa) i le ma le taimi lea na o mai ai le vaegaau a le Iunaite Setete i le Vanu o Sate Leki. Sa malaga atu i latou i le nuu o St. George faatasi ma Polika Iaga, e fai lava ma afe i po taitasi i aiga o tagata o le Ekalesia i luga o le ala. Sa tusi atu e le faletua o Keni ni tusi e tele i lona tama sa i Filatelefia i Penesilevania (Philadelphia, Pennsylvania). I se tasi o ia tusi na ia faapea atu ai:

“I nofoaga taitasi uma lava na matou afe ma nonofo ai i lenei faigamalaga, sa matou faia ni tatalo i le taimi lava e maea ai se talisuaga o le afiafi, ona toe faia foi lea o tatalo a o lei faia le taumafataga o le taeao. E leai se tasi e le auai… O tagata Mamona…e tootutuli faatasi a o faia leotele le tatalo e le ulu o le aiga po o se tagata malo faamamaluina foi….E itiiti lava se taimi latou te faaalu i viiga, a e ole atu mo se faamanuiaga i se tagata faapitoa e ta’u sona igoa, …Sa ou fiafia i lenei mea ina ua amata ona ou masani ai.”

Se maimau pe ana sei matua faatupuina e i tatou i le avea ma nuu, lenei uiga, lea sa matua taua naua i o tatou tuaa paionia. O tatalo faaleaiga o se vaega tele lea o a latou tapuaiga e pei lava o sauniga e faia i le Tapeneko. Faatasi ai la ma le faatuatua lena e maua mai i na talosaga e faia i aso taitasi, na latou faamamaese ai vaofali, tai atu ai le vai i eleele matutu mavaevae, faafuga mai ai le toafa, pulea ai o latou aiga i le alofa, ola ai i le filemu ma le fealofani, ma manatua ai pea lava pea o latou igoa i lo latou tuuina atu o i latou lava i le galuega a le Alii.

O le aiga o se iunite faavae lea o se alalafaga. O se aiga e tatalo faatasi o se faamoemoega lea o se nuu lelei. “Ia outou saili ia Ieova manu o mafai ona maua o Ia” (Isaia 55:56).

Pe mafai ea la ona tatou faamatagofieina atili o tatou aiga? Ioe, e ala i lo tatou talanoa atu o se aiga, i le puna o mea matagofie moni uma. Pe mafai ea la ona tatou faamalosia malo ma avea ma nofoaga sili tatou te nonofo ai? Ioe, e ala i le faamalosia o uiga lelei i olaga o o tatou aiga, e ala i le tootutuli faatasi ma ole atu i le Silisili Ese i le suafa o Lona Alo Pele.

O le toe foi i le faia o tapuaiga faaleaiga, ma faasalalau atu i le lalolagi, o le a mafai ai e se tupulaga ona aveesea le faamai o loo ia faaumatia i tatou. O le a toe fuataiina mai ai le amio sa’o, faaaloalo, ma le agaga faafetai i loto o tagata.

Na tautino mai le Matai, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tuitui atu, ona toina ai lea ia te outou” (Mataio 7:7).

Ou te tuuina atu ia te outou la’u molimau afai e faia a outou tatalo faaleaiga ma le faamaoni, o le a tauia outou. Atonu o le a vave ona aliali mai ni suiga. Atonu o le a matua lilo lava. A e peitai e moni naua na suiga aua o le Atua “na te tauia mai o e matua saili ia te Ia” (Eperu 11:6).

Tau ina tatou faamaoni i le faatuina o se faataitaiga i luma o le lalolagi i le faia o lenei mea, i le ma le uunaiina o isi ia faia faapea.

Mai le Liahona, Setema 1991, 3–6).

“O Lea sa ou Aoaoina ai”

Elder L. Tom Perry
O le Korama a Aposetolo e Toasefululua

Matua Lelei

E amataina faapea le Tusi a Mamona i upu nei: “O a’u o Nifae, na fanaua e matua lelei, o lea sa ou aoaoina ai teisi i le poto uma o lo’u tama” (1 Nifae 1:1). O le a matua ese lenei lalolagi pe ana fai e amata tusi o talaaga patino o fanau taitasi a lo tatou Tama o i le Lagi, i se faaupuga masani faapea—na fanaua a’u e matua lelei ma aoaoina e i la’ua.

