8

Pagbuntog sa Oposisyon

Report:Ipaambit (o irekord sa imong journal) ang usa sa imong kasinatian gamit ang usa sa mga kapanguhaan nga imong gi-identify sa miaging semana.

Ang mga Panalangin sa Ginoo

Basaha:Si Presidente Thomas S. Monson mitudlo sa mosunod:

Walay bisan usa kanato ang makalahos niining kinabuhia nga walay mga problema ug mga hagit—usahay mga trahedya ug mga kalamidad. … Bisan og ang unos nga mga panganud magpundok, bisan og ang ulan mobundak kanato, ang atong kahibalo sa ebanghelyo ug ang atong gugma sa atong Langitnong Amahan ug sa atong Manluluwas mohupay ug molig-on kanato ug mohatag og kalipay sa atong mga kasingkasing samtang kita maglakaw sa matarung ug mosunod sa mga sugo. Walay butang niining kalibutana nga makapildi kanato. Minahal kong mga kaigsoonan, ayaw kahadlok. Pagmaya. Ang umaabut sama sa kahayag sa inyong hugot nga pagtuo” (“Pagmaya,” Ensign o Liahona, Mayo 2009, 89, 92).

Gitudloan kita sa Ginoo nga ang pag-atubang sa oposisyon usa ka gikinahanglang bahin sa atong mortal nga kasinatian. Ang mga pagsulay ug oposisyon nagpresentar kanato og mga oportunidad nga malig-on ang pagtuo ug mohulma og lig-ong kinaiya. Kon walay mga pagsulay dili nato maabut unsay gikinahanglan sa atong Langitnong Amahan nga atong maabut.

Busath.com

“Ang mga kalooy ug mga panalangin moabut sa nagkalainlaing porma—usahay isip malisud nga mga pagsulay. Bisan pa niana ang Ginoo miingon ‘Magpasalamat kamo sa Ginoo nga inyong Dios sa tanang mga butang.” (D&P 59:7). Ang tanang mga butang nagpasabut og niana lamang: ang maayong mga butang ug lisud nga mga butang—dili lamang pipila ka mga butang. Siya nagmando kanato nga magmapasalamaton tungod kay siya nasayud nga ang pagkamapasalamaton makalipay kanato. Kini maoy laing ebidensya sa Iyang gugma.”

Bonnie D. Parkin, “Pagpasalamat: Ang Dalan sa Kalipay,” Ensign o Liahona, Mayo 2007, 35

Tan-awa:“Jarem Frye: Amputee, Innovator, Mormon” naa sa srs.lds.org/mcm. (Walay video? Basaha ang kinutlo sa ubos.)

Jarem Frye: “Among nahibaloan nga duna koy kanser sa bukog [sa akong tuhod] ug nagsugod ang unos. Miadto dayon mi sa ospital ug daghang testing ang gihimo. Wala koy ideya og unsay akong mapaabut. … Gihatagan ko og tulo ka opsyon: artipisyal nga tuway-tuway sa tuhod, usa ka donor sa bukog nga ipuli, ug putlon na lang. Gitimbang-timbang nako ang mga opsyon ug gipili nako nga ipaputol na lang.

“Nakadawat ko og tawag [dihang] bag-o pa lang kong nauli gikan sa ospital sulod sa usa ka adlaw. Ang suod nakong higala. Akong gitubag ang telepono, ug miingon siya, ‘Bai, moadto ka ba sa sayawan karong gabii sa eskwelahan?’ Ug miingon ko, ‘Bai, bag-o lang kong giputlan og tiil!’ Ug ang iyang tubag mao, ‘Ah, oo, nakalimot ko. Unya moadto ka?’ Nianang higayona mikawas ko sa higdaanan ug miingon, ‘Buhi ko. Dili ko moundang.’ Gisultihan ko nga dili na ko mahimong mag-mountain bike, dili na ko pakatkaton sa kabatoan o mobuhat sa mga butang nga ganahan kaayo nako. Apan sukad nianang panahona nabuhat nako kanang tanan nga butang. Wala lang ko mosurender. Wala ko modawat nga wala na koy mahimo.

