5

Pagkab-ot sa Akong mga Tumong

Report:Ipaambit (o irekord sa imong journal) ang usa ka butang nga imong nahimo karong semanaha aron mahimong mas self-reliant. Giunsa man pagtabang sa Ginoo kanimo?

Ang Pagtakda og mga Tumong nga may Pinakataas nga Prayoridad

Basaha:Kon maghimo og mga tumong, ikonsiderar ang imong mga prayoridad. Daghang tumong makatabang nga kita molambo, apan pinaagi sa giya sa Ginoo makapili kita sa pinakamaayong tumong sa atong kinabuhi.

Miingon si Elder Oaks: “Angay natong sugdan pinaagi sa [pag-ila] nga tungod lamang kay ang usa ka butang maayo kini dili igo nga rason sa pagbuhat niini. Ang gidaghanon sa maayong mga butang nga atong mahimo misobra kaayo sa panahon nga magamit sa pagbuhat niini. Pipila sa mga butang mas maayo kay sa maayo, og kini mao ang mga butang nga nagkinahanglan nga unang hatagan ug pagtagad sa atong kinabuhi” (“Maayo, Mas Maayo, Labing Maayo,” Ensign o Liahona, Nob. 2007, 104).

Mas epektibo ang mga tumong kon kini makahinam, makahagit ug makadasig kanato. Sa imong paghimo o pagpalambo sa imong mga tumong, tinoa kon unsay gusto nimong makab-ot, paghimo og pipila ka paagi nga masukod ang imong paglambo, ug hatagi ang imong kaugalingon og iskedyul kanus-a kini makab-ot.

Kalihokan:Gahini og panahon ug ribyuha ang mga tumong nga imong gitakda gamit ang My Plan atol sa imong misyon. Kon wala ka magsugod sa My Plan samtang nagmisyon ka, ribyuha ang worksheet sa luyo niini nga manwal.

“Kumbinsido gayud ako nga kon dili kita magtakda og mga tumong sa atong kinabuhi ug magkat-on unsaon nga mahanas sa pamaagi sa pagpakabuhi aron makab-ot ang atong mga tumong, moabut ang atong katigulangon ug maglantaw lang nga gamay ra nga bahin ang atong nakab-ot sa atong kinatibuk-ang potensyal.”

M. Russell Ballard, “Do Things That Make a Difference,” Ensign, Hunyo 1983, 9–10

Tumong nga may Pinakataas nga Prayoridad: Makig-date ug Magminyo

Basaha:Ang mahangturon nga kaminyoon usa ka importante kaayong bahin sa plano sa Dios para sa Iyang mga anak. Kon nakaapil ka sa My Plan atol sa imong pagmisyon, imong mahinumduman nga usa sa pinakaimportanting katuyoan sa imong misyon mao ang pag-andam nga makabaton ka og mahangturong pamilya. Sa tanan nimo nga tumong, ang kaminyoon nga na-seal sa templo kinahanglan nga maoy pinakataas nga prayoridad. Kon mag-focus ka sa tarung nga personal nga mga tinguha, sama sa edukasyon ug mga tumong sa panarbaho, tingali sayon ra sa ubang prayoridad nga makasulod. Ang kaminyoon maghatag og mga oportunidad para sa personal ug espiritwal nga kalamboan nga dili mahimo sa ubang paagi. Mao nga gitambagan sa mga propeta ang returned missionaries nga aktibong magtinguha sa kaminyoon.

Si Presidente Thomas S. Monson miingon: “Akong naamguhan nga adunay daghang mga rason ngano nga kamo nagduha-duha sa paghimo nianang lakang sa pagminyo. … Basin nahadlok kamo nga masayop og pili. Alang niini ako moingon nga kinahanglan ninyong gamiton ang hugot nga pagtuo” (“Gahum sa Priesthood,” Ensign o Liahona, Mayo 2011, 67).

Mipahayag si Elder M. Russell Ballard: “Kamong mga single adult kinahanglan nga makig-date ug magminyo. Hununga na palihug ang paglangay! … Daghang problema nga inyong masugatan mahimong malikayan kon kamo “matinguhaong moapil” sa matarung nga pakig-date, panag-uyab, ug kaminyoon” (“Young Adults,” 69).