Ua tatou ola i se vaitaimi faapitoa o le tala faasolopito, o se vaitaimi ua toe fuataiina mai ai le talalelei a le Alii i lona atoatoa. O la tatou autau o faifeautalai ua faateleina le lelei ma le numera; ua faapea, ona aoaoina atu le talalelei i gagana e tele i atunuu e tele, i se aofai o taliga e tele ua faalogo mai, nai lo se isi lava taimi muamua. A o faavaeina uarota ma siteki i le tele o itu o le lalolagi, sa faapea foi ona musuia mafaufau magafagafa e atinae ni auupega o fesootaiga, lea e mafai ona aumaia ai faatonuga a perofeta i taliga o tagata e toatele, ma le sili atu foi. O le tala fiafia o le talalelei ua mafai nei ona vave ona faasalalau atu, e aumaia ai le faamoemoe o le filemu e faavavau i loto o fanau a tagata.

Lamatia le Olaga Faaleaiga

O se tasi o savali sili o le talalelei, o le mataupu lea o le faavavau o le iunite o le aiga. Tatou te folafola atu i le lalolagi le aoga ma le taua o le olaga faaleaiga, a o le tele o le fenumiai ma faigata ua i ai i le lalolagi i aso nei, e pogai mai i le solosolo i tua o le olaga faaleaiga. O le aafiaga masani i le aiga e aoaoina ai ma faasino fanau e matua alolofa, ua faaitiitia naua.

O se olaga faaleaiga, lea e talatalanoa ai faatasi fanau ma matua i suesuega, taaloga, ma galuega, ua suitulaga i ‘aiga faatatope, taitoatasi, e kuka i ogaumu uila, ma se afiafi i luma o le televise. I le 1991, sa manatu ai se fonotaga i le Aai o Sate Leki a le Faalapotopotoga Aoao a Itumalo, o le le lava o faatosinaga e faia i le aiga, ua o’o atu nei i le tulaga ua avea ai lena mea ma mala i lo tatou atunuu, ma ua latou fa’aaluina taimi i a latou fonotaga e talanoaina ai o latou atugaluga. Sa latou faaamanino mai ni manatu autu e lima e mafai ona faateleina ai ni avanoa i aiga uma e manuia ai.

Muamua, ia faamalosi le vafealoai e ala i gaoioiga faaleaiga; lua, ia faatuina ni tulafono aoga ma ni faamoemoega; tolu, ia atinae le manatu lelei o le tagata ia te ia lava, fa, ia faatutu ni sini e mafai ona ausia; ma lona lima, ia iloiloina i lea taimi ma lea taimi malosiaga faaleaiga ma manaoga.

Ua faafuasei ona taua faapitoa le leo pulunaunau ma lapatai o a tatou perofeta, mai lava i le amataga o taimi. E pei ona fautuaina ma uunaiina i tatou, e tatau lava ona tatou uai atu i o tatou aiga ma ia faanatinati a tatou galuega faafaifeautalai, i le aumaia o isi i se malamalama o le upu moni e uiga i le taua o le iunite faaleaiga.

Ua Aoaoina e Atamu ma Eva Tiute o Matua

I le amataga lava, sa faamanino atu ai i faatonuga a le Alii ia Atamu ma Eva o la tiute i le avea ma matua. Sa faamatalaina auiliili lelei atu o la tiute. Ina ua mavae ona maua e i la’ua faatonuga mai le Alii, ua tatou iloa sa la mulimuli i lana fautuaga, ma ua faapea mai:

“Ma sa viia e Atamu le Atua i lena aso ma sa faatumuina o ia i le Agaga Paia, ma sa amata ona ia perofeta ane e uiga i aiga uma o le lalolagi, ua faapea atu: Ia viia le suafa o le Atua, aua ua pupula o’u mata ona o lo’u solitulafono ma o le a ou maua le olioli i le olaga nei, ma o le a ou toe vaai i le Atua i le tino.

“Ma sa faalogo Eva, le ava a Atamu, i ia mea uma, ma sa ia fiafia, ma faapea atu: Ana le seanoa la ta solitulafono, semanu ta te le maua ni fanau, ma le iloa le lelei mai le leaga, ma le olioli o le togiolaina o i ta’ua, ma le ola faavavau e tuuina mai e le Atua ia i latou uma o e usiusitai.