“Sa edad nga 14, gisultihan ko nga mamatay ko bisan kanus-a ug naniid sa akong mga higala nga akong nahimamat sa ospital sa tinuod wala na kay patay na sila, ug nakita nga kadelikado gayud sa kinabuhi—lisud hunahunaon. … Apan nagtudlo kini og leksyon kanako nga dili nako hikalimtan: kong magkalisud ang mga butang, kon di ka kahibalo unsay buhaton ug walay makatarunganong tubag, aduna koy tubag nga napamatud-an sa akong kaugalingon pinaagi sa kasinatian—nga ang tanang butang ma-okay ra. Gihigugma ko sa Dios ug tinguha Niya unsay pinakamaayo kanako ug mahunahunaon Siya kanatong tanan, ug kon mosalig lang kita Kaniya, maayo ra ang tanan. Maayo ra ang tanan.”

Hisguti:Unsa ang tahas sa mga pagsulay ug sa oposisyon diha sa plano sa Langitnong Amahan? Unsaon nga makapangandam ka sa pag-atubang sa mga hagit ug pagsulay samtang magpadayon ka sa pagtuman sa imong mga tumong ug mga plano?

Basaha:Sa mga panahon nga maghangyo kita og kahupayan gikan sa pisikal, mental, emosyunal, og espiritwal nga kalisdanan, Iya rang dugangan ang atong determinasyon ug kadasig sa paglahutay. Iya usab nga itugot nga mag-antus kita sa inosenting hinungdan, sama ni Job, aron Iya kitang mahimo nga bulawan (tan-awa sa Job 23:10). Ang mga panalangin nga gibu-bu gikan sa langitnong mga bintana tingali dakong kapasidad sa pag-usab sa atong mga kahimtang kay sa maglaum nga usabon sa uban ang atong mga kahimtang o sa bisan unsa.

Pamalandungi:Sa unsa nga paagi kamo napanalanginan sa Ginoo pinaagi sa mga personal ninyong pagsulay ug mga hagit?

Oposisyon gikan sa Kaaway

Tan-awa:“Cast Not Away Therefore Your Confidence” at srs.lds.org/mcm. (Walay video? Basaha ang teksto sa ubos.)

Elder Jeffrey R. Holland: “Mahinumduman ninyo ang basahon ni Moises nagsugod nga gidala siya sa ‘usa ka hilabihan ka taas nga bukid’ diin nag-ingon ang kasulatan ‘siya nakakita sa Dios nawong sa nawong, ug siya nakigsulti uban kaniya, ug ang himaya sa Dios diha kang Moises.’ …

“… Kini nga kasinatian talagsaon sa matag sumbanan. Usa kini sa talagsaong mga pagpadayag nga gihatag sa tawhanong kasaysayan. Nagbarug kini kauban sa talagsaong mga istorya nga anaa kanato gikan sa kasinatian sa mga propeta uban sa Pagka-diosnon.

“Apan ang mensahe ni Moises kaninyo karon mao kini: Ayaw ipaubos ang inyong panagang. Ayaw pagbana-bana nga ang talagsaong pagpadayag, pipila sa kahibulungan, sanag nga panahon, ang pag-abli sa dinasig nga agianan, mao na ang utlanan. Hinumdumi, dili pa kini ang katapusan hangtud nga mahuman kini.

“Ang nahitabo ni Moises pagkahuman, human sa iyang mapanagnaong oras, kataw-anan ra gayud unta kon dili pa kadto makahadlok ug tinuod ang pamaagi niini.

“‘Si Satanas misinggit uban ang makusog nga tingog, ug nagyaw-yaw diha sa yuta, ug nagmando, nga nag-ingon: Ako mao ang Bugtong Anak, simba kanako.

