Lesona 10

O Tiute Paia o Tama ma Tina

Vaega 1: Tiute o Tama

Auala mo le Faatinoga

Mulimuli i se tasi o mea po o mea uma o nei fautuaga e tusa ai ma ou lava tulaga manaomia ma tulaga o i ai.

Ia talanoaina tiute o tama ma tina e pei ona otootoina i le parakalafa lona fitu o le “O le Aiga: O se Folafolaga i le Lalolagi” (tagai itulau iv). Ia filifili ma le agaga tatalo le ala e talafeagai ai lenei fautuaga ma lou aiga faapea ma le mea o le a e faia e mulimuli ai.
Tusi se tusi i lou tama po o se tama matua.

Faamatalaga Faatonuina e Faitauina

Ia suesue i le faamatalaga tusia o loo i lalo. Afai ua e faaipoipo, ia faitau ma talanoaina le faamatalaga tusia faatasi ma lou toalua.

Mo Tama i Isaraelu

Peresitene Ezra Taft Benson
Peresitene Lona Sefulutolu o le Ekalesia

O’u uso pele e, ou te faafetai ona ua ou i ai iinei faatasi ma outou i lenei faatasiga mamalu o le perisitua a le Atua. Ou te tatalo ina ia faatasi mai ia te a’u le agaga o le Alii faapea ma outou a o ou lauga atu ia te outou e uiga i se mataupu sili ona taua. Ou te fia lauga atu i lenei afiafi i tama o loo faatasi mai ma e o loo i le Ekalesia atoa e uiga i o latou valaauga paia.

Ou te faamoemoe o le a faalogo lelei mai foi outou alii talavou, talu ai ona o loo saunia nei outou e avea ma tama i le lumanai o le Ekalesia.

O Se Valaauga e Faavavau

Tama, o outou valaauga o se valaauga e faavavau e le mafai ona faamaloloina mai ai outou. O valaauga i le Ekalesia, e ui lava ina e taua, a o lo latou tulaga e mo na o se vaitaimi, ona faamaloloina ai lea talafeagai. Peitai e faavavau se valaauga o se tama, ma e faaauau pea lona taua i augatupulaga. O se valaauga lea e le gata i le taimi nei ae faapea foi i le faavavau.

E moni lava na faapea mai Peresitene Harold B. Lee “O le galuega sili ona taua a le Alii e faia e outou [tama] o le galuega lea tou te faia i totonu o puipui o o outou lava fale. O aoaoga a aiga, galuega a le au epikopo, ma isi tiute o le Ekalesia e taua uma lava, ae o le galuega sili ona taua e faia lea i totonu o puipui o lou aiga” (Strengthening the Home [tamai tusi,1973], 7).

O le a la le tiutetauave patino o le tama i totonu o puipui paia o lona aiga? Ou te fia ta’u atu tiutetauave autu e lua o tama uma i Isaraelu.

Saunia Mea e Manaomia Faaletino

Muamua, ua ia te oe se tiutetauave paia o le saunia lea o tulaga manaomia faaletino o lou aiga.

Ua famatalaina manino mai e le Alii tiute o le saunia o mea mo le atiinae o se aiga amiotonu. Na faatonuina i le amataga Atamu, ae le o Eva, e galue mo meaai ma le afu o ona mata.

Ua fautuaina e le Aposetolo o Paulo tane ma tama, “Ae afai e le tausia e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faalogo” (I Timoteo 5:8).

I le amataga lava o le talafaasolopito o le Ekalesia toefuataiina, sa tuuina mai faapitoa lava e le Alii i alii le tiutetauave o le saunia o mea mo le tausiga o a latou ava ma aiga. I le masina o Ianuari o le 1832, sa fetalai mai o Ia, “A o lenei foi, e moni ou te fai atu ia te outou, ai se ao ina faia mea e tausia ai lona lava aiga, ia tuu atu ia te ia e tausi, na te le maumauina ai foi lona pale” (MFF 75:28). I masina e tolu mulimuli ane sa toe fetalai mai foi le Alii, “E tatau i tamaitai lo latou tausiga mai a latou tane se’ia oti a latou tane” (MFF 83:2). O le tiute paia lea o se ava ma se tina. E vaaia e ia ma fafagaina lana fanau i le aiga, ao galue lana tane e saili se mea mo le tausiga o le aiga, ma o lea galuega ua mafai ai ona fafagaina le aiga.

