Lesona 4

O le Tali Atu i Lu’i i le Faaipoipoga

Auala mo leFaatinoga

Ia mulimuli i se mea e tasi po o mea uma o nei fautuaga e tusa ai ma ou lava tulaga manaomia ma tulaga o i ai.

I le faamatalaga faatonuina e faitauina o loo i lalo, o loo faamatala ai e Elder Lynn G. Robbins se “fua mo le faatupuina o le ita.” Faitau e uiga i lana faamatalaga o loo i lenei itulau. Ona faia lea o se fua mo le ogatasi o mea uma i le aiga. Ia filifili po o a “mea e fai ai ” e te faaaogaina i lea fua.
Ia faia se tautinoga ina ia tali atu i lu’i ma le onosai ma le alofa ae le o le faia ma le ita. Ia filifili po o le a se mea e mafai ona e faia o le a faamanatu soo ai ia te oe lenei tautinoga. Mo se faataitaiga, e mafai ona e tuuina se tupe siliva po o se isi mea laiitiiti i totonu o lou seevae po o le tusia o se faaaliga ia te oe lava ma tuu i totonu o lau taga.
Afai e maua le Tusi Faavae o Afiafi Faaleaiga (31106), faitau le “Faaleleia o Faafitauli Faaleulugalii,” itulau 276–77, Afai ua e faaipoipo, ia faitau ma talanoaina nei faamatalaga tusia faatasi ma lou toalua.

FaamatalagaFaatonuina eFaitauina

Ia suesue i le faamatalaga tusia o loo i lalo. Afai ua e faaipoipo, faitau ma talanoaina le faamatalaga tusia faatasi ma lou toalua.

Filifiliga ma leIta

Elder Lynn G. Robbins
O le Fitugafulu

E Faatupu e Satani le Ita i Aiga

“E i ai so’u aiga i lalo nei. Alolofa ia te au.” O le faamoemoega lea o soo se tamaitiiti o loo faaalia i upu o se tasi o a tatou pese ( Viiga, numera 183; faatusilima faaopoopo).

Ua tatou aoao mai le folafolaga i le aiga e faapea “o le aiga o le totonugalemu lea o fuafuaga a Le Foafoa…” ma o le “tane ma le ava ua i ai le tiutetauave paia e alofa ma tausi e le tasi le isi…” ma se “tiute paia e tausia a latou fanau i le alofa ma le amiotonu…” (Liahona, Oketopa 1998, 24).

O le aiga o le vaega sili foi lea o loo tulimataia e Satani. O loo ia siitaua i le aiga. O se tasi o ana fuafuaga o le auala faatogafiti ma le taufaasese o loo ia te ia o lona oo mai lea e aunoa ma se iloa ma ulu mai i o tatou lava fale ma o tatou olaga.

Na te faaleagaina ma e masani ona ia faaumatiaina ia aiga i totonu lava o puipui o o latou fale. O lona faamoemoega o le faatupuina lea o le feitagai i tagata o aiga. O Satani o le “tama o finauga,” ma na te “faaosoina foi loto o tagata e fefinauai ma le ita ”(3 Nifae 11:29, faatusilima faaopoopo). O le veape o le faaoso e foliga mai o se fua mo le faatupuina o le ita : Tuutuu teisi i luga le ita, ona saeu lea i ni nai upu e te filifilia e faatupu ai le vevesi; ia fai ai pea lea faiga seia faateteleina; faamaalili; ona tumau ai pea lea o ia lagona i le va o tagata ma faatupuina ai le tele o faafitauli.

E Mafai Ona Tatou Filifili Ia Aua Ne’i Ita

O se vaega taufaasese o lenei fuafuaga o le faaeseeseina ai lea o le ita mai le filifiliga, ia faatalitonu ai i tatou o i tatou o nisi ua aafia i se lagona lea e le mafai ona tatou puleaina. Tatou te faalogoina le faaupuga, “Ua le mafai lo’u ita.” O lea faaupuga ua avea ma faamatalaga e faaaoga soo. O loo faailoa mai e lea faaupuga o le “ua le mafai lo’u ita” o lona uiga e “lei faamoemoe i ai,” “e faafuaseia,” “e tupu fua,” ma “e le tuuaia,”—atonu o se mea ua sasi, ae “e le tuuaia” o ia.

