Lesona 11

O Tiute Paia o Tama ma Tina

Vaega 2: Tiute o Tina

Auala mo le Faatinoga

Mulimuli i se mea e tasi poo mea uma o nei fautuaga e tusa ai ma ou tulaga manaomia ma tulaga e i ai.

I le folafolaga e faatatau i le aiga, ua fautuaina ai i tatou e faapea “e ao i tama ma tina ona fesoasoani le tasi i le isi o se paaga tutusa” (tagai itulau iv o lenei taiala suesue). Ia iloilo faatasi ma lou toalua fautuaga e 10 a Peresitene Ezra Taft Benson e faatatau i tama, o lo o i itulau 46–47 o lenei taiala suesue, ma ana fautuaga e 10 mo tina, o loo i itulau 51–53. Ia talanoaina ni auala e mafai ai ona oulua galulue faatasi ma lagolago e le tasi le tasi i nei tiutetauave.
Tusi se tusi i lou tina po o se tina matua.

Faamatalaga Faatonuina e Faitauina

Ia suesue i faamatalaga tusia o loo i lalo. Afai ua e faaipoipo, ia faitau ma talanoaina faamatalaga tusia faatasi ma lou to’alua.

“Aua o Ia o Se Tina”

Elder Jeffrey R. Holland
O le Korama a Aposetolo e Toasefululua

Faamalo i Tina

O loo i ai ni laina na tusia e Victor Hugo e faitauina e faapea:

“Sa ia tofitofiina le falaoa i ni vaega se lua ma tuu atu i le fanau, o e sa aina ma le naunau. ‘Na te le i tuuina ese se falaoa mo ia,’ o le tomumu lea a le satini.

“‘Aua e le o fia ai o ia,’ le tala a se fitafita.

“‘E leai,’ o le tala lea a le satini, ‘aua o ia o se tina.’”

I lenei tausaga a o tatou faamanatuina ai le faatuatua ma le totoa o e sa savalia lena auala fita na sopoia Iowa, Nebraska, ma Wyoming, ou te fia faaviivii ai lava tina o aso nei, e pei o tina paionia na sa latou tausia, tatalo, ma na masani ona latou tanuina a latou pepe i lena faigamalaga umi. Mo tamaitai o loo mafai ona faafofoga mai i lo’u leo o e o loo faananau ina ia avea ma tina ae le mafai, ou te faapea atu i o outou loimata ma i matou foi i lena mataupu, o le a aumaia lava e le Atua ia i se taimi o loo i le lumanai le “faamoemoe [i le] loto ua mafatia.”¹ E pei ona aoao atu pea ia perofeta mai lenei pulelaa, o “faamanuiaga silisili o le a le taofia lea mai ia i latou e faamaoni, e tusa lava pe le oo vave mai na faamanuiaga.² Ae o le taimi nei ia tatou olioli ai, ua le faatapulaaina na o a tatou fanau totino le valaau ia tausia ma faafailele.

I le tautalagia o tina ou te le faagaloina ai le tiute taua, ma mamafa o tama, aemaise lava o le tulaga aumatua i aiga o aso nei, ua manatu i ai nisi “o le faafitauli tutotonu lena o o tatou vaitaimi.”³ E moni lava, o le aumatua e mafai ona avea ma faafitauli, e oo lava i se aiga o i ai se tama—ua na o le taumafa ma moe, o lona uiga pe a faamatalaina e le o fegalegaleai ma lona auaiga e pei ona tatau ai. Afai ae tautalagia, o le a “vavamamao loa.” Ae o se savali faaleperisitua lena mo se isi aso. O le aso ou te fia faaviivii ai na lima faaletina sa luelueina le moega pepe, ma o lo latou amiotonu sa aoaoina ai a latou fanau iina, o le autu tonu lena o faamoemoega o le Alii mo i tatou i le olaga faaletino.