I totonu o se aiga o loo i ai se tane e mafai ona galue, ua faamoemoe ina ia sailia e ia tupe o le tausiga o le aiga. O nisi taimi tatou te faalogo ai e uiga i tane o e, ona o ni tulaga tau le tamaoaiga, ua aveesea mai ai mai a latou galuega ma ua faamoemoe ina ia o atu taitoalua mai o latou aiga e galulue, e tusa lava pe o mafai e le tane ona tausia lona aiga. i nei tulaga, matou te faamalosi atu i tane ina ia faia mea uma e mafai ona latou fai e faatagaina ai lana ava ina ia nofo pea i le aiga ma vaai tamaiti a o faaauau e le tane ona sailia tupe mo lona aiga i le mea sili na te mafaia, e ui lava o le galuega o loo mafai ona ia maua atonu e le lelei ma le lava tupe e tausi ai le aiga.

E le gata i lea, o le tulaga manaomia o aoga po o mea i la le tino ua le avea lea ma mafuaaga tatau e tolopoina ai le fanau mai o fanau ina ia mafai ai ona faigaluega pea le ava ina ia avea ma se e tausia le aiga.

Fautuaga a Peresitene Kimball

Ou te manatua le fautuaga a lo tatou perofeta pele o Spencer W. Kimball na tuuina atu i tagata aoga ua faaipoipo. Sa ia faapea mai: “Ua uma ona ou ta’u atu i le sefulu ma sefulu o afe o tagata talavou e faapea pe a faaipoipoina i latou e le tatau ona latou faatali mo le fanauina mai o fanau se’i vagana ua maea a latou aoga ma manaoga tau tupe. … E tatau ona latou ola faatasi i le tulaga masani ma ia tuu atu le avanoa e fanauina ai fanau. …

“E leai se mau ou te iloa,” o le faaauauina lea o le saunoaga Peresitene Kimball, “o loo tuuina atu ai le faatagaga i ava talavou ina ia taofia le fanauina o fanau i o latou aiga ae o atu e faigaluega ina ia mafai ai ona aooga a latou tane. O loo i ai le afe ma afe o tane o e na o atu i le aoga ma fanauina fanau i o latou aiga i le taimi e tasi” (“Marriage Is Honourable,” i le Speeches of the Year,1973 [1974], 263).

O le Tiute o se Tina i le Aiga

Uso e o le perisitua, ou te faaauauina le faamamafa atu o le taua o tina e nonofo i le fale e fafaga, ma tausia, ma aoaoina a latou fanau i mataupu o le amiotonu.

A o ou malaga i le Ekalesia atoa, ou te lagona o le to’atele naua o tina o le Au Paia o Aso e Gata Ai o loo mananao ma le agaga naunautai e mulimuli i lenei fautuaga. Peitai ua matou iloa o nisi taimi e galue ai le tina i fafo atu o le aiga ona o le uunaiga, po o le tauanau foi, a lana tane. O ia lava lea o loo manao i mea taugata e mafai ona faatauina i tupe faaopoopo. O le a le gata ina mafatia le aiga i ia tulaga, uso e, ae o le a taofia ai foi lo oe lava tulaga tuputupu ae ma le alualu i luma faaleagaga. Ou te faapea atu ia te outou uma, ua tuuina mai e le Alii i alii le tiutetauave o le tausia o aiga i se auala e mafai ona faatagaina ai le ava e faataunuuina lona tiute i le avea ma tina i le aiga.

O Loo Sili Ona Vave Manaomia i Aso Nei le Saunia o Aiga

Tama e, o se isi vaega taua o le tausia o tulaga manaomia faaletino o lou aiga o le saunia lea o mea mo lou aiga ina ne’i oo mai se faalavelave tupu faafuasei. O le saunia o aiga o se mataupu faavae o le uelefea ua leva ona faamautuina. Ua sili atu ona manaomia vave i aso nei.

Ou te fai atu ma le agaga naunautai ia te outou, pe ua e saunia ea mo lou aiga ni meaai mo se tausaga, lavalava, ma, i mea e mafai ai, alala? Atonu o le taua o le faaaliga ina ia saunia ma teu meaai mo lo tatou soifua manuia faaletino i aso nei e pei lava lona taua i tagata i ona po o Noa o le ulu atu i le vaa.