“O ia na mafua ai ona ou ita.” O se tasi lea o fuaitau tatou te faalogoina, e atagia mai ai foi le leai o se puleaina po o se filifiliga. O se alofaga lenei e tatau ona tu’ueseina. E leai se tasi na te faaitaina i tatou. E le faatupuina e isi tagata lo tatou feita. E leai se tulaga faamalosi o aafia ai. O le ita o se filifiliga i le lotofuatiaifo, o se faaiuga; o le mea lea, e mafai ona tatou faia se filifiliga e aua le ita. O tatou lava e filifilia!

Ia i latou o e faapea mai, “e le mafai ona ou tatalia,” o le tali i ai a le tusitala o William Wilbanks, “E sese.”

“O le maemaea,… oono po o le ita o le loto ae le faaalia, o le talanoa e uiga i ai, avaavau ma le e’e” o tulaga uma ia e aoaoina i le feagai ai ma le ita. “Tatou te filifilia le vaega ua faamaonia e aoga tele mo i tatou i le taimi ua tuanai. O e maitauina ea e seasea ona tatou feita pe a tatou le fiafia i o tatou pule i falefaigaluega, ae ese lo tatou vave ita pe a faatiga i tatou e a tatou uo po o aiga?” (“The New Obscenity,” Readers Digest, Tesema1988, 24; faatusilima faaopoopo).

I lona tausaga lona lua i le aoga na taumafai ai ia Wilbanks ina ia sao atu i le au pasiketipolo a le aoga maualuga ma sa ia mafaia lava. I le aso muamua lava o a latou toleniga sa tuu atu ai e lo latou faiaoga o ia e taalo to’atasi a’o matamata uma le au. Na misi sana togi faigofie lava, ma ita ai ma tatu ona vae ma tomumu. Na savali atu le faiaoga ia te ia ma faapea atu i ai, “e te toe faia loa se uiga faapea e te le toe taalo lava i la’u au.” O le isi tolu tausaga na sosoo ai e le i toe ita lava o ia. I tausaga mulimuli ane ai, a’o ia toe tomanatu i le mea na tupu, na ia iloaina ai na aoaoina atu e le faiaoga ia te ia se mataupu faavae ua suia ai lona olaga i lena aso; o le ita e mafai ona puleaina (tagai “The New Obscenity,” 24).

O Aoaoga a le Alii

I le Faaliliuga a Iosefa Samita o le Efeso 4:26, na fautua mai ai Paulo e faapea: “Pe mafai ea ona tatou feita e aunoa ma le agasala ai?” E matuai manino lava le saunoaga a le Alii i lea mataupu:

“O le ua i ai le agaga o le finauga, e le mai ia te a’u lea, ae mai le tiapolo, o le tama lea o finauga, ua ia faaosoina foi loto o tagata e fefinauai ma le ita.

“Faauta e le o la’u mataupu lea, e faaosoina loto o tagata i le feitagai; a’o la’u mataupu lenei, ia mavae atu lava mea faapea” (3 Nifae 11:29–30).

O lenei aoaoga faavae po o le poloaiga mai le Alii o loo i ai ma le filifiliga ma e faaatatau lea i le lotofuatiaifo ina ia faia ai se faaiuga. Ua faamoemoeina i tatou e le Alii ina ia faia filifiliga e aua ne’i o tatou feita.

E le mafai foi ona faamaoniaina le ita. I le Mataio 5, fuaiupu 22, o loo fetalai mai ai le Alii: “A’o a’u ou te fai atu ia te outou, ai se ita fua i lona uso e nofosala o ia i le faamasinoga.” O se mea e maofa ai ona o le upu “fua” e le o maua i le Faaliliuga musuia a Iosefa Samita (tagai Mataio 5:24, e le o maua foi i le 3 Nifae 12:22. Ina ua aveese e le Alii le upu “fua” ua ia tu’ua i tatou e aunoa ma se alofaga. “Ae o la’u mataupu lenei, ia mavae atu lava mea faapea” (3 Nifae 11:30). E mafai ona tatou “mavae ese” ma le ita aua ua Ia aoao mai ai ma poloaiina ai i tatou.

