Fakatupulaki Hono Ako ʻo e Ongoongoleleí

ʻOku mahuʻinga ke lotu mo ako maʻu pē ʻa e folofolá, fakafoʻituitui pea fakataha mo ho fāmilí (kapau ʻe lava). ʻI hoʻo fai iá, te ke ongoʻi ʻa e Laumālié mo maʻu ha fakahinohino ki ho moʻui fakaʻahó.

Ako fekauʻaki mo e fakaʻau ke ofi ange ki he Fakamoʻuí ʻo fakafou ʻi he ako folofola fakaʻahó mo e lotú. Fakakaukau ke fakaʻaongaʻi ʻa e:
- Haʻu, ʻo Muimui ʻIate Aú—Maʻá e ʻApí mo e Lotú. ʻE lava ke hoko ʻa e maʻuʻanga tokoni ko ʻení ko ha fakahinohino ʻi hoʻo ako folofola fakaʻahó.
- “Faʻa Lotu” mo e “Ako e Folofolá” ʻi he Malanga ʻAki ʻEku Ongoongoleleí: Ko ha Fakahinohino ki he Ngāue Fakafaifekaú (2023), 77–79.
Kapau kuo teʻeki ke ke download ʻa e polokalama Gospel Library, fai leva ia pe ko hoʻo ʻalu ki he ChurchofJesusChrist.org ke kumi ʻa e ngaahi leá, fakamatalá, vitioó, mo ha ngaahi meʻa lahi ange. Kapau ʻokú ke fakaʻaongaʻi ha meʻangāue Android, te ke lava ʻo download ʻa e polokalamá mei he Google Play store. Kapau ʻokú ke fakaʻaongaʻi ha meʻangāue iOS, te ke lava ʻo download ʻa e polokalamá mei he Apple App Store.
ʻE lava ke tokoni atu ʻa e ʻū makasini ʻa e Siasí ke ke muimui ki he Fakamoʻuí ʻi hoʻo hoko ko ha mēmipa ʻo Hono Siasí.
- ʻOku ʻi ai ha ngaahi makasini ʻe tolu ʻa e Siasí: ko e Liahona maʻá e kakai lalahí, Ki Hono Fakamālohia ʻo e Toʻu Tupú maʻá e toʻu tupú, pea mo e Ko e Kaumeʻá maʻá e fānaú. Te ke lava ʻo maʻu fakaʻilekitulōnika kinautolu ʻo ʻikai ha totongi, ʻi he konga “ʻŪ Makasiní” ʻo e Gospel Library. Kapau ko ha mēmipa foʻou koe pea ʻokú ke fiemaʻu ha tatau kuo paaki, fetuʻutaki ki hoʻo pīsopé pe palesiteni fakakoló ke lesisita ke maʻu taʻetotongi ʻi he taʻu ʻe taha.
Kapau ko ha tokotaha lahi kei talavou koe ʻi he vahaʻa ʻo e taʻu 18 mo e 30, ako fekauʻaki mo e ʻInisititiutí ʻaki hono lau ʻa e “The Purpose of Institute” ʻi he ChurchofJesusChrist.org pea ako fekauʻaki mo e YA Fakauiké ʻi he Gospel Library.
Tukupā ki he ako fakaʻaho ʻo e folofolá, tautefito ki he Tohi ʻa Molomoná, mo e lotú (vakai, Ngāue 17:11).