11:

Saili i le Aoaoina: Filifili Poo Fea O E Agai i ai ma Pe Faapefea ona Oo ai Iina

Lipoti:Faasoa faapuupuu se mea na tupu na e faaalia ai le amio sao i le vaiaso ua tuanai.

Mafaufau loloto:E faapefea e le aoaoina ona fatuina le avanoa?

Maimoa:“Education for a Better Life,” o loo maua i le srs.lds.org/videos. (A e a pe a le maua le vitio? Faitau le itulau 29.)

Aoga mo se Olaga Sili Atu

Afai e le mafai ona e matamata i le vitio, faitau le tusiga lenei.

mai le Aoga mo se Olaga Sili Atu

Elder Joseph W. Sitati: I le 13 o tausaga sa nofo ai i se vaega sili ona maotua o Kenya. O tagata na laiti ni mea sa latou maua. Ae o i latou o e na foliga mai e gafatia mea na faamemelo i ai isi o i latou na sa maua se aoaoga lelei. Na ou iloa ai o le aotauina o le ki lea i se olaga e sili atu.

Sa tumau pea le oo mai o le manatu ia te au ou te alu atu ma fai i le puleaoga i se tasi o aoga sa ou manao lava ia auai. Sa ou manaomia ai le uila a lou tama e faia ai lenei malaga lea na alu ai le afa o le aso. Ou te lei alu ese atu lava ma lou nuu. Ou te lei iloa pe faapefea ona tautala lelei i le faaperetania, ma o lenei puleaoga o se tamalii paepae. Ou te lei feiloai muamua pe talanoa sao i se tamalii paepae, lea o se manatu taufaamatau ai lenei mea.

Sa i ai se mea i totonu ia te au na tuleia au ma fai mai ia te au ou te faia lenei mea, lea na ou alu atu ai e asiasi i le puleaoga. A o ou vaai atu ia te ia sa ou iloa sa fai sina tei o ia e vaai i lenei tama talavou o loo tu e pei o se fitafita i ona luma. Sa ia te ia ni fofoga agalelei, lea sa tuu mai ia te au le lototele. Sa ou tau atu ia te ia ou te matua manao lava e auai i lana aoga ma o le a ou fiafia pe a ia talia au. Ona ia fai mai lea, “Ia, sei ta vaai pe a maua taunuuga o suega.” Sa ou fai atu, “Faafetai lava, i lau susuga.” I le itiiti ifo ma le fa minute sa ou i fafo mai le ofisa.

O na minute e fa na ou faaaluina i lena ofisa sa o ni taimi taua i lou olaga. Sa na o au le tamaitiiti aoga mai i lau aoga maualalo na filifilia i se tasi o aoga sili ona lelei i la matou eria. O le mea moni sa tuuina mai e lenei tamalii lelei ia te au lenei avanoa sa ou faafetai ai, ma sa uunaia au e taumafai ia avea ma se tamaitiiti aoga sili ona lelei i lau vasega.

Sa tatalaina e lena mea ni avanoa fou mo au e alu ai i se isi aoga lelei ma saunia ai mo le iunivesite. O lou aotauina na ou mafaia ai ona maua lou toalua i le iunivesite. Sa ou mafaia ai ona maua se galuega i le taulaga. A o nofo ai i Nairobi, sa ma maua ai se ulugalii faifeautalai sa valaaulia i maua i lo la aiga, lea sa latou faia ai ni fonotaga ma i latou o tagata o le Ekalesia. Ana ou le iai i Nairobi i lena taimi, semanu ou te le maua lava le talalelei. O le mea moni sa ou i ai i se galuega malupuipuia sa ou mafaia ai ona auauna atu i le Ekalesia.

Ou te molimau atu o le aotauina o se ki lea i le ola tutoatasi. O le a tatala ai ni auala mo oe e mafai ai ona e saunia mo oe lava i le faaletino ma ola tutoatasi ai foi faaleagaga.

