« ១. បទពិសោធន៍ផ្សព្វផ្សាយសាសនារបស់អ្នក » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—បេសកកម្មផ្នែកសេវាកម្ម ( ឆ្នាំ២០២១ )

« ១. បទពិសោធន៍ផ្សព្វផ្សាយសាសនារបស់អ្នក » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—បេសកកម្មផ្នែកសេវាកម្ម

រូបភាព

ព្រះគ្រីស្ទ និងពួកអ្នកនេសាទត្រី ដោយ ជេ ខឺក រីឆាដ

១

បទពិសោធន៍ផ្សព្វផ្សាយសាសនារបស់អ្នក

១.០

សេចក្តីផ្តើម

បេសកកម្មរបស់អ្នកពុំបានចាប់ផ្ដើមនៅថ្ងៃដែលអ្នកបានធ្វើពិធីញែកចេញនោះទេ ។ វានឹងមិនបញ្ចប់នៅថ្ងៃដែលអ្នកត្រូវបានដោះលែងនោះឡើយ ។ បេសកកម្មផ្នែកសេវាកម្មគឺលើសពីការស្លៀកពាក់ឯកសណ្ឋាននៅពេលព្រឹក ហើយដោះវាចេញម្ដងទៀតនៅពេលយប់នោះទេ ។

បទពិសោធន៍បេសកកម្មផ្នែកសេវាកម្មរបស់អ្នកបង្ហាញពីការតាំងចិត្តរបស់អ្នកចំពោះព្រះយេស៊ូវគ្រីស្ទ និងបំណងប្រាថ្នារបស់អ្នកដើម្បីបម្រើមនុស្សដទៃក្នុងព្រះនាមរបស់ទ្រង់ ។ ចាប់តាំងពីពិធីបុណ្យជ្រមុជទឹករបស់អ្នកមក អ្នកបានស្ថិតនៅលើផ្លូវនៃសេចក្ដីសញ្ញា ដែលនាំទៅកាន់សុភមង្គល អំណរ និងសេចក្ដីសុខសាន្តដ៏នៅអស់កល្បជានិច្ច ។ បទពិសោធន៍បេសកកម្មរបស់អ្នកអាចផ្លាស់ប្ដូរអ្នកបាន ហើយអ្នកគួរតែទទួលយកការផ្លាស់ប្ដូរទាំងនោះជាមួយនឹងអ្នកពេញមួយជីវិត ។

នៅពេលមើលតាមទស្សនវិស័យដ៏នៅអស់កល្បជានិច្ច នោះបេសកកម្មរបស់អ្នកគឺលើសពីការគូសសញ្ញាកែងក្នុងប្រអប់ថាបានធ្វើរួចរាល់ហើយទៅទៀត ។ វាគឺជាវិធីមួយដើម្បីជួយអ្នកនៅក្នុងដំំណើរស្វែងរករបស់អ្នកដើម្បីប្រែក្លាយជាសិស្សរបស់ព្រះយេស៊ូវគ្រីស្ទពេញមួយជីវិត ។ ប្រធាន ម៉ារីអន ជី. រ៉ូមនី បានមានប្រសាសន៍ថា « ការបម្រើពុំមែនជាអ្វីមួយដែលយើងត្រូវស៊ូទ្រាំនៅលើផែនដីនេះដើម្បីយើងអាចទទួលបានសិទ្ធិរស់នៅក្នុងនគរសេឡេស្ទាលនោះទេ ។ ការបម្រើគឺជាកម្លាំងដែលជីវិតដ៏ខ្ពង់ខ្ពស់នៅក្នុងនគរសេឡស្ទាលត្រូវបានបង្កើតឡើង » ( « The Celestial Nature of Self-reliance » Ensign ខែវិច្ឆិកា ឆ្នាំ១៩៨២ ទំព័រ ៩៣ ) ។