“‘Si Moises misugod sa pagkahadlok sa hilabihan; ug sa ingon nga siya misugod sa pagkahadlok, siya nakakita sa kapait sa impyerno. Bisan pa, sa pagtawag sa Dios [sa mao gihapong mga pulong nga gigamit ni Joseph Smith], nakadawat siya og kalig-on.’ …

“… Dili kita mahimong moapil sa pakig-away sa ingon nga mahangturong kahulugan ug walay katapusang sangputanan nga walay kasayuran nga usa kini ka bugno—maayong pakigbugno ug bugno sa kadaugan, apan pakigbugno bisan pa. …

“Sa iyang sulat ngadto sa Taga-Hebreohanon, si Apostol Pablo naningkamot sa pag-awhag sa bag-ong mga miyembro nga bag-o pang mipasakop sa Simbahan … kinsa sa walay pagduha-duha nakadawat og mga kasinatiang espiritwal ug tim-os nga kahayag sa pagpamatuod, nga nakadiskubre nga ang ilang mga problema wala pa diay matapos apan ang pipila niini nagsugod pa lang.

“Dayon kining talagsaon kaayong tambag nga maoy sentro sa akong tambag kaninyo ‘Ayaw ninyo pagwad-a ang inyong pagsalig, kay kini aduna ra unyay dakong balus. Kay kamo nagakinahanglan ug pailub, aron kamo makatuman sa kabubut-on sa Dios ug makadawat sa gisaad.’

“Sa pinulongan sa mga Santos sa Ulahing mga Adlaw mahimong litukon niini nga paagi, oo, lisud ang agianan—sa dili pa kamo magpasakop sa Simbahan, samtang naninguha kamo sa pagpasakop, ug human kamo magpasakop. … Ayaw paghunong kon ang gibug-aton magkabug-at. Isiguro nga dili ka motugyan nianang binuhat nga tinguha ang pagguba sa imong kalipay. Atubanga ang imong mga pagduha-duha. Kontrolaha ang imong mga kahadlok. ‘Busa ayaw wagtanga ang imong kamasaligon.’ Magpabilin sa dalan ug sud-onga ang katahum nga mobuklad para kanimo” (“Cast Not Away Therefore Your Confidence” [Brigham Young University devotional, Mar. 2, 1999], speeches.byu.edu).

Basaha:Sa kakugi naningkamot si Satanas nga matipas kita sa dalan ug ilayo kita sa pagtuman sa buhat ug sa plano sa Dios. Tinguha niya ang paglingla, paglibug, pagbalda, ug pagpahunong kanimo. Iyang tuyo nga mangatarungan ka sa sala. Buhaton niya kini pinaagi sa paghulhog sa kahuyang sa unod, lakip ang garbo ug tinguha para sa personal nga kaayohan o ambisyon. Atubangon ka niya ug mosulay sa paghimo nga ikaw magduha-duha sa imong gituohan ug sa imong pagka-ikaw isip anak sa atong Amahan sa Langit. Samtang maningkamot ka sa paghimo ug paghupot og mahinungdanong mga espiritwal nga commitment sa imong kinabuhi, moatake siya kanimo, sama sa iyang gihimo kang Moises (Moises 1:12–22), Jesus Christ (Mateo 4:1–11), Joseph Smith (Joseph Smith—Kasaysayan 1:15), ug daghan pang uban.

Pamalandungi:Unsaon nimo sa pagpangandam nga makapanagang batok sa lahi-lahing paagi sa pag-atake ni Satanas kanimo?

Kalihokan:

1. Basaha ug pamalandungi ang mga doktrina sa table nga naa sa ubos.

2. Basaha ang “Mga Bakak ni Satanas mahitungod sa Doktrina” aron masabtan ang lahi-lahing pamaagi nga gigamit ni Satanas sa pag-atake o pagpugong sa kamatuoran niining bililhong mga kamatuoran.

