Ang Pagkahimong Angay: Pagtuman sa Akong mga Pakigsaad ug Katuyoan sa Kinabuhi

Report:Ipaambit (o irekord sa imong journal) ang butang nga imong nahimo karong semanaha sa pagpakita sa imong kamatinud-anon.

Unsa Man ang Akong Maabut?

Basaha:Kon gisugdan nimo ang My Plan didto sa imong misyon, hinumdumi nga isip usa ka returned missionary, ang imong oportunidad sa pagmugna og malipayon, nagsentro sa ebanghelyo nga kinabuhi mas labaw pa karon kay sa kaniadto. Miingon si Elder Dallin H. Oaks: “Sukwahi sa mga institusyon sa kalibutan, nga nagtudlo kanato nga mahibalo og mga butang, ang ebanghelyo ni Jesukristo naghagit kanato sa pagkahimong angay kon unsa kita. … Dili igo kang bisan kinsa nga mobuhat lamang kon unsay ganahan. … Ang importante sa katapusan mao ang unsay atong maabut tungod sa atong paningkamot” (“The Challenge to Become,” Ensign, Nob. 2000, 32, 34).

Hisguti:Sa unsang paagi ang imong misyon mipalapad sa imong panan-awon kon unsay imong maabut?

Pagmugna og Panan-awon: Unsa ang Tuyo sa Dios para Kanako?

Basaha:Mitudlo si Elder Richard G. Scott, “Ang Ginoo adunay katuyoan para kaninyo, sa tinagsa-tagsa” (“Learning to Succeed in Life” [Brigham Young University devotional, Sept. 15, 1998], speeches.byu.edu). Isip anak sa Dios, ikaw adunay potensyal sa pagdawat sa “tanan nga (anaa) sa akong Amahan” (D&P 84:38). Ang mga pangutana nga angay nimong tubagon maglakip sa “Unsa may buhaton nako sa akong potensyal? Sa unsang paagi nako masabtan ug matuman ang katuyoan sa Dios sa akong kinabuhi?” Una nagkinahanglan ka og panan-awon, dayon mga tumong, dayon sundan og usa ka plano.

Pamalandungi:Sa imong hunahuna unsa kaha ang imong makaya nga maabut sa espiritwal ug sa temporal nga paagi?

Ang mga Pakigsaad Mao ang Mahinungdanong Bahin sa Imong Misyon ug Katuyoan sa Kinabuhi

Basaha:Ang mga katawhan sa Dios katawhan nga tighimo og pakigsaad. Ang Amahan makigtambayayong kanato pinaagi sa mga pakigsaad nga atong gihimo Kaniya. Si Lorenzo Snow, propeta ug Presidente sa Simbahan, mitudlo: “Mituo ako nga dihang ikaw ug ako didto sa [atong premortal] nga kinabuhi, mihimo kita og pihong mga pakigsaad sa mga nagdumala, nga niining kinabuhia … buhaton nato ang unsay atong gihimo niana nga [premortal] nga kinabuhi—mangita sa kabubut-on sa Dios ug magsubay niini” (Teachings of Lorenzo Snow [1984], 118–19).

Gitudlo usab ni Elder LeGrand Richards: “Nakadawat ko og patriyarkal nga panalangin sa otso anyos pa lang ko. Kauban sa ubang mga butang nag-ingon kini, ‘Wala ka moanhi sa kalibutan nga sulagma, apan sa katumanan sa mga pamahayag sa Makagagahum aron pagtuman sa dakong buluhaton.’ Dayon gidetalye dayon kon unsay angay nakong buhaton. Sa tibuok nakong pagkabata, nag-ampo ko nga kon dili man sulagma ang akong pag-anhi nga ako unta tabangan sa Ginoo sa pagpakabuhi nga dili unta ko mahikawan sa pribilehiyo nga makahimo sa buluhaton nga iyang ipabuhat kanako. Wala koy mahunahunaang butang nga makasagmuyo kaayo kay sa mopauli human niining kinabuhia ug mosulti ang Ginoo nga, ‘Ah, LeGrand, mao ni ang tuyo nga buhaton nimo sa among pagpadala kanimo, apan wala nimo himoa. Mitipas ka, ug nangita kami og lain nga mohimo sa buluhaton para nimo’ (“A Constructive Life,” New Era, Hunyo 1976, 8).

Pamalandungi:Pangutan-a ang imong kaugalingon, “Unsa man ang tinuod nga kalampusan sa kinabuhi?” Unsa may imong nahibaloan mahitungod sa imong kinabuhi sukad?

Basaha:Kon mamalandong ka ug mag-ampo mahitungod sa imong misyon dinhi sa kalibutan, panalanginan ka sa Ginoo og mas dakong panabut. Gipanalanginan ka niya og daghang kapanguhaan, lakip ang mga kasulatan, ug imong patriyarkal nga panalangin, sa paggiya ug pagtabang nga imong masabtan ang katuyoan sa imong kinabuhi.

