Lesona 6

Faamalosia o Faaipoipoga e Ala i le Faatuatua ma le Tatalo

Auala mo le Faatinoga

Ia mulimuli i se mea e tasi po o mea uma e lua o nei fautuaga e tusa ai ma ou lava tulaga manaomia ma tulaga o loo i ai.

Ia filifili i se mea e tasi e mafai ona e faia mo le faamalosia o lou faatuatua i le Tama Faalelagi ma Iesu Keriso.
Ia faamautuina lelei se taimi i aso taitasi e tatalo ai faatasi ma lou toalua.

Faamatalaga Faatonuina e Faitauina

Ia suesue i le faamatalaga tusia o loo i lalo. Afai ua e faaipoipo, ia faitau ma talanoaina le faamatalaga tusia faatasi ma lou toalua.

Mauaina o le Olioli i le Olaga

Elder Richard G. Scott
O le Korama a Aposetolo e Toasefululua

O le Femoumouai i le Lotolotoi o le Tumau Faamaoni

Talu ai nei lava na ou tutu ai i luga o le matafaga i le itu i matu o se motu matagofie o le Pasefika ma vaavaai atu agai i le sami i le fotuai mai o se taeao fou. Na ou maofa i le le fesuisuiai o le fafati mai o galu ma toe mou atu i luga o le matafaga. Na toe faamanatu mai ai ia te a’u le le masuia o le fuafuaga a le Alii, faatasi ma mea ua i ai, o tulafono e faavavau, ma le malupuipuia o le faamasinoga e tumau ma le matagofie o le alofa pe a maitauina o galu taitasi o le a siisii a’e i se maualuga e ese mai isi ina ia sailia mai sona auala i le matafaga. O nisi na fati i luga o papa, ma tuua ai ia ni oa papae o le sami. O nisi na fati atu i luga o le matafaga i se ata e tasi. Latou te seesee atu i luga o le oneone susu ma o latou pito e fetaviovioai ao latou toe mou malie mai.

Na ou manatunatu i le leai o se mutaaga o le tele o mea lelei na saunia e le Alii mo i tatou. Ua tele naua so tatou saolotoga, ua tele avanoa e atina’eina ai o tatou tulaga faaletagata ma taleni, o o tatou manatunatuga taitoatasi, o mea e ofoina atu e le tagata lava ia. Talu ai ona e le toe i ai se avanoa i lena aso e toe vaavaai ai i se sami malualii, sa ou taumafai ai e vaai i se ata faalemafaufau o le a i ai i le matagofie o le gaosia e le la susulu i se taimi mulimuli ane. A o o’u vaavaai atu ma le migao i lenei vaaiga matagofie, sa vaaia se avanoa i ao; o ave susulu o le la oso ua ofi mai i le va o ao o le lagi ma liua mea uma i lona susulu, o lona lanu, ma lona uiga. E foliga mai e pei o lo o finagalo le Alii e fetufaai mai se faamanuiaga faaopoopo, o se faailoga malamalama o Ana aoaoga lea na te aumaia le pupula ma le faamoemoe i tagata uma e pai atu i ai. O loimata o le fiafia ua tupu ifo ona o lenei lalolagi ofoofogia o loo tatou ola ai, mo le matagofie silisili ua tuuina mai e lo tatou Tama Faalelagi mo i latou uma o e naunau e vaai i ai. E moni lava e matagofie le olaga.

Ia Maua Le Agaga Faafetai i Le Matagofie o Le Olaga

Pe e te faaaluina ea se taimi e te sailia ai i aso taitasi le matagofie o le olaga e mafai ona i ai? O le a le umi talu ona e vaavaai i le la ua goto? O ave o le la ua mou atu ma tuua ai ao, o laau, o mauga ma vanu i le pogisa—o nisi taimi e toafilemu, o nisi taimi e i ai le fesuisuiai o lanu ma foliga.

O le a se mea e maofa ai i le vaai i se po maninoa pe a faaavanoaina e le Alii le ofoofogia o Ona lagi, o fetu fepulafi, o le masina susulu, e faaosofia ai o tatou manatu i lona silisiliese ma lona mamalu?

E ese le matagofie o le vaavaai atu i se fatu na totoina i le eleele lelei ua ola a’e, ua faatuputupuina le malosi ma aumaia ai i luga se tamai tatupu. E amatamata malie ona ola ma tuputupu a’e i lona lava ituaiga e taitaiina e le faatulagaga ua uma ona fuafuaina e le Alii e taitai ai lona tuputupu a’e. Faatasi ai ma le matagofie, o se laau manogi; o se pea; o se avoka; po o se fugalaau matagofie, e tulaga ese lona manogi ma lona sasala.

