« ៣. អាកប្បកិរិយារបស់អ្នកផ្សព្វផ្សាយសាសនា » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—បេសកកម្មផ្នែកសេវាកម្ម ( ឆ្នាំ ២០២១ )

« ៣. អាកប្បកិរិយារបស់អ្នកផ្សព្វផ្សាយសាសនា » បទដ្ឋានអ្នកផ្សព្វផ្សាយសាសនាសម្រាប់សិស្សរបស់ព្រះយេស៊ូវគ្រីស្ទ—បេសកកម្មផ្នែកសេវាកម្ម

រូបភាព

គ្រប់ជង្គង់នឹងលុតចុះ ដោយ ជេ ខឺក រីឆាត

៣

អាកប្បកិរិយារបស់អ្នកផ្សព្វផ្សាយសាសនា

៣.០

សេចក្តីផ្តើម

វគ្គនេះពិពណ៌នាអំពីបទដ្ឋានអ្នកផ្សព្វផ្សាយសាសនាស្ដីពីបុគ្គលិកលក្ខណៈ និងគុណសម្បត្តិដូចជាព្រះគ្រីស្ទ ។ អ្នកត្រូវបានរំពឹងឲ្យអនុវត្ត និងអភិវឌ្ឍបទដ្ឋាន និងគុណសម្បត្តិទាំងនេះ ពេលអ្នកក្លាយជាសិស្សដែលកាន់តែលះបង់របស់ព្រះយេស៊ូវគ្រីស្ទ ។ ដូចជាព្យាការីមរ៉ូណៃ បានប្រឹក្សាថា « នឹកចាំពីព្រះបន្ទូលនៃព្រះដែលចែងថា ដោយកិច្ចការរបស់គេ នោះអ្នករាល់គ្នានឹងស្គាល់ពួកគេហើយ ដ្បិតបើសិនជាកិច្ចការរបស់គេល្អ នោះពួកគេក៏ជាមនុស្សល្អដែរ » ( មរ៉ូណៃ ៧:៥ ) ។

៣.១

បុគ្គលិកលក្ខណៈដូចជាព្រះគ្រីស្ទ

សូមអធិស្ឋាន និងខិតខំដើម្បីអភិវឌ្ឍចរិតលក្ខណៈ ឬគុណលក្ខណៈដូចជាព្រះគ្រីស្ទ ដូចបានពិពណ៌នានៅក្នុងបទគម្ពីរ និងនៅក្នុងការបង្រៀនរបស់ពួកព្យាការីនៅរស់ ។ គុណលក្ខណៈទាំងនេះរួមមាន ការដឹងគុណ សេចក្ដីសប្បុរស សេចក្ដីស្រឡាញ់ សេចក្ដីរាបសា សេចក្ដីអត់ធ្មត់ សេចក្ដីអាណិតអាសូរ និងការគោរពប្រតិបត្តិ ។ ដោយមានជំនួយរបស់ព្រះអម្ចាស់ ព្រមទាំងកិច្ចប្រឹងប្រែងដ៏ស្មោះសរ និងឧស្សាហ៍ព្យាយាមរបស់អ្នកផ្ទាល់ នោះអ្នកអាចអភិវឌ្ឍគុណលក្ខណៈដូចជាព្រះគ្រីស្ទបាន ( សូមមើល ម៉ូសាយ ៣:១៩ ) ។

ចូរមានចិត្តល្អ វិជ្ជមាន និងលើកស្ទួយ ។ ចូរមានការគិតគូរអំពីស្ថានភាពរបស់មនុស្សម្នាក់ៗ ៖ អ្នកជាភ្ញៀវម្នាក់នៅក្នុងទីតាំងដែលអ្នកបម្រើ ហើយគួរតែប្រព្រឹត្តចំពោះមនុស្ស និងទីកន្លែងដោយការគោរព និងអំណរគុណ ។

ខណៈកំពុងបម្រើនៅក្នុងសហគមន៍ សូមគោរពប្រពៃណី ជំនឿសាសនា និងការអនុវត្តរបស់មនុស្សដទៃនៅគ្រប់ពេលជានិច្ច ។ ចៀសវាងធ្វើឲ្យមនុស្សដទៃអាក់អន់ចិត្ត ។ ចូរចងចាំថា អ្វីដែលអ្នកនិយាយ និងអ្វីដែលអ្នកធ្វើអំឡុងការចាត់តាំងនៃការបម្រើរបស់អ្នកអាចត្រូវបានស្ដាប់ឮ សង្កេត និងកត់ត្រាទុក ។ នៅពេលអ្នកបម្រើ អ្នកគឺជាអ្នកតំណាងរបស់ព្រះយេស៊ូវគ្រីស្ទ និងសាសនាចក្រដែលបានស្ដារឡើងវិញរបស់ទ្រង់ ។

៣.២

ភាពស័ក្ដិសមសម្រាប់ព្រះវិហារបរិសុទ្ធ

ពួកអ្នកផ្សព្វផ្សាយសាសនាចាំបាច់ត្រូវមានស័ក្ដិសមដើម្បីចូលព្រះវិហារបរិសុទ្ធពេញមួយបេសកកម្មរបស់ពួកគេ ។

ព្រះអម្ចាស់ព្រះយេស៊ូវគ្រីស្ទអញ្ជើញអ្នកឲ្យ « រៀបចំខ្លួន ហើយប្រុងប្រៀបខ្លួន ហើយញែកខ្លួនជាបរិសុទ្ធ មែនហើយ ចូរជម្រះចិត្តរបស់អ្នកឲ្យបានបរិសុទ្ធ ហើយលាងដៃរបស់អ្នក និងជើងរបស់អ្នកនៅចំពោះយើងចុះ ប្រយោជន៍ឲ្យយើងអាចធ្វើឲ្យអ្នកបានជ្រះស្អាត » ( គោលលទ្ធិ និង សេចក្ដីសញ្ញា ៨៨:៧៤ ) ។ ផ្នែកនៃការរៀបចំនេះ រួមមានការរក្សាសេចក្ដីសញ្ញាព្រះវិហារបរិសុទ្ធរបស់អ្នក ប្រសិនបើអ្នកបានទទួលអំណោយទានពិសិដ្ឋរបស់អ្នកក្នុងព្រះវិហារបរិសុទ្ធ ។

