Mga Baruganan aron Mahimong Self-Reliant

Report:Ipaambit (o irekord sa imong journal) ang usa sa gibati nimong impresyon samtang nag-fill up ka sa My Plan worksheet sa luyo niini nga manwal.

Tibuok Kinabuhi nga mga Commitment

Basaha:Kon dawaton nimo ang responsibilidad sa imong temporal ug espiritwal nga kinabuhi pinaagi sa kinabuhi sa pagserbisyo, kinahanglan nimong sundon ang pihong mga sumbanan isip mahalaron nga disipulo ni Kristo. Ang pipila sa mga commitment nga lisud naglakip sa mosunod:

Pagbalaan sa Adlawng Igpapahulay ug takus nga pag-ambit sa sakrament matag semana
Pagpuasa, pag-ampo, ug pagbusog sa pulong sa Dios
Pagbayad og mga ikapulo ug mga halad
Pagkahimong matinud-anon sa imong mga pakigsaad sa templo, lakip ang pagdawat og mga calling sa pagserbisyo ug pagtuman sa balaod sa kaputli ug paglikay sa pornograpiya
Pagkahimong sef-reliant sa temporal pinaagi sa pagtrabaho ug pag-angkon sa tanang edukasyon nga gikinahanglan
Pagtabang sa imong pamilya nga sundon ang ebanghelyo

Pamalandungi:Ngano kaha nga ang matag usa niining mga commitment gikinahanglan man sa imong kinabuhi? Unsa pa ang ubang commitment ang makatabang kanimo?

Upat ka Baruganan sa Pagkahimong Self-Reliant

Basaha:Ang pagkahimong tinuod nga self-reliant, sa temporal ug sa espiritwal, nagkinahanglan og tinuoray nga pagsunod sa mga mahinundanong sukaranan nga baruganan. Samtang dunay daghang baruganan diin ikaw angayang mahanas, dunay upat ka nag-unang baruganan nga nagsuporta sa mga saad sa Dios aron matabangan kita nga mahimong self-reliant.

1: Mogamit og Hugot nga Pagtuo kang Jesukristo

Basaha:Kon mogamit kita og hugot nga pagtuo kang Jesukristo, kita mosalig nga Iya kitang pasayloon sa atong mga sayop ug mohimo nga atong maabut ang Iyang gusto nga atong maabut. Ang dalan sa pagkadisipulo lisud ug nagkinahanglan og lahutay. Mitudlo si Presidente Henry B. Eyring nga “kon ang pundasyon sa pagtuo wala makulit sa kasingkasing, ang gahum sa paglahutay mapakyas” (“Mga Hagit nga Buntugon,” Ensign o Liahona, Mayo 2012, 24).

Hisguti:Ngano nga ang hugot nga pagtuo kang Jesukristo mahinungdanon? Unsay buot ipasabut sa paglahutay?

Basaha:Mitudlo ang Manluluwas nga pinaagi sa pagtuo “ang tanang butang mahimo” (Marcos 9:23), apan angay natong hinumduman nga ang hugot nga pagtuo usa ka pagpili. Mitudlo si Elder L. Whitney Clayton nga “Ang gituohan ug ang pagpamatuod ug ang hugot nga pagtuo aktibo nga mga baruganan. … Ang gituohan usa ka butang nga atong gipili—lauman nato kini, lihukon nato kini, ug sakripisyuhan nato kini. Dili sulagma nga kita motuo sa Manluluwas ug sa Iyang ebanghelyo kay sa kita sulagmang nag-ampo o nagbayad sa ikapulo. Kita aktibong mopili nga motuo, sama nga kita mopili nga mosunod sa ubang mga sugo” (“Pagpili nga Motuo,” Ensign o Liahona, Mayo 2015, 38).

Pamalandungi:Unsay imong gibuhat aron maalimahan ang imong hugot nga pagtuo? Unsa pay imong mahimo aron “maduol” sa Ginoo (D&P 88:63)? Ngano nga ang pagtuo kang Jesukristo gikinahanglan aron mahimong self-reliant sa espiritwal ug temporal?

Basaha:Bisan og mopili kita nga mopakita og hugot nga pagtuo, dili nato kanunay madawat ang tubag kon kanus-a gayud ug ang gilauman nato unsaon kini sa pagtubag. Mitudlo si Elder Neal A. Maxwell: “Ang tinuod nga pagtuo sa Dios naglakip dili lamang sa pagtuo kaniya, apan sa iyang tayming, usa sa mga butang sa pagtuo nga lisud kaayong mabatunan” (“If Thou Endure It Well” [Brigham Young University devotional address, Dis. 4, 1984], speeches.byu.edu).