O anafea le taimi mulimuli na e vaai ai i se fua matala o se rosa? O aso taitasi e fesuisuiai ai ona uiga, e atagia mai ai le matagofie seia oo ina ua avea ma rosa matagofie.

O oe o se tasi o foafoaga mamalu a le Atua. O lona faamoemoega ina ia matagofie ma mamalu lou olaga e tusa lava pe o a tulaga e i ai. A o e usiusitai ma maua le lagona faafetai, e mafai lava ona avea ma taunuuga na faamoemoe le Atua e te oo i ai.

O Le Olioli i le Olaga e Faalagolago i Le Faatuatua i le Atua

O le faanoanoa, o le fiafia, o luitau matuia o ni mea ia e tutupu i le olaga, ae le o le olaga lava ia. Ou te le taumãmãina le faigata o nisi o ia mea e tutupu. E mafai ona oo atu i se taimi umi ae le tatau lava ona faatagaina i latou e puleaina ma faatonutonuina mea uma tou te faia. Na musuia e le Alii ia Liae ina ia faailoa atu le upu moni faavae: “Ua ola tagata ina ia latou maua le olioli”.¹ Ae le faatatau i le Alii. E i ai se mea e faia ona faataunuuina ai lea o lena fasifuaitau. Ae e le o le faamoemoega lena i le Alii. O Lona faamoemoega ina ia maua e i tatou taitoatasi le fiafia. E le faatatau lea mea ia te oe pe a e usitai i poloaiga, ma faatuatua i le Matai ma faia mea uma e talafeagai ai ina ia maua ai le fiafia i le lalolagi.

O lou fiafia i le olaga e faalagolago i lou faatuatuaina o le Tama Faalelagi ma Lona Alo paia, o lou talitonuga e faapea o la Laua fuafuaga o le olioli e mafai ona aumaia moni ai lava ia te oe le fiafia. O le suesueina o a laua aoaoga o le a e fiafia ai i le matagofie o le lalolagi ma faamauoaina ai au fesootaiga ma isi. O le a taitaiina atu ai oe i le faamafanafanaina, faamalosia o le malamalama e sau mai le tatalo i le Tama o i le Lagi ma tali na te toe tuuina mai.

Faamoemoe Ma Le Onosai

O se maa laitiiti e uu faalatalata i le mata e foliga mai o se matua mea tele. Afai e togi i le eleele, e foliga mai o se mea e taulai atu i ai le vaai. Ua faapea foi ona tatau ona tatou tulimatai atu i faafitauli po o mea faigata i o tatou olaga faatasi ma se vaaiga faaletusitusiga paia. Aua a le o lea e faigofie lava ona avea ma mea e pupuni ai la tatou vaai, miti’ia ai lo tatou malosi, ma aveesea ai mai ia i tatou le olioli ma le matagofie ua faamoemoe le Alii ina ia maua e i tatou i lenei olaga. O nisi tagata ua pei o ni maa e togi i totonu o se sami o faafitauli. E malelemo i latou i ia faafitauli. Ia avea o se mea e opeopea. Afai e goto ifo i se faafitauli, ia taumafai ina ia saoloto e toe manu a’e ina ia toe galue ma le fiafia.

Ua i ai outou iinei i le lalolagi ona o se faamoemoega paia. E le ona ia faafiafiaina po o le maua e le aunoa o le fiafia. Ua i ai outou iinei ina ia tofotofoina, ia faamaonia e outou outou lava ina ia mafai ona outou maua isi faamanuiaga ua saunia e le Atua mo outou.² E manaomia le puleaina i aafiaga o le onosai.³ O nisi faamanuiaga o le a tuuina mai lea iinei i lenei olaga; o nisi o le a maua i talaatu o le veli.