៣.២.១

សេចក្ដីសញ្ញាក្នុងព្រះវិហារបរិសុទ្ធ ( ប្រសិនបើបានទទួលអំណោយទានពិសិដ្ឋ )

ការរក្សាសេចក្ដីសញ្ញាព្រះវិហារបរិសុទ្ធនៃការគោរពប្រតិបត្តិ ការលះបង់ និងការថ្វាយនឹងផ្ដល់អំណាចដល់អ្នក និងជួយអ្នកឲ្យក្លាយកាន់តែដូចជាព្រះអង្គសង្គ្រោះ ។

ទោះបីជាគ្មានព្រះវិហារបរិសុទ្ធមួយនៅក្នុងតំបន់ផ្សព្វផ្សាយសាសនាផ្នែកសេវាកម្មរបស់អ្នកក្ដី សូមបន្តមានភាពស័ក្ដិសមចូលព្រះវិហារបរិសុទ្ធ ។ សូមសួរដល់ប៊ីស្សព និងប្រធានស្តេករបស់អ្នកសម្រាប់ការសម្ភាសន៍ដើម្បីទទួលបានប័ណ្ណចូលព្រះវិហារបរិសុទ្ធមួយ ពីមុនប័ណ្ណបច្ចុប្បន្នរបស់អ្នកផុតកំណត់ ។

ការស្លៀកសម្លៀកបំពាក់បរិសុទ្ធ គឺជាអភ័យឯកសិទ្ធិដ៏ពិសិដ្ឋ នៃជនទំាងឡាយណាដែលបានធ្វើសេចក្ដីសញ្ញានៃអំណោយទានពិសិដ្ឋ ។ ចូរឲ្យព្រះវិញ្ញាណដឹកនាំអ្នកដើម្បីពង្រឹងការតាំងចិត្តផ្ទាល់ខ្លួនរបស់អ្នកដើម្បីស្លៀកសម្លៀកបំពាក់បរិសុទ្ធ ។

៣.២.២

ការថ្វាយបង្គំនៅព្រះវិហារបរិសុទ្ធ

ប្រសិនបើមានព្រះវិហារបរិសុទ្ធនៅជិត អ្នកត្រូវបានលើកទឹកចិត្តឲ្យចូលរួមក្នុងព្រះវិហារបរិសុទ្ធពេញមួយបេសកកម្មរបស់អ្នក ។ ការចូលរួមនេះក៏អាចជាឱកាសបម្រើមួយដែលបានចាត់តាំងដល់អ្នកផងដែរ ។

ការចូលរួមក្នុងព្រះវិហារបរិសុទ្ធមិនគួររំខានដល់ការចាត់តាំងផ្សេងទៀតរបស់អ្នកនោះទេ ។ ពេលអ្នកកំពុងបម្រើនៅក្នុងព្រះវិហារបរិសុទ្ធ សូមបំពេញការចាត់តាំងរបស់អ្នកដោយសេចក្ដីទៀងត្រង់ ការគោរព និងគារវភាព ។ នៅពេលអ្នកចូលរួមក្នុងព្រះវិហារបរិសុទ្ធ សូមចងចាំពីចំណុចដូចតទៅនេះ ៖

ប្រសិនបើអ្នកត្រូវបានហៅដោយគណៈប្រធានព្រះវិហារបរិសុទ្ធដើម្បីបម្រើជាអ្នកធ្វើពិធីបរិសុទ្ធ អ្នកនឹងបម្រើនៅក្នុងព្រះវិហារបរិសុទ្ធតាមការដឹកនាំរបស់ពួកគាត់ ។
កុំយកម៉ាស៊ីនថតរូប ទូរសព្ទដៃ ឬឯកសារអំណាន ( ព្រមទាំងពររបស់លោកអយ្យកោ ) ទៅប្រើនៅក្នុងព្រះវិហារបរិសុទ្ធឡើយ ។
កុំផ្ដុំគ្នាជាក្រុមអ្នកផ្សព្វផ្សាយសាសនា ឬលុតជង្គង់អធិស្ឋាននៅក្នុងបន្ទប់សេឡេស្ទាលឡើយ ។
តាមរយៈយកឈ្មោះគ្រួសារទៅកាន់ព្រះវិហារបរិសុទ្ធ អ្នកអាចជួយប្រមូលផ្ដុំអ៊ីស្រាអែលនៅផ្នែកម្ខាងទៀតនៃវាំងនន ហើយពង្រីកបទពិសោធន៍ព្រះវិហារបរិសុទ្ធរបស់អ្នក ។

៣.៣

ច្បាប់ព្រហ្មចារីភាព

ផ្នែកសំខាន់មួយនៃការមានភាពស័ក្តិសមដើម្បីទៅព្រះវិហារបរិសុទ្ធគឺត្រូវគោរពតាមច្បាប់ព្រហ្មចារីភាព ។ សូមធ្វើឲ្យអស់ពីសមត្ថភាពដើម្បីការពារខ្លួនអ្នកពីការល្បួងខាងផ្លូវភេទដែលអាចនាំទៅកាន់ការបំពានសេចក្ដីសញ្ញាដ៏ពិសិដ្ឋរបស់អ្នក ។ ការធ្វើអ្វីៗដែលបំពានច្បាប់ព្រហ្មចារីយភាព អាចត្រូវបានចាត់ទុកថាជាបទឧក្រិដ្ឋនៅក្នុងតំបន់ខ្លះ ។