Hisguti:Unsa man ang buot ipasabut sa pagbaton og hugot nga pagtuo sa tayming sa Ginoo? Nganong lisud man kanang buhaton? Nganong ang tubag sa mga pag-ampo kasagaran moabut man sa mga paagi nga lahi sa atong gilauman?

2: Magmasulundon

Basaha:Namahayag ang Ginoo, “Tan-awa, kini mao ang imong buhat, sa paghupot sa akong mga sugo, oo, uban sa imong tibuok nga gahum, hunahuna ug kusog” (D&P 11:20). Ang mga kasulatan naglangkob og daghang ehemplo sa mga panalangin nga miabut gumikan sa pagsunod sa mga sugo sa Ginoo pinaagi sa “gahum, hunahuna, ug kusog” sa usa ka tawo.” Ang mga anak ni Helaman giluwas ug gihimong madaugon sa ilang mga pakig-away tungod kay sila “lig-on ug walay kahadlok” ug “mituman ug naninguha sa pagbuhat sa matag pulong sa sugo nga walay pagkasayop” (Alma 57:20–21). Sa samang paagi, ikaw makadawat og proteksyon ug giya pinaagi sa pagsunod sa mga sugo sa Dios ug sa mga pag-aghat sa Espiritu Santo.

Ang mga kasulatan nagtudlo nga “Adunay usa ka balaod, nga dili mausab nga sugo didto sa langit sa wala pa ang mga katukuran niini nga kalibutan, nga diha ang tanan nga mga panalangin gipasikad—ug kon kita makadawat og bisan unsa nga panalangin gikan sa Dios, kini tungod sa pagsunod niana nga balaod diin diha kini gipasikad” (D&P 130:20–21).

Ginaingon nga walay makadawat sa gikinahanglang panalangin gikan sa Dios gawas kon sundon niya ang mga balaod nga gikaptan sa gitinguha nga panalangin.

Hisguti:Unsay hinungdan nga ang mga anak ni Helaman mituman sa walay pagkasayop? Unsay mogiya kanimo sa paghimo og samang butang?

Basaha:Ang pagsunod dunay nagkapot nga talagsaong mga saad, ilabi na kon kabahin sa pagtuman sa atong misyon og mga tumong sa kinabuhi.

Misulat si Nephi: “Ug sa ingon kami nakasabut nga ang mga sugo sa Dios kinahanglan gayud nga matuman. Ug kon kini mao nga ang mga katawhan maghupot sa mga sugo sa Dios siya moamuma kanila, ug molig-on kanila, ug mohatag og mga paagi diin sila makatuman sa butang diin siya misugo kanila; busa, siya mihatag og mga paagi alang kanamo samtang kami nagpuyo diha sa kamingawan” (1 Nephi 17:3).

Pamalandungi:Unsa ang gipamatud-an ni Nephi nga buhaton sa Dios kon mosunod kita Kaniya? Duna bay mga sugo nga nagkinahanglan og istriktong pagsunod nga makadala sa gikinahanglang mga panalangin nga espiritwal ug temporal sa imong kinabuhi?

3. Sulbaron ang mga Problema, Molihok sa Imong Kaugalingon

Basaha:Isip mga anak sa atong Langitnong Amahan, may gahum kita sa pagkab-ot labaw sa kasamtangan natong mga kahimtang ug molambo sa mas taas nga sukod. Kon pahimuslan nato kini nga katakus sa paglihok, gidawat nato ang responsibilidad nga maduol kang Kristo ug mosalig Kaniya samtang manlimbasug kita sa atong temporal ug espiritwal nga kaluwasan (Mateo 11:28–29). Mitudlo si Presidente Marion G. Romney, “Ang kaluwasan buhatunon sa usa ka indibidwal, ug kinahanglan nga trabahoon nato ang kaugalingon natong kaluwasan sa temporal ug sa mga butang nga espiritwal” (sa Welfare Services Meeting Report, Okt. 1976, 13).

Hisguti:Ngano kaha nga ang pagpangita og paagi sa pagsulbad sa atong kaugalingong mga problema usa man sa mga sukaranang mga baruganan sa pagkahimong self-reliant?

Basaha:Mitudlo si Elder Rober D. Hales: “Ang Ginoo naglaum nga kita makatabang og sulbad sa atong kaugalingong mga problema. … Mga tawo kita nga dunay hunahuna, nga kahibalong mangatarungan. Duna kitay abilidad sa pag-ila sa kaugalingon natong panginahanglan, sa pagplano, sa pagtakda og mga tumong, ug sa pagsulbad sa atong mga problema” (“Every Good Gift,” New Era, Ago. 1983, 8–9).

