Maaaring napakahirap patawarin ang ibang tao. Sumulat si Pablo sa mga Banal sa Corinto tungkol sa pagpapatawad sa isang nagkasala sa kanilang komunidad. Inanyayahan sila ni Pablo na magpatawad, para sa ikabubuti ng taong papatawarin at para din sa kanilang sariling kapakinabangan. Habang nag-aaral ka, hangaring mas maunawaan mo ang kahalagahan ng pagpapatawad at ang hangarin mong patawarin ang iba.
Paghikayat sa pag-aaral ng banal na kasulatan araw-araw. Hikayating ugaliin ang pag-aaral ng mga banal na kasulatan araw-araw. Iilang bagay lang ang may mas malakas at walang-hanggang impluwensya para sa ikabubuti ng buhay ng mga estudyante kaysa sa pagtulong sa kanilang matutuhang mahalin ang mga banal na kasulatan at pag-aralan ang mga ito araw-araw.
Paghahanda ng estudyante: Sabihin sa mga estudyante na maghandang magbahagi ng halimbawa ng isang taong kakilala nila na nagpatawad sa ibang tao nang katulad ni Cristo.
Mga Posibleng Aktibidad sa Pag-aaral
Ang mga sumusunod na tanong ay maaaring makatulong sa mga estudyante na pag-isipan ang nagagawa ng pagpapatawad sa kanilang buhay. Ang paksa ng pagpapatawad ay maaaring maging sensitibo para sa ilang estudyante. Maghandang sundin ang mga pahiwatig ng Espiritu Santo upang ituro ang mga alituntuning ito nang may pagmamahal at pag-unawa.
Ano ang gagawin mo?
Isipin kung paano ka maaaring tumugon at maging ang iba pang tao sa paligid mo sa mga sumusunod na sitwasyon:
Naging usap-usapan na nakagawa ng mabigat na kasalanan ang isang miyembro ng iyong ward o branch, tulad ng paglabag sa batas ng kalinisang-puri.
Hayagang sumasalungat sa mga lider ng Simbahan ang isang tao sa iyong ward o branch.
Sagutin ang mga sumusunod na tanong:
Kahit na nakikipagpulong sa mga lider ng Simbahan at nagsisikap na magsisi ang mga tao sa mga sitwasyong ito, paano sila maaaring pag-usapan at pakitunguhan ng ibang tao?
Bakit maaaring mahirap para sa ilang tao na pakitunguhan sila nang may pagmamahal at pagpapatawad?
Sa 2 Corinto 2 , sumulat si Pablo ng isang katulad na sitwasyon sa Corinto kung saan nagkasala at dinisiplina ng mga miyembro ng Simbahan ang isang tao.
Pag-isipang mabuti kung paano mo pinakikitunguhan ang mga taong nasa paligid mo na maaaring nagkasala. Isaalang-alang ang mga sumusunod na tanong ni Elder Jeffrey R. Holland ng Korum ng Labindalawang Apostol:
Larawan
Official Portrait of Elder Jeffrey R. Holland. Photographed January 2018.
Mayroon bang tao sa buhay ninyo na marahil ay kailangang patawarin? May tao ba sa inyong tahanan, sa inyong pamilya, sa mga kapitbahay ninyo na nakagawa ng isang bagay na hindi makatarungan o masama o hindi nararapat gawin ng isang Kristiyano? Lahat tayo ay nakagawa ng gayong mga paglabag, kaya tiyak na may isang taong kailangan pa ninyong patawarin.
(Jeffrey R. Holland, “I Stand All Amazed,”Ensign, Ago. 1986, 72)
Habang pinag-aaralan mo ang lesson na ito, hangarin ang tulong ng Espiritu Santo upang mas maunawaan mo ang kahalagahan ng pagpapatawad na katulad ng kay Cristo at kung paano mo mapapatawad ang iba.
