Lesona 15

Taitaiina o Fanau a o Latou Faia Faaiuga

Auala mo le Faatinoga

Mulimuli i se tasi o mea po o mea uma o nei fautuaga e tusa ai ma ou lava tulaga manaomia ma tulaga e i ai.

• I le faamatalaga faatonuina e faitauina o lo o i lalo, o loo tuuina atu ai e Elder M.Russell Ballard ni fautuaga se fa e fesoasoani ai ia i tatou i le “atina’e o se pa pupuni o le faatuatua i o tatou aiga ma…saunia ai o tatou tupulaga talavou ina ia mama ma ia le eleelea, ia agavaa atoatoa mo le ulu atu i le malumalu.” Ia iloiloina ana fautuaga ma ia faia ni fuafuaga patino e mulimuli ai i nei fautuaga i lou aiga.

• Ia mafaufau e uiga i faaiuga atonu e feagai ma tamaiti taitoatasi i lou aiga e le aoga, i le aiga, ma isi nofoaga. Ia mafaufau po o le a se mea e mafai ona e faia e fesoasoani ai i le saunia o tamaiti taitoatasi i le faia o faaiuga amiotonu.

Faamatalaga Faatonuina e Faitauina

Suesue i le faamatalaga tusia o loo i lalo. Afai ua e faaipoipo, faitau ma talanoaina le faamatalaga tusia faatasi ma lou toalua.

E Pei o Se Aloiafi e Le Pe

Elder M. Russell Ballard
O le Korama a Aposetolo e Toasefululua

O Le Olioli e Maua i le Faaipoipoga Faalemalumalusa

E seasea ona ou maua le avanoa ou te taitai ai i totonu o le malumalu pe a faaipoipoina ni tagata agavaa se toalua ma faamauina i totonu o le Maota o le Alii. E masani lava o ni taimi faapitoa nei mo aiga ma uo. O lagona i taimi faapea e manaia ma faamalieina i le fiafia e fefiloi i fiafiaga faalelalolagi ma le olioli e faavavau e vaaia i mata o tina e tumu i loimata o e sa nofo tatalo ma o latou loto atoa mo lenei aso. Tou te vaaia i mata o tama, o e mo le uluai taimi i le tele o masina, o mafaufau i se isi mea e ese mai le mafaufau pe faapefea ona totogiina mea uma o le faaipoipoga. Ae o mea sili lava tou te vaaia o mata ia o se faatoa nofotane ma se faatoa faiava mama o e sa ola faamaoni i aoaoga o le Talalelei, ma teteeina ia faaosoosoga o le lalolagi. E i ai se lagona faapitoa ma e le mafai ona teenaina e avanoa mo i latou o e tumau i le mama ma le legavia ma atoatoa.

O Tulaga o le Tino Ola Pea e Sa’olele

E toatele na’ua o tatou alii talavou ma tamaitai talavou ua gauai atu i faatosinaga a se lalolagi ua lofia i savali leaga ma amioga le mama. O loo faaauauina pea e Lusifelo se taua matautia mo loto ma agaga o e talavou faapea foi e matutua, ma ua faateleina lava i latou o loo manunua ai. O faatulagaga o le lalolagi ua fesuiai e pei o oneone o le toafa o loo agi ai se matagi. O mea sa le i faalogoina pe taliaina ua avea nei ma mea faalauaitele. O le tulaga o le lalolagi ua matuai suia lava ma o i latou o e filifili e pipii i faatulagaga o tu masani po o le ola mama ua vaaia ua suia, e toetoe lava ona tatau ia i latou ona faamaoniaina lo latou naunautai e tausia poloaiga a le Atua.

Ae tasi le mea e mautinoa: e le i suia lava poloaiga. Aua lava ne’i sese ai se manatu o se isi. O le sa- ’o e sa’o lava pea. O le sese e sese lava pea, e tusa lava po o le a le faiga ina ia taliaina ai i le lautele po o faiga faaupufai. Matou te talitonu i le ola mama a’o le i faaipoipoina ma le faamaoni i le toalua pe a maea. O lenei faatulagaga o se faatulagaga tumau o le upumoni. E le tuuina atu ina ia palotaina pe faalagolago foi i ni tulaga po o ni aafiaga. E le manaomia ona finauina po o isi faatulagaga o le talalelei.