ព្រះអម្ចាស់បានមានបន្ទូលថា « ហេតុដូច្នេះហើយ បើសិនជាអ្នករាល់គ្នាមានបំណងចង់បម្រើព្រះ នោះអ្នករាល់គ្នាបានហៅឲ្យធ្វើកិច្ចការនោះហើយ » ( គោលលទ្ធិ និង សេចក្តីសញ្ញា ៤:៣ ) ។ មិនថាអ្នកបានត្រូវចាត់ឲ្យធ្វើជាអ្នកផ្សព្វផ្សាយសាសនាផ្នែកសេវាកម្មតាំងពីដំបូងមក ឬក៏ត្រូវបានប្ដូរឲ្យធ្វើជាអ្នកផ្សព្វផ្សាយសាសនាផ្នែកសេវាកម្ម ឬចាត់ឲ្យធ្វើជាអ្នកផ្សព្វផ្សាយសាសនាផ្នែកសេវាកម្មឡើងវិញនោះទេ អ្នកមានឯកសិទ្ធិនៃការឧទ្ទិសថ្វាយរយៈពេលនេះនៃជីវិតរបស់អ្នកចំពោះការបម្រើព្រះអម្ចាស់ដោយបម្រើមនុស្សដទៃនៅក្នុងព្រះនាមរបស់ទ្រង់ ។ នៅក្នុងការហៅនេះ អ្នកនឹងមានឱកាសផ្ដល់ការបម្រើដែលនឹងផ្ដល់ពរដល់មនុស្សដទៃ ជីវិតរបស់អ្នកផ្ទាល់ គ្រួសាររបស់អ្នក សាសនាចក្រ និងអង្គការដែលអ្នកបម្រើ ។

យើងម្នាក់ៗត្រូវបានចាត់មកផែនដីនេះជាមួយនឹងសមត្ថភាព និងទេពកោសល្យខុសៗគ្នា ។ អ្នកអាចធ្វើការចូលរួមចំណែកដ៏មានន័យចំពោះកិច្ចការរបស់ព្រះនៅលើផែនដីនេះជាមួយនឹងទេពកោសល្យ និងសមត្ថភាពដ៏វិសេសវិសាលរបស់អ្នក ។ ការបម្រើដ៏ស្មោះត្រង់របស់អ្នកក្នុងនាមជាអ្នកផ្សព្វផ្សាយសាសនាគឺជាការថ្វាយដែលអាចទទួលយកបានចំពោះព្រះអម្ចាស់ ។

ចូររីករាយនឹងបទពិសោធន៍បេសកកម្មរបស់អ្នក ពេលអ្នកស្រឡាញ់ព្រះ និងស្រឡាញ់អ្នកជិតខាងរបស់អ្នក ។ នេះជាពេលដើម្បីត្រេកអរ និងដើម្បីដកពិសោធន៍នូវសុភមង្គល និងភាពសុខសាន្តដ៏យូរអង្វែងតាមរយៈព្រះយេស៊ូវគ្រីស្ទ ។

១.១

ការគោរពប្រតិបត្តិ

សិស្សដ៏ពិតរបស់ព្រះយេស៊ូវគ្រីស្ទ គឺគោរពប្រតិបត្តិ ។ ព្រះអង្គសង្គ្រោះបានបង្រៀនថា « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ » ( យ៉ូហាន ១៤:១៥ ) ។ ការកាន់តាមបទបញ្ញត្តិមានន័យថា អ្នកនឹងធ្វើអ្វីដែលព្រះអម្ចាស់សុំដោយស្ម័គ្រចិត្ត ហើយដោយស្មោះត្រង់ ដោយសារអ្នកស្រឡាញ់ទ្រង់ ។ ការគោរពប្រតិបត្តិក៏មានន័យថា អ្នកកាន់តាមបទបញ្ញត្តិ « ដោយអំណរ » ផងដែរ ( កូឡ៉ុស ១:១១ ) និង « ចិត្តស្មោះត្រង់ » ( កិច្ចការ ២:៤៦ ) ។

