« ២. ការរៀបចំ និងសកម្មភាពរបស់អ្នកផ្សព្វផ្សាយសាសនាផ្នែកសេវាកម្ម » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—បេសកកម្មផ្នែកសេវាកម្ម ( ឆ្នាំ២០២១ )

« ២. ការរៀបចំ និងសកម្មភាពរបស់អ្នកផ្សព្វផ្សាយសាសនាផ្នែកសេវាកម្ម » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—បេសកកម្មផ្នែកសេវាកម្ម

២

ការរៀបចំ និងសកម្មភាពរបស់អ្នកផ្សព្វផ្សាយសាសនាផ្នែកសេវាកម្ម

២.០

សេចក្តីផ្តើម

ព្រះអម្ចាស់បានមានព្រះបន្ទូលថា « អ្នករាល់គ្នាត្រូវរៀបចំខ្លួន ហើយតាំងឲ្យមនុស្ស [ ទាំងប្រុសទាំងស្រី ] មានការកាន់កាប់ត្រួតត្រារៀងៗខ្លួន [ របស់ពួកគេ ] » ( គោលលទ្ធិ និង សេចក្ដីសញ្ញា ១០៤:១១ ) ។ វគ្គនេះនៃបទដ្ឋានអ្នកផ្សព្វផ្សាយសាសនាពិពណ៌នាអំពីការរៀបចំបេសកកម្មផ្នែកសេវាកម្ម ។ វាក៏ពន្យល់ពីរបៀបដែលអ្នកអាចបម្រើមនុស្សដទៃបានល្អបំផុតដោយសេចក្ដីស្រឡាញ់ដ៏សុទ្ធសាធនៃព្រះគ្រីស្ទ ពេលអ្នកចូលរួមនៅក្នុងកិច្ចការ និងសកម្មភាពបេសកកម្មផ្នែកសេវាកម្មដែរ ( សូមមើល មរ៉ូណៃ ៧:៤៤–៤៧ ) ។

ពាក្យ ថ្នាក់ដឹកនាំអ្នកផ្សព្វផ្សាយសាសនា សំដៅលើពួកអ្នកផ្សព្វផ្សាយសាសនាដែលមានការចាត់តាំងជាថ្នាក់ដឹកនាំ ដូចជាអ្នកដឹកនាំមណ្ឌល និងអ្នកដឹកនាំស៊ីស្ទើរ ។ ពាក្យ ថ្នាក់ដឹកនាំបេសកកម្មផ្នែកសេវាកម្ម សំដៅទៅលើអ្នកដឹកនាំដែលមានការទទួលខុសត្រូវជាប្រចាំចំពោះអ្នក និងពួកអ្នកផ្សព្វផ្សាយសាសនាផ្សេងទៀតនៅក្នុងតំបន់ចាត់តាំងរបស់អ្នក ( សូមមើល ២.១.១ ) ។

នៅក្នុងក្បួនខ្នាតនេះពាក្យ ប្រធានស្តេក ប៊ីស្សព ស្តេក និង វួដ ក៏អនុវត្តចំពោះប្រធានមណ្ឌល ប្រធានសាខា មណ្ឌល និងសាខាផងដែរ ។

២.១

ភាពជាអ្នកដឹកនាំក្នុងបេសកកម្មផ្នែកសេវាកម្ម

ទំនួលខុសត្រូវដ៏សំខាន់បំផុតរបស់អ្នក មិនថានៅក្នុងការចាត់តាំងជាថ្នាក់ដឹកនាំណាឡើយ គឺការធ្វើជាអ្នកផ្សព្វផ្សាយសាសនាម្នាក់ដែលស្មោះត្រង់ និងលះបង់ ។ អ្នកនឹងមានពរ ពេលអ្នកធ្វើតាមការប្រឹក្សាមកពីថ្នាក់ដឹកនាំរបស់អ្នក និងពេលអ្នកអភិវឌ្ឍទំនាក់ទំនងគួរឲ្យស្រឡាញ់ជាមួយនឹងពួកគេ ។

២.១.១

ថ្នាក់ដឹកនាំបេសកកម្មផ្នែកសេវាកម្ម

ព្រះអម្ចាស់ប្រទានពរដល់ពួកអ្នកផ្សព្វផ្សាយសាសនារបស់ទ្រង់ដោយការហៅអ្នកផ្សព្វផ្សាយសាសនារៀមច្បងផ្នែកសេវាកម្មដើម្បីដឹកនាំពួកគេ ។ ថ្នាក់ដឹកនាំបេសកកម្មផ្នែកសេវាកម្មរបស់អ្នក បម្រើរួមគ្នាជាថ្នាក់ដឹកនាំជំនួយ នៅក្រោមការដឹកនាំរបស់ថ្នាក់ដឹកនាំបព្វជិតភាពក្នុងមូលដ្ឋាន ។ ពួកគាត់ត្រូវបានហៅមកពីព្រះ ហើយត្រូវបានញែកចេញដើម្បីដឹកនាំពួកអ្នកផ្សព្វផ្សាយសាសនាផ្នែកសេវាកម្ម នៅក្នុងតំបន់ចាត់តាំងរបស់អ្នក ។ ពួកគាត់ស្រឡាញ់អ្នក បម្រើអ្នក និងជួយអ្នកបំពេញគោលបំណងរបស់អ្នកក្នុងនាមជាអ្នកផ្សព្វផ្សាយសាសនាម្នាក់ ។ ដោយធ្វើការជិតស្និទ្ធជាមួយនឹងប្រធានស្តេករបស់អ្នក នោះពួកគាត់ជួយកំណត់ពីឱកាសបម្រើសម្រាប់អ្នក ។ ពួកគាត់ជួយអភិវឌ្ឍកាលវិភាគអ្នកផ្សព្វផ្សាយសាសនារបស់អ្នក និងការចាត់តាំងរបស់អ្នក ។ ពួកគាត់ក៏ ៖