I lo’u tautala la i lena itu, ou te ta’ua ai upu a Paulo sa ia viia ai Timoteo ma lona “faatuatua faamaoni… sa muai i ai” na ia faapea mai, “ia Loi o le tina o lou tina, atoa ma Eunike lou tina.”⁴ “Talu foi ina o e tamaitiiti,” le tala a Paulo “ua e iloa ai tusi paia.”⁵ Matou te momoli atu le faafetai i tina uma ma tina matutua, o e ua tatou aoaoina mai ai upu moni faapena i tausaga ao laiti.

O Taulaga e Faia e Tina Talavou

I lo’u tautala lautele e uiga i tina, ou te fia faaviivii faapitoa lava ma faamalosia tina talavou. E faigata galuega a se tina, ma e masani ona le amanaia. O tausaga o le talavou, e masani o tausaga na e aoga ai le tane po o le ava—pe o la’ua uma foi—po o taimi na o le mativa faato’a amata ona atina’e e le tane le tomai tau galuega. O mea tau tupe e eseese lava, o nisi aso ua itiiti pe o le matua leai lava. E masani lava ona teuteuina le fale mautotogi i ni teuteuga se lua—o ni meafale tuai po o le leai foi o ni meafale. O le taavale, pe afai e i ai, e alu i pa’u lamolemole ma se tane kesi e gaogao. A e o le alaala i luga i le po e fafaga ma faaluelue le pepe pe a oso le fiva i nifo po o le matanana foi o se lu’i maoa’e lea i se tina talavou o le le lava. I le gasologa o na tausaga, e faatetele ai ona le lava se taimi e moe ai tina ma tuuina atu le fesoasoani tele i isi ae itiiti le lagona faafouina patino mo i latou lava na i lo se isi lava vaega o tagata ua ou iloa i se isi lava taimi i lo’u olaga. E le o se mea e ofo ai pe a vaaia i nisi taimi ua solouli lalo ifo o o latou mata.

O le mea e malie ai, e masani lava o le tuafafine lava foi lenei tatou te mananao e valaauina—pe ua manaomia foi ona valaauina e auauna atu i ausilali a le uarota ma le siteki. O se mea ua malamalama lelei lava i ai. O ai se tasi e le manao i se faataitaiga faapena a nei tamaitai talavou e pei o Loi ma Eunike? Ia atamamai tagata uma. Ia manatua o aiga o se mea lea e faatumutumuina i mea uma, aemaise lava i tausaga faatoa amata ai. I le faia faapea, o le a maua ai pea e tina talavou ni auala maoa’e e auauna faamaoni atu ai i le Ekalesia, e pei lava ona auauna atu isi ma faamalosia i latou ma o latou aiga i lena ala.

Ia fai le mea sili e te mafai i le gasologa o nei tausaga ae po o le a lava se isi mea e te fai, ia sili ia te oe le tiute lena ua patino ia te oe, ma o lena tiute ua auina mai i ai e le lagi ni agelu e leoleoina oe ma au fanau laiti. O outou tane—aemaise lava tane—faapea foi ma taitai o le Ekalesia ma uo i soo se mea, ia outou loto fesoasoani ma maua le faautautaga mamao ma le faautaga poto. Ia manatua “O le mea ma lona tausaga i mea uma, ma ona lava po i mea uma lava i lalo o le lagi.”⁶

Tina, matou te faailoa atu ma talisapaiaina lo outou faatuatua i ala uma. Faamolemole ia silafia e tutusa le taua o taumafaiga ina ia tausia fanau i le taimi ua tuanai, o le taimi nei, ma le faavavau. Ma afai, po o le a lava le mafuaaga ua outou faia ai lena taumafaiga lototele na o outou, e aunoa ma a outou tane i o outou tafatafa, o le a faapea ona faateleina a matou talosaga mo outou, ma o lo matou naunautaiga ina ia ofoina atu se lima fesoasoani o le a faatumauina.