Mitudlo si Elder Richard G. Scott: “Kon single ka ug wala pa makakita og siguradong makauban para sa celestial nga kaminyoon, pagpakabuhing takus niini. Mag-ampo alang niini. Laumi nga anaa kini sa iskedyul sa Ginoo. … Miingon ang Iyang mga propeta nga maangkon nimo kanang panalangin kon padayon ka nga magpakabuhing takus niini. Wala kita masayud kon dinhi ba o sa pikas bahin sa tabil. Apan pagpakabuhing takus niini. Mag-ampo alang niini” (“Receive the Temple Blessings,” Ensign, Mayo 1999, 27).

“Ang kaminyoon sa templo alang sa karon ug sa kahangturan takus sa imong labing dako nga mga paningkamot ug labing taas nga prayoridad. Diha pa lamang nga nakompleto na ni Nephi ang templo sa kamingawan nga siya miingon, “Ug … kami mipuyo subay sa matang sa pagkamalipayon.’ Ang ‘matang sa pagkamalipayon’ makaplagan sulod sa templo. Kini mao ang pagtuman sa pakigsaad.”

Elaine S. Dalton, “Higugmaa ang Iyang Inahan,” Ensign or Liahona, Nov. 2011, 77

Pamalandungi:Sa unsang paagi nimo magamit ang imong pagtuo sa pagpangita og kauban nga kaminyoan? Unsay buot ipasabut sa “laumi ang kaminyoon diha sa iskedyul sa Ginoo? Unsa man ang ipasabut sa pagpakabuhing takus ug mag-ampo alang sa kaminyoon? Unsaon nimo sa paglig-on ang imong tinguha nga magminyo sa templo?

Pagkab-ot sa Imong mga Tumong

Basaha:Bisan og mohimo kitag maayong mga tumong, dili sa kanunay nga kini atong makab-ot. Dunay daghang rason nganong mahitabo kini, apan tingali nakakat-on ka na, sa imo man nga misyon o sa ubang kasinatian, sa pipila ka paagi nga imong mamonitor ang imong kaugalingon. Isulat ang imong mga ideya diha sa imong journal.

Isulat ang Imong mga Tumong

Basaha:Mitanyag si Elder M. Russell Ballard sa mosunod nga tambag sa dili pagtipas sa imong mga plano: “mosugyot ko nga kon gusto ka og kalampusan sa proseso sa pagtakda og tumong… ibutang kini sa dali rang makita nga dapit—sa imo bang samin o sa pultahan sa refrigerator. Ibutang kanunay sa imong atubangan ang imong mga tumong, nga nakasulat. Dayon, pinaagi sa tinguha nga makab-ot ang nasulat nimong mga tumong, mas mosakripisyo ka sama sa gihimo sa mga tawong malampuson sa paghimo og tumong” (“Make a Difference,” 70).

Hisguti:Sa unsang paagi “makita nimo kanunay ang imong tumong,” sama sa gitambag ni Elder Ballard?

Ipakita ang Pagtuo, Paghinulsol, ug Disiplina sa Kaugalingon

Basaha:Aron molampus sa pagtuman sa mga tumong, kinahanglan nga mogamit ka og pagtuo sa Dios ug sa imong kaugalingon, ug gamiton gayud nimo ang disiplina sa kaugalingon sa pagpaningkamot nga makab-ot ang imong mga tumong.

Midugang sa pagtudlo si Elder Ballard: “Kita kinahanglan nga magbaton og hugot nga pagtuo. Kinahanglan nga magbaton kita og hugot nga pagtuo sa Dios. Kinahanglan nga magbaton kita og hugot nga pagtuo ni Ginoong Jesukristo. Pagkadako sa atong panginahanglan nga makabaton og hugot nga pagtuo sa atong kaugalingon! … Kon magtakda kamo og tumong ug i-commit sa imong kaugalingon ang gikinahanglan nga disiplina sa kaugalingon aron makab-ot kana nga tumong, imong mapapas ang kadaghanang problema sa imong kinabuhi. Gahini og enerhiya ang paghimo nianang mga butanga nga makahimo og kalainan” (“Make a Difference,” 71, 72).