3. Basaha ug irekord ang dugang nga mga pagtulun-an mahitungod sa mga bakak ni Satanas. Ang mga pagtulun-an anaa sa ikatulo nga row sa table sa ubos.

4. Isulat sa imong journal ang dugang nga mga bakak nga gigamit ni Satanas sa paglingla, pagbalda, ug pagpahunong kanato sa paghangop sa mga doktrina sa Ginoo.

	Example 1	Example 2	Example 3
Doktrina	Ang Dios ang akong Amahan, ug nakaila Siya ug nahigugma kanako.	Si Kristo dunay gahum sa pagpabalik kanako ngadto sa akong Amahan.	Kay ako anak man sa Dios mapanalanginan ko sa tanan nga gasa ug talento aron makapuyo og balik Kaniya.
Ang mga Bakak ni Satanas mahitungod sa Doktrina	Ang Dios dili motubag sa akong mga pag-ampo. Lisud kaayo ang pagkamatikud sa kalainan tali sa Espiritu ug sa kaugalingon nakong mga hunahuna ug emosyon.	Kinahanglan kong mobuhat niini sa akong kaugalingon. Ingon ra gyud ko niini; wala kinahanglana nga maghinulsol.	Dili ko espesyal ug walay daghang talento. Dili gyud ko espiritwal; dili ko mohaum sa mga miyembro sa Simbahan. Ang Ginoo mas naghunahuna sa mga lalaki kay sa mga babaye.
Basaha ug Irekord ang mga Pagtulun-an mahitungod sa Paglikay sa mga Bakak ni Satanas	Moises 1	David A. Bednar, “Sa Kalig-on sa Ginoo,” Ensign o Liahona, Nob. 2004, 76	Sheri L. Dew, “You Were Born to Lead, You Were Born for Glory,” Brigham Young University devotional, Dis. 9, 2003, speeches.byu.edu Moises 7

Ang Manluluwas ug Pagbuntog sa Oposisyon

Basaha:Ang talagsaong panabut sa kasulatan mahitungod sa paglahutay sa oposisyon maggikan sa Manluluwas Mismo. Ang Amahan mihangyo Kaniya sa pagkanaog ug ubos sa tanang butang. Gitudlo sa mga kasulatan nga sa dihang miadto na Siya sa Getsemani, anaa Kaniya ang “pagbati sa kakulba” (Marcos 14:33) sa sakripisyo nga gihangyo Kaniya. Sa katapusan, nagtinguha Siya “nga [Siya] unta dili moinom sa mapait nga kopa, ug mobiya.” Hinoon, Iyang gilahutay, mihimaya sa Amahan, ug “nakaambit” o mitugyan ug “nakahuman” sa tanan nga gihangyo sa Amahan Kaniya (D&P 19:18–19).

Aron matuman ang plano sa Amahan sa imong kinabuhi ug sa pagkab-ot sa imong talagsaong potensyal, gikinahanglan nimo nga mosalig kang Jesus, kinsa mibuntog sa tanang butang, sa paglahutay ug pagtuman sa bisan unsa nga pangayoon Niya kanimo.

Aron maandam sa kalisdanan nga moabut, makatukod ka og mga kinaiya nga makalig-on kanimo.

Pamalandungi:Ang akong mga tumong naglakip ba sa pag-establisar o pagmintenar og mga kinaiya nga maghatag kanako og gahum nga mosalig sa Manluluwas ug pagbuntog sa oposisyon nga akong atubangon?

I-commit [Ipasalig]:

• Sa imong misyon, dihang nakigtambayayong ka sa uban sa paglig-on sa ilang pagtuo, unsay imong gibuhat aron sa pagtabang? Paghimo og plano aron sa espiritwal nga paagi mapanalipdan ang imong kaugalingon gikan sa oposisyon sa imong pagtuo.

• Ipaambit unsay imong nakat-unan karon ngadto sa laing returned missionary, young single adult, o sakop sa imong pamilya.