ព្រះយេស៊ូវគ្រីស្ទគឺជាគំរូនៃការគោរពប្រតិបត្តិដ៏ល្អឥតខ្ចោះ ។ អ្វីៗដែលទ្រង់បានធ្វើគឺជាព្រះហឫទ័យរបស់ព្រះវរបិតា ។ សូមធ្វើតាមទ្រង់ដោយធ្វើឲ្យអស់ពីលទ្ធភាពរបស់អ្នកដើម្បីគោរពរាល់បទបញ្ញត្តិរបស់ទ្រង់ ហើយរស់នៅតាមបទដ្ឋានអ្នកផ្សព្វផ្សាយសាសនាផ្នែកសេវាកម្ម ។ ការគោរពប្រតិបត្តិ និងការមានភាពស្មោះត្រង់ ក៏មានន័យថា អ្នកព្យាយាមរៀន លូតលាស់ និងធ្វើឲ្យប្រសើរឡើងផងដែរ ។ សូមកែតម្រូវកំហុសភ្លាមៗ ។ សូមបង្ហាញថា អ្នកមានភាពស្មោះត្រង់ និងគោរពប្រតិបត្តិ ដោយទទួលខុសត្រូវចំពោះសកម្មភាពរបស់អ្នក ។

អ្នកនឹងមានពរ ពេលអ្នកធ្វើតាមបទបញ្ញត្តិ និងបទដ្ឋានអ្នកផ្សព្វផ្សាយសាសនា ហើយប្រើសុភវិនិច្ឆ័យ ។ ចូរដឹងថា ទោះបីជាពេលដែលអ្នកកាន់តាមបទបញ្ញត្តិទាំងឡាយក្ដី ក៏អ្នកអាចជួបនឹងបញ្ហា ជំងឺ ឬការប្រឈមនានាផងដែរ ( សូមមើល យ៉ូហាន ១៦:៣៣ ) ។ ព្រះអង្គសង្គ្រោះបានដកពិសោធន៍នៅគ្រប់រឿងទាំងនេះ ( សូមមើល អាលម៉ា ៧:១១–១២; គោលលទ្ធិ និង សេចក្ដីសញ្ញា ១២២:៨ ) ។ ទ្រង់សន្យាថា « ខ្ញុំមិនចោលអ្នករាល់គ្នាឲ្យនៅកំព្រាទេ ខ្ញុំនឹងមកឯអ្នករាល់គ្នាវិញ » ( យ៉ូហាន ១៤:១៨ ) ។

ព្រះស្រឡាញ់អ្នក ។ ចូរជ្រើសរើសកាន់តាមព្រះបញ្ញត្តិទាំងឡាយ ដោយសារអ្នកស្រឡាញ់ព្រះ ។ សូមកុំព្យាយាមធ្វើកិច្ចព្រមព្រាងជាមួយនឹងព្រះ ឬចាត់ទុកការគោរពប្រតិបត្តិរបស់អ្នកជាកិច្ចការដើម្បីទទួលបានពរជ័យណាមួយឡើយ ។

១.២

សិទ្ធិជ្រើសរើស

សិទ្ធិជ្រើសរើស ឬសមត្ថភាពដើម្បីជ្រើសរើស និងធ្វើសកម្មភាពដោយខ្លួនឯងគឺជាអំណោយទានដ៏មហិមាមួយរបស់ព្រះចំពោះបុត្រាបុត្រីរបស់ទ្រង់ ។ ការរីកចម្រើនដ៏អស់កល្បជានិច្ចរបស់យើងពឹងអាស្រ័យទៅលើរបៀបដែលយើងប្រើអំណោយទាននេះ ។ យើងត្រូវតែជ្រើសរើសថាតើត្រូវធ្វើតាមព្រះយេស៊ូវគ្រីស្ទ និងការបង្រៀនរបស់ទ្រង់ដែរឬទេ ។ សិទ្ធិជ្រើសរើសអនុញ្ញាតឲ្យអ្នករៀន រីកចម្រើន និងធ្វើតាមព្រះអង្គសង្គ្រោះ ។ ដោយមានសិទ្ធិនេះ អ្នក « មានសេរីភាព … រើសយកឥស្សរភាព និងជីវិតដ៏នៅអស់កល្បជានិច្ច តាមរយៈព្រះជាអ្នកសង្រួបសង្រួមដ៏ធំរបស់មនុស្សលោកទាំងអស់ » ( នីហ្វៃទី ២ ២:២៧ ) ។

អ្នកទទួលខុសត្រូវលើការសម្រេចចិត្តដែលអ្នកធ្វើ ។ អ្នកគឺជាបុត្ររបស់ព្រះដែលមានកម្លាំងដ៏អស្ចារ្យ ! អ្នកមានសមត្ថភាពជ្រើសរើសសេចក្ដីសុចរិត និងសុភមង្គល ទោះជាកាលៈទេសៈរបស់អ្នកបែបណាក្ដី ។