E Faia e Tina le Galuega a le Atua

O se tasi tina talavou sa tusi mai ia te a’u e faapea o lona popolega e auala mai i ni vaega se tolu. Muamua, soo se taimi lava e faalogo ai i faamatalaga e faatatau i le avea ma tina i le Au Paia o Aso e Gata Ai, na te lagonaina ai lava le popole ona e le i taitai lava ona latalata atu o ia i le tulaga e tatau ona faataunuuina ai le galuega. Lona lua, na te lagonaina lava o loo faamoemoe mai le lalolagi ia te ia na te aoaoina lana fanau ina ia iloa ona faitau, tusitusi, tusiata, tautala faaLatina, numera, ma le komepiuta—a o le i ta’uina mai e le pepe se upu e masani ai e pei o le “ta, ta.” Lona tolu, e masani lava ona ia lagonaina le ta’ufaatauvaaina o ia e tagata i nisi taimi, e toetoe lava a faia pea lava pea ma le le iloaina, aua o fautuaga poo faamatalaga faamalo e tuuina atu ia te ia e foliga mai e le o atagia mai ai taumafaiga i tulaga o le mafaufau, o taumafaiga faaleagaga ma faalelagona, o tulaga manaomia i po ma aso uma faapea tulaga e aveeseina uma ai le malosi [o le tina], o mea ia e i ai taimi e moomia ai i le taumafai e avea po o le manao foi e fia avea ma tina o loo faamoemoe le Atua ia avea ai o ia.

Ae o le mea e tasi, na ia fai mai ai, o loo alualu ai pea ia i luma: “E ui i le faigata ma le faigofie o lenei mea, ma loimata i taimi uma, ou te iloa ma lo’u loto atoa o loo o’u faia le galuega a le Atua. Ou te iloa i le avea ai o a’u ma se tina o loo ou i ai lea i se sootaga e faavavau ma Ia. Ua matua faagaeetia lava a’u ina ua mauaina e le Atua Lona faamoemoega silisili ma le uiga o le avea ma se matua, e tusa lava pe afai o loo tutulu o Ia ona o nisi o ana fanau.

“I le iloaina la o lenei mea,” o lana tala mai lea, “o lea na ou taumafai ai e toe manatunatu i aso faigata e le mafai ona teenaina, lea e mafai ai ona lofituina ai. Atonu e sa’o lava o lo tatou le mafaia ma le nofo popole lea e uunaiina ai i tatou ina ia tatou aapa atu ia te Ia ma faalauteleina Lona mafai ina ia toe aapa mai ia i tatou. Atonu o loo faalilolilo lona faamoemoe o le a tatou popole,” o lana tala lea, “ma o le a tatou ole atu mo Lana fesoasoani. Ona ou talitonu ai lea, e mafai ona Ia aoaoina sa’o nei fanau, e ala mai ia i tatou, e aunoa ma le teenaina. Ou te fiafia tele i lena manatu,” sa ia faaiuina ai. “Ou te maua ai le faamoemoe. Afai ou te mafai ona tonu i luma o lo’u Tama o i le Lagi, atonu o le a le mafai ona faalavelavea lana taitaiga ia tatou fanau. Atonu o le a mafai ai ona avea ma Lana galuega ma Lona manatu i lona uiga moni lava.” ⁷

O Le a Ta’ua Oe e Lau Fanau Ua Faamanuiaina

I le malamalama ai i lena ituaiga faamatalaga, e manino mai ai e oo mai nisi o na solouli i lalo o mata e le gata i le suiina o napekini ma le feaveaiina o tamaiti i le aoga ae oo mai i le le lava o le moe i po i le sailia o le agaga, o le sailia ma le naunautai mo le malamalama e tausia ai nei fanau ina ia oo i le tulaga e finagalo le Atua ina ia latou i ai. O le faagaeetiaina i na ituaiga uiga ma le naunautaiga, tau ia ina ia ou fai atu faalauaitele i tina uma, i le suafa o le Alii, ua matuai matagofie lava outou. O loo matuai lelei atoatoa outou uma. O le mea moni lava ua tuuina atu ia te outou se tiutetauave e le gata ai le faatuatuaina o outou e lo outou Tama o i le Lagi. Na te silafia o lo outou fanauina o se tamaitiiti e le faafuaseia ai lava ona outou iloaina mea uma. Afai e te lua tauivi uma ma lau tane ina ia alolofa i le Atua ma ola ai i le talalelei; afai e te lua ole atu mo le taitaiga ma le faamafanafanaga a le Agaga Paia lea ua folafolaina atu i e faamaoni; afai e te lua o atu i le malumalu ma osi ma mauaina ia folafolaga o feagaiga sili ona paia e mafai e se alii po o se tamaitai ona faia i lenei lalolagi; afai e te lua faaali atu i isi, e aofia ai ma le lua fanau, le tausiga, o le alofa, le loto faamagalo lava lea e tasi e te lua mananao i le lagi e faaali atu ia te oulua; afai e te lua faia taumafaiga silisili ina ia avea ma matua silisili e mafai ona oulua oo i ai, o le a oulua faia mea uma e mafai e se tagata soifua ona fai ma mea uma o loo faamoemoe le Atua lua te faia.

