Lesona 13

O le Aoao Atu o Mataupu Faavae o le Talalelei i Fanau

Vaega 1

Auala mo le Faatinoga

Mulimuli i se mea e tasi po o mea uma o nei fautuaga e tusa ai ma o oe lava tulaga manaomia ma tulaga e i ai.

Faitau le Mataupu Faavae ma Feagaiga 68:25–28. A o e faitau i ai, ia faailoga mataupu faavae ma sauniga ua poloaiina e le Alii matua e aoao atu ia latou fanau. Ia fuafua ni mea e mafai ona e faia e aoao atu ai nei mataupu faavae ma sauniga i lau fanau po o le fanau a lau fanau, fanau a ou uso po o tuafafine, poo isi tamaiti e te iloa.
A o e faitau i le faamatalaga tusia o loo i lalo, ia filifili e tepa taulai lou mafaufau i se fautuaga e tasi pe lua ua tuuina mai e Elder Robert D. Hales. A maua ni avanoa eseese e faataunuuina ai, ia tepa taulai atu i isi fautuaga mai le faamatalaga tusia.

Faamatalaga Faatonuina e Faitauina

Ia suesue i le faamatalaga o loo i lalo. Afai ua e faaipoipo, ia faitau ma talanoaina le faamatalaga tusia faatasi ma lou toalua.

Faamalolosia o Aiga: O lo Tatou Tiute Paia

Elder Robert D. Hales
O le Korama a Aposetolo e Toasefululua

E Faamalosia Aiga e Le Faaleagaga

O le faamalolosia o aiga o lo tatou tiute paia lea i le avea ai ma matua, fanau, aiga lautele, taitai, faiaoga, ma tagata taitoatasi o le Ekalesia.

O le taua o le faamalolosia faaleagaga o aiga o loo aoao manino mai i tusitusiga paia. Na aoao e le Tama o Atamu ma le Tina o Eva a la tama teine ma tama tane e uiga i le talalelei. O taulaga a Apelu na taliaina e le Alii o le sa ia alofa i ai. A o Kaino, “na sili lona alofa ia Satani na i lo le Atua” ma sa ia faia ni agasala matuia. “Na faanoanoa Atamu ma Eva i luma o le Alii, ona o Kaino ma ona uso,” peitai e le i taofia ai lo laua aoaoina o a la fanau i le talalelei (tagai Mose 5:12, 18, 20, 27; 6:1, 58).

E tatau ona tatou malamalama e tofu a tatou fanau taitoatasi ma meaalofa eseese ma taleni latou te o mai ma i latou. O nisi, e pei o Apelu, e foliga mai na fananau mai ma meaalofa o le faatuatua. O isi e tauivi ma faaiuga uma latou te faia. I le avea ai ma matua, e le tatau ona avea le sailiga ma tauiviga a a tatou fanau ma mea tatou te faavavai ai pe le faatuatua ai foi i le Alii.

O Alema le itiiti, ina ua “tigaina [o ia] i le puapuaga…[ma] atuatuvale [o ia] i le manatu i [ana] agasala e tele,” na ia manatuaina le faalogo i lona tama o aoao e uiga i le afio mai o “Iesu Keriso, o le Alo o le Atua, e Togiola agasala a le lalolagi” (Alema 36:17). O upu a lona tama na taitaiina ai o ia i lona liua. I se tulaga foi faapena, o le a manatua ai e a tatou fanau a tatou aoaoga ma molimau.

O le autau talavou e lua afe a Helamana, na latou molimau mai o o latou tina amiotonu na aoaoina ma le mamana i latou e uiga i mataupu faavae o le Talalelei (tagai Alema 56:47–48).

I se taimi o se saili maoa’e faaleagaga na faapea ai Enosa, “Na tuia lava lo’u loto i upu na fai mai e lo’u tama… na ou faalogoina soo lava e uiga i le ola faavavau” (Enosa 1:3).

I le Mataupu Faavae ma Feagaiga o loo ta’u mai ai e tatau i matua ona aoao a latou fanau “Ia malamalama i le mataupu o le salamo, ma le faatuatua ia Keriso, le Atalii o le Atua soifua, ma le papatisoga ma le meaalofa o le Agaga Paia i le faaeeina o lima, pe a valu tausaga. …

“Ma o le a latou aoao atu foi ia latou fanau ia tatalo, ma savavali tonu i luma o le Alii” (MFF 68:25, 28).