ជួបហើយសម្ភាសន៍អ្នកជាទៀងទាត់ ។
វាយតម្លៃ និងគាំទ្រដល់ការរីកចម្រើនរបស់អ្នក ។
គាំទ្រ និងលើកទឹកចិត្តអ្នក ។
ស្ដាប់កង្វល់របស់អ្នក ឆ្លើយសំណួររបស់អ្នក ហើយប្រឹក្សាយោបល់ ។
ប្រើការបំផុសគំនិត និងវិវរណៈដើម្បីជួយអ្នកឲ្យជោគជ័យក្នុងនាមជាអ្នកផ្សព្វផ្សាយសាសនា ។

សរុបទៅ ពួកគាត់មានការទទួលខុសត្រូវជាប្រចាំចំពោះការធ្វើការជាមួយនឹងអ្នក ដើម្បីអ្នកអាចមានបទពិសោធន៍បេសកកម្មដែលផ្លាស់ប្ដូរជីវិត ។

ពេលអ្នកមានការសម្ភាសន៍មួយជាមួយនឹងថ្នាក់ដឹកនាំបេសកកម្មផ្នែកសេវាកម្ម នោះអ្នកអាចអញ្ជើញឪពុកម្ដាយរបស់អ្នក ឬអ្នកផ្សព្វផ្សាយសាសនាគាំទ្រដោយផ្ទាល់ ដើម្បីមានវត្តមានក្នុងការសម្ភាសន៍នោះ ។ ការសម្រេចចិត្តរបស់អ្នកដើម្បីអញ្ជើញនរណាម្នាក់ឲ្យចូលរួមជាមួយអ្នក មិនបន្ថយនូវសេចក្ដីស្រឡាញ់ ការខ្វល់ខ្វាយ ឬការកោតសរសើររបស់ថ្នាក់ដឹកនាំបេសកកម្មផ្នែកសេវាកម្មរបស់អ្នកចំពោះអ្នកនោះទេ ។

២.១.២

ប្រធានស្តេក

ដោយសារអ្នកជាសមាជិកម្នាក់នៅក្នុងស្តេក នោះប្រធានស្តេករបស់អ្នកមានការទទួលខុសត្រូវបព្វជិតភាពចំពោះអ្នក ។ ដោយធ្វើការជិតស្និទ្ធជាមួយនឹងថ្នាក់ដឹកនាំបេសកកម្មផ្នែកសេវាកម្មរបស់អ្នក នោះគាត់ដាក់ការរំពឹងទុកខាងវិញ្ញាណ និងខាងអាកប្បកិរិយានៃបេសកកម្មរបស់អ្នក ហើយអនុម័តបទពិសោធន៍អ្នកផ្សព្វផ្សាយសាសនាសម្រាប់ការបម្រើរបស់អ្នក ។

ប្រធានស្ដេករបស់អ្នកមានការទទួលខុសសម្រាប់ការសម្ភាសន៍ភាពស័ក្ដិសម ។ គាត់ត្រូវប្រាកដថា អ្នកនឹងធ្វើតាមបទដ្ឋានបេសកកម្មផ្នែកសេវាកម្ម ។ ដោយប្រឹក្សាជាមួយនឹងថ្នាក់ដឹកនាំបេសកកម្មផ្នែកសេវាកម្ម នោះគាត់ពិនិត្យឡើងវិញនូវកាលវិភាគ និងការចាត់តាំងរបស់អ្នក ។ នៅចុងបញ្ចប់នៃបេសកកម្មរបស់អ្នក គាត់នឹងដោះលែងអ្នក ហើយអរគុណអ្នកចំពោះការបម្រើជាអ្នកផ្សព្វផ្សាយសាសនារបស់អ្នក ។

ក្នុងករណីមួយចំនួន ចម្ងាយផ្លូវធ្វើឲ្យមានការលំបាកចំពោះប្រធានស្តេកដើម្បីជួបជាមួយនឹងអ្នកជាទៀងទាត់ ។ ប្រសិនបើដូច្នោះមែន គាត់អាចចាត់អ្នកជំនាញប្រចាំស្តេក ឬថ្នាក់ដឹកនាំបព្វជិតភាពផ្សេងទៀតម្នាក់ដើម្បីធ្វើការជិតស្និទ្ធជាមួយនឹងថ្នាក់ដឹកនាំបេសកកម្មផ្នែកសេវាកម្ម ដើម្បីគាំទ្រ ហើយជួយអ្នកឲ្យប្រាកដថា អ្នកមានបទពិសោធន៍អ្នកផ្សព្វផ្សាយសាសនាដែលផ្លាស់ប្ដូរជីវិតមួយ ។

២.១.៣

ការរៀបចំថ្នាក់ដឹកនាំក្នុងបេសកកម្មផ្នែកសេវាកម្ម

ថ្នាក់ដឹកនាំបេសកកម្មផ្នែកសេវាកម្មរបស់អ្នកប្រើការបំផុសគំនិត និងវិវរណៈដើម្បីរៀបចំកិច្ចការនោះ ។ ពួកគេអាចចាត់ពួកអ្នកផ្សព្វផ្សាយសាសនាឲ្យធ្វើជាអ្នកដឹកនាំនៅក្នុងតំបន់អ្នកផ្សព្វផ្សាយសាសនាផ្នែកសេវាកម្ម ( ដូចជាអ្នកដឹកនាំមណ្ឌល ឬអ្នកដឹកនាំស៊ីស្ទើរ ) ។ អ្នកក៏អាចត្រូវបានសុំឲ្យដឹកនាំ ឬផ្ដល់ការបំពាក់បំប៉ននៅក្នុងការចាត់តាំងប្រតិបត្តិការ ឬសហគមន៍របស់អ្នកដែរ ។