Ua faamoemoe le Alii ina ia e tupu a’e ma alualu i luma. O le a sili atu ona vave le alualu i luma pe afai e te faatagaina ma le lotomalie o Ia na te taitaiina oe i mea uma lava e te alualu ai i luma e mafai ona e manatua, e tusa lava pe e te fiafia i ai pe leai. Afai e te faalagolago i le Alii, pe afai e te lotomalie e tuuina atu lou loto ma le mafaufau i Lona finagalo, ma pe afai e talosagaina oe ina ia taitaiina le agaga ina ia faia Lona finagalo, o lona uiga ua mautinoa e oe le maua o le fiafia sili i le ala atoa ma le lotomalie i lenei olaga faaletino. Afai e te fesiligia mea uma e te faia, po o le tetee i lu’itau uma e le fiafia i ai, o lona uiga ua e faia ina ia sili atu ona faigata mo le Alii e faamanuia mai ai ia te oe.⁴

O lau filifiliga saoloto, le aia lea e faia ai filifiliga; ua le i tuuina mai ina ia mafai ona e maua mea e te manao ai. O lenei meaalofa paia ua saunia ina ia mafai ai ona e filifili le mea ua finagalo ai lou Tama Faalelagi mo oe. O lena auala o le a mafai ai e Ia ona taitaiina oe ina ia maua mea uma ua Ia finagalo ina ia e maua.⁵ O lena ala e taitaiina atu ai i le olioli ma le fiafia e le gata mai.

Ia Ola i le Olioli e Ui Lava i Puapuaga

Ia aoao mai tagata musuia o e na avea o latou lu’i ma mea e maua ai le filemu ma ola i le olioli e ui lava i puapuaga. Sa maua e se fafine lalelei o le sa maua i se faamai le olioli i le olaga. Sa malamalama o ia i le fuafuaga o le fiafia, sa maua e ia sauniga o le malumalu, ma sa ia faia le mea sili na te mafaia e agavaa ai mo faamanuiaga ua folafola mai. Ua faamaumauina i le tusi o le talaaga o lona olaga e faapea:

“O lea aso o se aso matagofie lava i le to’ulu o lau o laau. Sa ou aumaia le meli ma nofo i luga o le faaluega. Sa ou matua fiafia ma le loto malie i le la mafanafana, le manogi o le natura ma laau na siomia ai a’u. Sa na ona ou nofo ma fiafia i le mea moni e faapea o loo ou ola pea i lenei lalolagi matagofie…. Ua agalelei mai tele le Alii ia te a’u. Faauta i lo’u faafetai ia te ia ona o loo o’u i ai pea iinei ma maua se lagona lelei. Ua ou matua fiafia lava ma o le mea lea ua na ona ou manao ai e alaga leotele ma siva faataamilo i totonu o lenei fale matagofie a’o susulu mai le la i ona faamalama tetele. Ou te fiafia lava e ola i lenei olaga.”

O se tina lototele o le na tauivi ma le lototele i se mai faigata sa ia faaaluina le anoano o itula e faauma ai se galuega tele na ia faia e faaaoga ai le nila. O lea galuega o se meaalofa lea i ni tulaga faigata se lua na oo ia te ia. O ia galuega e lua o se oa taua e leai sona tau, o se tulaga na faamanatu mai ai pea lava pea e uiga i fua taua o le galue malosi e tusa lava pe feagai ma puapuaga, o se savali lea o le faamoemoe ua fusia faatasi i le alofa faamaoni ma le auauna atu ma le lotomalie.

Ia Maua le Olioli i Mea Ua e Maua

Ua aoao mai e tamaiti ia i tatou le ala e maua ai le olioli e tusa lava pe feagai ma ni tulaga sili ona faigata. E le i iloa e tamaiti le lagona faanoanoa e ala i le mafaufau atu i mea latou te le i maua. Latou te maua le fiafia i mea o lo’o mafai ona maua e i latou. Ou te manatua se tama laitiiti sa taalo i se auvai. Sa nonoa e ia se afa fagota i pito o ni apainu se lua ua lafoaia. Sa togi e ia le isi apa i luga o se lala laau, ona faatumu lea i ni vai. E toso e ia le isi apa, ona faamamulu lea. O le mamafa o le apa muamua o le a toso a’e ai le apa lona lua agai i luga a’o pa’u ifo le apa muamua. Sa ata o ia ma sivasiva ma le fiafia.

O loo siomia i tatou i ni mea faigofie e faia e tamaiti. O ia mea o ni mea saogalemu e faaitiitia ai le popole vale ae faaopoopoina le faaleagaga. Aua le alu tele lou mafaufau i mea ua e le maua po o mea ua aveesea mai ia te oe. Sa folafola mai e le Alii i e usiusitai o le a Ia tuuina mai mea uma ua ia te Ia ia te i latou. Atonu ua leai ni mea tou te maua i lenei olaga, peitai i le olaga a sau, a fai o le a outou faamaonia outou lava ua agavaa e ala i le ola ma le lototele, o le a outou maua le atoatoa o faamanuiaga.

