4:

Salamo ma Ia Usiusitai

Lipoti:Faasoa puupuu i le vaega lou alualu i luma i le tausia o tupe maua ma tupe faaalu i le vaiaso ua tuanai.

Mafaufau loloto:E faapefea ona fesootai le salamo ma le usiusitai i le ola tutoatasi?

Maimoa:Obedience Brings Blessings,” o loo maua i le srs.lds.org/videos. (Pe a le maua le vitio? Faitau le itulau 13.)

O Le Usiusitai e Aumaia ai Faamanuiaga

Afai e le mafai ona e matamata i le vitio, ia faitau le tusiga lenei.

Peresitene Thomas S. Monson: E maeu lea folafolaga mamalu! “O ia o le e tausia poloaiga [a le Atua], e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma.” [MF&F 93:28]. …

Ou uso e ma tuafafine, o le suega tele lava o lenei olaga o le usiusitai. “O le a tatou tofotofoina ai i latou,” na fetalai ai le Alii, “e vaai pe latou te faia mea uma o soo se mea e poloaiina ai i latou e le Alii lo latou Atua.” [Aperaamo 3:25].

Na tautino mai le Faaola, “Aua o i latou uma o e e fia mauaina se faamanuiaga i lo’u lima ia mau i le tulafono na tofia mo lena faamanuiaga, ma ona tulaga, e pei ona sa faatutuina mai i luma atu o le faavaega o le lalolagi.”[MF&F 132:5].

E leai se isi faataitaiga sili atu o le usiusitai o i ai nai lo lo tatou Faaola lava ia. Na saunoa Paulo e uiga ia te Ia:

“E ui lava o ia o le Alo, a o mea sa tiga ai o ia na aoaoina ai o ia ia usiusitai;

“Ua faaatoatoaina foi o ia, ona avea ai lea o ia ma tupuga o le ola e faavavau ia i latou uma o e usiusitai ia te ia.” [Eperu 5:8–9].

Sa faailoa e le Faaola le alofa faamaoni o le Atua e ala i le soifua i se soifuaga atoatoa, e ala i le faamamaluina o Lana lava misiona. Sa lei faasausili o Ia. Sa lei faafefeteina o Ia i le faamaualuga. Sa lotonuu o Ia. Sa lotomaualalo o Ia. Sa faamaoni o Ia. Sa usiusitai o Ia i taimi uma. …

Ina ua fetaiai ma tiga i Ketesemane, lea sa Ia onosaia ai ia tiga ma o “lona afu foi ua pei o alualu toto ua pau ifo i le eleele,” [Luka 22:44], o Ia o le faataitaiga atoatoa o le Alo usiusitai i Lona fetalai mai, “Lo’u Tama e, a e finagalo i ai, ia e ave ese lenei ipu ia te au: a e aua le faia lo’u loto, a o lou finagalo.”[Luka 22:42].

E pei lava ona faatonuina e le Faaola Ana uluai Aposetolo, ua faapena foi ona Ia faatonuina oe ma au: “Mulimuli mai ia te au.” [Ioane 21:22]. Pe ua tatou naunau ea e usiusitai?

O le malamalama lea tatou te sailia, o tali o loo tatou mananao ai, ma le malosi ua tatou manaomia i nei aso e faafetaiaia ai luitau o se lalolagi faigata ma fesuisuiai e mafai lava ona fai mā tatou pe a tatou naunau e usiusitai i poloaiga a le Alii. Ou te toe sii maia le fetalaiga a le Alii: “O le e tausia poloaiga , e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma.” [MF&F 93:28].

O lau tatalo faamaualalo ina ia faamanuiaina i tatou i taui silisili ua folafolaina i e usiusitai. I le suafa o Iesu Keriso, lo tatou Alii ma le Faaola, amene.

(“O Le Usiusitai e Aumaia ai Faamanuiaga,” Ensign po o le Liahona, Me 2013, 89, 92)

Toe foi i le itulau 12.

Talanoa: O a faamanuiaga na e maua i le mulimuli i poloaiga a le Atua? E faapefea e le salamo ona fesoasoani ia i tatou ia agai i luma?

Faitau:Mataupu Faavae ma Feagaiga 130:20–21 ma le upu sii na saunia e le Perofeta o Iosefa Samita (i le itu taumatau)

“E i ai se tulafono … ua faavae ai i luga faamanuiaga uma—ma a tatou maua se faamanuiaga mai le Atua, e maua i le usiusitai i lena tulafono ua faavae ai i luga.”

Mataupu Faavae ma Feagaiga 130:20–21

“Sa ou faia lenei mea ma au tulafono: Pe a faatonuina ai e le Alii, ia faia loa”

Aoaoga a Peresitene o le Ekalesia: Iosefa Samita (2007), 160

Gaoioiga

O le usitai i tulafono faapitoa e taitai atu i faamanuiaga faapitoa.

Laasaga 1: Ia tusi e oe lava nisi o faamanuiaga e te manao ai i le koluma i le itu agavale.

Laasaga 2: Faailoa poo fea o tulafono po o mataupu faavae e te manaomia ona usitaia ina ia maua faamanuiaga e te manao ai.

Faamanuiaga Ou Te Manao e Maua		Tulafono po o Mataupu Faavae e Usitaia
Tupe teu o le tolu masina		Sefuluai ma taulaga (Malaki 3:10–12) Mulimuli i se paketi

Talanoa: Faitau le Iosua 3:5 ma upu sii na saunia e Elder Jeffrey R. Holland ma Peresitene Spencer W. Kimball (i le itulau 13). Aisea tatou te manaomia ai ona salamo, faapaiaina i tatou lava, ma taumafai e faia mea lelei a o tatou saili ina ia ola tutoatasi atili?

“Faapaia outou lava: o a taeao o le a faia ai e Ieova vavega i o outou luma.”

Iosua 3:5

“E faamanuiaina e le Alii i latou e mananao ina ia lelei atili, o e taliaina le manaomia o poloaiga ma taumafai e tausi i ai. … O le a Ia fesoasoani ia te oe e salamo, faaleleia, toefausia soo se mea e ao ona e toe faaleleia, ma faaauau pea lau malaga. E le pine i le taimi sa’o, o le a e mauaina le manuia o loo e sailia.”

Jeffrey R. Holland, “O a Taeao e Faia ai e le Alii o Vavega i o Outou Luma,” Ensign po o le Liahona, Me 2016, 126

“Afai e sili atu ona tatou fiafia i mea taugata po mea e manaomia nai lo le tatou fiafia e usiusitai, o le a tatou misia faamanuiaga lea e Na te aumaia ia i tatou.”

Spencer W. Kimball,i le Teachings of Spencer W. Kimball, ed. Edward L. Kimball (1982), 212

Tautino:Tautino atu e faia faatinoga nei i le aluga o le vaiaso. Tuu se togi i pusa pe a e faamaeaina faatinoga taitasi.

• Usitai i le tulafono sa e filifilia i le gaoioiga o loo i luga.

• Faasoa mea na e aoaoina i le aso e uiga i le usiusitai i lou aiga poo uo.