Fausia o Papuipui o le Faatuatua i le Aiga

Ae o loo i ai se tulaga matuai moomia mo matua, taitai, ma faiaoga ina ia fesoasoani i le tatou autalavou e aoao ina ia malamalama, alofa, faatauaina, ma ola i faatulagaga o le talalelei. E tatau i matua ma talavou ona tutu faatasi e tetee atu i faigapoto ma taufaasese a le tiapolo. E tatau ona tatou matuai gauai, mataala, ma naunautai i a tatou taumafaiga ina ia ola i le talalelei e pei foi ona i ai o ia i ana taumafaiga e faaleaga le talalelei—ma i tatou.

O le luitau o loo i tatou luma e maoae. O loo i se tulaga matautia ia agaga ola pea o i latou tatou te alolofa i ai. Ou te fia fautuaina atu ni auala se fa e mafai ona tatou fausia ai o tatou aiga e avea ma mapusaga o le faatuatua ma ia fesoasoani patino ai i a tatou talavou ina ia mama ma legavia ma atoatoa, ina ia ulu atu ma le agavaa i le malumalu.

Aoao i Fanau le Talalelei

O le vaega muamua o le malamalama lea i le talalelei. O le faamatalaga sili ona taua, e suia ai le olaga ua ou iloa o le malamalamaaga lea faapea o i tatou moni lava o fanau a le Atua lo tatou Tama Faavavau. E le gata e matuai sa’o atoatoa lea mataupu, ae taua foi i le faaleagaga. Na fetalai le Faaaola i Lana tatalo augani e faapea, “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane 17:3). O le iloa o le Tama Faalelagi ma malamalama i lo tatou sootaga ia te Ia o lo tatou Tama ma lo tatou Atua, o le mauaina foi lea o le uiga o lenei olaga ma le faamoemoega i le olaga a sau. E moomia ona iloa e o tatou aiga e moni o Ia, ma o i tatou moni lava o Ona atalii ma afafine ma o suli i mea uma o ia te Ia—i le taimi nei ma le faavavau. Afai e mautu lena malamalama, o le a faamanuiaina tagata o le aiga ma o le a latou le saili atu mo ni faiga taufaasese ma o le a latou vaai atu i le Atua ma ola ai (tagai Numera 21:8).

Ola e Tusa Ai Ma Feagaiga, Ae le o le Ola Tuusaunoa

Ae peitai, e moomia ona tatou faamautuina i o tatou loto le molimau malosi o le talalelei a Iesu Keriso e pei ona sa i ai o tatou augatama paionia. Manatua ina ua faatoilaloina ia Navu ia Setema o le 1846 faapea ma tulaga o tolauapiga matitiva a le Au Paia sa le gafataulimaina. Ina ua taunuu atu se lipoti i Uinita Kuota, sa faavave loa ona valaauina faatasi e Polika Iaga ia le usoga. Ina ua maea ona faamatala atu i ai le tulaga ma faamanatu atu ia i latou le feagaiga na latou osia i totonu o le Malumalu o Navu e faapea e leai se tasi e manao e sau, e tusa lava po o le a le mativa, o le a tuua, na ia tuuina atu ai lenei luitau maoae:

“O le taimi lenei e galue ai,” na ia saunoa ai. “Ia tautuana le afi o le feagaiga, lea na outou osia i totonu o le Maota o le Alii, ia mu pea i o outou loto e pei o se aloiafi e le pe….” (Journal History, Setema 17,1846). I ni nai aso na sosoo ai, e ui lava i tulaga faigata o Uinita Kuota, sa agaigai malie atu ai i sasae ia le tele o taavale solofanua ina ia faasaoina le Au Paia i togalauapi matitiva e ui lava i tulaga faigata i luga o Auvai o le Misisipi.