E le gata i lea, pe o outou ola ea e tusa ai ma la outou tupe maua ma faasaoina se vaega itiiti?

Pe o outou faamaoni ea i le Alii i le totogiina o a outou sefuluai? O le ola i lenei tulafono paia o le a aumaia ai faamanuiaga faaleagaga ma le faaletino.

Ioe, uso e, i le avea ma tama i Isaraelu ua ia te outou se tiutetauave taua o le saunia o mea faaletino mo outou aiga ma maua tausiga e tatau ai mo tulaga o faalavelave tutupu faafuasei.

Saunia le Taitaiga Faaleagaga

O lona lua, ua ia te outou se tiutetauave paia o le saunia lea o le taitaiga faaleagaga i lou aiga.

I se tusi itiiti na lomia ma faasalalauina i aso ua mavae e le Au Fono a le Toasefululua, sa matou ta’ua ai mea nei: “O se tulaga taitai le avea ma tama, o le ituaiga o taitaiga lea e pito sili ona taua. Sa faapea lava i taimi uma; o le a faapea foi i le lumanai. Tama, o oe e pule faamalumalu i le aiga faatasi ma le fesoasoani ma le fautuaga ma le uunaiga a lau soa e faavavau” (Father, Consider Your Ways [tamai tusi, 1973], 4–5).

Ae ui i lea, o le i ai o lena tulaga pule faamalumalu o loo oo mai ai foi ma nisi tiute taua. O nisi taimi ua tatou faalogo ai i ni tala e uiga i alii, e oo lava foi i totonu o le Ekalesia, o e ua manatu talu ai ona o le avea ma ulu o le aiga ua tuuina ai i latou i se tulaga i se tiute maualuga ma ua faatagaina ai i latou e pule saua ma faia faamalosi taitaiga i o latou aiga.

Ua faamanino mai e le Aposetolo o Paulo “o le tane o le ulu ia o le ava, pei o Keriso foi o le ulu ia o le Ekalesia” (Efeso 5:23; faaopoopo le faatusilima). O le auala lena e tatau ona tatou mulimuli ai i lo tatou tiute o le pule faamalumalu i le aiga. Ua tatou le iloa lava le taitaiina e le Faaola o le Ekalesia i se aao le agalelei. Ua tatou le iloa le Faaola o feagai ma le taitaiina o Lana Ekalesia i se tulaga le faaaloalo po o le le amanaia. Ua tatou le iloa foi le faaaogaina e le Faaola o le faamalosi po o le saua i le faataunuuina o Ona faamoemoega. E leai foi se mea tatou te maua ai le Faaola o ia faia se mea ae tau lava o le faagaeetia, siitia a’e, faamafanafana, ma faaeaina le Ekalesia. Uso e, ou te faapea atu ia te outou ma le agaga naunautai uma lava, o Ia o le faataitaiga e tatau ona tatou mulimuli i ai a o taitaiina faaleagaga e i tatou o tatou aiga.

Ua moni faapitoa lava lenei tulaga i le lua sootaga ma lau ava.

Alofa i Lau Ava

Ua toe avea foi le fautuaga mai le Aposetolo o Paulo ma se tulaga sili ona matagofie ma faatatau tonu i le mea o loo tatou talanoaina. Sa ia faapea mai, “o outou tane, ia outou alolofa atu ia outou lava ava, faapei o Keriso foi ona alofa mai i le Ekalesia” (Efeso 5:25).

Na toe fetalai mai le Alii i se faaaliga i ona po nei e uiga i lenei tiutetauave. Na Ia fetalai mai “Ia e alofa atu i lau ava ma lou loto atoa, ma pipii atu ia te ia ae le o se isi” (MFF 42:22). O lo’u lava malamalama e na o le tasi lava le isi mea o loo i tusitusiga paia uma o loo ua poloaiina i tatou e alolofa i ai ma o tatou loto atoa, ma o lena mea o le Atua lava Ia. Ia mafaufau po o le a le uiga o lena mea!

