Kapitulo 5

Unsa ang kalainan tali sa pagkaperpeksyonismo ug gusto nga mahimong takus?

Ang tinguha nga mahimong takus kasagaran nagagikan sa atong gugma sa Dios ug usa ka pagbati sa Iyang gugma alang kanato. Naggiya kini kanato ngadto sa dalan sa pagkamasulundon, sa mga pakigsaad, ug sa paghinulsol. Kini usa ka tinguha nga mahimong perpekto sama nga ang Manluluwas nagdapit kanato nga buhaton (tan-awa sa Mateo 5:48). Kini nagpasabut sa pagtinguha nga magpaubos ug “molimud sa [atong mga kaugalingon] sa tanan nga dili diosnon” aron kita maperpekto diha ni Jesukristo pinaagi sa Iyang grasya (Moroni 10:32).

Ang pagkaperpekto, sa laing bahin, sa kasagaran nadala sa kahadlok kay sa gugma—kahadlok sa kaulaw, kahadlok sa kapakyasan, kahadlok sa kastigo, kahadlok nga dili kauyonan o kahigawad. Usa ka paagi nga kini nagpaila mao nga kon kita motan-aw “lapas sa tumong” (Jacob 4:14) pinaagi sa pagtakda og mga pagdahum alang sa atong mga kaugalingon lapas sa unsay gihatag sa Ginoo alang kanato ug hasulon ang atong mga kaugalingon sa walay kapuslanan kon dili kini nato makab-ut. Kini makagiya ngadto sa kabalaka ug kaluya sa pagbati.

Gipasabut ni Elder Cecil O. Samuelson ang kalainan tali sa pagkatakus ug pagkaperpekto: “Ang pagkatakus ug pagkaperpekto dili managsama og kahulugan! … Kita makahimo sa pagpakatakus samtang nagkinahanglan pa og kauswagan. … Kadtong nag-antus gikan sa pagpakaperpekto … nag-antus sa pagpadako sa ilang gagmay nga mga sayop, mga kahuyang, o mga kakulangan hangtud sila mahimong dili normal ang mga panglihok [dysfunctional]. … Kinahanglan natong ilhon ang [atong mga kahuyang], apan dili kita mohatag og bili niini o mopadako niini” (“What Does It Mean to Be Perfect?” New Era, Ene. 2006, 10, 12).