“Ona viia lea e Atamu ma Eva le suafa o le Atua, ma sa la faailoa atu ia mea uma i o la atalii ma afafine” (Mose 5:10–12).

Aoao ma Uunai i Mea Lelei Fanau

Ioe, mai lava i le amataga, o le tiute o matua, o le a’oa’o o a latou fanau, o se tasi lea o faatonuga sa tuuina atu e le Alii i o tatou uluai matua faalelalolagi.

O faaaliga na maua ina ua toe fuataiina mai le Ekalesia i aso nei, sa toe apoapoaiina mai ai foi matua i le latou tiute o le a’oa’o ma le faatonu o a latou fanau. I le mataupu e ivasefulutolu o le Mataupu Faavae ma Feagaiga, ua tatou maua ai sa aoaoina e le Alii nisi o le au uso, i lo latou le amanaia o o latou tiute faaleaiga. Ua faitauina faapea le mau:

“A ua ou poloaiina outou e taitaiina a outou fanau i le malamalama ma le upu moni….

“E te lei a’oa’o lau fanau i le malamalama ma le upu moni, e tusa ma poloaiga, ma o le amioleaga o loo i ai pea le mana, ia te oe, o le mafuaaga foi lea o lou puapuagatia.

“Ou te tuu atu nei foi ia te oe le poloaiga—afai e te fia laveaiina ia e faatulaga tonu lou lava aiga, aua o i ai mea e tele e le sa’o i lou aiga” (MFF 93: 40, 42–43).

Taua o Afiafi Faaleaiga

I tausaga ua mavae sa lapataiina ai e le Ekalesia matua uma ia faia afiafi faaleaiga faalevaiaso. O aso nei ua faatuina ai lena lapataiga i aiga o tagata o le Ekalesia. O po o Aso Gafua ua tuu ese e avea o se afiafi e faapotopoto ai le aiga. E leai ni gaoioiga faale Ekalesia po o ni fiafia foi e tatau ona faia i lena po. Ua folafolaina mai ia i tatou ni faamanuiaga maoae tatou te maua pe afai e faamaoni o tatou aiga i lenei poloaiga.

Sa fautuaina i tatou e Peresitene Harold B. Lee i se tasi taimi:

“O lenei, ia teu i o outou mafaufau lenei mea, pe a malamalama i le fua atoatoa o le misiona a Elia, o le a faaliliuina loto o fanau i o latou tama, ma loto o tama i a latou fanau. E faapena le tele o le tiutetauave i le itu lenei o le veli, e pei foi o le isi itu o le veli. Afai tatou te faatalale i o tatou aiga iinei i le faia o afiafi faaleaiga, ma tatou le faia lo tatou tiutetauave iinei, faamata o le a se vaaiga e i ai pe afai tatou te le maua i latou ona o lo tatou faatalale? O le a le avea le lagi ma lagi seiloga ua faia mea uma tatou te mafai e faaolaina ai i latou sa auina mai e le Alii i lo tatou gafa.”

Sa faaauau ona saunoa mai o ia:

“E tatau la ona faaliliuina loto o outou tama ma tina i a outou fanau i le taimi nei, pe afai o ia te outou le agaga moni o Elia, ma le manatu ua faatatau lena tulaga mo na o i latou o i tua atu o le veli. Ia tuuina atu o outou loto ia faaliliuina i a outou fanau, ma ia a’oa’o a outou fanau; a e tatau ona outou faia a o lava lo latou laiti e a’oa’o lelei ai i latou. Ma afai o tou faatalale i a outou afiafi faaleaiga, ua outou faatalale i amataga o le misiona a Elia e pei lava foi ua outou faatalale ia outou galuega o le sailia o gafa” (I le Relief Society Courses of Study, 1977–78 [1977], 2; faaopoopo le faatusilima).

E masani ona ou mafaufau i taimi fiafia sa matou maua a o talavou lava lo’u aiga, ma a o i ai le ma fanau i lo matou aiga. Ou te iloiloina lava faalemafaufau na aso ma mafaufau i suiga ou te faia i la matou faalapotopotoga faaleaiga ma le taitaiga, pe ana faapea ma te toe maua le avanoa e toe ola ai i lena vaitaimi. E lua ni eria semanu ou te filifilia e faaleleia pe ana faapea e toe tuuina mai lena avanoa ia te a’u e toe maua ai ni fanau talavou i lo ma aiga.