O lenei ituaiga o alofa e mafai ona faaalia mo a outou ava i le tele o auala. O le mea muamua ma o le mea sili lava lea, e leai se mea se’i vagana ai o le Atua lava ia e tatau ona sili atu i lau ava i lou olaga—e le o le galuega, e le o ni fiafiaga, po o ni mea e fiafia i ai. O lau ava o lou fesoasoani taua lea ma le faavavau—o lau aumea.

O le a le uiga o le alofa atu i se tasi ma lou loto atoa? O le uiga o lea mea o le alofa atu lea ma ou lagona alofa uma faapea ma lou faamaoni. O le mea moni pe a e alofa atu i lau ava ma lou loto atoa, e le mafai ona e ta’u faatauvaaina o ia, faitioina o ia, saili i mea e sese ai o ia, po o le saua ia te ia i upu, amioga tu fanua, po o mea e faia.

O le a le uiga o le “pipii atu ia te ia”? O le uiga o lea mea o le faalatalata atu pea ia te ia, ia amio sa’o ma faamaoni ia te ia, ia fesootai ma ia, ma ia faaalia lou alofa mo ia.

O le alofa o lona uiga o le gauai atu lea i ona lagona ma tulaga manaomia. E manao o ia ia faatauaina ma faapelepeleina. E manao o ia ina ia e ta’u atu o lau vaai ia te ia e matagofie ma faatosina loto ma e taua ia te oe. O le uiga o le alofa o le faamuamua lea i lou olaga o lona manuia ma le faatauaina e ia o ia lava.

E tatau ona e faafetai ua avea o ia ma tina o lau fanau ma tupu tamaitai o lou aiga, ua e faafetai ona ua ia filifilia le tausiga o aiga ma le avea ma tina—o le tauaveina, fafagaina, alofa, ma aoaoina lau fanau—i le avea ma valaauga sili ona mamalu o valaauga uma.

O outou tane, ia outou aloaia le atamai o lau ava ma lona atamai e fautua mai ia te oe i lona tulaga o se soa moni e uiga i fuafuaga a le aiga, gaoioiga a le aiga, ma le fuafuaina o tupe a le aiga. Aua le pupu tele lou loto i lou taimi po o mea e te maua.

Ia tuuina atu ia te ia le avanoa e tuputupua’e ai i le atamai, lagona, ma le va fealoai ma tagata faapea foi ma le faaleagaga.

Ia manatua, uso e, e mafai ona fafagaina le alofa ma faatupuina atili i nai mea laiti tou te fai. O le avatu i ai o ni fugalaau i aso faapitoa o se mea matagofie tele, peitai ua faapea foi ma lou loto malie e fesoasoani atu i le fufuluina o ipu, suia o napekini, ala e faanana se tamaitiiti o loo tagi i le po, ma ia tu’ua le televise po o le nusipepa ina ia fesoasoani atu i le saunia o le meaai. O auala le iloa na tatou te faapea atu ai “ou te alofa ia te oe” ia tatou mea e fai. E tele sona aoga mo se taumafaiga itiiti tatou te fai.

O lenei taitaiga alofa faaleperisitua e faaaogaina i lau fanau faapea foi ma lau ava.

O se Tiute o le Tama i le Aiga

Ua i ai i tina se tiute taua i le avea ma fatu o le aiga, ae peitai e le faapea e faaitiitia ai le tiute taua o tama e tatau ona fai, i le avea ma ulu o le aiga, i le fafagaina, aoaoina, ma alolofa ia latou fanau.

I le avea ma peteriaka i lou aiga, ua i ai ia te oe se tiutetauave taua o le tauaveina o le taitaiga i le galulue ai ma lau fanau. E tatau ona e fesoasoani e fausia se aiga e mafai ona tumau ai pea le Agaga o le Alii. O lou tulaga o le tuuina atu lea o le taitaiga i le olaga atoa o le aiga. E tatau ona e taulamua i le faamautuina o tulafono faaleaiga ma ala e pulea ai le aiga.

E tatau ona avea o outou aiga ma lagi o le filemu ma le olioli mo lou aiga. O le mea moni e leai se tamaitiiti e tatau ona fefe i lona lava tama—aemaise lava se tama o umia le perisitua. O le tiute o se tama o le saunia lea o lona aiga e avea ma nofoaga o le fiafia ma le olioli. E le mafai ona ia faia lenei mea pe afai e i ai le faatiga, feupuai, fevaevaeai, po o se amioga le amiotonu. O aafiaga malolosi o tama amiotonu i le faia o faataitaiga, pulea ma aoaoina, fafagaina ma le alofa o mea taua ia mo le manuia faaleagaga o lana fanau.