២.១.៤

ការទទួលខុសត្រូវរបស់អ្នកដឹកនាំអ្នកផ្សព្វផ្សាយសាសនា

ដូចជាអ្នកដឹកនាំអ្នកផ្សព្វផ្សាយសាសនាទាំងអស់ដែរ ថ្នាក់ដឹកនាំអ្នកផ្សព្វផ្សាយសាសនាធ្វើតាមការប្រឹក្សារបស់ព្រះយេស៊ូវគ្រីស្ទ ដើម្បី « បម្រើ [ ព្រះ ] ឲ្យអស់ពីចិត្ត អស់ពីពលំ អស់ពីគំនិត ហើយអស់ពីកម្លាំង [ របស់ពួកគេ ] » និង « នឹកចាំពីសេចក្ដីជំនឿ គុណធម៌ តម្រិះ សេចក្ដីអត់សង្កត់ សេចក្ដីអត់ធន់ សេចក្ដីរាប់អានគ្នាជាបងប្អូន សេចក្ដីកោតខ្លាចដល់ព្រះ សេចក្ដីសប្បុរស សេចក្ដីទាបរាបសា សេចក្ដីឧស្សាហ៍ » ( គោលលទ្ធិ និងសេចក្ដីសញ្ញា ៤:២, ៦ ) ។ ការចាត់តាំងភាពជាអ្នកដឹកនាំ ពុំចង្អុលបង្ហាញអំពីការទទួលស្គាល់ពិសេស ឬការដំឡើងតំណែង ឬជាការឆ្លុះបញ្ចាំងពីតម្លៃរបស់អ្នកផ្សព្វផ្សាយសាសនាម្នាក់នោះទេ ។

អ្នកដឹកនាំអ្នកផ្សព្វផ្សាយសាសនាមានទំនួលខុសត្រូវដើម្បី ៖

ធ្វើជាគំរូអំពីបទដ្ឋានអ្នកផ្សព្វផ្សាយសាសនា ផ្នែកអាកប្បកិរិយា ( សូមមើល ជំពូកទី ៣ ) ។
ជួយបំពាក់បំប៉នពួកអ្នកផ្សព្វផ្សាយសាសនាផ្សេងទៀត ដូចដែលបានដឹកនាំដោយអ្នកដឹកនាំបេសកកម្មផ្នែកសេវាកម្ម ។
ស្រឡាញ់ និងធ្វើជាមិត្តភក្ដិនឹងពួកអ្នកផ្សព្វផ្សាយសាសនាដទៃទៀត ។
ជួយពួកអ្នកផ្សព្វផ្សាយសាសនាផ្សេងទៀតឲ្យស្គាល់ពីតម្លៃនៃកិច្ចខិតខំរបស់ពួកគេ ។
ស្ដាប់ពីកង្វល់របស់ពួកអ្នកផ្សព្វផ្សាយសាសនាផ្សេងទៀត ហើយចែកចាយសេចក្ដីត្រូវការជាមួយនឹងថ្នាក់ដឹកនាំបេសកកម្មផ្នែកសេវាកម្ម ។
ទទួលខុសត្រូវចំពោះកាតព្វកិច្ចជាអ្នកដឹកនាំរបស់ពួកគេចំពោះថ្នាក់ដឹកនាំបេសកកម្មផ្នែកសេវាកម្ម ។
ជួយរៀបចំ និងដឹកនាំសន្និសីទ ការប្រជុំ និងសកម្មភាពនានា ក្រោមការដឹកនាំរបស់ថ្នាក់ដឹកនាំបេសកកម្មផ្នែកសេវាកម្ម ។

ដូចជាពួកអ្នកផ្សព្វផ្សាយសាសនាទាំងអស់ដែរ ពួកអែលឌើរ និងពួកស៊ីស្ទើរ ដែលមានការចាត់តាំងជាថ្នាក់ដឹកនាំ គប្បីអនុវត្តនូវភាពជាអ្នកដឹកនាំដែលមានលក្ខណៈដូចព្រះគ្រីស្ទ ។ ប្រសិនបើអាកប្បកិរិយារបស់អ្នកផ្សព្វផ្សាយណាម្នាក់ រួមទាំងអ្នកដឹកនាំអ្នកផ្សព្វផ្សាយសាសនា ហាក់មិនប្រកាន់តាមបទបញ្ញត្តិ និងបទដ្ឋានអ្នកផ្សព្វផ្សាយសាសនា សូមពិភាក្សាបញ្ហានោះជាមួយនឹងថ្នាក់ដឹកនាំបេសកកម្មផ្នែកសេវាកម្ម ឪពុកម្ដាយ ឬមិត្តភក្ដិរបស់អ្នក ។

២.១.៥

ទំនួលខុសត្រូវផ្ទាល់ខ្លួន

« តម្កើងការងារ [ របស់អ្នក ] ថ្វាយព្រះអម្ចាស់ » ( យ៉ាកុប ១:១៩ ) មានភាពខ្លួនទីពឹងខ្លួនខាងវិញ្ញាណ ហើយ « ត្រូវប្រព្រឹត្តអ្វីៗដោយ [ ខ្លួនអ្នក ] » ( នីហ្វៃទី២ ២:១៦ ) តាមរយៈការទុកចិត្តលើព្រះអម្ចាស់ និងធ្វើតាមព្រះវិញ្ញាណ ។

