Punaoa Faaleaiga
Lesona 7: O le Mana Faamalolo o le Faamagalo Atu

Lesona 7

O le Mana Faamalolo o le Faamagalo Atu

Auala mo le Faatinoga

Ia mulimuli i se mea e tasi po o mea uma e lua o nei fautuaga e tusa ai ma ou tulaga manaomia ma tulaga o loo i ai.

Faamatalaga Faatonuina e Faitauina

Ia suesue i le faamatalaga tusia o loo i lalo. Afai ua e faaipoipo, faitau ma talanoaina le faamatalaga tusia faatasi ma lou to’alua.

“A o Outou e Ao Ina Outou Faamagalo Atu”

Peresitene Gordon B. Hinkley
Fesoasoani Muamua i le Au Peresitene Sili

O le maua o se agaga o le faamagalo atu ma se uiga o le alofa ia i latou o e atonu ua sese mai ia i tatou o le autu moni lava lea o le talalelei a Iesu Keriso. E manaomia e i tatou taitoatasi lea agaga. E manaomia e le lalolagi atoa lava. Sa aoao atu e le Alii lea agaga. Sa ia faataitai atu lea agaga e sili atu nai lo se isi lava tagata.

I le taimi o Lona mafatia i luga o le satauro o Kalevaria, a o i ai i Ona luma tagata faatiga uiga eseese ma le inoino, o i latou ia na aumaia ia te Ia lea faasatauroga inosia, sa alaga o Ia, “Lo’u Tama e, ia e faamagalo atu ia te i latou; aua ua latou le iloa le mea ua latou faia” (Luka 23:34).

E leai se tasi o i tatou ua valaauina e faamagalo atu faapea, peitai ua ia i tatou le tiute ua tofia mai le lagi ina ia aapa atu i le faamagalo ma le agalelei. Sa ta’u mai e le Alii i upu faafaaaliga: “Sa saili o’u soo e fai pona o le tasi i le tasi i aso anamua, a e le faamagalo atu le tasi i le tasi i o latou loto; ma ona o lenei mea leaga na puapuagatia ma a’oa’oina tiga ai i latou.

“O le mea lea, ou te fai atu ai ia te outou, e tatau ona outou faamagalo atu le tasi i le tasi; aua o le le faamagalo atu i lona uso i ana solitulafono ua ta’usalaina i luma o le Alii; aua e i ai pea ia te ia le agasala sili ona mamafa.

“O a’u le Alii, e faamagalo atu i e ou te loto ia faamagaloina, a o outou e ao ina outou faamagaloina atu i tagata uma.

“E tatau foi ona outou faapea i o outou loto—ia faamasino le Atua i lo ta va, ma tauia ia te oe e tusa ma au galuega.” (MFF 64:8–11).

Faauta i le moomia tele ona tatou faatinoina o lenei mataupu faavae ua tuuina mai le Atua faapea ma lona mataupu faavae e o faatasi ma lena mea, o le salamo lea! Ua tatou iloa le manaomia tele o lenei mea i aiga o tagata, o aiga ia ua avea ai nai mauga laiti o feeseeseaiga ma mauga tetele o finauga. Ua tatou vaaia lea tulaga i tuaoi, ia ua avea ai nai feeseeseaiga faatauvaa ma mea ua fai ma feitagai e le mavae. Ua tatou iloa lea lava tulaga i e ua faigaluega faatasi o e ua tauupu ma mumusu e toe fetu’utu’unai ma faamagalo, ma i le tele o tulaga ia, afai latou te nonofo faatasi ma le lotomalie ma tautala filemu le tasi i le tasi, e mafai ona foia lea faafitauli mo le manuia o tagata uma. Ae peitai, ua latou faaaluina o latou aso i le teu loto o le feitagai ma ua fuafua ni auala e taui atu ai.