O Le Aoao Atu o le Talalelei e Faamalosia Ai Aiga

A tatou aoao atu le talalelei ia tatou fanau e ala i upu ma faataitaiga, o le a faamalolosia faaleagaga ma malupuipuia o tatou aiga.

E manino upu a perofeta soifua e tusa ai ma o tatou tiute paia e faamalolosia o tatou aiga i le faaleagaga. I le 1995, na tuuina atu ai e le Au Peresitene Sili ma le Au Fono a Aposetolo e Toasefululua se folafolaga i le lalolagi e ta’utino atu ai “o le Aiga o le totonugalemu lea o le fuafuaga a Le foafoa mo le taunuuga e faavavau o lana fanau. …O le tane ma le ava ua i ai le tiutetauave paia e alolofa ma tausi e le tasi le isi ma a la fanau. …Ua i ai i matua se tiute paia e tausia a latou fanau i le alofa ma le amiotonu, ia tuuina atu i ai mea e manaomia i le faaleagaga ma le faaletino, ia aoao i latou e alolofa ma feauaunaai, [ma] ia tausia poloaiga a le Atua” (Liahona, Iuni 1996, 10–11).

I le masina o Fepuari i le tausaga nei, na tuuina atu ai e le Au Peresitene Sili se valaau i matua uma “ina ia tuuina atu atoatoa a latou taumafaiga sili i le aoaoina ma le faafaileleina o a latou fanau i mataupu faavae o le talalelei, ia o le a faaauai atili i latou i le Ekalesia. O le aiga o le faavae lea o se olaga amiotonu, ma e leai se isi auala e mafai ona suia lona tulaga pe faataunuuina ai ana galuega taua, o le faia lea o le tiutetauave na tuuina mai e le Atua.”

I le tusi o le masina o Fepuari, na aoao atu ai e le Au Peresitene Sili o le aoaoina ma le fafagaina o fanau i mataupu o le talalelei, e mafai ai e matua ona puipuia o latou aiga mai elemene faatamai. Na latou fautuaina foi matua ma fanau ina “ia tu’u atu le faamuamua aupito maualuga i tatalo faaleaiga, afiafi faaleaiga, suesuega ma aoaoga o le talalelei, ma gaoioiga lelei faaleaiga. E ui i lea, tusa pe o le a le taua ma le talafeagai o isi gaoioiga, e le tatau ona faatagaina e sui tulaga i tiute ua faatonuina mai e le Atua, ia e na o matua ma aiga e mafai ona faia lelei ai” (tusi a le Au Peresitene Sili, 11 Fepuari 1999; tagai Church News, 27 Fepuari 1999,3).

Faatasi ai ma le fesoasoani a le Alii ma Ana aoaoga faavae, o tiga uma mai lu’itau atonu e feagai ma se aiga e mafai ona malamalama i ai ma faatoilaloina. E tusa lava la po o a tulaga manaomia o tagata o le aiga, e mafai ona tatou faamalosia o tatou aiga a o tatou mulimuli i fautuaga o lo o tuuina mai e perofeta.

O le mea autu mo le faamalosia o o tatou aiga o le maua lea o le Agaga o le Alii e oo mai i o tatou aiga. O le sini o o tatou aiga o le i ai lea i le ala sa’o ma le vaapiapi.

Manatu Mo Le Faamalosia o Aiga

E le mafaitauina mea e mafai ona fai i totonu o puipui o o tatou aiga e faamalosia ai le aiga. Ou te fia ta’u atu ni nai auala atonu e fesoasoani e iloa ai vaega e manaomia le faamalosia i totonu o o tatou lava aiga. Ou te tuuina atu nei mea i se agaga o le faalaeiau, faatasi ma le iloa o aiga taitasi—ma tagata taitoatasi o le aiga—e tulaga ese.