Toe foi i le itulau 26.

Talanoa: O le a le mea na manao ai Elder Joseph W. Sitati ina ua 13 ona tausaga? O le a le mea na ia faia e uiga i ai?

Faitau:Mataupu Faavae ma Feagaiga 88:118-19 ma le upu sii na saunia e Peresitene Gordon B. Hinckley (i le itu taumatau)

“Ia outou saili ma le filiga ma aoao i le tasi upu o le poto; ioe, ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi. … Faatu se fale … o le aoaoga.”

Mataupu Faavae ma Feagaiga 88:118–19

“Ua ia i tatou se tiutetauave ma se valaaulia e tutu i o tatou tulaga i le lalolagi o pisinisi, saeanisi, malo, vai faafomai, aoaoga ma isi uma galuega taua ma le aoga. Ua ia i tatou se tiute e aotauina ai o tatou lima ma mafaufau ia silisili i le galuega o le lalolagi mo le faamanuiaina o tagata uma.”

Gordon B. Hinckley, “O Se Aai i luga o le Maupuepue,” Liahona, Novema 1990, 5

Mafaufau loloto:O a ni manatu ma ni uunaiga na e maua mai le Agaga Paia e uiga i le faaleleia o lou olaga?

Gaoioiga—Fatuina o se “Misiona o le Olaga”

Laasaga 1: Faitau le upu sii na saunia e Peresitene Henry B. Eyring (i le itulau 27). O loo i ai se fuafuaga a le Atua mo oe. Ua ia faamanuiaina oe i meaalofa ma taleni taua lea e faataga ai oe e avea ma soo se mea e Na te finagalo e te avea ai. E mafai ona e faataunuuina lau misiona iinei i le fogaeleele pe afai e te filiga i le sailia ia malamalama ma usitai i Lona finagalo mo oe.

“Aioi atu ina ia faaali mai e le Agaga ia te oe mea e finagalo le Alii e te faia. Fuafua e fai. Folafola atu ia te Ia e usiusitai. Galue ma le naunautai seia oo ina e faia le mea ua Ia poloai mai ai. Ona tatalo ai lea … ma ia iloa po o le a le isi mea e tatau ona e faia.”

Henry B. Eyring, “Galue i le Maelega Atoatoa,” Ensign po o le Liahona, Me 2010, 63

Laasaga 2: Tali fesili o i lalo e amata fatu ai lou vaaiga mamao po o le “misiona o le olaga.” O le a e maua i le vaiaso a sau se avanoa e faasoa ai lau “misiona o le olaga” i le vaega.

O Le Tapasa o Lo’u Olaga
O fea ou te manao ia i ai i le lima tausaga?
Aisea?
O a ni tomai, malamalama, po o aafiaga ou te manaomia ia oo ai iina?

Tautino:Tautino atu e faia faatinoga nei i le aluga o le vaiaso. Tuu se togi i pusa pe a e faamaeaina faatinoga taitasi.

• Faamaea sini ma gaoioiga fesoasoani nei.

• Faamaea le tusia o lau fuafuaga o le “misiona o le olaga” ma talanoaina ma lou aiga.

• Fai atu i se tasi ia avea ma au fesoasoani ma seti se taimi e feiloai ai.

Gaoioiga—Fatuina o Sini

Laasaga 1: Faitau le upu sii na saunia e Peresitene Howard W. Hunter (i le itu taumatau). E ala i sini, e suia o tatou faamoemoe i faatinoga.

“O le talalelei lenei o le salamo, ma e tatau ona tatou salamo ma faaleleia. E moni, o le faagasologa o le salamo, faia o tautinoga, ma le faatulagaina o sini e tatau ona avea ma se mea e faifai pea. … Ou te fautuaina le faatinoga ia te oe.”