អ្នកក៏ទទួលខុសត្រូវចំពោះការអភិវឌ្ឍសមត្ថភាព និងទេពកោសល្យដែលព្រះបានប្រទានដល់អ្នកផងដែរ ។ បេសកកម្មរបស់អ្នកគឺជាពេលវេលាមួយដើម្បីរៀនទទួលខុសត្រូវចំពោះទ្រង់សម្រាប់អ្វីដែលអ្នកធ្វើដោយប្រើសមត្ថភាពរបស់អ្នក និងរបៀបដែលអ្នកប្រើពេលវេលារបស់អ្នក ។ សូមកុំចំណាយពេលវេលាដោយភាពខ្ជិលច្រអូស ។ ចូរមានឆន្ទៈខិតខំធ្វើការ ។ សូមជ្រើសរើសធ្វើជាមនុស្សនឹងនរ ហើយអាចទុកចិត្តបាន ព្រមទាំងប្រព្រឹត្តរឿងល្អៗជាច្រើនតាមបំណងចិត្តរបស់អ្នកផ្ទាល់ ។

១.៣

គោលបំណងនៃអ្នកផ្សព្វផ្សាយសាសនាផ្នែកសេវាកម្ម

ការងារបម្រើរបស់ព្រះអង្គសង្គ្រោះបង្ហាញនូវគំរូនៃព្រះបញ្ញត្តិធំៗចំនួនពីរគឺ ៖ « ស្រឡាញ់ព្រះអម្ចាស់ជាព្រះនៃឯងឲ្យអស់អំពីចិត្ត អស់ពីព្រលឹង ហើយអស់អំពីគំនិតឯង » និង « ស្រឡាញ់ អ្នកជិតខាងដូចខ្លួនឯង » ( ម៉ាថាយ ២២:៣៧, ៣៩) ។ យើងបង្ហាញសេចក្ដីស្រឡាញ់របស់យើងចំពោះអ្នកជិតខាងរបស់យើង ពេលយើងបម្រើពួកគេ ។ ពេលយើងបម្រើមនុស្សដទៃ យើងក៏បង្ហាញសេចក្ដីស្រឡាញ់របស់យើងចំពោះព្រះផងដែរ ៖ « កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នាគ្រាន់តែនៅក្នុងការបម្រើដល់ព្រះរបស់អ្នកតែប៉ុណ្ណោះ » ( ម៉ូសាយ ២:១៧ ) ។

គណៈប្រធានទីមួយបានផ្ដល់គោលបំណងនៃអ្នកផ្សព្វផ្សាយសាសនាផ្នែកសេវាកម្មដើម្បីដឹកនាំអ្នកនៅក្នុងការហៅបម្រើដ៏ពិសិដ្ឋរបស់អ្នក ។

« គោលបំណងរបស់ប្អូនគឺជួយអ្នកដទៃឲ្យមករកព្រះគ្រីស្ទ តាមរយៈការបម្រើដល់ពួកគេឲ្យដូចព្រះអង្គសង្គ្រោះបានធ្វើ ។ យើងបម្រើដោយស្ម័គ្រចិត្តនៅក្នុងអង្គការសប្បុរសធម៌ ធុរកិច្ចរបស់សាសនាចក្រ និងនៅក្នុងសហគមន៍ ។ យើងនឹងផ្ដល់ការងារបម្រើនៅក្នុងព្រះនាមរបស់ទ្រង់ ទៅកាន់បុគ្គលនោះ គឺដូចជាទ្រង់បានធ្វើ ដោយបង្ហាញសេចក្តីសប្បុរសគួរឲ្យស្រឡាញ់របស់ទ្រង់ » ។