សូមចៀសវាងពីគំនិត ឬទង្វើណាដែលនឹងបំបែកអ្នកពីព្រះវិញ្ញាណ ។ ការណ៍នេះរួមមានចំណុចជាច្រើន ប៉ុន្តែមិនកំណត់តែទៅលើការផិតក្បត់ សហាយស្មន់ សកម្មភាពប្រតិព័ទ្ធភេទដូចគ្នា រួមភេទតាមមាត់ ដាស់អារម្មណ៍ផ្លូវភេទ ការប៉ះពាល់ដែលមិនសមរម្យ ការផ្ញើ ឬទទួលសារ រូបភាព ឬវីដេអូ ដែលមានលក្ខណៈអសីលធម៌ ឬដែលទាក់ទងនឹងផ្លូវភេទ ការសម្រេចកាមដោយខ្លួនឯង និងការមើល ឬប្រើប្រាស់ការណ៍អាសគ្រាមនោះទេ ។ សម្រាប់ព័ត៌មានបន្ថែម សូមមើល ដើម្បីកម្លាំងនៃយុវជន ( កូនសៀវភៅឆ្នាំ ២០១១ ) « ការប្រែចិត្ត » ទំព័រ ២៨–២៩ ។

ប្រសិនបើអ្នកកំពុងមានការលំបាកក្នុងការរក្សាបទដ្ឋានទាំងនេះ សូមទូលសុំជំនួយពីព្រះអម្ចាស់ ហើយជូបជាមួយនឹងប្រធានស្តេករបស់អ្នកភ្លាមៗ ។

៣.៣.១

ការចៀសវាងពីរូបភាពអាសគ្រាម

រូបអាសគ្រាមមានទម្រង់ជាច្រើន ។ ការដាក់ផែនការទុកជាមុន និងការធ្វើការជ្រើសរើសសុចរិតអាចជួយអ្នកឲ្យចៀសវាងរូបភាពអាសគ្រាមបាន ។ បើអ្នកឃើញរូបអាសគ្រាម សូមងាកចេញ បិទឧបករណ៍ ឬចាកចេញពីស្ថានភាពនោះ ។

សូមប្រើយោបល់ខាងក្រោមដើម្បីជួយអ្នកចៀសវាងពីរូបភាពអាសគ្រាម ៖

ចៀសវាងពីវិបសាយ សម្ភារ និងទីតាំងដែលអ្នកទំនងជាស្ដាប់ឮ អាន ឬមើលឃើញសម្ភារដែលបានណែនាំ ឬរូបភាពអាសគ្រាម ។
រៀនស្គាល់ពីពេលដែលអ្នកមានការល្បួងបំផុតក្នុងការប្រើបច្ចេកវិទ្យាដោយពុំសមរម្យ ដូចជាពេលអ្នកនឿយហត់ ឬពេលអផ្សុក ។
មានផែនការមួយដើម្បីធ្វើអ្វីជំនួសវិញនៅពេលនោះ ។ អ្នកដឹកនាំបេសកកម្មផ្នែកសេវាកម្មរបស់អ្នកអាចជួយបាន ។ អ្នកក៏អាចស្វែងរកព័ត៌មាននៅលើគេហទំព័រ ChurchofJesusChrist.org/addressing-pornography បានផងដែរ ។

នរណាម្នាក់ដែលខិតខំចៀសវាង ឬយកឈ្នះរូបភាពអាសគ្រាមអាចស្វែងរកជំនួយ និងការព្យាបាលតាមរយៈដង្វាយធួនរបស់ព្រះយេស៊ូវគ្រីស្ទ ។ ប្រសិនបើអ្នកមានភាពស្មុគស្មាញ សូមជួបជាមួយនឹងប្រធានស្តេករបស់អ្នក ដែលគាត់គួរតែផ្ដល់ការប្រឹក្សា និងការគាំទ្រដ៏ប្រកបដោយសេចក្ដីស្រឡាញ់ ។

៣.៤

សេចក្តីទៀងត្រង់

យើងត្រូវបានបង្គាប់ឲ្យមានភាពស្មោះត្រង់ ។ ភាពស័ក្ដិសមសម្រាប់ព្រះវិហារបរិសុទ្ធ រួមមានការស្មោះត្រង់នៅក្នុងគ្រប់ទំនាក់ទំនងទាំងអស់របស់អ្នកជាមួយមនុស្សដទៃទៀត ។ ការមានភាពស្មោះត្រង់ រួមមាន ៖

ការប្រាប់ការពិត ជាពិសេសចំពោះប្រធានបេសកកម្មផ្នែកសេវាកម្មរបស់អ្នក និងប្រធានស្តេករបស់អ្នក ទាក់ទងទៅនឹងការប្រព្រឹត្តិរបស់អ្នក ទីបន្ទាល់ ទម្លាប់ការងារ និងសុខភាពផ្លូវចិត្ត និងផ្លូវកាយរបស់អ្នក ។
ការផ្ដល់របាយការណ៍ត្រឹមត្រូវអំពីការបម្រើរបស់អ្នក និងរបៀបដែលអ្នកបានចំណាយពេលក្នុងអំឡុងសប្ដាហ៍នោះ ។
ធ្វើជាមនុស្សដែលគួរឲ្យទុកចិត្ត និងមិនដែលផ្ដល់ការរាយការណ៍ ឬព័ត៌មានក្លែងក្លាយ អំពីមនុស្សណាម្នាក់ ឬពីកិច្ចការបម្រើរបស់អ្នកឡើយ ។
គោរពអ្នកដទៃដោយការមិនខ្ចី មិនយក ឬការប្រើប្រាស់របស់របរផ្ទាល់ខ្លួនរបស់នរណាម្នាក់ ( ដូចជា សម្លៀកបំពាក់ សៀវភៅ ឧបករណ៍អេឡិចត្រូនិក និងគ្រឿងអលង្ការ ) ដោយគ្មានការអនុញ្ញាតឡើយ ។