I le uluai tausaga o le faavaeina o le Ekalesia, ina ua saisaitia soo le perofeta o Iosefa Samita ma faamasinoina i ni moliaga sese a i latou o e na manao e faatiga ia te ia, sa fetalai mai le Alii ia te ia e ala i se faaaliga, “O soo se tasi foi lua te o atu i le tulafono faatasi ma oe, o le a fetu’uina lava e le tulafono” (MFF 24:17). Ua ou vaaia lena agaga i lo tatou nei taimi i nisi o tagata o e ua faaauau pea ona teu loto i o latou loto mea e tiga ai. E oo lava i nisi o i latou ia o e e manumalo ia latou finauga e foliga mai e itiiti le filemu latou te maua i o latou mafaufau, ma e tusa lava pe latou te mauaina le tele o tupe, a ua le maua e i latou se mea e sili atu ona taua.

Aloese Mai Le Loto Tiga

Ua faamatalaina e Guy de Maupassant, le tagata tusitala Farani, le tala e uiga i se tagata galue e igoa ia Hauchecome o le na sau i le aso e tatala ai le maketi i le nuu. A o savali atu o ia i le faatafafa e feoai ai tagata, sa tau atu lana vaai i se fasimanoa o loo taatiatia mai i luga o ma’ama’a. Sa tago o ia i ai ma ua avae tuu i totonu o lana taga. Sa vaavaai mai le tagata fai faagutu solofanua o le aai i mea sa fai a lenei alii, ma o se alii sa i ai se mea sa feeseeseai ai ma ia.

Sa lipotia mai i le aso na sosoo ai se ato tupe na leiloa. Sa pu’e e leoleo Hauchecome ona ua molia e le tagata e faia faagutu o solofanua. Sa aveina atu Hauchecome i luma o le pulenuu, o le na tetee malosi i ai o ia e leai sana sala, ma sa faaali atu e ia le fasi manoa na tago i ai ma ava’e tuu i lana taga. Peitai sa le talitonu tagata ia te ia ma sa toe i ai.

I le aso na sosoo ai sa maua le ato tupe, ma sa matua mama lelei Hauchcome e leai sana mea sese na fai peitai, ona o le ita i le ta’uleagaina o lona igoa e pei ona sa mafatia ai ona o se tu’uaiga sese, sa o’o ina tiga matuitui lona loto ma sa le mana’o o ia e faauma lea mea. Talu ai ona sa le manao o ia e faamagalo atu ma faagalo, sa leai se isi lava mea na mafaufau ma talanoa i ai o ia. Sa le toe galue o ia i lana faatoaga. Sa alu atu o ia i mea uma, ma o tagata uma sa ia fetaui i ai sa ia ta’u atu i ai le sese o lea mea. Sa taumafai o ia e faamaonia lea lava mea i le ao atoa ma le po. Talu ai ona o le usiusitai i le tiga matuitui sa i lona loto, sa oo ina mai tigaina o ia ma oti ai. A o mafatia o ia o le a oti, sa memumemu o ia i taimi uma ma faapea, “o se fasi manoa, o se fasi manoa” (The Works of Guy de Maupassant [leai se aso] 34–38).

I le sui tulaga i ai o nisi tagata ma tulaga e i ai, e mafai ona toe faamatala ma toe faamatala le na tala i o tatou nei aso. Faauta i le faigata i soo se tasi o i tatou ona faamagalo atu ia i latou o e ua faatiga mai ia i tatou. E matele ina tatou taumafai e faamaonia le mea leaga ua fai mai ia i tatou. O lena faamaonia e avea ma se mea tiga matuitui. Pe i ai ea se uiga sili atu ona lelei e manaomia ai le faatinoina i o tatou nei taimi na i lo le uiga lelei o le faamagalo atu ma faagalo? O loo i ai i latou o e ua manatu o se faailoga lenei o le vaivai. Pe moni ea? Ou te ta’utino atu e le manaomia se malosi po o se atamai e taumafai ai e faamaonia ma le ita se mea sese ua mafatia ai, o le ola lea i le olaga ma se agaga o le tauimasui, o le faaitiitia lea o le ta’uleleia o se tasi i le fuafuaina o se mea e taui atu ai. E le maua le filemu i le teu loto o mea e tiga ai. E le maua se fiafia i le ola i se aso e mafai ai ona e taui atu.

Ua ta’ua e Paulo “mataupu e vaivai ma faatauvaa” o o tatou olaga (tagai Kalatia 4:9). Pe i ai ea se mea e sili atu ona vaivai na i lo le faaalu o le olaga o se tasi i le teu loto pea o mafaufauga ita ia i latou o e atonu e faatiga mai ia i tatou?