O le mea muamua, o le fa’aalu o se taimi tele i le avea ma tane ma ava, i se fonotaga faapitoa faalekomiti faaleaiga e aoaoina ai, talatalanoa, fuafua, ma faatulagaina ia faataunuuina lelei o ma’ua tiute i le avea ma matua.

O le moomooga lona lua, ou te manao, ana mafai ona ou toe maua na tausaga, semanu ou te fa’aalu se taimi tele e faatasi ai faaleaiga. E aofia ai lenei mea le faia soo, ma le faia o ni afiafi faaleaiga taua.

E Fesoasoani le Au Talavou i le Alualu i Luma

O le avega atoa o le fuafuaina ma le saunia mo afiafi faaleaiga, e le tatau ona na o matua e tuuina atu i ai. O ni afiafi faaleaiga e sili ona manuia ua ou vaai i ai, o taimi ia e tauave ai e le autalavou o le aiga se vaega i na afiafi faaleaiga.

Ou te valaau atu ia te outou alii tiakono maoa’e, o a’oa’o, ma ositaulaga, o outou na teine o le Ofagapi, Maea meite, ma le Lora, ia faia sa outou fesoasoani tele i le manuia o a outou afiafi faaleaiga. I le tele o aiga, e mafai ona outou mafaufau faautauta e uiga i le aiga. E le gata i lena, e tele atu aafiaga e mafai ona outou maua mai ai. Afai tou te mananao e ola i se lalolagi filemu, malupuipuia, ma avanoa, o le aiga ua e fesoasoani i ai, ioe, e mafai ona faaopoopo atu i le manuia o le lalolagi atoa.

Ou te manatua se faataitaiga o lenei mea, na tupu i aso malolo o le Kerisimasi i se tasi tausaga, a o faatasi le fanau a le ma fanau ma i ma’ua i se tasi tafaoga. Ina ia mafai ona maua se aafiaga moni faalefaatasiga, sa matou fuafuaina matou te malaga faatasi i se pasi laititi. Sa i ai i lena pasi laititi ia Tamamatua ma Tinamatua ma lo’u atalii ma lana fanau matutua e toatolu. Sa faamuli atu le ava a lo’u atalii i le fale ma le fanau laiti e toatolu a lo la aiga. Sa o’o mai lo’u taimi ou te aveina ai le taavale, ma e sa nofo la’u ava e pito mai ia te a’u e fai ma o matou tautai. Sa ou faalogo atu i tua o le pasi, o talatalanoa Oterei (Audrey), le ulumatua a le ma tama ma lona tama. Fai mai o ia, “Papa, o se tasi o a tatou sini i lenei tausaga o le faauma ona suesue e lo tatou aiga o le Tusi a Mamona. O le aso mulimuli lenei o le tausaga. Aisea tatou te le faauma ai nei ina ia fetaui tonu la tatou fuafuaga sa faia?”

Matua faapitoa lena aafiaga, o le faalogo atu i lo’u atalii ma lana fanau e toatolu, o feauauai latou e faitau leotele mataupu mulimuli o le Moronae, ma faamae’aina la latou sini o le faitau atoa o le Tusi a Mamona. Ia manatua, o se tamaitai talavou sa ia faia lea fautuaga, a e le o se tasi o matua.

O Le Lu’i i le Au Talavou

O outou o se tupulaga filifilia—ua faasaoina mo lenei vaitaimi faapitoa o le tala faasolopito o le tagata. E tele naua mea e mafai ona outou tuuina atu e faaopoopo i le tuputupu a’e ma le faatupuina o aiga ua auai outou. Ou te tuuina atu ia te outou se lu’i ia laa atu i luma i iunite o o tou aiga ma lena agaga faapitoa, filifiliga faaleautalavou, e avea le talalelei ma mea e ola moni ai i o outou aiga. Ia manatua le fautuaga a Peresitene Iosefa F. Samita ina ua ia faapea mai:

“Ou te manao i la’u fanau ma fanau uma a Siona ia iloa e leai se mea i lenei lalolagi e sili atu le taua ia i latou, e pei o le malamalama o le talalelei, e pei ona toe fuataiina mai i le Perofeta o Iosefa Samita. E leai se mea e mafai ona suitulaga i le leai o se malamalama. “E leai se mea i le lalolagi e mafai ona suitulaga i le leai o se malamalama sili e uiga ia Iesu Keriso. “O le mea lea, ia tuu ai matua uma o Siona e tausia a latou fanau ma a’oa’o i latou i mataupu o le talalelei, ma taumafai i le mea e mafai e uunai i latou e fai lo latou tiute, e aunoa ma ni lagona faapea ua uunaiina latou e faia. A e taumafai e totoina i o latou loto le agaga o le upu moni, se alofa tumau mo le talalelei, ina ia le gata i lo latou faia o lo latou tiute ona e fiafia ai o latou matua, a e ona e fiafia ai foi i latou” (i le Brian H. Stuy, le na tuufaatasia, Collected Discourses Delivered by President Wilford Woodruff, His Two Counselors, the Twelve Apostles, and Others, 5 voluma [1987–92], 5:436).

Toe Faaolaola Afiafi Faaleaiga

O afiafi faaleaiga ua mo tagata uma, pe faia i se aiga o i ai ni matua e toalua, pe o aiga foi o se matua e toatasi, po o se iunite foi na o le toatasi le tagata e i ai. Faiaoga e o aiga, matou te valaau atu ia outou uunaiina i a outou asiasiga fai soo, ma toe faamalosi atu le faia o afiafi faaleaiga.

Sa toe faamanatu mai e lo tatou perofeta o taimi nei, le Susuga a Peresitene Ezra Taft Benson, ia i tatou le manaomia ona faia o afiafi faaleaiga, faapea ma aoaoga aoga e maua ai se afiafi faaleaiga manuia. Na ia saunoa mai:

“Na fuafuaina e faamalosia ma puipuia ai le aiga, ua faatuina ai le polokalama o afiafi faaleaiga i se po e tasi o le vaiaso, e tuu ese mo tama ma tina e faapotopoto ai a latou fanau tama ma teine e siosioina i la’ua i le aiga. E faia tatalo, usuina viiga ma isi pese, e faitauina tusitusiga paia, ma talanoaina mataupu faaleaiga, ma fa’aalia ai taleni, e aoaoina ai mataupu o le talalelei, ma o le tele o taimi e faia ai ni taaloga, ma laulau ai foi ni taumafataga mama.” (I le Conference Report, Philippine Islands Area Conference, 1975, 10).

Matou te faamoemoe lava o le a outou tusia i lalo fautuaga taitasi na sa faia e le perofeta e uiga i mea e tatau ona aofia i afiafi faaleaiga.

Ona ia faaauau lea ona saunoa mai: “Ia o faamanuiaga nei sa folafola mai e se perofeta a le Atua ia i latou o e faia afiafi faaleaiga faalevaiaso. Afai e usiusitai le Au Paia i lenei fautuaga, matou te folafola atu o le a maua faamanuiaga maoae. O le a faateleina le alofa i le aiga ma le usiusitai i matua. O le a faatupuina le faatuatua i loto o le autalavou o Isaraelu ma o le a latou maua le malosi e faafetaiai ai faatosinaga leaga ma faaosoosoga e siomia i latou” (i le Conference Report, Philippine Islands Area Conference 1975, 10; tagai foi Improvement Era, Iuni 1915, 734).

Matou te uunaiina outou taitoatasi ia mulimuli i le fautuaga a lo tatou perofeta. I iunite uma faaleaiga i le Ekalesia aoao, ia toe iloiloina lo outou alualu i luma i le faia o afiafi faaleaiga e le aunoa. O le faatino o lenei polokalama o le a avea ma talita ma puipui ia te outou e faasagatau atu ai i mea leaga o o tatou vaitaimi, ma aumai ai ia te outou taitoatasi ma tagata uma foi, le olioli faateleina ma faulai i le taimi nei ma le faavavau a sau.

Ia faamanuia mai lava le Atua ia i tatou ina ia mafai ona tatou toe faamalosia ma toe uunaiina lenei polokalama taua matagofie, a o tatou talatalanoa faatasi o ni aiga.

Mai se lauga a Elder Perry i le konafesi aoao a le Ekalesia ia Aperila 1994 (Liahona, Iulai 1994, 47–50).