E Tatau Ona Avea Aiga o Se Nofoaga Saogalemu

Ia avea o tatou aiga ma se nofoaga saogalemu e maua ai e tagata taitoatasi o le aiga le lagona o le alofagia ma se lagona o le i ai i le aiga. Ia iloa o tamaiti taitoatasi e eseese a latou meaalofa ma mea e mafai ona latou fai; o tamaiti taitoatasi o se tagata e manaomia le alofa ma le tausiga faapitoa.
Ia manatua, “o le tali filemu e liliueseina ai le ita” (Faataoto 15:1). Ina ua faamauina la’u pele ma a’u i le Malumalu o Sate Leki, sa tuuina mai e Elder Harold B. Lee ia i ma’ua se fautuaga poto: “A siitia a’e oulua leo i le ita, e alu ese le Agaga mai lo oulua aiga.” E le tatau lava ona tapunia o tatou fale po o o tatou loto ia tatou fanau ona o le ita. E pei lava o le atalii faamaumauoa, e manaomia e a tatou fanau le iloa a oo ina maua i latou i puapuaga e mafai ona latou tapa atu ia i tatou mo le alofa ma se fautuaga.
Ia faaalu le taimi o le tagata lava ia e faatasi ai ma a tatou fanau, ma ia tuu atu e filifili e i latou le gaoioiga ma le mataupu o le talanoaga. Ia aveese nisi lava mea e faalavelave mai.

Ia Aoao Fanau Ina Ia Tatalo, Faitau Tusitusiga Paia, Ma Faalogo i Musika Talafeagai

Ia uunaiina amioga faalelotu a a tatou fanau, e pei o le tatalo a le tagata lava ia, suesuega a le tagata lava ia i tusitusiga paia, ma le anapogi mo ni tulaga manaomia patino. Ia fua le tulaga ua oo i ai lo latou faaleagaga e ala i le maitauina o a latou amioga, upu e tautala ai, ma amio e faaalia i isi tagata.
Tatalo i aso taitasi faatasi ma a tatou fanau.
Faitau faatasi tusitusiga paia. Ou te manatua lo’u lava tina ma le tama a o la faitauina tusitusiga paia a o nonofo i matou le fanau i le fola o le fale ma faalogologo atu. O nisi taimi la te fesili mai, “O le a le uiga o le mau ia te oe?” po o le “O le a sou lagona ona o lea mau?” Ona la faalogologo mai lea ia i matou a o matou tali atu ia matou lava upu.
Faitau upu a perofeta soifua ma isi faamatalaga tusia faagaeetia loto mo tamaiti, tupulaga talavou, ma tagata matutua o lo o i ai i mekasini a le Ekalesia.
E mafai ona tatou faatumulia o tatou aiga i le leo o musika aoga a o tatou pepese faatasi mai le tusi pese faapea ma le Tusi pese a Tamaiti.

Ia Faia Afiafi Faaleaiga Ma Fonotaga Faaleaiga

Ia faia afiafi faaleaiga i vaiaso uma. I le avea ma matua, e i ai nisi taimi e matamuli tele ai i tatou o matua e aoao atu ma molimau atu i la tatou fanau. Ou te lagona foi le nofosala i lena tulaga i lo’u olaga. E manaomia e a tatou fanau lo tatou faamatala atu o ni lagona faaleagaga ia i latou ma ia aoao atu ma tuuina atu molimau ia i latou.
Ia faia fonotaga faaleaiga e talanoa ai fuafuaga ma mea e atugalu ai le aiga. O nisi o fonotaga faaleaiga e sili ona aoga e faia lea taitasi ma tagata taitoatasi o le aiga. Fesoasoani atu ia tatou fanau ina ia iloa o o latou manatu e taua. Ia faalogo ia i latou ma aoao mai ia i latou.

Aoao Atu Le Talalelei, Lagolago i Taitai o Le Ekalesia, Ma Ia Faia Mea i Le Tulaga O Se Aiga

Ia valaau atu i faifeautalai e aoao atu i uo le toaaga po o le le lotu i o tatou aiga.
Ia faaali atu tatou te talia ma lagolagoina taitai o le Ekalesia.
Ia aai faatasi pe afai e mafai, ma ia faia ni talanoaga aoga i le taimi e aai ai.
Ia galulue faatasi i le tulaga o se aiga, e tusa lava pe sili atu ona vave ma sili atu ona faigofie le fai e i tatou lava o le galuega. Ia talanoa ma a tatou fanau tama ma fanau teine a o tatou galulue faatasi. Sa ou maua le avanoa i aso Toonai taitasi e faatasi ai ma lo’u tama.