O nisi taimi o faaiuga a se tamaitiiti po o se tama a le lua fanau e ootia ai lou loto. O nisi taimi o le a le faataunuuina mea na faamoemoe i ai. O tina ma tama uma lava e popole i lena mea. E oo lava foi i se tasi o matua faamanuiaina ma alofagia o Peresitene Iosefa F. Samita na ia augani e faapea, “Oi! Le Atua e, aua ne’i tuuina atu la’u lava fanau ia se.”⁸ O le tagi lena a matua uma, ma o se mea e fefefe uma i ai matua. Ae leai se tasi ua to’ilalo o e o loo taumafai pea ma tatalo pea. O loo ia te oe aia uma e te maua ai le faamalosiauga ma e iloa ai i le taunuuga o le a valaauina ai e lau fanau lou igoa e faamanuiaina, e pei lava o na augatupulaga o uluai tina o e na muamua atu sa faamoemoe foi i faamoemoega lava e tasi na e ia te outou ma lagona foi mea o loo outou atuatuvale ai.

O outou o se faataitaiga aoao o Eva, le tina o tagata ola uma, o le na malamalama o ia ma Atamu e ao ona pa’uu “ina ia i ai le tagata”⁹ ma ia i ai le fiafia. O outou o se faataitaiga aoao o Sara ma Repeka ma Rasela, ana le seanoa i latou semanu e leai ni folafolaga faapeteriaka matagofie na tuuina atu ia Aperaamo, Isaako, ma Iakopo lea ua faamanuiaina ai i tatou uma. O outou o se faataitaiga aoao o Loi ma Eunike ma tina o le autau talavou e lua afe. O outou o se faataitaiga aoao o Maria, lea na filifilia ma muai faauuina talu mai le amataga o lenei lalolagi na te mauaina, ma tauaveina, ma fanauina le Alo o le Atua lava Ia. Matou te faafetai atu ia te outou uma, e aofia ai o matou lava tina, ma ta’u atu ia te outou e leai se isi mea i le lalolagi e sili atu lona taua na i lo le auai tonu i le galuega ma le mamalu o le Atua, i le aumaia lea o le tino ma le ola i Ona afafine ma atalii, ina ia mafai ai ona oo mai le tino ola pea ma le ola e faavavau i na mamalu faaselesitila i luga.

Faalagolago i le Faaola e Faavavau

Afai tou te o atu i le Alii i le agamalu ma le lotomaualalo, e pei ona fai mai ai se tasi o tina, “ia tu’itu’i atu i faitotoa o le lagi e talosaga atu, ole atu, ina ia aumaia le taitaiga ma le atamai ma le fesoasoani mo lenei galuega ofoofogia,” o le a matua tatalaina mai le faitotoa ma maua ai le fesoasoani ma aafiaga o le faavavau atoa. Ia maua folafolaga a le Faaola o le lalolagi. Ole atu mo le mana faamalolo o le Togiola mo soo se mea atonu o loo faafitauli ia te outou po o a outou fanau. Ia iloa o le faatuatua e mafaia ai mea uma, tainane o oe, pe ona o oe foi.