Ia saili i faamanuiaga maua gata i lou olaga pe afai, i le poto o le Alii, e aveesea ai e Ia mai ia te oe se mea e te manao tele i ai. O i latou o e ua le vaai pe faalogo, e faatoatoaina e Ia isi tulaga o tomai. Na te tuuina atu le onosai, malamalama, ma le faafetai faateleina mo le agalelei o isi, ia i latou o e mamai. I le maliu o se tasi e pele, e faaopoopoina e Ia noataga o le alofa, faaopoopoina mea e manatua pea, ma faatupuina le faamoemoe mo le toe faatasia i le lumanai. O le a e maua ni faamanuiaga pe afai o le a e lotomalie e talia le finagalo o le Alii ma faatinoina le faatuatua ia te Ia.⁶

Sa fetalai atu le Alii i tagata mafatia o Alema,:

“Ou te faamama foi avega… .ina ia outou le lagona ai lava i o outou tua. …Ou te faia foi lenei mea ina ia outou laulaututu e fai ma molimau ia te a’u i aso amuli ina ia outou mautinoa lava o a’u o le Alii le Atua, ua asiasi atu i lo’u nuu i o latou puapuaga.

“O lenei foi, ua oo ina faamamasagia avega;. … Ioe, ua faamalolosia i latou e le Atua ina ia faigofie ona latou tauave a latou avega ma ua latou gauai ma le loto fiafia ma le onosai i le finagalo o le Atua.”⁷

O Le Agaga Faifai Mea o Le a Fesoasoani ia Te Oe e Maua ai le Olioli i le Olaga

Ia taumafai ina ia maua le agaga faifai mea ona o le olioli e maua mai ai. Na aoao ma iloa e Tuafafine Camilla Kimball, Amelia McConkie, ma Helen Richards le ala e faia ai ni ata vali ina ua mavae le valaauina o a latou tane e foi atu i o latou aiga. Sa le gata ina latou maua le poto aoaoina, peitai o le a le toe mafai ona latou vaai i se la goto, se foliga, po o se laau i se vaaiga sa i ai muamua. Ua i ai nei se latou vaaiga i vaega eseese o lanu ma foliga ma ua olioli i mea matagofie ua siomia ai i latou.

Ia filifili se mea e pei o le musika, siva, ta faatagata, po o le fatusolo. O le agaga faifai mea o le a fesoasoani ia te oe e maua ai le olioli i le olaga. O lea agaga o le a tupu a’e ai se agaga o le loto faafetai. O le agaga lea e atiina’e ai taleni natia, faatupuina ai lou mafai ona fetuunai, amio ai, ma maua le faamoemoega i le olaga. E mou ese atu ai le faanoanoa ma le loto ita. E tuuina atu ai le faafouina o mea, le agaga magafagafa, ma le taumafai i le olaga.

Auauna Atu: O se Mea Autu e Maua ai Le Fiafia

O le auauna atu ma le lotomalie i isi o le mea autu lea e maua ai le fiafia tumau. Sa saunoa mai Peresitene Spencer W. Kimball: “E moni lava o loo iloa mai tatou e le Atua, ma e leoleo mai o Ia ia i tatou. Peitai e masani lava o se isi tagata ola e auala mai ai Lona faataunuuina o o tatou tulaga manaomia. O le mea lea, e taua ai lava lo tatou auauna o le tasi i le tasi.”⁸

E i ai se tamaitai ou te iloa o le sa matua tumu i le fiafia. O taeao uma lava e ole atu ai o ia i le Tama Faalelagi ina ia taitaiina atu o ia i se tasi e mafai ona ia fesoasoani i ai. O lena tatalo e faia ma le loto faamaoni sa talia i lea taimi ma lea taimi. Sa faamamaina avega a le toatele ma sa faamalamalamaina o latou olaga. Sa faamanuiaina o ia e le aunoa i le avea ma mea faigaluega sa faatonutonuina e le Alii.