Sa pule faamalumalu Iosefa F. Samita i le Ekalesia i se taimi o le ita tele o tagata i o tatou tagata. Sa avea o ia ma tulimataiga o tuuaiiga a tagata, atoa ma faitioga a le au tusitala e oo lava i tagata o lona nuu. Sa tauemuina o ia, ulagia, ma faifai i ai tagata. Faalogo foi i lana tali ia i latou o e na faaleaga ia te ia: “Tu’u ai pea i latou. Tu’u i latou e o atu. Ia tuuina atu ia i latou le saolotoga e tautala ai e tusa ma lo latou manao. Ia tuuina atu ia i latou e faamatala mai la latou lava tala, ma tusia lo latou lava iuga” (Gospel Doctrine, lomiga lona lima [1939], 339). Ona faia ai lea e ia, faatasi ma se agaga o le faamagalo atu ma le faagalo, o lenei galuega tele ma le lelei o le taitaiina lea o le Ekalesia ina ia agai i luma i se ola fou ma galuega faataunuuina lelei. I le taimi o lona maliu, sa tusia e le to’atele o e na ula ia te ia ni faamatalaga faagaeetia loto e uiga ia te ia.

Ou te manatua lo’u faalogologo atu i se taimi umi lava i se ulugalii sa nonofo faatasi ma au i le isi itu o le kesi. Sa i ai se feitagai i lo la va. Ou te iloa e i ai se taimi na maua ai e i la’ua le alofa ma le faamaoni. Peitai sa faatupuina e i laua uma se amioga o le tautala i mea sese e uiga i le tasi. O lo tatou le loto e faamagalo atu ituaiga mea sese e faia e i tatou uma, faapea ma le le loto e faamagalo atu ia mea sese ma manumalo ai ma le onosai, o le mea lea ua faitioina ai e le tasi le tasi se’ia oo ina mou ese atu le alofa sa iloa muamua e i la’ua. Sa liu efuefu lea alofa ona o le mea leaga ua tatou ta’ua o le faaipoipoga tatala. Ona oo mai ai lea o le nofo to’atasi ma le agaga o le faitio. Ua ou ioe ana se’i faapea e i ai sina salamo ma le agaga faamagalo atu, semanu e faatasia pea i la’ua, ma ua olioli i le la mafutaga e pei ona sa matua faamanuiaina ai tausaga muamua o le la faaipoipoga.

Filemu e Ala i Le Faamagalo Atu

Afai e i ai se tasi na te teu loto le agaga leaga o le ita i le isi, ou te ole atu ia te outou ina ia ole atu i le Alii mo le maua o le malosi e faamagalo atu ai. O lenei lagona o le faaalia o le loto malie o le mea tonu lava lea ua ta’ua o lou salamo. Atonu e le faigofie, ma atonu foi e le vave ona oo mai. Peitai afai e te sailia ma le loto faamaoni ma faatupulaia, o le a oo mai lava. E tusa lava la pe faaauau pea ona faatiga le tagata o le ua e faamagalo atu i ai, o le a e iloa ua e faia le mea e sili e te mafaia mo le maua o se faaleleiga. O le a oo mai i lou loto se filemu e mafai ona maua. O lena filemu o le filemu lea o Le na fetalai mai:

“Aua afai tou te faamagaloina atu tagata ia latou lava agasala, e faamagaloina foi outou e lo outou Tama o i le lagi:

“A e afai tou te le faamagalo atu tagata ia latou lava agasala, e le faamagaloina foi e lo outou Tama a outou agasala” (Mataio 6:14–15).

Atalii Faamaumauoa

Ou te le iloa lava se isi tala sili atu ona matagofie i tusitusiga uma na i lo le tala o loo maua i le mataupu e sefulu ma le lima o le Luka. O lea tala o se tala e uiga i se atalii ua salamo ma se tama ua loto faamagalo. O lea tala o se tala e uiga i se atalii o le na faamaimauina lona tofi i le olaga leaga, ma ua teena le fautuaga a lona tama, ma ua tetee i e na alolofa ia te ia. Ina ua ia faaaluina mea uma, sa fia ai o ia ma leai sana uo, “ona atamai ai lea o ia” (Luka 15:17), sa toe foi o ia i lona tama, o le, ina ua iloa mamao atu e ia lona atalii, “ua momoe atu, ua fusi ia te ia, ma sogi atu ia te ia” (Luka 15:20).