Howard W. Hunter, “The Dauntless Spirit of Resolution” (Brigham Young University devotional, Jan. 5, 1992), 2, speeches.byu.edu

O sini e tatau ona:

1. Ia patino ma mafai ona fuaina.

2. Ia tusia i lalo ma tuu i se mea e mafai ona e vaai ai i latou i le itiiti ifo i aso taitasi.

3. Ua faatulaga taimi e faamaea ai.

4. E i ai faatinoga faapitoa e faia ia ausia ai le sini.

5. Ia iloiloina, lipotia, ma toe faafou e le aunoa.

Laasaga 2: I luga o se fasi pepa, tusi ni sini se lua pe tolu o le a fesoasoani ia te oe e ausia lou misiona o le olaga. Mulimuli i laasaga o i lalo. Faapipii ia sini e lua i se mea e te vaai atu i ai i aso taitasi.

Sini	Aisea?	Laasaga Faapitoa e Ausia ai le Sini	Faasologa o Taimi	O Ai Ou te Lipoti Atu i Ai Lou Alualu i Luma?
FAATAITAIGA: Faitau le Tusi a Mamona 30 minute i aso taitasi.	Ina ia mafai ona ou maua le taitaiga i aso uma mai le Agaga Paia.	1. Ala i luga i le 6:30 i le taeao i aso taitasi. 2. Faitau ae lei oo i le taumafataga i le taeao. 3. Faamaumau lou alualu i luma i luga o se siata.	O le a ou iloiloa lou alualu i luma i po taitasi ae ou te lei moe.	O le a ou faasoa atua lau siata o le alualu i luma i se tasi o le aiga i aso Sa taitasi.

Gaoioiga—Mauaina o se Faufautua

Laasaga 1: Faitau le upu sii mai ia Elder Robert D. Hales (i le itu taumatau). E eseese ituaiga o faufautua. Atonu e te manaomia se tasi o i ai le tele o tomai e tali ai au fesili—se tasi sa faia se mea e te manao e fai. O isi faufautua e mafai ona avea o ni uo amiotonu po o ni tagata o le aiga. O tagata nei e naunau e faaalu le tele o le taimi e faamalosiau ai oe e faia suiga i lou olaga ma tuu atu ia te oe e alualu i luma.

“I o’u tausaga o le talavou matua, sa ou sailia fautuaga mai o’u matua ma mai faufautua faamaoni, ma faatuatuaina. O se tasi o se taitai perisitua; o le isi o se faiaoga na talitonu ia te a’u. Ia saili ma le agaga tatalo ni faufautua o e popole i lou tulaga faaleagaga.”

Robert D. Hales, “Fetaiai ma Luitau o le Lalolagi i Lenei Vaitaimi,” Ensign po o le Liahona, Nov. 2015, 46

Laasaga 2: Mafaufau e uiga i le ituaiga o fesoasoani e te manaomia. Tusi se lisi o tagata e mafai ona avea ma au faufautua. Mafaufau loloto ma tatalo e uiga i lau lisi o igoa.

Laasaga 3: Tali ia fesili o loo i lalo e amata ai se fegalegaleaiga faalefaufautua. Ina ia valaaulia se tasi ia avea ma au faufautua, e mafai ona tau lava o lou fai atu, “O loo ou taumafai e faia se suiga i lou olaga. E te naunau ea la e fesoasoani mai ia te au?”

O Lau Faufautua
O ai e te finagalo e avea ma au faufautua?
O le a le mea e te fai atu ia te ia ia avea ai ma au faufautua?
O afea e te manao e feiloai ai e faasoa atu ai lau “misiona o le olaga” ma au sini?
E faafia e te manao ai e feiloai ma lau faufautua?

Laasaga 4: Ia manatua o oe e te nafa ma lau “misiona o le olaga.” Pe a e feiloai ma lau faufautua:

• Toe iloilo lou alualu i luma.

• Toe iloilo ni puniala i lou alualu i luma ma mea o loo e faia e manumalo ai ia i latou.

• Toe iloilo aemaise lava mea ua e fuafua e faia ae e te lei toe feiloai ma lau faufautua.