Ang akong mga pagbati, mga buot, ug gani ang mga kinaiya malisud nga matag-an o usahay gani sa pagdumala, ug kini makahimo sa akong pagsimba ug serbisyo nga mas malisud. Aduna bay lugar alang kanako?

Oo. Si Jesukristo nagdapit sa tanan sa pagduol ngadto Kaniya. Nagdapit Siya sa tanan sa pag-ambit sa ebanghelyo. Dili lamang nga adunay dapit alang niadtong adunay mga hagit sa mental nga kahimsog, apan usab adunay panginahanglan. Matag usa kanato adunay espiritwal nga mga gasa, mga hiyas, ug mga talento sa pagtabang og tukod sa gingharian sa Dios. Sagad kini alang sa mga indibidwal kinsa mibati og kasakit sa emosyon nga magbaton og taas nga mga ang-ang sa pagbutang sa kaugalingon sa gibati sa uban ug sa pagsabut. Ang Simbahan nagkinahanglan kaninyo ug gusto kaninyo, ug kamo kinahanglan nga mobati nga kamo nahisakop.

Isip sakop sa Unang Kapangulohan, gitudlo ni Presidente Dieter F. Uchtdorf:

“Tingali moingon ang uban, ‘Dili ko haum uban kaninyo diha sa Simbahan.’

“Kon inyong makita ang among kasingkasing, tingali inyong makita nga mas haum kamo kay sa inyong gihunahuna. Tingali matingala kamo nga mahibalo nga duna kami mga tinguha ug panlimbasug ug pangandoy sama sa inyoha. Ang inyong kaagi o kasinatian tingali lahi kay sa inyong nakita diha sa mga Santos sa Ulahing mga Adlaw, apan mahimo kana nga panalangin. Mga kaigsoonan, minahal nga mga higala, gikinahanglan namo ang inyong talagsaon nga mga talento ug mga panglantaw. Ang panaglahi sa mga tawo ug mga katawhan libut sa kalibutan maoy kalig-on niini nga Simbahan” (“Dali, Pakig-uban Kanamo,” Liahona, Nob. 2013, 21).