“1: Unsaon nako pagkahibalo kon ako may kalisud sa pagkakaron lamang o kon ako nakigbisog ba og hagit sa mental nga kahimsog?” Mental nga Kahimsog: Tabang alang Kanako (2019)

“May Kalisud sa Panahon o Nakigbisog og Mental nga Hagit,” Mental nga Kahimsog: Tabang alang Kanako

Unsaon nako pagkahibalo kon ako may kalisud sa pagkakaron lamang o kon ako nakigbisog ba og hagit sa mental nga kahimsog?

Usa ka importante nga bahin sa maayong mental nga kahimsog mao ang abilidad sa pagtan-aw sa mga problema o mga kabalaka sa tininuod nga paagi. Ang tanan adunay mga adlaw nga sila maguol, maugtas, mabalaka, o masanapan pinaagi sa mga hagit sa kinabuhi. Kon ikaw magpadayon sa pagpakigbisog sulod sa pipila ka mga semana o dugay pa o ang imong mga sintomas nagsugod sa pagsamok sa imong inadlaw nga kinabuhi—sa panimalay, trabaho, eskwelahan, o sa inyong mga relasyon—pangayo og tabang. Pakigsulti ngadto sa usa ka tawo nga ikaw mosalig, sama sa sakop sa pamilya, higala, presidente sa Relief Society, bishop, o doktor sa mental nga kahimsog. Ang paghatag og sayo nga atensyon sa mga kabalaka sa mental nga kahimsog sa kasagaran mao ang labing epektibo nga paagi ug makatabang sa pagpugong og krisis sa umaabut.

Adunay lainlaing mga kapasikaran nga nakaapekto sa mga pagbati, mga panghunahuna, buot, ug kinaiya. Ang pakigbisog sa imong mental nga kahimsog wala magpakita og kahuyang sa imong kinaiya o espiritu. Mipahinumdom kanato si Elder Neil L. Andersen nga samtang ang “sitwasyon [sa usa ka tawo] dinhi sa yuta mahimong dili labing maayo, ang espirituhanong panulundon [sa usa ka tawo] hingpit tungod kay ang iyang tinuod nga pagkatawo niini mao ang pagkaanak sa Dios” (“Bisan Kinsa nga Magadawat Kanila, Magadawat Kanako,” Liahona, Mayo 2016, 49).

Samtang kitang tanan kinahanglan maninguha sa pagpalambo og positibong mental nga kahimsog, dili kini maayo ang paghiling [diagnose] sa kaugalingong mental nga sakit. Ang usa ka doktor sa mental nga kahimsog makatabang kanimo sa pag-ila sa kalainan tali sa usa ka mental nga sakit ug sa usa ka normal nga reaksyon ngadto sa inadlaw nga mga kaugtas sa kinabuhi. Ang usa ka paghiling nga konektado ngadto sa mental nga kahimsog kinahanglan nga dili tan-awon isip kulang sa pagkatinuod kay sa ubang medikal nga paghiling.

Hunahunaa ang mosunod samtang ikaw naghunahuna sa pagpakigsulti ngadto sa usa ka doktor sa mental nga kahimsog:

Unsa na ka dugay nimong nasinati kini nga mga hagit?
Giunsa niini nga mga sintomas pag-apekto sa imong inadlaw nga kinabuhi?
Nakaalinggat ka ba og uban diha sa imong pamilya kinsa nakasinati og susama nga mga hagit?
Kini ba nga mga problema nakahimo og mahinungdanon nga pag-antus sa imong kinabuhi?
Ang kaugalingon nimong mga pagsulay nga mobati ka og kaarang-arang wala ba makatabang?
Aduna bay usa ka tawo kinsa imong gisaligan mihisgot og usa ka butang mahitungod sa imong buot o kinaiya?