៣.៥

ការប្រាស្រ័យទាក់ទងជាមួយមនុស្សដទៃទៀត

ព្រះអង្គសង្គ្រោះបានបង្រៀនថា « នេះជាសេចក្តីបញ្ញត្តិរបស់ខ្ញុំ គឺឲ្យអ្នករាល់គ្នាស្រឡាញ់ដល់គ្នាទៅវិញទៅមក ដូចជាខ្ញុំបានស្រឡាញ់អ្នករាល់គ្នាដែរ » ( យ៉ូហាន ១៥:១២ ) ។ សូមជ្រើសរើសធ្វើតាមគំរូរបស់ព្រះអង្គសង្គ្រោះ និងប្រព្រឹត្តដោយគួរសម មានសុវត្ថិភាព និងសមរម្យសម្រាប់ស្ថានភាពនោះ ។

៣.៥.១

បទដ្ឋានទូទៅសម្រាប់ការប្រាស្រ័យទាក់ទងជាមួយគ្រួសារ និងមិត្តភក្តិ

សូមធ្វើជាកម្លាំង និងជាគំរូល្អដល់គ្រួសារ និងមិត្តភក្តិរបស់អ្នក ។ ចែកចាយដំណើររឿងបំផុសគំនិតចេញពីបទពិសោធន៍បេសកកម្មរបស់អ្នក ។

សមាជិកគ្រួសារអាចត្រូវជួយអ្នកផ្នែកតម្រូវការខាងសាច់ឈាម ជាមួយការធ្វើដំណើរ ឬរបៀបផ្សេងទៀតសម្រាប់អ្នកដើម្បីបម្រើដោយជោគជ័យ ។ ជីវិតគ្រួសារនឹងមានការផ្លាស់ប្តូរនៅអំឡុងការផ្សព្វផ្សាយសាសនាផ្នែកសេវាកម្មរបស់អ្នក ។ អ្នក និងគ្រួសាររបស់អ្នកនឹងត្រូវធ្វើការពលិកម្មមួយចំនួនដើម្បីធានាឲ្យបានថាអ្នកមានបទពិសោធន៍បេសកកម្មប្រកបដោយអត្ថន័យ និងផលិតភាពបំផុតអស់ពីលទ្ធភាព ។

៣.៥.២

បទដ្ឋានទូទៅសម្រាប់ការប្រាស្រ័យទាក់ទងជាមួយមជ្ឈិមវ័យ

សូមបង្កើតទំនាក់ទំនងដែលមានការទុកចិត្តគ្នា និងមានអត្ថន័យជាមួយមនុស្សដែលអ្នកបម្រើ ។ ត្រូវមានវិជ្ជាជីវៈ និងសណ្តានចិត្តល្អ ។ សូមគោរពតាមបទដ្ឋានដូចខាងក្រោម ៖

ចៀសវាងស្ថានភាពទាំងឡាយដែលអាចប្រែជាមានគ្រោះថ្នាក់ខាងរាងកាយ និងខាងវិញ្ញាណ ឬដែលអាចធ្វើឲ្យយល់ខុស ។
កុំចែចង់ ឬមានទំនាក់ទំនងដោយមិនសមរម្យជាមួយនរណាម្នាក់ឡើយ ។
រក្សាភាសារបស់អ្នកឲ្យថ្លៃថ្នូរ ។ សូមចៀងវាងពីការប្រើប្រាស់ក្រៀមភាសា ។ ប្រើងារត្រឹមត្រូវពេលហៅមនុស្សផ្សេងទៀត ។ ឧទាហរណ៍ សូមប្រើងារ « អែលឌើរ » ឬ « ស៊ីស្ទើរ » ពេលសំដៅដល់អ្នកផ្សព្វផ្សាយសាសនាផ្នែកសេវាកម្ម និងអ្នកដឹកនាំបេសកកម្មផ្នែកសេវាកម្មផ្សេងទៀត ដើម្បីបង្ហាញការគោរពដល់ការហៅរបស់ពួកគាត់ ។

៣.៥.៣

បទដ្ឋានទូទៅសម្រាប់ការប្រាស្រ័យទាក់ទងជាមួយកុមារ និងមជ្ឈិមវ័យដែលងាយរងគ្រោះ

ដើម្បីជាសុវត្ថិភាពរបស់អ្នក ក៏ដូចជាសុវត្ថិភាពរបស់កុមារ និងមជ្ឈិមវ័យដែលងាយរងគ្រោះផងដែរ សូមគោរពតាមបទដ្ឋានដូចខាងក្រោមនេះឲ្យបានតឹងរឹងនៅពេលធ្វើការជាមួយក្រុមទាំងនេះ ៖

សូមកុំនៅជាមួយកុមារ ឬមជ្ឈិមវ័យងាយរងគ្រោះតែម្នាក់ឯងទោះស្ថិតក្រោមកាលៈទេសៈណាក៏ដោយ ។
សូមកុំមើលថែកូនក្មេង ស្លៀកពាក់ឲ្យពួកគេ ឲ្យពួកគេលេបថ្នាំ ឬមើលថែអនាម័យផ្ទាល់ខ្លួនរបស់ពួកគេឡើយ ។
បម្រើពួកគេតែពេលណាដែលមានមជ្ឈិមវ័យដែលមានទំនួលខុសត្រូវម្នាក់ទៀតមានវត្តមានតែប៉ុណ្ណោះ ។ សូមធ្វើតាមពិធីការសុវត្ថិភាពរបស់សាសនាចក្រ ឬអង្គការសប្បុរសធម៌ដែលអ្នកកំពុងបម្រើ ។
ប្រសិនបើអ្នកនឹងធ្វើការជាមួយពួកគេនៅក្នុងអង្គការសប្បុរសធម៌ ដំបូងអ្នកត្រូវបំពេញការពិនិត្យមើលជីវៈប្រវត្តិឲ្យសព្វគ្រប់សិន ។