E le mafaia ona outou faia na o outou lenei mea, ae o loo i ai le fesoasoani. O le Matai o le Lagi ma le Lalolagi o loo i ai iina e faamanuia ia te outou—o Ia lava lea e alu atu ma saili i le mamoe na leiloa, na suesue auiliili ina ia maua le tupe na leiloa, o loo faatalitali mai pea e le aunoa mo le toe foi atu o le atalii faamaimauoa. O la outou galuega o le galuega a le faaolataga, ma o le mea lea o le a faalauteleina ai outou, tauia, ma o le a sili atu lo outou lelei ma sili atu mea tou te maua na i lo le taimi nei a o outou taumafai ina ia faia ni taumafaiga faamaoni, e ui ina o le a outou lagona lava le vaivai i nisi o taimi.

Ia manatua, ia manatua aso o le avea o oe ma tina: “aua ana le seanoa le afioga lava a Keriso ma le faatuatua e le mafaagaeetia ia te ia, o loo faalagolago lava outou i le galuega a Le malosi i faaola.”¹⁰

Faalagolago ia te ia. Matuai faalagolago ia te ia. Faalagolago ia te ia e faavavau. Ma “fetaomi atu i luma ma le faamaoni ia Keriso, ina ua i ai le faamoemoe atoatoa lelei.”¹¹ O loo outou faia le galuega a le Atua. O loo outou faia ma le matagofie ma lelei. O loo ia faamanuiaina outou ma o le a faamanuiaina outou—aemaise lava i vaitaimi e luitauina ai outou. E pei o le fafine sa naunautai, agamalu, ma atonu sa i ai se faalotolotolua ma sina matamuli, ae sa taumafai atu lava sona auala i le tumutumu o le motu o tagata ina ia tau lava ia pai atu i le tu’upao o le ofu o le Matai, ina ia fetalai atu ai Keriso i tamaitai o loo popole ma maofa ma o nisi taimi e fetagisi ai i o latou tiutetauave o ni tina, “Lo’u afafine e, ina faalototele ia oe; ua e ola i lou faatuatua.” ¹² Ma o le a faaolaina ai foi ma lau fanau.

Mai se lauga a Elder Holland i le Konafesi Aoao a le Ekalesia ia Aperila 1997 (Liahona, Iulai 1997, 40–42).

Mo Tina i Siona

Peresitene Ezra Taft Benson
Peresitene Lona Sefulutolu o le Ekalesia

Tina e i Siona, o lo outou tiute mai le Atua e taua tele mo lo outou lava faaeaina ma le faaolataga faapea foi le faaeaina o lou aiga. E manaomia e se tamaitiiti se tina e sili atu nai lo mea uma lava e mafai ona faatau i tupe. O le faaaluina o le taimi e faatasi ai ma lau fanau o le meaalofa sili lava lea nai lo meaalofa uma.

Faatasi ma le alofa i lo’u loto mo tina i Siona, ou te manao i le taimi nei e fautua atu ala patino e sefulu e mafai ai e o tatou tina ona faaaluina lelei le taimi e faatasi ai ma a latou fanau.

Ia faaavanoa oe lava i le olaga atoa o lau tama. Muamua, ia faaavanoa le taimi e te i ai i taimi uma e o o mai ai po o le o ese atu o lau fanau—pe a o ese atu pe o mai mai le aoga, pe a o ese atu ma toe foi mai mai tafaoga, pe a aumaia e i latou uo i le fale. Ia i ai pea i taimi uma pe a ono pe sefuluono tausaga o lau fanau. O loo ua tatou faitau i le Faataoto, “A o le tama ua tuulafoaiina, e tupu ai le ma o lona tina” (Faataoto 29:15). O se tasi o popolega sili i o tatou nei vaitaimi o le i ai lea o le miliona ma miliona o fanau a matua o loo faigaluega, o e o mai i le aiga i aso taitasi i fale e tuufua, ua le faatonutonuina lelei e matua o loo faigaluega.