E masani ona tatou faalogo i mafatiaga ma osigataulaga na tutumau ai na uluai Au Paia, “Na faapefea ona latou faia? O le a le mea na latou maua ai se malosiaga faapea?” O se vaega o le tali o loo maua lea i upu mamana a Peresitene Iaga. O na uluai Au Paia sa latou osi feagaiga ma le Atua, ma o na feagaiga sa mumu e pei o se aloiafi e le pe i totonu o o latou loto.

O nisi taimi e faaosoosoina ai i tatou ina ia pulea o tatou olaga e tusa ma mea o loo i ai nai lo le feagaiga. E le o se mea e mafaia pea ona ola i le talalelei ma tu atu mo le upu moni ma molimau i le toefua-taiga. E le o se mea e mafaia pea ona fetufaai atu le talalelei i isi. E le o se mea e mafaia pea le tali atu i se valaauga i le Ekalesia, aemaise lava o valaauga ia e faateleina ai lo tatou malosi. O avanoa e auauna atu ai i isi i auala aoga, e pei ona tatou osi feagaiga ai e fai, e seasea ona oo mai i taimi talafeagai. Ae leai se mana faaleagaga i le ola ai i le seiloga e talafeagai. O le mana e maua mai lo tatou tausia o a tatou feagaiga. A tatou vaavaai i soifuaga o nei uluai Au Paia, tatou te iloa ai o a latou feagaiga o le malosiaga autu lea i o latou olaga. O a latou faataitaiga ma molimau na matuai lava le malosi e aafia ai lea augatupulaga ma lea augatupulaga o a latou fanau.

Aoao Fanau e Uiga i le Ola Mama

A o tutupu ae a tatou fanau, latou te moomia le malamalama e aoaoina atu sa’o ma manino e matua i le mea e talafeagai ma le mea e leai. E moomia ona aoaoina e matua ia fanau ina ia aloese mai ata po o tala leaga. E moomia e fanau iti ma talavou ona iloa mai matua o ata po o tusi leaga o soo se ituaiga o se auupega lea a le tiapolo; ma afai e i ai se tasi e faaaogaina ma le manatu mama i ai, o loo i ai le mana e faatosina ai, faapogisaina ai, ma oo ai lava i le faaleagaina o le agaga o le tagata. E moomia ona aoaoina i latou ina ia aua nei faaaogaina upu masoa ma aua lava ne’i ta’u fua le suafa o le Alii. O tala tausua leaga e faalogo i ai e le tatau ona toe faamatalaina atu. Aoao tagata o le aiga e aua ne’i faalogo i musika e faatupu ai lagona. Talanoa manino atu ia i latou e uiga i feusuaiga ma aoaoga o le talalelei e faatatau i le legavia. Ia tuu atu lenei faamatalaga e sau mai matua i totonu o le aiga i se auala talafeagai. E moomia e tagata uma o le aiga ona iloa ia tulafono ma ia faamalosia faaleagaga ina ia mafai ona latou tausia. Afai e faia ni mea sese, o le Togiola ofoofogia a le Alii o Iesu Keriso e tatau ona malamalama i ai ma taliaina ina ia auala mai tulaga o le salamo lea atonu e faigata i nisi o taimi, ona maua le faamagaloga ma le faamoemoe e faaauauina pea. E le tatau ona tatou fiu i sailiga a tagata taitoatasi ma aiga mo le ola faavavau.

Ae o le mea e faanoanoa ai, ua tele naua matua i le lalolagi i aso nei ua faamatuuese ia le tiutetauave o le aoaoina atu o nei tulaga taua ma isi aoaoga o le Ekalesia i o latou aiga, ma ua talitonu e i ai isi o le a latou faia; o uo, o le aoga, o taitai o le Ekalesia ma faiaoga, po o faasalalauga foi. O aso uma taitasi o loo aoao ai a tatou fanau, ma faatumuina o latou mafaufau ma loto i mea na oo i ai ma mataupu e matuai loloto ai lava le aafiaga o o latou lava tulaga taua faaletagata.