Ia Aoao Atu i Fanau Ina Ia Avea ma Ni Uo Lelei Ma Saunia Mo Le Lumanai

Ia fesoasoani atu ia tatou fanau e aoao le ala e avea ai ma ni uo lelei ma ia talia a latou uo i o tatou aiga. Ia malamalama i matua o uo a a tatou fanau.
Ia aoao atu ia tatou fanau i ala e fuafua lelei ai o tatou taimi ma risosi poo mea tatou te maua. Ia fesoasoani atu ia i latou e aoao le faalagolago o i latou ia i latou lava faapea ma le taua o le saunia mo le lumanai.

Faamatala Atu o Tatou Tupuaga ma Tu Faaleaiga

Ia aoao atu ia tatou fanau le talafaasolopito o tagata o o tatou tupuaga faapea ma talafaasolopito o o tatou lava aiga.
Ia faia ni tu faaleaiga. Ia fuafua ma faataunuu tuuaga poo malologa aoga e faatasi ai ma le aiga, ma ia manatu i tulaga manaomia o a tatou fanau, taleni, ma mea e mafai ona fai. Ia fesoasoani atu ia i latou i le faatupuina o mea fiafia e mafai ona latou manatua, faaleleia a latou taleni, ma ia faatupuina atili o latou lagona e uiga i le taua o i latou lava.

Ia Aoao Atu le Taua o le Usiusitai i Poloaiga Ma le Maua o Sauniga

Ia aoao atu uiga mama ma se tautinoga ina ia usiusitai i poloaiga i upu ma faataitaiga.
Ina ua uma ona papatisoina a’u ma faamauina lo- ’u papatisoga, sa fusi atu a’u e lo’u tina i ona tafatafa ma fesili mai, “O le a se lagona o loo e maua?” Sa ou faamatala atu i le mea sili ou te mafai le lagona mafanafana o le filemu, faamafanafana, ma le fiafia na ou maua. Sa faamatala mai e lo’u tina e faapea o le lagona sa ou maua o le meaalofa lea na faatoa uma ona ou maua, o le mea foaifua o le Agaga Paia. Sa ia ta’u mai ia te a’u afai ou te ola agavaa mo lea mea, o le a maua e a’u le meaalofa e faatasi ma a’u e le aunoa. O se taimi lena o se aoaoga na ou manatua pea i lo’u olaga atoa lava.

Ia aoao atu i lau fanau le taua o le papatisoga ma le faamauina o le papatisoga, le maua o le mea foaifua o le Agaga Paia, o le fetagofi atu i le faamanatuga, o le faamamaluina o le Perisitua, ma le osia ma le tausia o feagaiga o le malumalu. E tatau ona latou iloa le taua o le ola agavaa mo le maua o se pepa faataga o le malumalu ma le saunia mo se faaipoipoga i le malumalu.

Afai e le i faamauina oe i le malumalu i lou to’alua po o lau fanau, ia galulue o se aiga mo le maua o faamanuiaga o le malumalu. Ia faatutuina ni sini o le malumalu i le tulaga o se aiga.
Ia agavaa mo le perisitua o lo o e umia, uso e, ma ia faaaoga e faamanuiaina ai olaga o lou aiga. . …

Ia Iloa Gaoioiga a Alalafaga, Aoga, ma le Ekalesia

E maua fesoasoani i fafo atu o le aiga. O le faaaoga tatau o ia risosi po o fesoasoani o le a faamalosia ai o tatou aiga.

Ia uunaiina a tatou fanau ina ia auauna atu i le Ekalesia ma le alalafaga.
Talanoa i faiaoga o a tatou fanau, tagata a’o au, fautua, ma taitai o le Ekalesia e uiga i o tatou atugaluga ma tulaga manaomia o a tatou fanau.
Ia malamalama i mea e fai e a tatou fanau i o latou taimi avanoa. Ia i ai le fesoasoani i le filifilia o tifaga, polokalama a le televise, ma vitio. Afai o faaaogaina e i latou le Initoneti, ia malamalama i mea o lo o latou faia. Ia fesoasoani atu ia i latou ia iloa le taua o faafiafiaga aoga.
Ia uunaiina gaoioiga aoga a le aoga. Ia malamalama i mea o loo suesue i ai a tatou fanau. Ia fesoasoani atu ia i latou ia latou meaaoga. Ia fesoasoani atu ia i latou ina ia iloa le taua o le aoga ma saunia mo galuega ma le faalagolago o i latou ia i latou lava.
Tamaitai talavou: Auai i le aualofa pe a atoa le sefuluvalu tausaga o lo outou matutua. O nisi o outou atonu e mumusu e faia lena suiga. Atonu e te fefe ona e te le fetaui i ai. Ou tuafafine talavou, e le o le tulaga lea. O loo i ai le tele o le taua i le aualofa mo outou. E mafai ona avea ma se faamanuiaga ia te outou i o outou olaga atoa.
Alii talavou: Ia faamamalu i le Perisitua Arona. O le perisitua lea e sauniuni ai, e saunia ai outou mo le Perisitua Mekisateko. Ia galulue atoatoa i le Korama a Toeaina pe a faauuina outou i le Perisitua Mekisateko. O le usoga faaleperisitua, aoaoga a le Korama, ma avanoa e auauna atu ai i isi o le a faamanuiaina ai outou ma o outou aiga i o outou olaga atoa.