Ia Avea ma Uo Moni. O lona lua, tina, ia faaavanoa taimi e avea ai ma se uo moni a lau fanau. Ia faalogologo lelei i lau fanau, ia matua faalogologo lelei. Talanoa ma i latou, featai ma fai ulaga ma i latou, pepese faatasi ma i latou, taaalo faatasi ma i latou, fetagisi faatasi ma i latou, fusi mai i latou, ia faaviivii atu ma le loto faamaoni ia i latou. Ioe, ia faaaluina se taimi e le faanatinatia e faatasi ai ma tamaiti taitoatasi. Ia avea ma uo moni i lau fanau.

Faitau atu Tusi i Lau Fanau. O lona tolu, tina, ia faaavanoa taimi e faitau atu ai tusi i lau fanau. E amata mai lava i le taimi o le pepe meamea, ia faitau atu tusi i lau fanau tama ma lau fanau teine. Ia manatua mea na fai mai ai le fatu solo:

Atonu e ia te oe le oa e le mafaamatalaina;
Pusa o maa taua ma pusa auro iila.
E le mafai lava ona e mauoa e sili atu i lo a’u—
Aua sa i ai lo’u tina o le na faitau mai tusi ia te a’u.

(Strickland Gillilan, “The Reading Mother.”)

Afai e te faitau atu tusi i lau fanau i taimi uma, o le a e totoina se alofa mo tusi lelei faapea ma se alofa moni mo tusitusiga paia.

Tatalo Faatasi ma Lau Fanau. O lona fa, ia faaavanoa taimi e tatalo ai faatasi ma lau fanau. E tatau ona faia i le taeao ma le po tatalo faaleaiga, i lalo o le taitaiga a le tama. Ia lagona e lau fanau lou faatuatua a o e valaau atu i le lagi e liligi mai ana faamanuiaga ia i latou. Ou te fia otootoina upu a Iakopo, “Ua aoga tele le tatalo faatauanau a le [tina] amiotonu” (Iakopo 5:16). Ia faia e lau fanau tatalo faaleaiga ma tatalo a le tagata lava ia, ma ia olioli i upu malie latou te ta’u atu i lo latou Tama o i le Lagi.

Ia Faia Afiafi Faaleaiga i Vaiaso Taitasi. O lona lima, ia faaavanoa taimi e fai ai afiafi faaleaiga aoga i vaiaso taitasi. A o pulefaamalumalu lau tane, ia auai i se afiafi faaleaiga faaleagaga ma faagaeetia loto i vaiaso taitasi. Ia auai malosi lau fanau. Ia aoao atu ia i latou mataupu sa’o. Ia avea lenei afiafi faaleaiga ma se tasi o tu masani sili a le tou aiga. Ia manatua le folafolaga ofoofogia na faia e Peresitene Iosefa F. Samita i le taimi na muai faailoa atu ai afiafi faaleaiga i le Ekalesia: “Afai e usiusitai le Au Paia i lenei fautuaga, matou te folafola atu o le a oo mai faamanuiaga silisili. O le a faatupulaia le alofa i le aiga ma le usiusitai i matua. O le a tupu le faatuatua i loto o le autalavou o Isaraelu, ma o le a maua e i latou le mana e tetee atu ai i faatosinaga a le tiapolo ma faaosoosoga o loo tosina ese ai i latou” (I le James R. Clark, le na tuufaatasia, Messages of the First Presidency of The Church of Jesus Christ of Latter Day Saints, 6 voluma [1965–75], 4:339). O lenei folafolaga matagofie o loo tumau pea lona aoga i aso nei.

Ia Faatasitasi i Taimi o Taumafataga. O lona ono, ia faaavanoa taimi e faatasi ai i taimi o taumafataga i taimi uma e mafai ai. O se lu’itau lenei a’o faasolo ina matutua tamaiti ma faasolo ina pisi tele olaga. Peitai o talanoaga fiafia, fetufaaiga o fuafuaga ma gaoioiga o le aso, ma taimi faapitoa e aoao atu ai e faia lea i taimi o taumafataga aua e tulimatai atu i ai tina ma tama ma fanau.

