Fakamaheni mo e Kāingalotu ʻo Hoʻo Uōtí

Naʻe akoʻi ʻe he ʻAposetolo ko Paulá, ko e taimi ʻokú ke kau atu ai ki ha haʻofanga ʻo ha Kau Māʻoniʻoni, ʻoku ʻikai ai ko ha “kau muli mo e kau ʻaunofo ʻa kimoutolu, ka ko e kaungā kolo” (ʻEfesō 2:19).

ʻOku hangē ʻa e haʻofanga lotu kotoa pē ʻo e kāingalotu ʻo e Siasí ko ha kāinga ofi te mou maʻu ai ha feohi fakakaungāmeʻa mo ha poupou. Tuku ha taimi ke ke feohi ai mo ha niʻihi ʻo e kāingalotú!

• Kapau ʻoku ʻi ai haʻo meʻangāue toʻotoʻo, download ʻa e polokalama Member Tools. Kapau ʻokú ke fakaʻaongaʻi ha meʻangāue Android, te ke lava ʻo download ʻa e polokalamá mei he Google Play store. Kapau ʻokú ke fakaʻaongaʻi ha meʻangāue iOS, te ke lava ʻo download ʻa e polokalamá mei he Apple App Store. Hili hono download ʻo e polokalama Member Tools, hū ki loto ʻaki hoʻo ʻakauni ʻi he Siasí. ʻI he polokalamá, te ke lava ʻo kumi ʻa e fakamatala fetuʻutaki maʻá e kakai ʻi ho uōtí.

• Mei he polokalama Member Tools, kumi hoʻo ʻakauní, fakatonutonu hoʻo fakamatala fetuʻutakí, pea tānaki atu haʻo laʻitā. Fakapapauʻi ke toe vakaiʻi mo fakatonutonu ʻa e fakamatala ki he Fakalakalaka ʻi he Hala ʻo e Fuakavá.

• Feohi lelei ange mo hoʻo kau takí (ʻa e pīsopé, palesiteni ʻo e kōlomu ʻo e kaumātuʻá, palesiteni Fineʻofá, palesiteni Palaimelí, mo e kau taki ʻo e kōlomu ʻo e Lakanga Taulaʻeiki Faka-ʻĒloné mo e Kau Finemuí) pea mo e kau mēmipa hoʻo kalasí pe kōlomú. Talanoa kiate kinautolu fekauʻaki mo e ngaahi ʻekitivitī ka hokó, ngaahi lēsoni ʻi he kahaʻú, mo e ngaahi faingamālie ke ngāue tokoní.