Ou te fai atu ia te outou ia faitau lena tala. E tatau i matua uma ona faitau ma saga faitau i ai. E lava le tele o lea tala e aofia ai le aiga atoa, ma e lava foi lona tele e aofia ai tagata uma, aua pe le o i tatou uma ea o atalii ma afafine faamaumauoa o e e tatau ona salamo ma maua le agaga faamagalo a lo tatou Tama Faalelagi ona mulimuli lea ia te Ia?

O Lona Atalii Pele, o lo tatou Togiola lea, o loo aapa mai ia i tatou ma le loto faamagalo ma le agalelei, peitai i Lona faia o lea mea ua ia poloai mai ina ia salamo. O se agaga moni o le faamagalo atu o le a faaalia ai le agaga moni o lena salamo moomia. Sa fetalai mai le Alii—ma ou te faitauina atu se faaaliga na tuuina atu i le Perofeta o Iosefa:

“O le mea lea ou te poloai atu ai ia te oe ia salamo—salamo, ne’i ou taia oe i la’u upu, i le tiga tele o lo’u loto ma lo’u ita, ma e faigata tele ou puapuaga—o le tiga e te le i iloa, ma o le uiga ese o le tiga e te le i iloa, ioe, o le faigata ona onosai e te le i iloa.

“Aua faauta, o a’u le Atua na puapuagatia i nei mea mo tagata uma, ina ia latou le puapuagatia pe afai latou te le salamo:

A e peitai, afai latou te le salamo, e ao ina latou tiga e pei o a’u:

“O le tiga lea na faagateteina ai a’u lava, o le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga. …

“Ia iloa a’u, ma faalogo i a’u upu; savavali i le agamalu o lo’u agaga, ma o le a e maua le filemu ia te a’u” (MFF 19:15–18, 23).

O le poloaiga lena, ma o Lana folafolaga foi lena lea na Ia aioi ai i lana tatalo sili ua avea ma faataitaiga, “Tama e, … ia e faamagalo ia te i matou i a matou agasala, e pei o i matou foi ona matou faamagalo atu i e ua agaleaga mai ia te i matou” (Mataio 6:9, 12).

“Fusifusi … Manu’a”

Pe le matagofie ea upu a Abraham Lincoln e pei ona sa ia tautalagia a o faia se taua uiga ese ma le matautia a tagata o le atunuu: “E aunoa ma le faamoemoe atu e faia se taui ma sui i se isi, ae ia i ai le alofa mo tagata uma … ia tatou … fusifusi … i manu’a” (i le John Barlett, Familiar Quotations [1968], 640).

O’u uso e ma tuafafine, ia tatou fusifusi i manu- ’a—ioe, le anoano o manu’a ua mafua mai ona o upu faatiga, e mafua ona o le faanoanoa e tupu a’e, e ala i le fuafuaina o auala “e taui” atu ai ia i latou o e atonu ua sese mai ia i tatou. Ua tofu i tatou uma lava ma sina agaga itiiti o le taui ma sui o loo i totonu o i tatou. O le mea e lelei ai, ua ia i tatou uma le mana e mafai ai ona tatou manumalo ai, pe afai o le a tatou “faaofuina [i tatou lava] i le noataga o le alofa, e pei o le ofutalaloa, o le noataga lea o le atoatoa ona lelei ma le filemu” (MFF 88:125).

“O le sese o le mea a le tagata, o le faamagalo atu o le mea mai luga” (Alexander Pope, An Essay on Criticism, 2:1711). E leai se filemu i le mafaufau pea i le tiga o manu’a tuai. Ua na o le salamo lava e i ai le filemu faapea foi ma le faamagalo atu. O le filemu matagofie lea o Keriso, o le na fetalai mai, “Amuia e faatupuina le filemu; aua e ta’ua i latou o atalii o le Atua” (Mataio 5:9).

Mai le Liahona, Novema1991, 2–6.