Faitau Tusitusiga Paia i Aso Taitasi. O lona fitu, ia faaavanoa taimi i aso taitasi e faitau faatasi ai tusitusiga paia i le tulaga o se aiga. E taua tele le faitau e tagata taitoatasi i tusitusiga paia, ae peitai o le faitau faatasi o le aiga i tusitusiga paia e taua tele. O le faitauina faatasi o le Tusi a Mamona i le tulaga o se aiga o le a aumaia ai faapitoa lava le faaleagaga faatuputupulaia i totonu o lou aiga ma o le a maua ai e matua uma ma le fanau le mana e tetee atu ai i faaosoosoga ma maua le Agaga Paia e avea ma a latou aumea e le aunoa. Ou te folafola atu ia te outou o le Tusi a Mamona o le a suia ai olaga o lo outou aiga.

Ia Faia Faatasi Mea i le Tulaga o se Aiga. O lona valu, ia faaavanoa taimi e faia faatasi ai mea i le tulaga o se aiga. Ia faia ni tafaoga faaleaiga ma le faamanatuina o aso fanau atoa ma malaga i ni taimi faapitoa ma avea ma mea e manatua pea. I soo se taimi lava e mafai ai, ia auai atu faatasi, i le tulaga o se aiga, i ni mea faapitoa o loo auai ai se tagata o le aiga, e pei o se tala faatino a le aoga, o ni taaloga, se tautalaga, po o se faaaliga taleni. Ia auai faatasi i sauniga lotu ma ia nonofo faatasi o se aiga i soo se taimi lava e mafai ai. O tina o e e fesoasoani atu i aiga e tatalo ma taaalo faatasi o le a mafuta faatasi ma o le a faamanuiaina olaga o fanau e oo lava i le faavavau.

Aoao Atu i Lau Fanau. O lona iva, tina, ia faaavanoa taimi e aoao atu ai i lau fanau. Ia saili taimi e aoao atu ai. E mafai ona faataunuuina lenei mea i soo se taimi lava o le aso—i le taimi o meaai, talatalanoaga faasamasamanoa, po o taimi foi faapitoa e nonofo faatasi ai i lalo, i taimi e momoe ai ina ua iu le aso, po o le taimi foi o se savalivaliga faatasi i le taeao po. Tina, o outou o faiaoga pito sili ona lelei o a outou fanau. Aua le tuuina atu lenei tiutetauave taua i nofoaga e vaaia ai tamaiti po o e e tausi tama. O le alofa o se tina ma lona popole faatasi ma le agaga tatalo mo lana fanau o mea sili ia ona taua i le aoaoina o lana lava fanau.

Ia aoao atu i fanau mataupu faavae o le talalelei. Ia aoao atu e tauia le faia o le lelei. Ia aoao atu ia i latou e leai se saogalemu e maua i le agasala. Ia aoao atu ia i latou se alofa mo le talalelei a Iesu Keriso ma se molimau e uiga i Lona paia.

Ia aoao atu i lau fanau tama ma lau fanau teine le faia lelei o lavalava, ma ia aoao atu ia i latou le tulaga faatamatane ma faatamaitai. Ia aoao atu i lau fanau le tulaga o le ola mama mai feuiaiga eleelea, ala tatau e fai ai faauoga, faaipoipoga i le malumalu, auauna atu e avea ma faifeautalai, atoa ma le taua o le talia ma le faalauteleina o valaauga i le Ekalesia.

Ia aoao atu ia i latou ina ia fiafia e galulue ma le taua o le maua o se aoga lelei.

Ia aoao atu ia i latou le taua o le ituaiga sa’o o faafiafiaga, e aofia ai tifaga e tatau ai ma vitio ma musika ma tusi ma mekasini. Ia talanoaina aafiaga leaga o tusi ma ata mataga ma fualaau oona, ma ia aoao atu ia i latou le taua o le ola i se olaga mama.