ពេលអ្នកមានសំណួរ ឬកង្វល់ ៖

អនុវត្តការបង្រៀនដើម្បី « សិក្សាក្នុងគំនិតរបស់អ្នក រួចហើយ … សូមដល់យើង បើសិនជាការណ៍នោះត្រឹមត្រូវ » ( គោលលទ្ធិ និង សេចក្ដីសញ្ញា ៩:៨ ) ។
ស្វែងរកការដឹកនាំតាមរយៈវិវរណៈផ្ទាល់ខ្លួន ការអធិស្ឋាន ការសិក្សាព្រះគម្ពីរ ( ជាពិសេស ព្រះគម្ពីរមរមន ) ការបង្រៀនរបស់ព្យាការីដែលនៅរស់ និងបទដ្ឋានអ្នកផ្សព្វផ្សាយសាសនាផ្នែកសេវាកម្ម ។

និយាយជាមួយប៊ីស្សព ឬប្រធានស្តេករបស់អ្នកអំពីបញ្ហាភាពស័ក្ដិសម ។ និយាយជាមួយថ្នាក់ដឹកនាំបេសកកម្មផ្នែកសេវាកម្មរបស់អ្នក អំពីកង្វល់ដែលទាក់ទងនឹងសុវត្ថិភាពបន្ទាន់ ដូចជាការវាយប្រហារ ការរំលោភបំពាន ឬបញ្ហាផ្សេងៗទៀត ។

វាអាចនឹងមានគ្រាទាំងឡាយ អំឡុងបេសកកម្មរបស់អ្នក ពេលដែលអ្នកឃើញថាវាពិបាកដើម្បីផ្ដោតលើកិច្ចការសេវាកម្មរបស់អ្នក ដោយសារតែឧបសគ្គនាពេលបច្ចុប្បន្ន បញ្ហាផ្ទាល់ខ្លួន ឬគ្រួសារ ឬសូម្បីតែជាបទពិសោធន៍ពីអតីតកាល ។ កុំស្ទាក់ស្ទើរដើម្បីចែកចាយកង្វល់របស់អ្នកជាមួយនឹងថ្នាក់ដឹកនាំបេសកកម្មផ្នែកសេវាកម្មរបស់អ្នក ។

សូមចងចាំអំពីការអញ្ជើញរបស់ព្រះអង្គសង្គ្រោះ ៖ « ចូរមើលមកឯយើងដោយនូវគ្រប់ទាំងគំនិត ចូរកុំសង្ស័យ កុំខ្លាចឡើយ ។ ចូរមើលស្នាមទាំងឡាយដែលនៅចំហៀងយើង ហើយព្រមទាំងស្នាមដែកគោលនៅដៃ និងជើងរបស់យើងចុះ ចូរមានចិត្តស្មោះត្រង់កាន់តាមបញ្ញត្តិទាំងឡាយរបស់យើង នោះអ្នករាល់គ្នានឹងគ្រងនគរស្ថានសួគ៌ទុកជាមរតក ។ អាម៉ែន » ( គោលលទ្ធិ និង សេចក្ដីសញ្ញា ៦:៣៦–៣៧ ) ។

២.២

ការបម្រើរួមគ្នា

ពីមួយគ្រាទៅមួយគ្រា អ្នកអាចត្រូវចាត់តាំងជាមួយនឹងពួកអ្នកផ្សព្វផ្សាយសាសនាផ្នែកសេវាកម្មផ្សេងទៀតទៅកាន់ទីតាំងដូចគ្នា ។ ក្នុងនាមជាអ្នកផ្សព្វផ្សាយសាសនាដែលធ្វើការបម្រើរួមគ្នា អ្នកគួរតែ ៖

មានភាពសាមគ្គីគ្នានៅក្នុងកិច្ចការនេះ ហើយបម្រើដូចជាព្រះអង្គសង្គ្រោះបានធ្វើ ។
គាំទ្រសុខុមាលភាពរបស់គ្នាទៅវិញទៅមក ខាងវិញ្ញាណ ខាងសតិអារម្មណ៍ និងរាងកាយ ។
គិតគូរពីសុវត្ថិភាពគ្នាទៅវិញទៅមកខណៈកំពុងបម្រើរួមគ្នា ។
ទទួលខុសត្រូវចំពោះគ្នាទៅវិញទៅមក ក្នុងការកាន់តាមបទដ្ឋានអ្នកផ្សព្វផ្សាយសាសនាផ្នែកសេវាកម្ម ។

២.២.១

ដៃគូ

ថ្នាក់ដឹកនាំបេសកកម្មផ្នែកសេវាកម្មអាចចាត់តាំងដៃគូដើម្បីកែលម្អការសិក្សាដំណឹងល្អ និងការប្រាស្រ័យទាក់ទងក្នុងសង្គមក្នុងបទពិសោធន៍បេសកកម្មរបស់អ្នក ។ ដៃគូអាចត្រូវបានចាត់នៅក្នុងតំបន់អ្នកផ្សព្វផ្សាយសាសនាផ្នែកសេវាកម្ម នៅទីតាំងសេវាកម្ម ឬសម្រាប់សកម្មភាពសេវាកម្មពិសេសៗ ។

សូមចងចាំពីសេចក្ដីណែនាំដូចតនេះជានិច្ច ពេលអ្នកប្រាស្រ័យទាក់ទងនឹងពួកអ្នកផ្សព្វផ្សាយសាសនាផ្នែកសេវាកម្មផ្សេងទៀត ៖