Itinuro ni Pablo ang tungkol sa pagpapatawad
Maaaring gawin ng mga estudyante ang sumusunod na aktibidad sa maliliit na grupo, nang magkakapartner, o nang mag-isa.
Basahin ang 2 Corinto 2:5–11 , at alamin ang mga katotohanang matutukoy mo sa ilalim ng mga sumusunod na kategorya:
Paano natin dapat pakitunguhan ang isang taong nagdulot sa atin ng pagdadalamhati?
Bakit dapat nating pakitunguhan ang mga tao sa ganitong paraan?
Ano ang natutuhan mo mula sa pag-aaral ng mga scripture passage na ito?
Habang ibinabahagi ng mga estudyante ang natutuhan nila, isulat sa pisara ang anumang katotohanang sasabihin nila.
Ang dalawang alituntunin na maaaring natukoy mo ay sa pamamagitan ng Tagapagligtas na si Jesucristo, maaari tayong magpatawad at tumulong nang may pagmamahal sa iba at kung hindi natin patatawarin ang iba, sasamantalahin ni Satanas ang pagkakataong ito.
Ano ang mga halimbawa ng paraan kung paano mo mapapatawad, mapapanatag, o mapagtitibay ang iyong pagmamahal sa isang taong nagkasala o hindi naging mabait?
Batay sa nalalaman mo tungkol sa Tagapagligtas na si Jesucristo, bakit nais Niya tayong magpatawad at magpakita ng pagmamahal sa isa’t isa? Paano Niya tayo matutulungang gawin ito?
Itinuro ni Elder Massimo De Feo ng Pitumpu:
Larawan
Official Portrait of Elder Massimo De Feo Photographed March 2017.
Ang mga tunay na disipulo ay gustong magpatawad. Alam nila na binayaran ng Pagbabayad-sala ng Tagapagligtas ang lahat ng kasalanan at pagkakamali ng bawat isa sa atin. Alam nila na ang ibinigay Niyang kabayaran ay “kabayarang para sa lahat.” Kasamang binayaran ang lahat ng mga espirituwal na buwis, bayad, komisyon, at singil na kaugnay ng mga kasalanan, o pagkakamali. Ang mga tunay na disipulo ay madaling magpatawad at madaling humingi ng kapatawaran.
Mahal kong mga kapatid, kung nahihirapan kayong magpatawad, huwag isipin ang ginawa ng iba sa inyo, kundi isipin ang ginawa para sa inyo ng Tagapagligtas, at makadarama kayo ng kapayapaan sa nakatutubos na mga pagpapala ng Kanyang Pagbabayad-sala.
Kung ginawa ng mga estudyante ang aktibidad sa paghahanda ng estudyante, maaari mong itanong ang mga sumusunod at anyayahan silang ibahagi ang inihanda nila. Ipaalala sa mga estudyante na huwag magbahagi ng mga karanasang maaaring masyadong personal.
Kailan ka nakakita ng halimbawa ng isang taong nagpatawad ng ibang tao at pagkatapos ay tinulungan ang taong iyon nang may pagmamahal?
Paano tayo “[malalamangan] ni Satanas” dahil sa hindi pagpapatawad? ( 2 Corinto 2:11).
Tulungan ang mga estudyante na maunawaan ang pagpapalang maaaring dumating sa nagpapatawad at sa pinapatawad sa pamamagitan ng paggawa ng sumusunod na aktibidad.
Ipakita ang mga sumusunod na tagubilin para sa aktibidad, o ibigay ang mga ito sa mga estudyante bilang handout.
Ipagpalagay na, tulad ng mga taga-Corinto, kailangang dagdagan ng mga tao sa iyong ward ang kanilang pagmamahal at pagpapatawad sa mga nagkasala. Dahil dito, inanyayahan kayo ng inyong bishop na magbahagi ng maikling saloobin tungkol sa pagpapatawad sa simula ng inyong klase o pulong ng korum. Maglaan ng ilang minuto at gumawa ng outline ng maaari mong sabihin. Isama ang sumusunod:
Isa pang banal na kasulatan o pahayag ng isang lider ng Simbahan. (Maaari mong gamitin ang pahayag ni Elder Kevin R. Duncan sa ibaba, ang isa sa mga banal na kasulatan na binanggit niya, o ang isa sa mga scripture passage na kasunod ng kanyang pahayag.)