Faamalosi e Le Tasi Le Tasi Mai le Amioleaga

Uso e ma tuafafine, e moomia ona tatou aoao le tasi i le tasi ma totoina se faatuatua loloto i o tatou loto ma faamalosia ai i tatou i le lototele e tausia poloaiga i se lalolagi o loo faateleina pea le amioleaga. E moomia ona tatou matuai liua mai i le talalelei a Keriso ina ia mu ai pea lena afi o le feagaiga i o tatou loto e pei o se aloiafi e le pe. Ma o lena ituaiga faatuatua o le a tatou faia ai mea e talafeagai ina ia tumau ai i le faamaoni ma le agavaa.

Ia Saoloto le Fesootaiga Ma Fanau

Lona lua, o le fesootaiga. E leai se mea e sili ona taua i le sootaga i le va o tagata o le aiga nai lo se fesootaiga malamalama ma faamaoni. Aemaise lava i matua o loo taumafai e aoao atu aoaoga ma faatulagaga o le talalelei i a latou fanau. O le malosi e fefautuaai ai ma o tatou talavou – ma atonu e sili atu lona taua, o le faalogo lelei lea i o latou popolega – o le faavae lea e fausia ai sootaga faamanuiaina. O le mea e masani ona vaaia i o tatou mata ma mea tatou lagonaina pe tautala i ai. O se upu ia te outou le fanau: ‘Aua lava ne’i outou le ava i outou matua. E tatau foi ona outou aoao e faalogo, aemaise lava i fautuaga a lou tama ma lou tina faapea musumusuga a le Agaga. E moomia ona tatou mataitu ma pu’epue maua ia taimi faapitoa o aoaoga na o loo faia pea i a tatou sootaga faaleaiga.

E i ai taimi mamana o fesootaiga lea e auala mai i tatalo faaleaiga e le aunoa ma suesuega o tusitusiga paia. O tusitusiga paia o le a fesoasoani e faamaninoina ia tulaga taua ma sini faaleaiga, ma o le talanoaina faatasi o na vaega o le a lagolagoina ai tagata o le aiga ina ia aoao ia malupuipuia taitoatasi, malolosi faaleagaga, ma ola faalagolago le tagata ia te ia lava. O lenei faiga e moomia ai le taimi, ma o lea e moomia ai ona tatou fefautuaai faatasi e faatatau i le tele o le taimi o le televise, pe fia ni ata tifaga, vitio, taaloga vitio, taimi i le Initaneti, po o ni gaoioiga foi i fafo atu o le aiga e tatau ona faagataina.

E Tatau i Matua Ma Taitai Ona Faauilavea

Lona tolu o le faauilavea. O le tiute o matua o le faalavelave lea pe a latou vaaia ni filifiliga sese ua faia. O lona uiga o lena mea e le faapea ua aveesea le meaalofa faapelepele o le filifiliga saoloto. Talu ai ona o le filifiliga saoloto o se meaalofa na tuuina mai le Atua, o le faatumutumuga lava, o le filifiliga i le mea o le a latou faia, o o latou uiga o le a faaalia, ma mea o le a latou talitonu i ai o le a avea pea ma latou. Ae i le avea ai ma matua, e moomia ona tatou mautinoaina ua latou malamalama i amioga talafeagai ma taunuuga e oo i ai pe afai latou te uia se auala sese. Ia manatua, e leai se mea e ta’u o le iloiloga e le faatulafonoina i totonu o le aiga. O tifaga, mekasini, televise, vitio, o le initaneti, ma isi faasalalauga ua i ai iina o ni malo valaaulia ma e tatau ona faatoa faafeiloaia pe afai e talafeagai mo fiafiaga o le aiga. Ia avea lou aiga o se malutaga o le filemu ma le amiotonu. ‘Aua ne’i faatagaina ia aafiaga leaga e faaleagaina ai lou lava siosiomaga faaleagaga faapitoa. Ia agalelei, manatunatu, agamalu, ma magafagafa i mea e te tautala i ai ma auala tou te fetausiai ai. Ona faigofie ai lea e sini faaleaiga o loo faavaeina i faatulagaga o le talalelei ona faia ni faaiuga lelei.