ស្រឡាញ់ គោរព និងពង្រឹងអ្នកផ្សព្វផ្សាយសាសនាផ្សេងទៀត ។
បន្ទាបខ្លួន ហើយទទួលស្គាល់ពីភាពខ្លាំងរបស់គ្នាទៅវិញទៅមក ។
ប្រព្រឹត្តចំពោះគ្នាទៅវិញទៅមក ដូចជាអ្នកចង់ឲ្យគេប្រព្រឹត្តចំពោះអ្នកដែរ ។
ចៀសវាងការរិះគន់ និងការទាស់ទែង ហើយទទួលស្គាល់ពីសេចក្ដីល្អនៅក្នុងខ្លួនអ្នកផ្សព្វផ្សាយសាសនាផ្សេងទៀត ។
ចៀសវាងការនិយាយអវិជ្ជមានអំពីគ្នាទៅវិញទៅមក ប្រាប់អ្នកផ្សព្វផ្សាយសាសនាផ្នែកសេវាកម្មផ្សេងទៀត សមាជិកសាសនាចក្រ ឬគ្រួសារ និងមិត្តភក្ដិ ។

ប្រសិនបើអ្នកកត់សម្គាល់ឃើញថាមានស្ថានភាព ឬអាកប្បកិរិយាមិនសមរម្យណាមួយ សូមពិភាក្សាវាជាមួយថ្នាក់ដឹកនាំបេសកកម្មផ្នែកសេវាកម្មរបស់អ្នក ។

២.៣

ការប្រជុំ សន្និសីទ និងក្រុមប្រឹក្សា

ក្នុងនាមជាអ្នកផ្សព្វផ្សាយសាសនា អ្នកប្រឹក្សាជាមួយគ្នា ពេលអ្នកផ្ដល់ និងទទួលការបំពាក់បំប៉ន និងពេលដែលអ្នកដាក់ផែនការ និងសម្របសម្រួលសេវាកម្មរបស់អ្នក ។ ការប្រជុំ សន្និសីទ និងក្រុមប្រឹក្សាគួរតែយាងអញ្ជើញព្រះវិញ្ញាណនៃព្រះអម្ចាស់ និងគួរតែជាពេលវេលាមួយសម្រាប់ការបំផុសគំនិត និងវិវរណៈ ( សូមមើល គោលលទ្ធិ និង សេចក្ដីសញ្ញា ៦:៣២ ) ។ ការប្រមូលផ្ដុំក្នុងនាមជាពួកអ្នកផ្សព្វផ្សាយសាសនា ក៏នឹងផ្ដល់ឱកាសឲ្យអ្នកស្អាងគ្នាទៅវិញទៅមក និងរីករាយជាមួយគ្នាផងដែរ ( សូមមើល គោលលទ្ធិ និង សេចក្ដីសញ្ញា ៤៣:៨; ៥០:២២ ) ។

ការប្រជុំដែលអ្នកដឹកនាំអ្នកផ្សព្វផ្សាយសាសនារៀបចំ នៅក្រោមការដឹកនាំរបស់ថ្នាក់ដឹកនាំបេសកកម្មផ្នែកសេវាកម្ម រួមមាន ៖

ការប្រជុំមណ្ឌលជាទៀងទាត់
ការប្រជុំប្រចាំសប្ដាហ៍ ឬប្រចាំខែ
សន្និសីទ
ក្រុមប្រឹក្សាភាពជាអ្នកដឹកនាំ

២.៤

ការចាត់តាំង និងកាលវិភាគ

ចូរស្មោះត្រង់ ហើយឧស្សាហ៍នៅក្នុងការធ្វើតាមការចាត់តាំង និងកាលវិភាគអ្នកផ្សព្វផ្សាយសាសនារបស់អ្នក ។

២.៤.១

ការចាត់តាំងតាមបំណង

អ្នកត្រូវបានហៅដោយព្រះអម្ចាស់ឲ្យធ្វើជាអ្នកផ្សព្វផ្សាយសាសនា ។ អ្នកត្រូវបានចាត់តាំងឲ្យបម្រើ នៅក្នុងបទពិសោធន៍បេសកកម្មតាមបំណងដែលបានជ្រើសរើសយ៉ាងវិសេសសម្រាប់ទេពកោសល្យ ជំនាញ និងអំណោយទានរបស់អ្នក ។ ក្នុងដំណើរនៃបេសកកម្មរបស់អ្នក អ្នកអាចបម្រើនៅក្នុងការចាត់តាំងច្រើន រួមមាននៅក្នុងអង្គការមនុស្សធម៌ដែលបានអនុម័ត ប្រតិបត្តិការសាសនាចក្រ ព្រះវិហារបរិសុទ្ធ និងឱកាសបម្រើដែលបានចាត់តាំងដោយស្តេក ។

អ្នកអាចបម្រើលើសពីមួយកន្លែងនៅក្នុងសប្ដាហ៍នោះ ។ នៅឯទីតាំងនីមួយៗ អ្នកនឹងរាយការណ៍ទៅកាន់អ្នកគ្រប់គ្រងដែលនឹងផ្ដល់ការបំពាក់បំប៉ន ឧបករណ៍ និងការគាំទ្រដែលអ្នកត្រូវការដើម្បីបំពេញការទទួលខុសត្រូវរបស់អ្នក ។ មកដល់កន្លែងចាត់តាំងរបស់អ្នកឲ្យទាន់ពេល ហើយបានរៀបចំខ្លួនដើម្បីបម្រើឲ្យបានល្អ ។ មានភាពជឿជាក់ និងអាចទុកចិត្តបាន ។ ធ្វើតាមការដឹកនាំមកពីអ្នកគ្រប់គ្រងរបស់អ្នកដោយប្រុងប្រយ័ត្ន និងដោយពេញលេញ ។ ធ្វើឲ្យអស់ពីលទ្ធភាពដើម្បីបរិច្ចាគដល់ការងារនេះតាមរបៀបដ៏មានន័យ ។ ចូរមានភាពវិជ្ជមាន និងមានឥទ្ធិពលនៃការលើកស្ទួយដល់មនុស្សដែលអ្នកបម្រើ និងប្រាស្រ័យទាក់ទង ។ ធ្វើការដោយសុវត្ថិភាព និងព្យាយាមកែលម្អជានិច្ច ។