Ang sarili mong mga saloobin at patotoo tungkol sa pagmamahal at pagpapatawad sa iba at kung paano makatutulong ang mga ito sa atin para mas mapalapit sa Tagapagligtas.
Mga turo tungkol sa pagpapatawad
Sinabi ni Elder Kevin R. Duncan ng Pitumpu:
Larawan
Official Portrait of Elder Kevin R. Duncan. Photographed in March 2017.
Alam kong marami sa atin ang gustong magpatawad, pero nahihirapan tayong gawin ito. Kapag may di-makatarungang nangyari sa atin, mabilis nating nasasabing, “Mali ang ginawa ng taong iyon. Dapat silang maparusahan. Nasaan ang katarungan?” Nagkakamali tayo sa pag-iisip na kung nagpapatawad tayo, kahit paano ay hindi nagkakaroon ng hustisya at naiiwasan ang mga kaparusahan.
Hindi ito totoo. Ang Diyos ay magbibigay ng parusang makatwiran, sapagkat hindi maaagawan ng awa ang katarungan (tingnan sa Alma 42:25). Buong pagmamahal na tinitiyak ng Diyos sa atin: “Iwan ang paghahatol sa akin, sapagkat ito ay akin at ako ang gaganti. [At hayaang] kapayapaan ang mapasainyo” [ Doktrina at mga Tipan 82:23 ].
Maaari mong sabihin sa mga estudyante na ibahagi ang kanilang mga outline nang magkakapartner o sa maliliit na grupo.
Ano ang natutuhan mo na makatutulong sa mga miyembro ng iyong ward na mas makaunawa at makapagpatawad?
Paano sila mas mapapalapit kay Jesucristo sa pamamagitan ng pagpapatawad sa iba?
Pag-isipan kung paano mo pinakikitunguhan ang mga nagkasala.Humingi ng inspirasyon mula sa Ama sa Langit tungkol sa magagawa mo upang “patawarin siya … at … papagtibayin ang [iyong] pag-ibig sa kanya” ( 2 Corinto 2:7–8). Maaari mong isulat ang iyong mga impresyon at saloobin sa iyong study journal, kabilang ang anumang nadarama mo na dapat mong gawin.
Hikayatin ang mga estudyante na gawin ang mga impresyong natanggap nila sa lesson. Maaari mong patotohanan ang mga pagpapala ng pagpapatawad at kung paano nito mas inilalapit kay Jesucristo ang nagpapatawad at pinapatawad.
Komentaryo at Pinagmulang Impormasyon
Paano ka personal na mapagpapala ng pagpapatawad?
Itinuro ni Pangulong James E. Faust (1920–2007) ng Unang Panguluhan:
Larawan
Last official portrait of President James E. Faust, Second Counselor in the First Presidency, 2001. Died 10 August 2007.
Kung mapapatawad natin sa ating puso ang mga nakasakit at nakapinsala sa atin, aangat tayo sa mas mataas na antas ng paggalang sa sarili at kagalingan.
(James E. Faust, “Ang Nakapagpapahilom na Kapangyarihan ng Pagpapatawad,”Liahona, Mayo 2007, 68)
Itinuro ni Elder Jeffrey R. Holland ng Korum ng Labindalawang Apostol:
Larawan
Last official portrait of President James E. Faust, Second Counselor in the First Presidency, 2001. Died 10 August 2007.
Sa awtoridad na ipinagkaloob sa akin ng Tagapagligtas ng mundo bilang apostol, pinatototohanan ko ang kapayapaan sa kaluluwa na ihahatid ng pakikipagkasundo sa Diyos at sa isa’t isa kung tayo ay mapagpakumbaba at may lakas ng loob na gawin iyon.