Mulimuli i le Faataitaiga o le Alofa a le Alii

E mafai ona faamalosia aiga uma i soo se tulaga pe afai e aumaia le Agaga o le Alii i o tatou aiga ma tatou aoao atu e ala i Lana faataitaiga.

Galue ma le faatuatua; aua le meia i le fefe. Pe a amata ona tofotofoina e o tatou tagata talavou uiga lelei, e tatau ona o atu matua i le Alii mo se taitaiga e uiga i tulaga manaomia patino o tagata taitoatasi o le aiga. O le taimi lea o le faaopoopoina o le alofa ma le faalaeiau ma faamalosia a outou molimau i le ala e faia ai filifiliga. O se mea faafefe tagata le faatagaina o a tatou fanau e aoao mai mea sese latou te faia, peitai o lo latou naunau e filifili le ala o le Alii ma uiga taua o le aiga e sili atu lea ona taua pe a oo mai le filifiliga mai le loto na i lo le taimi tatou te taumafai ai e faamalosia na uiga lelei ia i latou. O le ala o le alofa a le Alii ma le talileleia e sili atu ona lelei na i lo le auala a Satani o le faamalosi, aemaise lava i le tausia o fanau talavou.
Ia manatua upu a le perofeta o Iosefa Samita: “E leai se mea ua sili ona fuafuaina e taitai ai tagata ina ia aloese mai le agasala e pei o le taitaiina o o latou lima, ma vaavaai lelei i latou ma le alofa. Pe afai e faaalia e tagata le agalelei ma le alofa pito itiiti ia te a’u, faauta i le tele o se o’oo’oga i lo’u mafaufau, ae o se tuufaafeagai o lena mea e peiseai o le a faatupuina ai lagona o le lototiga ma le faanoanoa i le mafaufau o le tagata” (Teachings of the Prophet Joseph Smith, filifilia e Joseph Fielding Smith [1976], 240).

O Fanau e Se Ese o Le a Toe Foi Mai

Atonu tatou te faanoanoa, ina ua uma ona faia mea uma tatou te mafaia, ae o le a se ese nisi o a tatou fanau mai le ala o le amiotonu, e mafai ona faamafanafanaina i tatou i upu a Orson F. Whitney: “E ui lava ina feseai solo nisi o mamoe, o loo i ai pea fofoga o le Leoleo Mamoe ia i latou, ma i se taimi vave po o se taimi mulimuli ane o le a latou lagona aao o le Silisili Ese o aapa mai mo i latou, ina ia toe foi atu i le lafu mamoe. Po o le olaga nei po o le olaga a sau, o le a toe foi mai lava i latou. E tatau ona latou totogiina la latou aitalafu i le faamasinoga tonu; e tatau ona latou mafatia ia latou agasala; ma tauasa i se ala matuitui; peitai a oo ina latou maua le taitaiga mulimuli, e pei foi o le atalii faamaumauoa, e agai atu i se tina ma se tama loto faamagalo i le aiga, o le a le faapea ua le aoga le taumafaiga tiga. Ia tatalo mo a tatou fanau le faaeteete ma le le usiusitai; ia uumau pea i latou i lo tatou faatuatua. Ia faamoemoe ma faatuatua pea seia oo ina e vaaia le faaolataga a le Atua” (siiina upu a Iosefa Samita i le Conference Report, Aperila 1929, 110).

