“10: Sa unsa nga paagi akong masugakod ang mga hunahuna sa paghikog?” Mental nga Kahimsog: Tabang alang Kanako (2019)
“Mga Hunahuna sa Paghikog,” Mental nga Kahimsog: Tabang alang Kanako
Sa unsa nga paagi akong masugakod ang mga hunahuna sa paghikog?
Ang mga hunahuna sa paghikog wala magpasabut nga ikaw huyang o may depekto o ngil-ad nga tawo; kini nagpasabut nga ikaw nagpas-an og hilabihan nga kasakit ug mahimong nanginahanglan og dugang nga suporta aron sa pagsulbad sa imong krisis. Kon ang kinabuhi magsugod sa pagkadili madumala o ikaw nanlimbasog og mga hunahuna sa paghikog, sulayi ang pipila sa mga sugyot sa ubos o bisitahi ang PreventingSuicide.ChurchofJesusChrist.org alang sa dugang pa nga mga ideya.
-
Sultihi ang usa ka tawo. Kon bation nimo ang pagkadili luwas o ang imong kinabuhi namiligro, kontaka dihadiha dayon ang emergency services. Kon ang imong kinabuhi wala mamiligro, pakig-istorya ngadto sa usa ka higala, sa usa ka sakop sa pamilya, o sa usa ka lider sa Simbahan, o tawga ang usa ka suicide prevention helpline (tan-awa ang mga kapanguhaan sa ubos). Ang pagpakigbahin sa imong mga hunahuna makahupay sa daghan nga kalisud.
-
Salig sa Manluluwas. Bisan og dili nimo mabati ang gugma o presensya ni Jesukristo diha sa imong kinabuhi niini nga panahon, ikaw makalihok diha sa usa ka tinguha sa pagbati niini. Mahimo kang moluhod kon ikaw mag-ampo, pag-ampo og kusog, pangayo og panalangin sa pagkapari, o pakigsulti ngadto sa imong bishop.
-
Himoa ang imong panimalay nga walay peligro. Kon adunay mga butang nga imong gihunahuna nga gamiton sa pagpasakit sa imong kaugalingon, ipalayo kini o pabantayi kini og laing tawo. Kunhuri ang panahon nga imong gamiton sa pag-inusara ug pakigsulti ngadto sa usa ka tawo nga imong kauban sa balay o kasaligan. Pakigsulti ngadto niini nga tawo mahitungod sa unsa nga mga panagang ang labing maayo alang kanimo sa imong sitwasyon.
-
Paghimo og gagmay nga mga tumong. Kada adlaw pagsulat og dili mominos sa usa ka tahas o tumong alang sa sunod nga adlaw. Himoa kini nga yano ug makab-ot ra. Ang paghimo ug pagbuhat sa gagmay nga mga tumong makatabang kanimo sa paghimo og pagpugong kon ang tanan ingon og dili madumala.