Ioe, tina, ia aoao atu i lau fanau le talalelei i lo oe lava aiga, i tafatafa o sa outou lava afi e faia. O le aoaoga sili lea ona aoga o le a maua e lau fanau. O le auala lenei a le Alii e aoao atu ai. E le mafai e le Ekalesia ona aoao atu e pei ona mafai ona e faia. E le mafai foi e le aoga. E le mafai foi i se nofoaga e tausia ai tamaiti. Peitai e mafai ona e faia, ma o le a lagolagoina oe e le Alii. O le a manatua e lau fanau au aoaoga e faavavau, ma pe afai o le a matutua i latou, o le a le mafai ona latou o ese ai. O le a latou ta’ua oe o se tagata faamanuiaina—o lo latou tina agelu moni lava lea.

Tina, o lenei ituaiga o aoao atu faalelagi ma le faaletina e tele se taimi e alu ai—e tele na’ua le taimi. E le mafai ona faia lelei i le na o sina faavaitaimi. E tatau ona faia i taimi uma ina ia faaolaina ai ma faaeaina lau fanau. O lou valaauga paia lava lea.

Ia Alofa Faamaoni i Lau Fanau. O lona sefulu ma o le mea mulimuli foi lea, tina, ia faaavanoa taimi e alofa ai ma le faamaoni i lau fanau. E oo ina avea ma alofa faa-Keriso le alofa agavaa o se tina.

O se faamalo matagofie tele lenei a se tama tama i lona tina: “Ou te le manatua le tele o mea e uiga i ni ona talitonuga e uiga i mea e fiafia i ai po o lona faaaloalo i le va ma tagata; ma po o a foi ana auala e uiga i le aoaoina o tamaiti, mea’ai e fiafia i ai, po o ni ona talitonuga e uiga i le aoaoina o fanau, e le mafai ona ou manatua ia mea. O le mea autu ou te manatua i le taimi nei i le tele o tausaga ua mavae o lona alofa lea ia te a’u. Sa fiafia tele o ia e ta’oto i luga o le mutia faatasi ma a’u ma faamatala mai ni tala, po o le i veá foi ma i matou le fanau. Na te opoina a’u i le tele o taimi. Ma sa ou fiafia tele i lena mea. Sa ia te ia le laumata fiafia. O lo’u lava manatu sa pei lava o ia o le Atua, faapea ma mea matagofie uma e ta’u atu e le au paia ia te Ia. Ma pepese ai! Mai mea uma e fiafia i lo’u olaga, e leai se mea e mafai ona faatusatusa i le tulaga fiafia o le totolo a’e i luga o ona vae ma moe a o faalue o ia i lona nofoa faalue ma pese. Pe a mafaufau atu i lenei tulaga, ou te tau manatunatu pe o iloa e le tamaitai o aso nei, i le tele o mea e mafaufau i ai ma fuafuaga e faia, le avea o ia ma silisili ese i le faatonutonuina o lana tama mai le mafatia ma puapuaga. Ou te tau manatunatu pe na te iloa le aoga tele o sina alofa itiiti i le olaga o se tamaitiiti.”

Tina, e manaomia e lau fanau talavou lena foi ituaiga o alofa ma le vaaiga. E foliga mai e sili atu ona faigofie i le tele o tina ma tama le faaalia ma tuuina atu lo latou alofa i a latou fanau a o laiti i latou, peitai e sili atu ona faigata pe a faasolo ina matutua. Ia galue i lenei tulaga faatasi ma le agaga tatalo. E le tatau ona i ai ni eseesega i le va o tagata matutua ma tamaiti. Ma o le mea autu o le alofa. E manaomia e o tatou tagata talavou le alofa ma le manatu atu, ae le o le tuufau. E manaomia e i latou le lagona malamalama i mea ua latou lagona, ae le o le le ano ma le manatu i ai o tina ma tama. E manaomia e i latou le taimi o matua. O aoaoga alofa a se tina atoa ma lona alofa ma le faatuatuaga i se tama tama po o se tama teine talavou, o le mea moni e faasaoina ai i latou mai lenei lalolagi amioleaga.

Mai se lauga a Peresitene Benson i se faeasaite mo matua i le aso 22 o Fepuari 1987.