មជ្ឈិមវ័យដែលងាយរងគ្រោះ គឺជាបុគ្គលដែលមានពិការភាពផ្លូវចិត្ត ឬផ្លូវកាយ ដែលជះឥទ្ធិពលយ៉ាងខ្លាំងដល់សមត្ថភាពរបស់ពួកគេក្នុងការយល់ដឹងអំពីស្ថានភាព និងការពារខ្លួនពីការរំលោភបំពាន ការធ្វេសប្រហែស ឬការកេងប្រវ័ញ្ច ។ មជ្ឈិមវ័យដែលងាយរងគ្រោះ ក៏អនុវត្តចំពោះជនភៀសខ្លួន ដែលប្រហែលជាមិនយល់ពីភាពខុសគ្នានៃភាសា ឬវប្បធម៌ផងដែរ ។

៣.៥.៤

បទដ្ឋានទូទៅសម្រាប់ការប្រាស្រ័យទាក់ទងជាមួយពួកអ្នកផ្សព្វផ្សាយសាសនាផ្នែកបង្រៀន

ក្នុងនាមជាសមាជិកសាសនាចក្រ អ្នកអាចទៅបង្រៀនសួរសុខទុក្ខជាមួយពួកអ្នកផ្សព្វផ្សាយសាសនាផ្នែកបង្រៀន ។ អ្នកពុំគួរណែនាំខ្លួនជាអ្នកផ្សព្វផ្សាយសាសនាផ្នែកបង្រៀនឡើយ ។ សូមកុំពាក់ស្លាកឈ្មោះអ្នកផ្សព្វផ្សាយសាសនាផ្នែកសេវាកម្មរបស់អ្នកនៅពេលចុះបង្រៀនសួរសុខទុក្ខឡើយ ។ អ្នកមិនគួរចូលរួមជាមួយពួកអ្នកផ្សព្វផ្សាយសាសនាផ្នែកបង្រៀនក្នុងសន្និសីទមណ្ឌល ឬហ្សូនឡើយ លើកលែងតែប្រធានបេសកកម្មអញ្ជើញអ្នកប៉ុណ្ណោះ ។

៣.៥.៥

ការណាត់ដើរលេងជាគូ

អ្នកក៏មិនអាចណាត់ដើរលេងជាគូក្នុងនាមជាអ្នកផ្សព្វផ្សាយសាសនាដែរ ។ អ្នកត្រូវបានលើកទឹកចិត្តឲ្យចូលរួមនៅក្នុងវួដ និងសកម្មភាព យ.ម.ល. ប៉ុន្តែអ្នកមិនគួរចូលរួមនៅក្នុងការរាំរែកនោះទេ ។ អ្នកត្រូវតែប្រយ័ត្នប្រយែងក្នុងការចូលរួមសកម្មភាពណាដែលអាចទំនងជាមើលទៅថាជាការណាត់ដើរលេងជាគូ ។

៣.៥.៦

ការពាក់ស្លាកឈ្មោះអ្នកផ្សព្វផ្សាយសាសនា

វាគឺជាកិត្តិយស និងជាអភ័យឯកសិទ្ធិដើម្បីពាក់ស្លាកឈ្មោះអ្នកផ្សព្វផ្សាយសាសនា ។ សូមពាក់ស្លាសឈ្មោះជានិច្ចខណៈដែលអ្នកធ្វើដំណើរទៅ ឬមកពីបំពេញកិច្ចការជាផ្សព្វផ្សាយសាសនារបស់អ្នកវិញ ពេលកំពុងបំពេញកិច្ចការផ្សព្វផ្សាយសាសនារបស់អ្នក និងនៅក្នុងការប្រជុំរបស់សាសនាចក្រនានា ។

កិច្ចការអ្នកផ្សព្វផ្សាយសាសនារួមមានការប្រជុំ និងសន្និសីទអ្នកផ្សព្វផ្សាយសាសនា ម៉ោងបម្រើគ្រួសាររបស់អ្នក និងកិច្ចការសាសនាចក្រ និងសប្បុរសធម៌ដែលធ្វើនៅឯគេហដ្ឋាន ។ ប្រសិនបើអ្នកមានសំណួរណាមួយអំពីពេលវេលាដែលត្រូវពាក់ស្លាកឈ្មោះអ្នកផ្សព្វផ្សាយសាសនារបស់អ្នក សូមសួរទៅកាន់អ្នកដឹកនាំបេសកកម្មផ្នែកសេវាកម្មរបស់អ្នក ។

៣.៥.៧

ការរស់នៅក្នុងផ្ទះ

នៅក្នុងការហៅរបស់អ្នក អ្នកត្រូវបានចាត់ឲ្យធ្វើការជាអ្នកផ្សព្វផ្សាយសាសនាផ្នែកការបម្រើនៅក្នុងសហគមន៍ក្នុងមូលដ្ឋានរបស់អ្នក ដោយផ្តល់ការងារបម្រើដូចជាព្រះគ្រីស្ទខណៈពេលកំពុងរស់នៅឯគេហដ្ឋាន ។

