“8: Unsaon nako pagmalipayon kon dili ako mobati og bisan unsa?” Mental nga Kahimsog: Tabang alang Kanako (2019)

“Unsaon Nako Nga Magmalipayon?” Mental nga Kahimsog: Tabang alang Kanako

Imahe

lalaki naglingkod sa lingkuranan diha sa ngitngit

Unsaon nako pagmalipayon kon dili ako mobati og bisan unsa?

Gipakalma sa Manluluwas ang kadagatan ug midala og kahupayan ug kalinaw ngadto sa Iyang mga disipulo. Makatabang Siya kanimo sa pagdugang og kalipay ug sa pagkakaplag og kahulugan sa kinabuhi bisan pa sa imong mga hagit. Sulayi ang pipila ka mga ideya nga gilista sa ubos, apan hibaloi nga kini mahimong magkinahanglan og pipila ka pagsulay ug pagkasayop aron mahibaloan kon unsa ang labing angay alang kanimo:

Pangayo og propesyonal nga tabang. Kon ikaw nagpadayon sa pagpakigbisog sulod sa pipila ka mga semana o dugay pa o ang imong mga sintomas nagsugod sa pagsamok sa imong inadlaw nga kinabuhi—sa panimalay, trabaho, eskwelahan, o sa inyong mga relasyon—pangayo og tabang. Ang paghatag og atensyon sa mga kabalaka sa mental nga kahimsog makapugong og krisis sa umaabut.
Pagsaulog og ginagmay nga mga kadaugan. Ang kalampusan kalampusan, bisan unsa pa ka gamay ang nahuman. Tingali mipataas ka sa imong kamot diha sa klase, mikatawa og kusog, o miamuma igo sa pag-abli sa pultahan alang sa usa ka tawo. Paghanduraw niini nga mga higayon aron sa pagpahinumdom sa imong kaugalingon niini nga mga kadaugan sa panahon nga ang kinabuhi malisud. Kini mahimong makatabang sa pagsulat og pipila niini nga mga higayon.
Ilisdi ang kangitngit og kahayag. Pagbansay sa pag-ilis sa matag negatibong hunahuna nga mosulod sa imong ulo og positibo nga hunahuna. Mahimo usab ikaw nga mopili og usa ka himno o ubang makabayaw nga musika nga paminawon kon negatibong mga hunahuna motunga. Makapangayo usab ikaw og panalangin sa pagkapari.
Pagbansay og pag-amuma sa kaugalingon. Paghunahuna sa paghimo og kausaban sa imong inadlaw nga naandang buhat o sa paghimo og tinuyo nga gawi. Pangita og kalingawan diha sa gagmay ug yanong mga butang pinaagi sa pagmatikod sa hitsura sa usa ka bulak, ang lami sa usa ka kinaham nga pagkaon, o ang kanindot sa honi sa langgam. Pagbansay og pagkamahunahunaon o lain nga paagi sa paglingawlingaw. Tuguti ang imong mga hunahuna sa pagduol ngadto sa Dios samtang naghatag ka sa imong hunahuna ug lawas og panahon sa pagpahiuli sa mga kusog.
lihoka ang imong lawas. Ang pisikal nga kalihokan, inubanan sa igo nga katulog ug maayo nga nutrisyon, makaayo sa buot ug sa mga pagbati. Ang pisikal nga kalihokan makatabang og pakunhod sa kaugtas. Mahimong ikaw gustong molakaw sa gawas, modagan, mosayaw, moalsa og bug-at nga mga butang, o moapil sa ubang pisikal nga mga kalihokan nga ikaw malingaw. Ang pisikal nga mga kalihokan mahimo usab nga paagi sa pagkonektar ngadto sa uban. Tan-awa ang Provident Living: Physical Health (ChurchofJesusChrist.org) alang sa dugang nga mga ideya.
Pahayag og pasalamat. Kini wala nagpasabut nga ikaw naglimud o nagbali-wala sa mga sakit nga pagbati o mga kasubo; kini nagpasabut nga ikaw nag-ila sa mga panalangin nga ang Langitnong Amahan naghatag kanimo. Pagsulat og dili mominos sa usa ka butang nga ikaw mapasalamaton matag adlaw—mahimong ikaw dihay pipila ka mga higayon nga nahupay gikan sa sakit, tingali ikaw makahinumdom og panahon nga usa ka tawo nagmaloloy-on, o tingali ikaw midayeg sa unsay imong nakita, nasimhot, nahikap, o natilawan.
Isulat ug ilabay. Dili tanan nga gisulat kinahanglan nga pagatipigan diha sa usa ka journal alang sa mga panumduman o kaliwatan. Ang pagsulat isip usa ka paagi sa pagproseso sa hunahuna ug sa pagpahayag og tinuod nga emosyon hilabihan kaayo ka makatabang. Usahay, kon kita maghunahuna nga laing tawo makabasa sa unsay atong gisulat, nagmugna kita og babag nga mahimong hingpit ka tinuod sa atong mga pagbati. Makatabang ang pagsulat uban ang putli nga pagkamatinuoron, nagpahayag sa tinuod nga emosyon, ug dayon ilabay ang papel. Kini nga lihok mahimong magtabang kanato sa pagbuhi og pipila ka mga pagbati usab.