E Mafai Ona Liua le Faigata ma Avea ma Mea e Tuputupu A’e Ai

Ua ou iloa o faigata uma tatou te feagai i le olaga, e oo lava i faigata e mafua ona o lo tatou lava faatamala po o a tatou lava solitulafono, e mafai ona liua e le Alii ma avea ma mea e tuputupu a’e ai, o se apefai agai i luga.⁹ O le mea moni ou te le’o fautua atu ina ia avea le solitulafono ma se ala e tuputupu a’e ai. O lea mea e tiga, faigata, ma e matua le tatau ai. E matua sili atu ona faigofie ma sili atu lava ona faigofie ona agai i luma i le amiotonu. Peitai o le salamo e tatau ai, faatuatua i le Alii o Iesu Keriso, ma le usiusitai i Ana poloaiga, e oo lava i le le fiafia e maua mai le solitulafono e mafai ona liua ma toe faafoi ai i le fiafia.

Ia faia se lisi o mea e mafai ona e fai e maua ai le fiafia, e pei o le:

Ia manatunatu loloto i tusitusiga paia e malamalama ai i le fuafuaga o le fiafia.
Tatalo faatasi ma le faatuatua ia Iesu Keriso.
Alofa ma auauna atu i isi.
Ia maua sauniga o le malumalu. Toe foi e faamanuia atu i isi.
Faalogo i le perofeta ma usitai i lana fautuaga.
Ia maua le agaga faafetai mo mea ua e maua.
Ia faaalia atili le laumata fiafia.

O le a saunia e lau lisi ni mea autu e maua ai le lotomalie ma le fiafia.

O Faigata e Mo Na o Sina Taimi A’o le Fiafia e Faavavau Lea

E ta’u soo i se pese Pelesila (Brazilian) se mea sese ua talitonu i ai le toatele o tagata: E le mafai ona uma le faanoanoa, ae uma le fiafia. Ou te molimau atu o le faatuatua i le Faaola ma usiusitai i Ana aoaoga, e le mafai ona mavae le fiafia, ae mavae atu le faanoanoa.

E tusa lava po o le a le faigata o se mea e feagai ma oe po o se ua pele, e le tatau ona faaaoga i lou olaga ma avea ma autu o mea uma ua e fiafia i ai. O luitau o ni malamalamaaga ia o le tuputupu a’e. O faigata po o luitau o ni mea ia e tutupu i se olaga e aoga i le tele o taimi. Ia aua ne’i popole naua i se mea e tasi ma avea ma mea e le mafai ai ona iloa se isi mea po o le tausia o oe lava po o isi foi o e o loo faalagolago ia te oe. Ia manatua, e pei lava o le fonofonoina o le tino, o le faaleleia o ni mea faigata faaleagaga ma lagona e tele se taimi e alu ai.

Ua fetalai mai le Alii, “Ia onosai i puapuaga, aua e tele puapuaga e te maua; peitai ia onosai pea i ai, aua faauta, ou te i ai faatasi ma oe, e oo atu lava i le iuga o ou aso.”¹⁰ Afai e te onosai, o le a oo ina e malamalama i le uiga o le fuaitau “ou te i ai faatasi ma oe”. O le alofa o le Atua e aumaia le filemu ma le olioli.

O lou faatuatua ia Iesu Keriso e maua ai le uiga tumau o le olaga. Ia manatua o loo i ai oe i se malaga e tau atu i le faaeaina. O nisi taimi e feagai ai oe ma ni tulaga e maua atili ai le fiafia na i lo isi, peitai o ia mea uma e i ai le faamoemoega i le Alii.¹¹

I le avea ma molimau i le Faaola, ou te apoapoai atu ia te outou ina ia faamagalo atu i soo se isi atonu ua faatiga mai ia te oe. Afai ua e solia se tulafono, ia e salamo i lea mea, ina ia mafai ona fesoasoani mai le Matai ia te oe.

Ia faafetai atu i lou Tama Faalelagi ma Lona Alo Pele mo le fuafuaga o le fiafia atoa ma mataupu faavae o le talalelei o loo faaautu ai. Ia i ai le agaga faafetai mo sauniga ma feagaiga ua la tuuina mai. Ou te molimau atu ma le faamaoni ua ia i la’ua le mana e faapaleina ai lou olaga i le filemu ma le olioli, ma maua ai le faamoemoega ma le uiga. O le a e iloa o le faanoanoa ma le le fiafia o ni mea le tumau. E faavavau pea lava pea le fiafia ona o Iesu Keriso. Ou te molimau faamaoni atu o loo soifua o Ia, ma e alofa o Ia ia te oe, ma o le a fesoasoani o Ia ia te oe.

Mai se lauga a Elder Scott i le konafesi aoao a le Ekalesia ia Aperila 1996 (tagai Liahona, Iulai 1996, 28–31).