E Mafai e Tagata Nofofua ma Tagata o le Aiga Lautele Ona Tuuina Mai le Malosi

O le a le tulaga e i ai pe afai e te nofo toatasi ma ua le faamanuiaina i ni fanau? Pe tatau ea ona e popole e uiga i le fautuaga e faatatau i aiga? Ioe. O se mea lea e tatau e i tatou uma ona aoaoina i lenei lalolagi. O tagata matutua e le i faaipoipo e masani lava ona mafai ona latou tuuina mai se agalelei faapitoa o le malosi i le aiga, ma avea ma tagata e lagolago mai, talia, ma tuuina mai le alofa i o latou aiga ma aiga o i latou o siomia ai.
E toatele tagata matutua o le aiga lautele e fai ma matua i la latou lava filifiliga. O matua o matua, uso o tama ma tina, uso ma tuafafine, fanau o uso ma tuafafine, ma isi tagata o le aiga e mafai ona maua ai se fesoasoani tele i le aiga. Ou te manao ina ia tuuina atu la’u faafetai tele mo i latou o loo i lo’u lava aiga lautele o e na taitaiina au e ala i le latou faataitaiga ma le molimau. O nisi taimi o tagata o aiga lautele e mafai ona latou ta’u atu mea e le mafai e matua ona ta’u atu e aunoa ma le amatalia o se finauga. Ina ua mavae se talanoaga ma le loto faamaoni faatasi ma lona tina, sa faapea mai se tasi o tamaitai talavou: “Atonu o se mea le lelei le ta’u atu ia te oe ma tama ua ou faia se mea sese. Peitai o le a sili atu ona afaina pe a ta’u i le uso o lo’u tina o Susana. E le mafaia ona ou faia se mea e faanoanoa ai o ia.”

E Leai Ni Aiga Atoatoa Ona Lelei

O le malamalama o loo i ai i tatou i le olaga faitino e aoao ai ma faatupuina lo tatou faatuatua, e tatau ona tatou malamalama, e tatau ona i ai le faafeagai o mea uma. I se taimi o se fono faaleaiga i lo’u lava aiga, sa faapea mai lo’u toalua, “Pe a e manatu o lo o i ai i se tasi se aiga atoatoa ona lelei, e le lava lou iloaina o lena aiga.”

Faatulaga Lelei le Fale ma Le Aiga

Uso e ma tuafafine, i le avea ai ma matua sei o tatou faalogo ma usitaia le apoapoaiga, o le aoaiga lava lea, na tuuina mai e le Alii ia Iosefa Samita ma taitai o le Ekalesia i le 1833 ina ia “faatulaga tonu [o tatou] lava aiga” (MFF 93:43). “Ua ou poloaiina outou e taitaiina a outou fanau i le malamalama ma le upu moni” (MFF 93:40). “Faatonu [o tatou] aiga, ma vaai ia latou matua maelega ma mafaufau i le aiga ma tatalo e le aunoa, a leai o le a aveesea i latou mai lo latou nofoaga” (MFF 93:50).

Ua tuuina mai e perofeta o o tatou nei aso se apoapoaiga faapea ma se lapataiga i matua ina ia faatulaga o tatou aiga. Ia faamanuiaina i tatou i le musumusuga ma le alofa e fetaiai ai ma nisi tulaga ese faatasi ma le faatuatua i totonu o o tatou aiga. Ona tatou iloa ai lea o o tatou tofotofoga o le faalatalata atu atili lea o i tatou i le Alii ma le tasi i le tasi. Ia tatou faalogo i le siufofoga o se perofeta ma faatulaga o tatou lava aiga (vaai MFF 93:41-49). E faamalosia le aiga a o tatou faalatalata atu i le Alii, ma o le a faamalosia tagata taitoatasi o le aiga a o tatou siitia a’e ma faamalosia ma alofagia ma tausia e le tasi le tasi. “Ia e siitia a’u ona ou siitia ai lea o oe, ona ta o a’e faatasi ai lea” (Faataoto a Quaker).

Ia mafai e i tatou ona talia ma faatumauina le Agaga o le Alii i o tatou aiga e faamalosia ai o tatou aiga. Ina ia mafai ai e tagata taitoatasi o o tatou aiga ona tumau i le “ala sa’o ma le lauitiiti e tau atu i le ola e faavavau” (2 Nifae 31:18), o la’u tatalo lea.

Mai se lauga a Elder Hales i le konafesi aoao a le Ekalesia ia Aperila 1999 (Liahona, Iulai 1999, 37–40).