៣.៥.៨

ការងារ និងការសិក្សា

ការងារ និងការសិក្សា—ទោះជាការងារពេញម៉ោង ឬក្រៅម៉ោងក្តី—គឺមិនមែនជាផ្នែកមួយនៃបេសកកម្មផ្នែកសេវាកម្មឡើយ ។ អ្នកគួរលះបង់ពេលវេលា ទេព្យកោសល្យ កម្លាំង និងធនធានហិរញ្ញវត្ថុរបស់អ្នកដើម្បីបេសកកម្មរបស់អ្នក ។ នេះគឺជាផ្នែកមួយនៃក្រឹត្យវិន័យនៃការថ្វាយ ។

អ្នកអាចចុះឈ្មោះរៀននៅថ្នាក់វិទ្យាស្ថាន និង PathwayConnect ប្រសិនបើមានបំណង ។

៣.៥.៩

គោលការណ៍ណែនាំស្ដីពីសុវត្ថិភាពសម្រាប់ធ្វើសកម្មភាពនានា

គោលការណ៍ណែនាំស្ដីពីសុវត្ថិភាពសម្រាប់ធ្វើសកម្មភាពនានាអនុវត្តចំពោះយុវមជ្ឈិមវ័យដែលមានន័យថាគោលការណ៍ណែនាំនេះអនុវត្តចំពោះអ្នកក្នុងនាមជាអ្នកផ្សព្វផ្សាយសាសនាផ្នែកសេវាកម្មផងដែរ ។ ការធ្វើសកម្មភាពដែលត្រូវដេកយប់ ការទៅព្រះវិហារបរិសុទ្ធក្រៅមណ្ឌលព្រះវិហារបរិសុទ្ធដែលបានចាត់តាំងដល់អ្នក និងការធ្វើដំណើរផ្លូវឆ្ងាយគឺត្រូវហាមឃាត់ ។ សកម្មភាពទាំងនេះតម្រូវឲ្យអ្នកដឹកនាំបេសកកម្មផ្នែកសេវាកម្មរបស់អ្នកដាក់ផែនការជាមុន ហើយស្វែងរកការអនុម័តពីអ្នកដឹកនាំបព្វជិតភាពដែលបានកំណត់ ។ ឪពុកម្តាយ ឬអាណាព្យាបាលរបស់អ្នកអាចត្រូវបំពេញបែបបទផ្តល់ការអនុញ្ញាត និងសំបុត្រពេទ្យដើម្បីឲ្យអ្នកចូលរួម ។

៣.៦

ដំណើរកម្សាន្ត និងកម្មវិធីកម្សាន្ត

ជ្រើសរើសសកម្មភាពដែលលើកស្ទួយ និងជួយឲ្យអ្នកបន្ធូរអារម្មណ៍ ។ ក្នុងការប្រឹក្សាជាមួយអ្នកជំនាញផ្នែកថែទាំសុខភាព ការធ្វើលំហាត់ប្រាណ និងសកម្មដើម្បីរក្សារាងកាយ និងចិត្តគំនិតរបស់អ្នកឲ្យសមនឹងការបម្រើ ។ សូមជៀសវាងពីសកម្មភាពកម្សាន្តដែលនាំឲ្យមានរបួស និងនឿយហត់ខ្លាំង ។

៣.៦.១

ហ្គេម ភាពយន្ត និងទូរទស្សន៍

សកម្មភាពអំឡុងពេលម៉ោងដែលអ្នកមិនស្ថិតក្នុងការងារបម្រើរបស់អ្នក ដូចជា កម្មវិធីវីដេអូហ្គេម ភាពយន្ត និងទូរទស្សន៍ដែលសមរម្យគឺអាចទទួលយកបានដោយមានការអនុម័តពីប្រធានស្តេក និងអ្នកដឹកនាំ បេសកកម្មផ្នែកសេវាកម្មរបស់អ្នក ។

សកម្មភាពបែបនោះគឺមិនគួរប៉ះពាល់នឹងការរៀបចំផ្ទាល់ខ្លួន ការសិក្សា ឬម៉ោងបម្រើផ្ទាល់ខ្លួនរបស់អ្នកឡើយ ។ សូមជៀសវាងអ្វីៗដែលបង្អាក់ដល់ព្រះវិញ្ញាណ ។ សូមប្រើការវិនិច្ឆ័យត្រឹមត្រូវនៅក្នុងការពាក់ស្លាកឈ្មោះរបស់អ្នកនៅអំឡុងសកម្មភាព ប្រភេទនេះ ។

៣.៦.២

វត្តមានថ្នាក់សិក្ខាសាលា និងថ្នាក់វិទ្យាស្ថានវួដ

នៅក្នុងអំឡុងពេលនៃការបម្រើរបស់អ្នកក្នុងនាមជាអ្នកផ្សព្វផ្សាយសាសនា កំណត់ត្រាសមាជិកភាពរបស់អ្នកគួរតែនៅតែមាននៅក្នុងវួដកំណើតរបស់អ្នកដដែល ។ នៅកន្លែងដែលមានការអនុញ្ញាត អ្នកអាចចូលរួមក្នុងវួដមជ្ឈិមវ័យនៅលីវក្នុងតំបន់របស់អ្នកបាន ។

អ្នកត្រូវបានលើកទឹកចិត្តឲ្យចូលរួមនៅក្នុងថ្នាក់វិទ្យាស្ថាន និងសកម្មភាពនានា ។ អ្នកក៏អាចចូលរួមក្នុងសកម្មភាពមជ្ឈិមវ័យនៅលីវ ដែលឧបត្ថម្ភដោយវួដ ឬស្តេករបស់អ្នក ដូចជា សកម្មភាពរាត្រីជួបជុំក្រុមគ្រួសារ ដំណើរទៅព្រះវិហារបរិសុទ្ធ ការប្រជុំធម្មនិដ្ឋាន ហ្គេម និងអាហារពិនីក ប៉ុន្តែមិនរាប់បញ្ចូលការរាំរែកឡើយ ។