Tuuina Atu le Taitaiga Faaleagaga

Faatasi ma le alofa i lo’u loto mo tama i Isaraelu, ou te fia fautua atu ala patino nei e sefulu e mafai ai e tama ona tuuina atu se taitaiga faaleagaga ia latou fanau:

Ia tuuina atu faamanuiaga a tama i lau fanau. Ia papatisoina ma faamauina le papatisoga o lau fanau. Ia faauuina ou atalii i le perisitua. O le a avea lenei mea ma mea taua faaleagaga i olaga o lau fanau.
Ia taitai e oe tatalo faaleaiga, faitauina o tusitusiga paia i aso taitasi, ma afiafi faaleaiga i vaiaso taitasi. O le aafia o oe i mea e fai o le a faaali atu ai i lau fanau le taua o nei gaoioiga.
Ia o atu faatasi o se aiga i le lotu i soo se taimi lava e mafai ai. O le tapuaiga faaleaiga i lalo o lau taitaiga e taua lava lea mo le manuia faaleagaga o lau fanau.
Ia o atu ma lau fanau i ni tafaoga a le tama ma afafine poo le tama ma atalii. I le tulaga o se aiga, ia o atu e tolauapi ma tafafao, ia o atu i taaloga ma konaseti, polokalama a aoga, ma isi. O le i ai o tama i na mea e i ai sona suiga tele.
Ia faia ni tu o malologa faaleaiga ma malaga ma tafaoga. O nei mea e manatua pea o le a le galo i lau fanau.
Ia faia ni talanoaga taitoatasi ma lau fanau. Ia tuuina atu ni avanoa ia i latou e talanoa ai i mea latou te manaomia. Ia aoao atu ia i latou mataupu faavae o le talalelei. Ia aoao atu ia i latou uiga taua moni. Ta’u atu ia i latou e te alofa ia i latou. O le faaavanoaina o lou lava taimi e faatasi ai ma lau fanau e ta’u atu ai ia i latou mea o loo faamuamua e Tama.
Ia aoao atu i lau fanau ia galulue, ma ia faasino atu ia i latou le taua o le galue agai i se sini aoga. O le faamautuina o tupe mo misiona ma aoga mo lau fanau e ta’u atu ai ia i latou mea ua manatu Tama ua taua.
Ia uunaiina le faalogologo i musika lelei ma solo ma tusitusiga lelei i totonu o o outou aiga. O aiga o loo i ai se agaga o le faagaeetia loto ma le matagofie o le a faamanuiaina ai olaga o lau fanau e faavavau.
Afai e le mamao ese se malumalu, ia auai i taimi faifaipea i le malumalu faatasi ma lau ava. O le a sili atu ona malamalama lau fanau i le taua o le faaipoipoga faalemalumalu ma feagaiga faalemalumalu faapea ma le aiga e faavavau.
Ia vaai lau fanau i lou olioli ma le loto malie e maua i le auauna atu i le Ekalesia. E mafai ona avea lea mea ma mea faatosina loto ia i latou, o le mea lea, o le a mananao foi i latou e auauna atu i le Ekalesia ma o le a alolofa i le malo.

O Lou Valaauga Sili Ona Taua

O outou tane ma tama i Isaraelu, e tele naunau mea e mafai ona outou faia mo le faaolataga ma le faaeaina o o outou aiga! E taua tele o outou tiutetauave.

Ia manatua lou valaauga paia i le avea ma tama i Isaraelu—o lou valaauga sili ona taua i le taimi nei ma le faavavau—o se valaauga o le a le mafai ona faamaloloina ai oe.

Tau ina ia outou saunia e le aunoa mea faaletino mo lou aiga ma, faatasi ma lau soa e faavavau i ou tafatafa, ia outou faataunuuina lo outou tiutetauave paia o le saunia lea o le taitaiga faaleagaga i lou aiga.

Mai se lauga a Peresitene Benson i le sauniga perisitua o le konafesi aoao a le Ekalesia ia Oketopa 1987 (Liahona, Ianuari 1988, 48–54).