សូមចាំថា របៀបដែលអ្នកបម្រើព្រះអង្គសង្គ្រោះគឺសំខាន់ជាងទីកន្លែងដែលអ្នកបម្រើ ឬ អ្វីដែលអ្នកធ្វើ ។ ប្រធាន រ័សុល អិម ណិលសុន បានប្រកាសថា « តាមរយៈការបម្រើពេញមួយជីវិតនៅក្នុងសាសនាចក្រនេះ ខ្ញុំបានរៀនថា វាមិនសំខាន់ថាយើងបម្រើនៅកន្លែងណាឡើយ ។ អ្វីដែលព្រះអម្ចាស់ខ្វល់ព្រះទ័យបំផុតនោះគឺរបៀបដែលយើងម្នាក់ៗបម្រើទៅវិញទេ » ( Ministering with the Power and Authority of God » Liahona ខែ ឧសភា ឆ្នាំ ២០១៨ ទំព័រ ៦៨ ) ។ ការបម្រើរបស់អ្នកគឺសម្រាប់លោកចៅហ្វាយ ហើយអ្នកត្រូវបានអញ្ជើញឲ្យបម្រើដូចជាទ្រង់ !

១.៤

គោលដៅផ្សព្វផ្សាយសាសនា

គណៈប្រធានទីមួយក៏ផ្ដល់គោលដៅដូចតទៅនេះសម្រាប់បេសកកម្មផ្នែកសេវាកម្មផងដែរ ៖

ផ្ដល់ឱកាសសម្រាប់យុវជន និងយុវនារីគ្រប់រូបដែលមានឆន្ទៈ ដើម្បីបម្រើព្រះអម្ចាស់ ហើយបង្កើនទីបន្ទាល់លើទ្រង់ ។
ជួយអ្នកផ្សព្វផ្សាយសាសនាផ្នែកសេវាកម្មម្នាក់ៗឲ្យរៀបចំខ្លួនសម្រាប់ការបម្រើពេញមួយជីវិត ។
ផ្ដល់ការបម្រើដ៏ចាំបាច់ និងមានតម្លៃថ្វាយព្រះអម្ចាស់តាមរយៈការបម្រើនៅក្នុងសាសនាចក្រ និងអង្គការសហគមន៍ ។

ពេលអ្នកបម្រើព្រះអង្គសង្គ្រោះដោយស្មោះត្រង់នៅក្នុងព្រះនាមរបស់ទ្រង់ និងតាមរបៀបរបស់ទ្រង់ទាំងអំឡុង និងក្រោយពេលបេសកកម្មរបស់អ្នក នោះអ្នកនឹងអភិវឌ្ឍលក្ខណៈដូចជាព្រះគ្រីស្ទ ។ លក្ខណៈ ឬគុណសម្បត្តិទាំងនេះនឹងជួយអ្នកឲ្យសម្រេចនូវគោលដៅផ្សព្វផ្សាយសាសនារបស់អ្នក ។

អ្នកមានឱកាសបង្កើតជំនាញខាងវិញ្ញាណ ខាងសង្គម ខាងផ្លូវកាយ និងខាងបញ្ញថ្មីដែលនឹងផ្ដល់ពរ និងជះឥទ្ធិពលដល់គ្រប់ទិដ្ឋភាពនៃជីវិតរបស់អ្នក ។

១.៥

បទដ្ឋានសម្រាប់ជីវិត

ព្រះអញ្ជើញអ្នកឲ្យថ្វាយខ្លួនអ្នកដល់ទ្រង់អស់មួយជីវិតអ្នក ។ បទដ្ឋានបេសកកម្ម ដូចជាការសិក្សាផ្ទាល់ខ្លួន ការដាក់គោលដៅ និងការប្រើប្រាស់បច្ចេកវិទ្យាដោយសុចរិត នឹងផ្ដល់ពរជ័យដល់អ្នកនៅក្នុងបេសកកម្មរបស់អ្នក និងពេញមួយជីវិតរបស់អ្នក ។

ចូរធ្វើឲ្យបទបញ្ញត្តិនៅក្នុងបទគម្ពីរ និងបទដ្ឋានបេសកកម្មទាំងនេះក្លាយជាគោលការណ៍ដឹកនាំពេញមួយជីវិត ។ កាលដែលអ្នកធ្វើតាមព្រះបញ្ញត្តិរបស់ព្រះ និងតាមបទដ្ឋានទាំងឡាយ នោះទ្រង់នឹងដឹកនាំ ប្រទានពរ និងណែនាំអ្នកពេញមួយជីវិតអ្នក ។