Paano ka matutulungan ni Jesucristo na magpatawad?
Itinuro ni Elder Kevin R. Duncan ng Pitumpu:
Larawan
Official Portrait of Elder Kevin R. Duncan. Photographed in March 2017.
Pagpapatawad ang mismong dahilan kaya isinugo ng Diyos ang Kanyang Anak, kaya magalak tayo sa Kanyang alok na pagalingin tayong lahat. Ang Pagbabayad-sala ng Tagapagligtas ay hindi lamang para sa mga taong kailangang magsisi; ito ay para rin sa mga taong kailangang magpatawad. Kung nahihirapan kang patawarin ang isang tao o maging ang sarili mo, hilingin na tulungan ka ng Diyos. Ang pagpapatawad ay maluwalhati at nakapagpapagaling na alituntunin. Hindi tayo kailangang maging biktima nang dalawang beses. Maaari tayong magpatawad.
Paano ko mas mauunawaan kung ano ang pagpapatawad?
Itinuro ni Elder Jeffrey R. Holland ng Korum ng Labindalawang Apostol:
Larawan
Official Portrait of Elder Kevin R. Duncan. Photographed in March 2017.
Hindi sinabi [ni Jesucristo], “Hindi ka puwedeng makadama ng totoong sakit o kalungkutan sa masasakit na karanasan mo sa kamay ng iba.” Hindi rin Niya sinabing, “Para magpatawad nang lubusan kailangan mong magpatuloy sa di-kanais-nais na relasyon o bumalik sa mapang-abuso, at mapaminsalang kalagayan.” Ngunit kahit sa kabila ng pinakamabibigat na pagkakasalang maaaring mangyari sa atin, mapaglalabanan lamang natin ang sakit kapag tinahak natin ang landas tungo sa tunay na paggaling.
Sa ilan sa mga naunang kasulatan ni Apostol Pablo sa mga taga-Corinto, pinagsabihan niya sila dahil sa kanilang pagsuway at kawalan ng pananampalataya. Maaari mong anyayahan ang mga estudyante na basahin ang 2 Corinto 2:1–4 at alamin kung ano ang inasahan ni Pablo na mauunawaan nila tungkol sa kanyang mga dahilan kaya niya pinagsabihan sila. Paano naging patunay na minamahal ka ng isang lider o magulang kapag pinagsasabihan o iwinawasto ka nila?
Nakasulat sa puso
Dahil hindi itinuturo sa kurikulum ang materyal sa 2 Corinto 3 , nagbibigay ang sumusunod ng isang ideya sa pagtuturo para sa kabanatang iyon.
Ipaliwanag na noong wala si Pablo sa Corinto, nagsimulang salungatin ng ilang bulaang guro ang mga turo ni Pablo at sinubukan nilang siraan si Pablo sa pamamagitan ng pagsasabi sa mga nagbalik-loob na kailangan pa rin nilang sundin ang batas ni Moises. Ibuod ang 2 Corinto 3:1 sa pamamagitan ng pagpapaliwanag na bilang pagtugon sa mga sumubok na siraan siya, retorikal na nagtanong si Pablo sa mga miyembro sa Corinto kung kailangan niyang magbigay sa kanila ng “sulat ng papuri” na nagpapatunay sa kanyang pagkatao at katibayan na siya ay tunay na Apostol ni Jesucristo.
Maaaring basahin ng mga estudyante ang 2 Corinto 3:2–3 , at alamin kung ano ang nagsilbing sulat ng papuri ni Pablo (mga nagbagong buhay ng mga Banal). Ano sa palagay mo ang ibig sabihin na ang mga salita ni Cristo ay isinulat “hindi sa mga tapyas na bato, kundi sa mga tapyas ng puso ng tao”? Paano maititimo ng isang tao ang ebanghelyo sa kanyang puso? Paano natin mas maipamumuhay ang ebanghelyo mula sa ating puso?