Pamalandungi:Unsa man ang buot ipasabut sa pagbaton og hugot nga pagtuo sa imong kaugalingon? Sa unsang paagi ang pagbaton og pagtuo sa imong kaugalingon mousab sa paagi sa imong paggamit sa oras?

Pagmakugihon ug Pagmapailubon

Basaha:Mihatag si Presidente Dieter F. Uchtdorf mihatag sa mosunod nga tambag:

“Nakat-on ako nga ang pagpailub maoy labaw pa kay sa paghulat lamang sa butang nga mahitabo—ang pailub nagkinahanglan sa aktibo nga pagtrabaho paingon sa takus nga mga tumong ug dili mawad-an sa paglaum kon ang mga resulta dili moabut diha-diha dayon o sa walay pagpaningkamot.

“Adunay importante nga konsepto niini: ang pailub dili ang pagkawalay pagtagad, ni kini kapakyas sa pagbuhat tungod sa atong mga kahadlok. Ang pailub nagkahulugan nga aktibong maghulat ug maglahutay. Nagkahulugan kini nga magpabilin uban sa usa ka butang ug sa pagbuhat sa tanan kutob sa atong mahimo—motrabaho, molaum, ug mogamit sa hugot nga pagtuo; paglahutay sa kalisud uban sa determinasyon, bisan kon ang mga tinguha sa atong mga kasingkasing nalangan. Ang pailub dili lamang ang paglahutay; kondili paglahutay og maayo!” (“Ipadayon ang Pagpailub,” Ensign o Liahona, Mayo 2010, 57).

Pamalandungi:Duna ka bay mahinungdanong mga tumong nga nahibaloan nimong mogahin og dakong panahon sa pagtuman? Unsa ang ubang butang nga imong mahimo aron padayon kang madasigon?

“Kanang atong pursigihan sa pagbuhat sa kadugayan mamahimong mas sayon natong buhaton—dili tungod kay ang kinaiya sa butang nausab, apan ang atong gahum sa pagbuhat miusbaw.”

Gipahinungod kang Ralph Waldo Emerson, in Mga Pagtulun-an sa mga Presidente sa Simbahan J. Grant (2002), 41

Paghimo og Piho nga mga Plano

Basaha:Aron madugangan ang posibilidad sa pagkab-ot sa imong mga tumong, paghimo og pihong mga plano nga klarohon ang pagpasabut sa mga lakang.

Basaha ang mga ehemplo sa tumong sa mosunod nga tsart. Tan-awa kon sa unang paagi ang matag tumong dunay piho nga plano, oras, linya, ug tawo asa ka moreport.

Tumong	Mga Piho nga Lakang sa Pagkab-ot sa Tumong	Iskedyul sa Mahitabo [Time Line]	Asa Ko Mo-report
Magtuon ko sa mga kasulatan sulod sa 30 minutos matag adlaw.	Mobangon alas 6:00 sa buntag matag adlaw. Mobasa sa mga kasulatan sa dili pa mamahaw. Mo-monitor ang kalamboan diha sa tsart.	Timbang-timbangon nako ang akong kalamboan human sa usa ka bulan.	Ipaambit nako ang akong progress chart kauban sa mentor.
Makakwarta na ko og igong kantidad sulod sa unom ka bulan aron makasugod og eskwela.	Moila og 10 ka kompaniya nga interesado nakong matrabahoan. Mobisita sa matag kompaniya ug mangutana bahin sa mga oportunidad sa panarbaho.	Mobisita sa matag kompaniya sa mosunod nga tulo ka adlaw.	Mo-report ko sa akong mentor.

I-commit:

• Gahini og panahon ug ribyuha ang mga tumong nga imong gitakda gamit ang My Plan atol sa imong misyon. Kon wala ka magsugod sa My Plan samtang nagmisyon ka, ribyuha ang worksheet sa luyo niini nga manwal.

• Paghimo og tumong sa butang nga gusto nimong matuman niining bulana. Matag adlaw, tun-i ang imong tumong ug ang pihong mga plano. Lihoka ang imong mga impresyon ug kugihi ang paglihok aron matuman kini.

• Ipaambit unsay imong nakat-unan karon ngadto sa laing returned missionary, young single adult, o sakop sa imong pamilya.