២.៤.២

ការប្ដូរការចាត់តាំង

ដោយធ្វើការរួមគ្នាយ៉ាងជិតស្និទ្ធ នោះប្រធានស្តេក និងថ្នាក់ដឹកនាំបេសកកម្មផ្នែកសេវាកម្មរបស់អ្នកអាចកែសម្រួលការចាត់តាំងផ្នែកសេវាកម្មរបស់អ្នក ក្នុងអំឡុងពេលនៃដំណើរបេសកកម្មរបស់អ្នក ។

២.៤.៣

កាលវិភាគប្រចាំថ្ងៃ

ដោយធ្វើការជាមួយគ្នាយ៉ាងជិតស្និទ្ធ នោះថ្នាក់ដឹកនាំបេសកកម្មផ្នែកសេវាកម្មរបស់អ្នកនឹងបង្កើតកាលវិភាគអ្នកផ្សព្វផ្សាយសាសនាប្រចាំថ្ងៃ ដោយបានមតិមកពីអ្នក ។ ប្រធានស្ដេករបស់អ្នកនឹងអនុម័តលើកាលវិភាគនោះ ។ កាលវិភាគនេះអាចដាក់បញ្ចូលនូវកិច្ចការ និងសកម្មភាពដែលស្ថិតនៅក្រោមផ្នែកនៃការអភិវឌ្ឍដូចតទៅនេះ ៖

ផ្នែកខាងវិញ្ញាណ
ផ្នែកខាងសង្គម
ផ្នែកខាងសាច់ឈាម
ផ្នែកខាងបញ្ញា

ចូរមានភាពជាប់លាប់ និងអាចទុកចិត្តបានក្នុងការធ្វើតាមកាលវិភាគអ្នកផ្សព្វផ្សាយសាសនាប្រចាំថ្ងៃរបស់អ្នក ។ ការណ៍នេះនឹងនាំមកនូវការីកចម្រើន អំណរ និងពរជ័យខាងវិញ្ញាណដ៏ធំដល់អ្នក ក្នុងអំឡុងការបម្រើជាអ្នកផ្សព្វផ្សាយសាសនារបស់អ្នក ។

កាលវិភាគប្រចាំថ្ងៃរបស់អ្នកអាចរួមមាន ៖

ការដាក់ និងការពិនិត្យមើលអ្នកផ្សព្វផ្សាយសាសនាផ្នែកសេវាកម្មរបស់អ្នក ។
ការរៀបចំខ្លួន និងការបំពេញការចាត់តាំងរបស់អ្នករៀងរាល់ថ្ងៃ ។
ការសិក្សាបទគម្ពីរ ( ជាពិសេសព្រះគម្ពីរមរមន ) ការបង្រៀនរបស់ព្យាការី និងសាវកនៅរស់ ផ្នែកដែលទាក់ទងស្ដីពី ការកែសម្រួលជីវិតអ្នកផ្សព្វផ្សាយសាសនាផ្នែកសេវាកម្មនៃការប្រកាសដំណឹងល្អរបស់យើង និងធនធានអនុម័តផ្សេងទៀត ។ ( សូមមើល ២.៤.៥ ) ។

២.៤.៤

គំរូកាលវិភាគប្រចាំថ្ងៃ

ជាមួយគ្នានឹងថ្នាក់ដឹកនាំ ឪពុកម្ដាយ ឬអាណាព្យាបាលរបស់អ្នក សូមធ្វើកាលវិភាគជាលាយលក្ខណ៍អក្សរទូទៅមួយ ។ រួមបញ្ចូលទាំងពេលវេលារបស់អ្នកនៅក្នុងការចាត់តាំង និងពេលវេលាដែលអ្នកអនុវត្តសិទ្ធិជ្រើសរើសរបស់អ្នកដើម្បីកំណត់ពីរបៀបដែលអ្នកនឹងបម្រើ កែលម្អ និងរីកចម្រើន ( ហៅថា « ម៉ោងសិទ្ធិជ្រើសរើស » ) ។ ពិនិត្យមើលឡើងវិញ ហើយធ្វើតាមផែនការរបស់អ្នករៀងរាល់ថ្ងៃ ។