O le aoaoga foi lava lea e faatatau ia te outou epikopo, faiaoga, ma isi taitai i le Ekalesia a’o outou galulue e lagolagoina ia aiga. E le na ona tou tutu e aunoa ma se mea e faia ao faia e i latou o loo i la outou taitaiga ni faaiuga le lelei o le olaga. Afai e oo atu se tasi o a tatou talavou i se faaiuga faigata o le olaga, e toetoe lava o loo i ai se tasi iina—o se matua, se taitai, se faiaoga—o le na te mafai ona faia se suiga e ala lea i lona faauilavea atu i ai ma le alofa ma le agalelei.

Ia Avea ma Se Faataitaiga Lelei i Fanau

Lona fa o faataitaiga. E pei lava ona faigata i le seila vaivai ona sailia lona ala i le sousou o le vasa e aunoa ma se tapasa, e toetoe lava foi a le mafai e fanau ma le autalavou ona sailia lo latou auala i vasa o le olaga e aunoa ma se moli taiala o ni faataitaiga lelei. E le mafai ona tatou faamoemoeina i latou ina ia aloese mai na mea e le talafeagai pe afai latou te vaai i o latou matua e le o amanaiaina ia aoaoga ma faapea ona toilalo i le ola ai i le talalelei.

I le avea ai ma matua, faiaoga, ma taitai, o lo tatou tiute paia o le faatuina lea o se faataitaiga malosi faaletagata o le malosi amiotonu, lototele, ositaulaga, auaunaga le manatu faapito, ma le pulea o le tagata lava ia. O nei uiga o le a fesoasoani ai ia tatou talavou ina ia pipii mau i le ai uamea o le talalelei ma tutumau ai i le ala sa’o ma le vaapiapi.

O Le Ola i le Talalelei e Fesoasoani Lea i Le Aloese Mai Mea Sese

Ou te manao ia mafai ona ou ta’uina atu ia te outou faapea o le taulai i le malamalamaaga, fesootaiga, faauilavea, ma faataitaiga o le a taunuu atu pea i se aiga atoatoa ma ni fanau atoatoa o e le o ese mai faatulagaga o le talalelei. Ae o le mea e faanoanoa ai, e le o le tulaga lena. Ae o aiga ua latou iloa, aoao, ma ola i mataupu ma faatulagaga o le talalelei e foliga mai latou te puipuia i latou mai tiga ogaoga o mea sese. Afai e faamanuiaina ia ni faatulagaga ua leva o fesootaiga lelei ma faataitaiga faamaoni, o le a matuai faigofie ona fefautuaai faatasi e uiga i faafitauli o le tagata lava ia ma galulue ai i fesuiaiga talafeagai na o le a faamanuiaina ai tagata uma o le aiga.

Faafofoga i le fautuaga ofoofogia a le Tupu o Peniamina:

“Ou te le mafai ona ta’u atu ia te outou mea uma e mafai ona outou agasala ai, aua ua tele ala ma togafiti eseese e faapea ona tele ou te le mafai ona faitau ai.

“Ae peitai, ou te mafai ona fai atu lenei mea ia te outou, afai tou te leoleo ia te outou lava ma o outou manatu, ma a outou upu, ma a outou galuega, ma tausi i poloaiga a le Atua, ma tutumau i le faatuatua i mea ua outou faalogoina e uiga i le afio mai o lo tatou Alii, e oo lava i le iuga o outou olaga, e fano lava outou. O lenei foi, le tagata e, ia manatua, ina ia e le fano” (Mosaea 4:29-30).

O’u uso e ma tuafafine, tau ina ia faamanuiaina i tatou uma taitoatasi e le Atua ina ia mumu pea le afi o a tatou feagaiga i o tatou loto e pei o se aloiafi e le pe. Tau ina ia tatou saunia faaleagaga e faafouina a tatou feagaiga paia i vaiaso taitasi a o tatou fetagofi atu i le faamanatuga. O le a tatou faamamaluina le Alii ma ia tatou naunau e faia la tatou vaega, i nei aso silisili ma le ofoofogia, ina ia fausiaina Lana Ekalesia e ala lea i le faamalolosia o o tatou aiga o la- ’u tatalo faamaulalo lea.

Mai se lauga a Elder Ballard i le konafesi aoao a le Ekalesia ia Aperila 1999 (Liahona, Iulai 1999, 101–104).