សារមកពីគណៈប្រធានទីមួយ និងកូរ៉ុមនៃពួកសាវកដប់ពីរនាក់
ជូនចំពោះអ្នកផ្សព្វផ្សាយសាសនាផ្នែកសេវាកម្មជាទីស្រឡាញ់ ៖
ព្រះគម្ពីរមរមនបង្រៀនថា « ហើយមើលចុះ យើងសុំប្រាប់អ្នកនូវការណ៍ទាំងនេះ ដើម្បីឲ្យអ្នករាល់គ្នាអាចមានប្រាជ្ញា ដើម្បីឲ្យអ្នករាល់គ្នាអាចបានដឹងថា កាលណាអ្នករាល់គ្នានៅក្នុងការបម្រើដល់មនុស្សទូទៅ នោះអ្នករាល់គ្នាគ្រាន់តែនៅក្នុងការបម្រើដល់ព្រះរបស់អ្នកតែប៉ុណ្ណោះ » ( ម៉ូសាយ ២:១៧ ) ។ ព្រះបានហៅអ្នកឲ្យធ្វើជាអ្នកផ្សព្វផ្សាយសាសនាផ្នែកសេវាកម្មដើម្បីធ្វើកិច្ចការដ៏សំខាន់មួយនៅពេលនេះ យើងមានអំណរគុណខ្លាំងណាស់ចំពោះឆន្ទៈរបស់អ្នកដើម្បីធ្វើកិច្ចការនេះ ។
យើងសូមលើកទឹកចិត្តអ្នកឲ្យ « អធិស្ឋានដល់ព្រះវរបិតាដោយអស់ពីកម្លាំងចិត្ត ដើម្បីឲ្យអ្នករាល់គ្នាបានពោរពេញដោយសេចក្ដីស្រឡាញ់នេះដែលទ្រង់បានប្រទានដល់អស់អ្នកណាដែលជាអ្នកដើរតាមដ៏ពិតនៃព្រះរាជបុត្រារបស់ទ្រង់គឺព្រះយេស៊ូវគ្រីស្ទ » ( មរ៉ូណៃ ៧:៤៧–៤៨ ) ។ យើងសូមអញ្ជើញអ្នកឲ្យពង្រីកទេពកោសល្យ និងជំនាញរបស់អ្នកសម្រាប់សិរីល្អនៃព្រះ ។ ទ្រង់នឹងជួយអ្នកឲ្យផ្ដល់ពរជ័យដល់កូនចៅរបស់ទ្រង់ នៅពេលអ្នកបម្រើពួកគេក្នុងនាមជាអ្នកផ្សព្វផ្សាយសាសនាផ្នែកសេវាកម្ម ។
បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—បេសកកម្មផ្នែកសេវាកម្ម ត្រូវបានផ្តល់ឲ្យដោយគណៈប្រធានទីមួយ និងកូរ៉ុមនៃពួកសាវកដប់ពីរនាក់ គឺដើម្បីដឹកនាំការបម្រើរបស់អ្នក ។ យើងសូមលើកទឹកចិត្តអ្នកឲ្យស្គាល់វា ហើយរស់នៅតាមបទដ្ឋានដែលបានចែង ។ បទដ្ឋានទាំងនេះនឹងជួយការពារអ្នកខាងផ្លូវកាយ ខាងវិញ្ញាណ និងខាងផ្លូវចិត្ត ។ វានឹងជួយអ្នកឲ្យក្លាយជាសិស្សដ៏ពិតរបស់ព្រះយេស៊ូវគ្រីស្ទ ហើយកាន់តែប្រែក្លាយដូចជាទ្រង់ ។ សូមសិក្សាបទដ្ឋានទាំងនេះជាទៀងទាត់ ហើយខិតខំគោរពតាមវា ។ ប្រសិនបើអ្នកមានសំណួរ ចូរទូលសូមព្រះអម្ចាស់ប្រកបដោយការអធិស្ឋានដើម្បីជួយអ្នក រួចហើយប្រឹក្សាជាមួយនឹងប្រធានស្តេករបស់អ្នក ព្រមទាំងថ្នាក់ដឹកនាំបេសកកម្មផ្នែកសេវាកម្មរបស់អ្នក ប្រសិនបើចាំបាច់ ។
យើងសូមអធិស្ឋានថា អ្នកនឹងរកឃើញសេចក្ដីសុខសាន្ត និងអំណរពិត ក្នុងនាមជាអ្នកផ្សព្វផ្សាយសាសនាផ្នែកសេវាកម្មដើម្បីបម្រើព្រះអម្ចាស់ព្រះយេស៊ូវគ្រីស្ទ និងបុត្រាបុត្រីរបស់ព្រះវរបិតាសួគ៌ ។
ដោយសេចក្ដីស្រឡាញ់ និងអរគុណ
គណៈប្រធានទីមួយ និងកូរ៉ុមនៃពួកសាវកដប់ពីរនាក់
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