កាលវិភាគប្រចាំថ្ងៃសម្រាប់បេសកកម្មរបស់អ្នក អាចមើលទៅដូចគំរូខាងក្រោមនេះ ។

ពេលព្រឹក ៖
[ ម៉ោងចាប់ផ្ដើម ]	ក្រោកឡើង និងអធិស្ឋាន ។
[ ម៉ោងចាប់ផ្ដើម ]	ហាត់ប្រាណ ៣០ នាទី ។ ( ប្រឹក្សាជាមួយនឹងអ្នកជំនាញផ្នែកសុខភាពអំពីអ្វីដែលល្អបំផុតសម្រាប់សុខភាព និងស្ថានភាពរាងកាយរបស់អ្នក ) ។
[ ម៉ោងចាប់ផ្ដើម ]	ងូតទឹក បរិភោគអាហារពេលព្រឹក និងបញ្ចប់ការរៀបចំខ្លួនសម្រាប់ថ្ងៃនេះ ។
[ ម៉ោងចាប់ផ្ដើម ]	ចូលរួមក្នុងការប្រជុំធម្មនិដ្ឋាន ឬការសិក្សាដំណឹងល្អ ។
[ ម៉ោងចាប់ផ្ដើម ]	ទៅដល់កន្លែងធ្វើការចាត់តាំងរបស់អ្នកឲ្យទាន់ពេល ។ ( ចូលរួមការប្រជុំអធិស្ឋាន ឬការប្រជុំធម្មនិដ្ឋានពីមុនការបម្រើរបស់អ្នក ប្រសិនបើមាននៅក្នុងកាលវិភាគ ) ។
ពេលរសៀល ៖
[ ម៉ោងចាប់ផ្ដើម ]	បរិភោគអាហារថ្ងៃត្រង់ ។
[ ម៉ោងចាប់ផ្ដើម ]	បម្រើរហូតដល់ពេលវេលានៃការចាត់តាំងរបស់អ្នកបានបញ្ចប់ ។
ពេលល្ងាច ៖
[ ម៉ោងចាប់ផ្ដើម ]	បរិភោគអាហារពេលល្ងាច ។
[ ម៉ោងចាប់ផ្ដើម ]	ធ្វើតាមផែនការសកម្មភាពផ្ទាល់ខ្លួនរបស់អ្នកនៅក្នុងកាលវិភាគប្រចាំថ្ងៃរបស់អ្នក ។ ការណ៍នេះគួរតែដាក់បញ្ចូលនូវពេលវេលាមួយម៉ោង នៃការសិក្សាព្រះគម្ពីរផ្ទាល់ខ្លួន ។ វាក៏អាចដាក់បញ្ចូលនូវការចូលរួមក្នុងព្រះវិហារបរិសុទ្ធ ថ្នាក់វិទ្យាស្ថាន សកម្មភាព យ.ម.ល និងកិច្ចការក្នុងគ្រួសារ ។
[ ម៉ោងចាប់ផ្ដើម ]	កត់ត្រាអារម្មណ៍របស់អ្នក និងបទពិសោធន៍ពិសេសៗនៅក្នុងកំណត់ហេតុរបស់អ្នក ។
[ ម៉ោងចាប់ផ្ដើម ]	រៀបចំខ្លួនចូលដំណេក ។ អធិស្ឋាន និងចូលដំណេក ។

សូម្បីតែពេលដែលអ្នកមិនទាន់បម្រើនៅទីតាំងដែលអ្នកបានចាត់ក្ដី ក៏អ្នកនៅតែជាអ្នកផ្សព្វផ្សាយសាសនាដែរ ។ ទង្វើ គំនិត និងសកម្មភាពរបស់អ្នកគួរតែឆ្លុះបញ្ចាំងពីស្ថានភាពអ្នកផ្សព្វផ្សាយសាសនារបស់អ្នក ។

២.៤.៥

ម៉ោងសិក្សាជាមួយពួកអ្នកផ្សព្វផ្សាយសាសនាផ្នែកសេវាកម្មផ្សេងទៀត

ប្រសិនបើអាចធ្វើបាន សូមសិក្សាជាមួយនឹងអ្នកផ្សព្វផ្សាយសាសនាផ្នែកសេវាកម្មម្នាក់ទៀត ។ មនុស្សម្នាក់អាចត្រូវបានចាត់តាំងដោយថ្នាក់ដឹកនាំបេសកកម្មផ្នែកសេវាកម្មរបស់អ្នកឲ្យធ្វើជាដៃគូអ្នក ។ ការសិក្សាជាដៃគូនេះអាចធ្វើឡើងដោយផ្ទាល់ ឬតាមអនឡាញ ។

សូមផ្ដោតលើបទគម្ពី ( ជាពិសេសព្រះគម្ពីរមរមន ) ការបង្រៀនរបស់ព្យាការីនៅរស់ ផ្នែកដែលទាក់ទងស្ដីពី ការសម្របទៅនឹងជីវិតជាអ្នកផ្សព្វផ្សាយសាសនាផ្នែកសេវាកម្មនៃការប្រកាសដំណឹងល្អរបស់យើង និងបទដ្ឋានបេសកកម្មផ្នែកសេវាកម្ម ។ ធនធានដែលត្រូវបានអនុម័តទាំងនេះ អាចពង្រឹងចំណេះដឹង និងទីបន្ទាល់របស់អ្នក អំពីដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ព្រមទាំងជួយអ្នកឲ្យរៀបចំខ្លួន ដើម្បីបំពេញតាមសេចក្ដីត្រូវការរបស់មនុស្សដែលអ្នកបម្រើផងដែរ ។

២.៥

ព្រឹត្តិការណ៍ សកម្មភាព និងការរៀបចំខ្លួនក្រៅពីការចាត់តាំងផ្នែកសេវាកម្ម

កាលវិភាគអ្នកផ្សព្វផ្សាយសាសនារបស់អ្នកអាចរួមបញ្ចូលនូវពេលវេលាអំឡុងសប្ដាហ៍ដើម្បីបំពេញសេចក្ដីត្រូវការ និងការរៀបចំផ្ទាល់ខ្លួន ដូចជា កិច្ចការផ្ទះ ការណាត់ជួបពេទ្យ ពេលវេលាជាគ្រួសារ និងការកម្សាន្ត ។ ការណ៍នេះអាចធ្វើឡើងពេញមួយថ្ងៃ ឬពាក់កណ្ដាលថ្ងៃ ។ « ចូររៀបចំខ្លួន ចូររៀបចំអ្វីៗដែលត្រូវការគ្រប់មុខ ហើយចូរតាំងដំណាក់មួយឡើង គឺ … ដំណាក់នៃរបៀបរៀបរយ » ( គោលលទ្ធិ និង សេចក្ដីសញ្ញា ១០៩:៨ ) ។