៣.៦.៣

សកម្មភាពវប្បធម៌ និងការកម្សាន្ត

សូមចងចាំថា អ្នកគឺជាអ្នកផ្សព្វផ្សាយសាសនា ។ សកម្មភាពរបស់អ្នកគួរតែត្រឹមត្រូវ លើកស្ទួយ និងស្របតាមបទដ្ឋាននៃសៀវភៅក្បួនខ្នាតនេះជានិច្ច ។

ចូរមានសុវត្ថិភាព និងប្រើសុភវិនិច្ឆ័យជានិច្ច នៅពេលចូលរួមនៅក្នុងសកម្មភាពកម្សាន្តនានា ។ អំឡុងបេសកកម្មរបស់អ្នក អ្នកមិនគួរចូលរួមនៅក្នុងសកម្មភាពណាដែលទាក់ទងនឹងហានិភ័យខ្ពស់នោះទេ ។

អ្នកអាចរៀបចំ ឬចូលរួមក្នុងការជួបជុំក្នុងសង្គមជាមួយនឹងអ្នកផ្សព្វផ្សាយសាសនាផ្នែកសេវាកម្មផ្សេងទៀត នៅពេលអ្នកមិនស្ថិតក្នុងកិច្ចការបម្រើរបស់អ្នក ។ ទោះជាយ៉ាងណាក៏ដោយ សកម្មភាពទាំងនេះគួរតែធ្វើតាមបទដ្ឋានរបស់អ្នកផ្សព្វផ្សាយសាសនាផ្នែកសេវាកម្ម ហើយមិនគួរធ្វើឡើងពេញមួយយប់នោះទេ ។

អ្នកអាចទៅវិស្សមកាលជាមួយគ្រួសារដោយមានការជូនដំណឹងជាមុនទៅកាន់ថ្នាក់ដឹកនាំបេសកកម្មផ្នែកសេវាកម្មរបស់អ្នក និងអ្នកគ្រប់គ្រងប្រតិបត្តិការរបស់អ្នក ។ សូមបង្កើតផែនការជាមួយថ្នាក់ដឹកនាំបេសកកម្មផ្នែកសេវាកម្មរបស់អ្នក ដើម្បីបង្កើនបទពិសោធន៍បេសកកម្មរបស់អ្នកខណៈពេលទៅវិស្សមកាល ។

៣.៦.៤

តន្ត្រី

សូមស្តាប់តន្រ្តីដែលសមស្របនឹងការហៅដ៏ពិសិដ្ឋរបស់អ្នក ។ តន្រ្តីគួរយាងអញ្ជើញព្រះវិញ្ញាណ ជួយអ្នកផ្តោតលើកិច្ចការ និងដឹកនាំគំនិត និងអារម្មណ៍របស់អ្នកទៅរកព្រះអង្គសង្រ្គោះ ។

សូមកុំស្តាប់តន្រ្តីណាដែលលើកទឹកចិត្តដល់អំពើអសីលធម៌ ឬលើកតម្កើងអំពើហិង្សា ប្រើភាសាដែលនាំឲ្យខឹងសម្បារ ឬធ្វើឲ្យអាប់ប្រាជ្ញាខាងវិញ្ញាណរបស់អ្នកតាមរយៈចង្វាក់ភ្លេង ឧបករណ៍ កម្លាំងសំឡេង ទំនុក ឬប្រពលភាពរបស់តន្រ្តី ។

៣.៦.៥

ឧបករណ៍អេឡិចត្រូនិក និងកុំព្យូទ័រ

រាល់ការប្រើប្រាស់ឧបករណ៍អេឡិចត្រូនិក និងប្រព័ន្ធផ្សព្វផ្សាយ រួមទាំងទូរសព្ទដៃ និងកុំព្យូទ័រផងដែរ គួរតែសមស្របតាមគោលការណ៍នៃដំណឹងល្អ ។ ការប្រើប្រាស់គ្រឿងអេឡិចត្រូនិកតាមមធ្យោបាយណាមួយមិនគួរបង្អាក់ដល់ស្មារតី និងការហៅបេសកកម្មរបស់អ្នកឡើយ ។

សូមជៀសវាងរាល់អ្វីៗដែលប្រមាថ អសីលធម៌ ហិង្សា ឬអាសអាភាស ។ សូមកុំប្រើទូរសព្ទដៃរបស់អ្នកអំឡុងពេលម៉ោងធ្វើការឡើយ ។

៣.៦.៦

ប្រព័ន្ធផ្សព្វផ្សាយ

ប្រព័ន្ធផ្សព្វផ្សាយសង្គមអាចជាវិធីមួយដ៏មានប្រសិទ្ធភាពដើម្បីចែកចាយពីរបៀបដែលអ្នកកំពុងធ្វើតាមព្រះអង្គសង្គ្រោះក្នុងនាមជាអ្នកផ្សព្វផ្សាយសាសនា ។ សូមចុះផ្សាយអំពីសកម្មភាពដែលមិនមែនជាការផ្សព្វផ្សាយសាសនា ប៉ុន្តែអាចនៅតែឆ្លុះបញ្ចាំងពីសេចក្តីថ្លៃថ្នូរ នៃការហៅបេសកកម្មរបស់អ្នក ។

សូមជ្រើសរើសដោយឈ្លាសវៃ នៅពេលប្រើប្រាស់ប្រព័ន្ធផ្សព្វផ្សាយ ។ អ្វីក៏ដោយដែលអ្នកអាន ស្តាប់ ឬមើលវាជះឥទ្ធិពលមកលើអ្នក ។ ជ្រើសរើសតែប្រព័ន្ធផ្សព្វផ្សាយដែលលើកស្ទួយអ្នកតែប៉ុណ្ណោះ ។