Gamiton ang Imong Patriyarkal nga Panalangin nga usa ka Giya

Basaha:Mihatag si Presidente Thomas S. Monson og instruksyon sa pagkat-on mahitungod sa mga personal nga misyon gikan sa mga patriyarkal nga panalangin: “Ang mao gihapon nga Ginoo kinsa naghatag og Liahona para kang Lehi naghatag para kanimo ug kanako karon og talagsaon ug bililhong gasa nga naghatag og direksyon sa atong kinabuhi, nagpahibalo sa mga peligro para luwas kita, ug nagplano sa mga paagi, gani sa luwas nga agianan—dili ngadto sa usa ka yuta nga saad, apan ngadto sa atong langitnong panimalay. Ang gasa nga akong gipasabut mao ang imong patriyarkal nga panalangin. Ang matag takus nga miyembro sa Simbahan adunay katungod nga makadawat niining talagsaon ug bililhong personal nga bahandi” (“Your Patriarchal Blessing: A Liahona of Light,” Ensign, Nob. 1986, 65).

Hisguti:Sa unsang paagi migiya kanako ang akong patriyarkal nga panalangin atol sa akong pagmisyon?

Kalihokan:Aron makaangkon og mas maayong panabut sa kabubut-on sa Ginoo para nimo, paghimo og kopya sa imong patriyarkal nga panalangin. Dayon buhata ang mosunod:

Step 1. Lingini ang tanang pulong diha sa imong patriyarkal nga panalangin nga naghulagway kanimo (sama pananglit, “mapaubsanon” o “sinsero”). Sa imong journal, ilista kini nga mga pulong sa ilawom sa ulohan nga “Ako.”
Step 2. Badlisi ang tanang mga pulong nga naghulagway sa buhat nga buhatunon (sama pananglit, “makugihong magtuon sa kasulatan” o “mangita og advance nga edukasyon”). Sa imong journal, ilista kini nga mga pulong sa ilawom sa ulohan nga “Ako mo-.”
Step 3. Tan-awa ang mga lista nga imong gihimo. Pangutan-a ang imong kaugalingon, “Unsa may gipadayag sa akong patriyarkal nga panalangin ngari kanako mahitungod sa katuyoan sa akong kinabuhi?”
Step 4. Pagsulat og deskripsyon sa tawo nga sa imong hunahuna maoy gusto sa Langitnong Amahan nga imong maabut.

Personal nga Pagpadayag pinaagi sa Basahon ni Mormon

Basaha:Mipamatuod si Elder M. Russell Ballard nga “ang Basahon ni Mormon, nga labaw sa tanang mga basahon nga akong nailhan, mao ang labing mahinungdanon nga kapanguhaan nga anaa kanato alang sa mga tubag sa tinuod nga mga problema sa kinabuhi” (“We Add Our Witness,” Ensign, Mar. 1989, 8–9). Gipasabut og maayo ni Elder David A. Bednar ang kaimportante sa “pagbasa, pagtuon, pagsiksik, ug pamalandong sa mga kasulatan sa kinatibuk-an ug ilabi na ang Basahon ni Mormon, gihatagan og gibug-aton diha sa pipila ka mga elemento sa panan-awon ni Lehi kabahin sa kahoy sa kinabuhi” (“Damgo ni Lehi: Hugot nga Paggunit sa Gunitanan,” Liahona, Okt. 2011, 33). Pinaagi sa paggamit sa Basahon ni Mormon matag adlaw, mapanalanginan kita og mas klaro nga giya, katuyoan, proteksyon, ug kahupayan. Giyahan kita sa Ginoo sa mga butang nga temporal ug espiritwal. Si Elder Richard G. Scott miingon: “Mosaksi ko nga ang Basahon ni Mormon mamahimong personal nga ‘Urim ug Thummin’ sa imong kinabuhi” (“The Power of the Book of Mormon in My Life,” Ensign, Okt. 1984, 65).

Hisguti:Unsay ipasabut sa giingon nga ang mga kasulatan mao ang Urim ug Thummim? Sa unsang paagi ang Basahon ni Mormon mitabang nimo sa imong misyon? Sa unsang paagi nga kini mahimong padayon nga giya sa imong pagpadayon?

I-commit:

Sa imong misyon, midapit ka sa uban sa pagbasa sa Basahon ni Mormon ug mangita og tubag. Karong semanaha, tun-i ang Basahon ni Mormon matag adlaw, magtinguha sa pagkat-on mahitungod sa buluhaton nga ipabuhat kanimo sa Langitnong Amahan. Isulat ang imong mga impresyon diha sa imong journal.
Mobisita sa templo, o mangita og hilum nga dapit, ug mag-ampo og mas dakong panabut bahin sa gihatag kanimo nga buhaton niining kinabuhia.
Ipaambit unsay imong nakat-unan karon uban sa laing returned missionary, young single adult, o sakop sa imong pamilya.