O le Ita o le Gauai Atu Lea i le Faatosinaga a Satani

O le ita o se gauai atu lea i faatosinaga a Satani. O le agasala lea e tupu mai i le manatu ma oo atu ai i lagona po o uiga feitagai. O le mafuaaga lea o feeseeseaiga o avetaavale i luga o le auala, o le tauaimisa i totonu o malae taalo, ma le faasaua i totonu o aiga.

Afai e le puleaina, e mafai e le ita ona faapogaiina se puna o upu masoa ma isi ituaiga o faatautala faalelagona lea e mafai ona faamailaina ai se loto agamalu. O le mea e “sau mai le gutu,” o le fetalaiga lea a le Faaola, “e leaga ai le tagata” (Mataio 15:11).

Na faapea mai Tavita O. Makei, “ia aua lava ne’i talanoa le tane ma le ava i ni leo avaavau, se’i vagana ua mu le fale’” (David O. Mckay, Stepping Stones to Abundant Life, comp. Lewelyn R. Mckay [1971],294).

O le faatautala faaletino e mafua mai ona o le le taofiofia o le ita, ma e le tatau lava ona faatagaina, ma o se amioletonu lea.

O le ita o se taumafaiga le mafaufau lea ina ia lagona ai e le isi tagata le ta’usalaina po o se auala mataga e taumafai ai e faasaoina i latou. E masani lava ona faaupuina sese o le a’oaiga, ae masani lava ona tulai mai ai ni taunuuga faafeagai. O lea la, o le lapataiga mai tusitusiga paia: “O outou tane ia outou alolofa ia outou ava, aua foi ne’i faaonoono ia te i latou,” ma “outou tama, aua ne’i faaita ia outou fanau, ina ne’i faapalapala i latou” (Kolose 3:19, 21).

“O le a le Mafai Ona ou Toe Ita”

O le filifiliga ma le faamasinoina, o ni mataupu faavae e le tu’ueseeseina. Talu ai ona o le ita o se filifiliga, o lo o i ai se lapataiga malosi lava i le folafolaga e faapea “o tagata taitoatasi… o e faasaunoa i taitoalua ma fanau,… o le a i ai se aso tou te tutu atu ai e tali atu i luma o le Atua.”

O le malamalama i le sootaga i le va o le sa’olotoga ma le ita o le laasaga muamua lea i lona aveeseina mai o tatou olaga. E mafai ona tatou filifili ina ia aua nei o tatou feita. Ma e mafai lava ona tatou faia lena filifiliga i le aso, i le taimi nei: “O le a ou le toe ita lava.” Ia mafaufau loloto i ai i lena faaiuga.

O le vaega e 121 o le Mataupu Faavae ma Feagaiga o se tasi lea o a tatou fesoasoaniga sili e aoaoina ai mataupu faavae sa’o faale-autaitai. Atonu o le faaaogaina sili o le vaega e 121 e mo taitoalua ma matua. E ao ona tatou taitaiina o tatou aiga e ala lea i le faaoleole atu, faapalepale, agalelei, agamalu, ma le alofa faamaoni (tagai MFF 121: 41–42).

Tau ia ina ia taunuu miti a tamaiti uma taitoatasi ina ia i ai se aiga i lalo nei e alolofa ia i latou. Mai se lauga a Elder Robbins i le Konafesi Aoao a le Ekalesia ia Aperila 1998 (vaai Conference Report, Apr. 1998, 105-6; or Ensign, May 1998, 80-81).

Mai se lauga a Elder Robbins i le konafesi aoao a le Ekalesia ia Aperila 1998 (Tagai Liahona, Iulai1998, 90–91).