សូមចងចាំការព្រមានរបស់ព្រះអម្ចាស់ចំពោះការរៀបចំពេលវេលា ៖ « ចូរកុំរត់លឿន ឬធ្វើការលើសជាងកម្លាំងដែលអ្នកមាន » ( គោលលទ្ធិ និង សេចក្ដីសញ្ញា ១០:៤ ) និង « ចូរឆាប់ចូលដំណេក ប្រយោជន៍កុំឲ្យអ្នករាល់គ្នាអស់កម្លាំង ចូរឆាប់ក្រោក ប្រយោជន៍ឲ្យរូបកាយរបស់អ្នករាល់គ្នា និងគំនិតរបស់អ្នករាល់គ្នាអាចមានកម្លាំងក្លៀវក្លា » ( គោលលទ្ធិ និង សេចក្ដីសញ្ញា ៨៨:១២៤ ) ។ ការឈប់សម្រាក និងការរៀបចំខ្លួននឹងជួយគាំទ្រដល់សមត្ថភាពរបស់អ្នកដើម្បីបម្រើមនុស្សដទៃ ។

២.៦

សកម្មភាពថ្ងៃឈប់សម្រាក

ដាក់ផែនការសកម្មភាពនៅថ្ងៃឈប់សម្រាកដែលជួយអ្នកឲ្យបំពេញគោលបំណងជាអ្នកផ្សព្វផ្សាយសាសនារបស់អ្នក ដើម្បីជួយមនុស្សដទៃឲ្យមករកព្រះគ្រីស្ទដោយបម្រើពួកគេឲ្យដូចព្រះអង្គសង្គ្រោះនឹងធ្វើ ។ សូមចងចាំការបង្រៀនរបស់ព្រះអម្ចាស់អំពីថ្ងៃឈប់សម្រាកនៅក្នុង គោលលទ្ធិ និងសេចក្ដីសញ្ញា ៥៩:១៣–១៩ ។

ដោយធ្វើការជាមួយនឹងថ្នាក់ដឹកនាំបេសកកម្មផ្នែកសេវាកម្ម នោះថ្នាក់ដឹកនាំបព្វជិតភាពក្នុងមូលដ្ឋានរបស់អ្នកអាចផ្ដល់ឲ្យអ្នកនូវការហៅក្នុងវួដ ឬស្តេកដែលមិនប៉ះពាល់ដល់កាលវិភាគ ឬការចាត់តាំងបេសកកម្មរបស់អ្នក ។ អ្នកក៏អាចបម្រើជាបងប្អូនប្រុស ឬបងប្អូនស្រីដែលផ្ដល់ការងារបម្រើផងដែរ ។

២.៧

ការបម្រើនៅក្នុងសហគមន៍

វិធីមួយដើម្បីរៀនធ្វើជាសិស្សរបស់ព្រះយេស៊ូវគ្រីស្ទគឺតាមរយៈការបម្រើដូចជាទ្រង់បានធ្វើ ។ ថ្នាក់ដឹកនាំបេសកកម្មផ្នែកសេវាកម្មរបស់អ្នកនឹងជួយស្វែងរកឱកាសឲ្យអ្នកបម្រើមនុស្សដទៃនៅក្នុងសហគមន៍ « ដើម្បីឲ្យអ្នករាល់គ្នាអាចបានដឹងថា កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នាគ្រាន់តែនៅក្នុងការបម្រើដល់ព្រះរបស់អ្នកតែប៉ុណ្ណោះ » ( ម៉ូសាយ ២:១៧ ) ។

អ្នកគួរតែបម្រើដោយបំណងប្រាថ្នាដ៏ស្មោះសរ ដើម្បីជួយមនុស្សផ្សេងទៀតដោយមិនរំពឹងថាលទ្ធផលជាអ្វីនោះទេ ។ សូមចងចាំថា អ្នកមិនត្រូវបានហៅឲ្យបង្រៀនដំណឹងល្អដោយពាក្យសម្ដីរបស់អ្នកនោះទេ ។ តាមរយៈគំរូនៃការបម្រើដូចជាព្រះគ្រីស្ទរបស់អ្នក នោះអ្នកបង្ហាញពីសេចក្ដីស្រឡាញ់របស់អ្នកចំពោះព្រះ ។ សូមកុំផ្សព្វផ្សាយពេលអ្នកកំពុងបម្រើនៅក្នុងអង្គការមនុស្សធម៌ ។

ការចាត់តាំងជាក់លាក់តម្រូវឲ្យមានការបំពាក់បំប៉ន ឬការគ្រប់គ្រងបន្ថែមទៀត ។ លើកលែងតែអង្គការមនុស្សធម៌ដែលអ្នកកំពុងបម្រើបានដាក់ស្នើឲ្យមានផែនការបំពាក់បំប៉នជាក់លាក់មួយទៅកាន់ថ្នាក់ដឹកនាំបេសកកម្មផ្នែកសេវាកម្មរបស់អ្នក នោះអ្នកមិនគួរចូលរួមក្នុងសកម្មភាពហាមឃាត់ណាមួយដូចតទៅនេះឡើយ ៖

ការប្រាស្រ័យទាក់ទងនឹងកុមារ ឬមនុស្សពេញវ័យដែលងាយរងគ្រោះ
ដំណើរការម៉ាស៊ីន ឧបករណ៍ ឬរថយន្តផ្សេងៗ
ការកាន់ប្រាក់ ឬវត្ថុមានតម្លៃណាមួយ
ការផ្ដល់យោបល់លើវិជ្ជាជីវៈ