Pamalandungi:Ngano nga ang Ginoo gusto nga kita ang molihok sa pagsulbad sa mga problema? Sa unsang paagi ka napanalanginan tungod sa pagsulbad og mga problemang lisud?

4. Maghiusa, Moserbisyo sa Uban

Basaha:Ang espiritwal ug temporal nga kakabus mabuntog kon moserbisyo kita sa usag usa ug mamahimong “usa sa kasingkasing ug usa sa hunahuna” (Moises 7:18).

Ang Doktrina ug mga Pakigsaad 104:15–16 nag-ingon: “Ug mao kini ang akong katuyoan sa paghatag sa akong mga santos. … Apan kini kinahanglan pagahimoon sa akong kaugalingon nga pamaagi; ug tan-awa kini ang pamaagi nga Ako, ang Ginoo, nagtakda sa paghatag sa akong mga santos, aron ang mga kabus ipataas, pinaagi niana ang mga adunahan ipaubos.” Nagpasabut nga kon ang mga datu ug ang mga kabus magkahiusa, nianang paagiha lang ang Ginoo makasangkap sa atong panginahanglan. Matag usa kanato kinahanglang andam nga mohatag sa atong panahon ug mga talento sa pagserbisyo sa uban kon gusto natong madawat ang kompletong mga panalangin sa Ginoo nga temporal ug espiritwal.

Mitudlo si Elder Jeffrey R. Holland nga ang matag usa kanato dunay responsibilidad nga moserbisyo sa uban: “Datu o kabus, kinahanglang mohimo ‘kutob sa atong mahimo’ kon ang uban nanginahanglan” (“Dili Ba Kitang Tanan Makililimos?” Ensign o Liahona, Nob. 2014, 41).

Sa Alma 34:28, mitudlo si Amulek: “Ug karon tan-awa, akong hinigugma nga mga kaigsoonan, ako moingon nganha kaninyo, ayaw pagdahum nga mao kini ang tanan; kay human ninyo mahimo kining tanan nga mga butang, kon kamo mosalikway sa timawa, ug sa hubo, ug dili moduaw sa masakiton ug sa may balatian, ug mohatag sa inyong kabtangan, kon kamo aduna, ngadto sa nanginahanglan—ako moingon nganha kaninyo, kon kamo dili mobuhat sa bisan hain niini nga mga butang, tan-awa, ang inyong pag-ampo makawang, ug dili ninyo mapahimuslan, ug kamo ingon sa mga nagpakaaron-ingnon kinsa naglimud sa hugot nga pagtuo” (tan-awa usab sa Mosiah 4:16; D&P 44:6; ug sa 88:123).

Pamalandungi:Unsa man ang gitudlo ni Amulek sa mga kabus ug sa timawa nga mga disipulo nga Zoramite mahitungod sa pagserbisyo? Sa unsang paagi ang pagserbisyo sa uban makalig-on sa imong pagtuo?

Kalihokan:Basaha ang istorya sa 1 Nephi 16:21–32 kon giunsa sa Ginoo sa pagtabang si Nephi aron makakuha og pagkaon sa kamingawan. Unsa man ang gitudlo niini nga tudling mahitungod sa upat ka baruganan sa self-reliance?

Baruganan	Mga pagtulun-an sa 1 Nephi 16:21–32
Mogamit og hugot nga pagtuo kang Jesukristo
Magmasulundon
Sulbaron ang mga problema, molihok sa imong kaugalingon
Maghiusa, moserbisyo sa uban

Commit:

Paghunahuna og problema nga gipaningkamutan nimong masulbad sa imong kinabuhi. Sa unsang paagi nimo gitabangan ang uban sa imong misyon sa pagsulbad sa ilang mga problema? Isulat sa imong journal ang imong mga pangutana mahitungod sa imong problema. Ilista ang mga kapanguhaan nga gibutang sa Dios libut kanimo aron sa pagtabang. Paningkamuti nga magamit ang imong mga kapanguhaan sa pagtubag pinakaminus usa sa imong mga pangutana.
Ipaambit unsay imong nakat-unan karong adlawa uban sa laing returned missionary, young single adult, o sakop sa imong pamilya.
Kon miapil ka sa My Plan sa imong misyon, ribyuha ang imong nakat-unan ug irekord ang mahitungod sa pagkahimong self-reliant sa temporal ug sa espiritwal.