សូមការពារសុវត្ថិភាពរបស់អ្នក និងសុវត្ថិភាពអ្នកដទៃដោយប្រយ័ត្នប្រយែងអំពីព័ត៌មានផ្ទាល់ខ្លួន និងរូបភាពដែលអ្នកចែកចាយតាមរយៈបច្ចេកវិទ្យា ។ សូមកុំប្រើងារ « អែលឌើរ » ឬ « ស៊ីស្ទើរ » នៅក្នុងឈ្មោះគណនីរបស់អ្នកឡើយ ។ សូមកុំទាក់ទងអ្វីមួយតាមអ៊ីនធឺណិត ឬតាមរយៈការផ្ញើសារដែលមិនសមរម្យក្នុងការចែកចាយដោយផ្ទាល់ឡើយ ។ សូមកុំចែកចាយទស្សនៈខាងនយោបាយឡើយ ។ សូមគោរពតាមច្បាប់ដែលគ្រប់គ្រងការចែកចាយតន្ត្រី ភាពយន្ត និងច្បាប់កម្មសិទ្ធិបញ្ញាផ្សេងៗទៀត ។ កុំបញ្ជាក់ថា ការចុះផ្សាយរបស់អ្នកគឺជាការប្រាស្រ័យទាក់ទងជាផ្លូវការរបស់សាសនាចក្រឡើយ ។

ការចំណាយពេលវេលាប្រើប្រាស់អ៊ីនធឺណិត ឧបករណ៍ចល័ត ឬប្រព័ន្ធផ្សព្វផ្សាយផ្សេងៗទៀតច្រើនពេក អាចរាំងស្ទះអ្នកពីកាលវិភាគបេសកកម្មផ្នែកសេវាកម្ម និងភារកិច្ចរបស់អ្នក ។

ប្រសិនបើអ្នកមិនច្បាស់ថាតើអ្វីសមរម្យដើម្បីមើល ឬស្តាប់ សូមជួបជាមួយឪពុកម្ដាយ ប៊ីស្សព ប្រធានស្តេក ឬថ្នាក់ដឹកនាំបេសកកម្មផ្នែកសេវាកម្មរបស់អ្នក ។ ព្រះវិញ្ញាណបរិសុទ្ធនឹងប្រទានកម្លាំងដល់អ្នកដើម្បីធ្វើការជ្រើសរើសត្រឹមត្រូវ ។

៣.៧

ការលើកលែងផ្នែកគោលនយោបាយ

ការលើកលែងណាមួយចំពោះបទដ្ឋានដែលបានពន្យល់នៅក្នុងបទដ្ឋានរបស់អ្នកផ្សព្វផ្សាយសាសនាទាំងនេះ មិនមែនជាការសម្រេចចិត្តតែម្នាក់ឯងរបស់ប្រធានស្តេក ប៊ីស្សព ឪពុកម្តាយ ឬអ្នកដឹកនាំបេសកកម្មផ្នែកសេវាកម្មរបស់អ្នក នោះទេ ។ ប្រសិនបើអ្នកមានអារម្មណ៍ថាការលើកលែងមួយគួរតែលើកយកមកពិចារណា នោះសូមពិភាក្សាជាមួយប្រធានស្តេក និងថ្នាក់ដឹកនាំបេសកកម្មផ្នែកសេវាកម្មរបស់អ្នក ដើម្បីពិភាក្សាអំពីកាលៈទេសៈនេះ ។ បន្ទាប់មកថ្នាក់ដឹកនាំបេសកកម្មផ្នែកសេវាកម្មអាចនិយាយជាមួយការិយាល័យបេសកកម្មផ្នែកសេវាកម្មដើម្បីពិចារណាពីសំណើនេះ ។

៣.៨

ការប្រាស្រ័យទាក់ទងជាមួយថ្នាក់ដឹកនាំបេសកកម្មផ្នែកសេវាកម្ម អ្នកដឹកនាំបព្វជិតភាព និងអ្នកគ្រប់គ្រងទីតាំងផ្នែកសេវាកម្ម

ការបម្រើជាអ្នកផ្សព្វផ្សាយសាសនារួមមានការទទួលខុសត្រូវចំពោះព្រះអម្ចាស់ និងថ្នាក់ដឹកនាំរបស់អ្នក ។ អ្នកធ្វើដូច្នេះដោយការផ្តល់របាយការណ៍ផ្សព្វផ្សាយសាសនាជាប្រចាំ ។ របាយការណ៍ទាំងនេះអាចមាន ៖

កិច្ចការ និងកាលវិភាគកិច្ចការផ្សព្វផ្សាយសាសនារបស់អ្នក
សុខុមាលភាពខាងផ្លូវកាយ និងសតិអារម្មណ៍របស់អ្នក
បទពិសោធន៍ខាងវិញ្ញាណ និងការអភិវឌ្ឍន៍របស់អ្នក
ជោគជ័យ និងឧបសគ្គនាពេលថ្មីៗរបស់អ្នក

អ្នកគួរតែជូនដំណឹងទៅអ្នកគ្រប់គ្រងទីតាំងផ្នែកសេវាកម្មរបស់អ្នក និងអ្នកដឹកនាំបេសកកម្មផ្នែកសេវាកម្មរបស់អ្នកគ្រប់ពេលដែលអ្នកប្រហែលមិនអាចចូលរួមក្នុងកិច្ចការបម្រើរបស់អ្នក ។ ទំនាក់ទំនងនេះគួរតែធ្វើឡើងជាមុនឲ្យបានល្អ ប្រសិនបើអាចធ្វើបាន ។

នៅក្នុងបេសកកម្មរបស់អ្នក សូមប្រើគណនីអ៊ីម៉ែលអ្នកផ្សព្វផ្សាយសាសនាដែលបានចុះឈ្មោះរបស់អ្នក ជាជាងប្រើគណនីផ្ទាល់ខ្លួនណាមួយ ។