Two young women sit together on a bench. One of the young women appears to be distraught, sad, or concerned about something. The other young woman is showing concern and appears to be trying to comfort the other.
Lahat tayo ay dumaranas ng pighati at kalungkutan, mga sagabal at balakid, at pagkabagabag at sakit. Nang dumanas ng paghihirap ang mga tao sa Corinto, sumulat si Pablo sa mga miyembro ng Simbahan doon upang patuloy na magbigay ng suporta at payo. Pinatotohanan niya ang kapanatagan at kapayapaang matatamo nila sa pamamagitan ng Ama sa Langit at ni Jesucristo (tingnan sa 2 Corinto 1:3–4). Ang lesson na ito ay makatutulong sa iyong maunawaan ang ilan sa mga paraan kung paano nagbibigay ng kapanatagan ang Diyos sa Kanyang mga anak, at matukoy ang mga paraan kung paano mo maibabahagi sa iba ang kapanatagang ibinibigay Niya.
Paggamit ng mga bagay at larawan. Maaaring mahirap maunawaan ang ilang konsepto ng ebanghelyo. Ang paggamit ng mga bagay at larawan ay maaaring maging epektibong paraan upang matulungan ang mga estudyante na maunawaan ang mga espirituwal na alituntunin.
Paghahanda ng estudyante: Sabihin sa mga estudyante na mag-isip ng iba’t ibang paraan na napapanatag sila kapag nagkakaproblema sa kanilang buhay. Kung maaari, hikayatin silang magdala ng isang larawan o bagay na kumakatawan sa nakakapagpanatag sa kanila.
Mga Posibleng Aktibidad sa Pag-aaral
Ano ang nagpapanatag sa iyo?
Kung ipinagawa sa mga estudyante ang aktibidad sa paghahanda ng estudyante, sabihin sa kanila na ipakita sa klase ang bagay na dinala nila at ipaliwanag kung paano sila napapanatag nito.
Ano o sino ang binabalingan mo para makadama ng kapanatagan kapag may mga problema ka?
Ano o sino ang nagbibigay sa iyo ng lubos na kapanatagan? Bakit?
Gumawa ng listahan ng mga sitwasyon sa buhay ngayon o sa hinaharap kung saan maaaring kailangan mo ng tulong at kapanatagan upang malampasan mo ang mga ito.
Isipin ang mga sumusunod na tanong:
Bakit maaari kang magtiwala na papanatagin ka ng Ama sa Langit at ni Jesucristo sa pamamagitan ng kaloob na Espiritu Santo sa mga panahong ito?
Sa iyong palagay, gaano kahusay mong natutukoy at natatanggap ang kapanatagan na ibinibigay ng Ama sa Langit at ni Jesucristo sa pamamagitan ng Espiritu Santo?
Paano mo maibabahagi sa iba ang kapanatagang ibinibigay Nila?
Hanapin ang mga sagot sa mga nakaraang tanong habang pinag-aaralan mo ang lesson na ito.
Nais ni Pablo na panatagin ang mga Banal sa Corinto sa kanilang mga pagsubok
Habang nasa Macedonia, nabalitaan ni Pablo mula sa isang disipulong nagngangalang Tito na natanggap nang maayos ng mga Banal sa Corinto ang kanyang naunang sulat (tingnan sa 2 Corinto 2:13 ; 7:5). Nalaman din ni Pablo ang mga hamon na patuloy na nararanasan ng mga Banal na ito at sumulat siya ng isa pang sulat (2 Corinto) upang bigyan sila ng kapanatagan at tugunan ang kanilang mga problema.
Ano ang naaalala mo tungkol sa Corinto at sa mga paghihirap ng mga Banal doon?
Kung nahihirapan ang mga estudyanteng sumagot, ipaalala sa kanila na ang Corinto ay isang malaki at mayamang lungsod na kilala sa pagsamba sa mga diyus-diyosan at imoralidad. Nahirapan ang mga Banal doon na manatiling nagkakaisa, tanggapin ang karunungan ng Diyos sa halip na ang mga maling turo, at sundin ang batas ng kalinisang-puri.
Basahin ang 2 Corinto 1:1–4 , at bigyang-pansin kung paano sinimulan ni Pablo ang kanyang pangalawang sulat sa mga Banal sa Corinto.
Maaari mong sabihin sa mga estudyante na tukuyin ang mga pangalang ginamit ni Pablo upang tukuyin ang Ama sa Langit at pagkatapos ay isulat sa pisara ang mga pangalang ito.
Ano ang tila pinakamahalaga para sa iyo sa pagbati ni Pablo sa mga Banal?
Ano ang mga pangalan o titulong ginamit ni Pablo para sa Ama sa Langit ang napansin mo?
Ano ang itinuturo sa iyo ng mga pangalan o titulong iyon tungkol sa Ama sa Langit?
Anong katotohanan ang itinuro ni Pablo sa talata 4 ?
Pagtanggap ng kapanatagan mula sa Ama sa Langit at pagtulong sa iba na matanggap ito
Maaaring may natukoy kang katotohanan mula sa talata 4 na tulad ng sumusunod: Kapag natanggap natin ang ibinibigay na kapanatagan ng Ama sa Langit sa panahong sinusubok tayo, mas matutulungan natin ang iba na matanggap din ito.
Kapag natukoy ng mga estudyante ang katotohanan sa 2 Corinto 1:4 , maaari mong sabihin sa kanila na ihambing ang talatang ito sa Mosias 18:8–10 at maghanap ng mga pagkakatulad.
Maaari mong ibahagi ang pahayag ni Elder Gary E. Stevenson sa bahaging “Komentaryo at Pinagmulang Impormasyon” sa katapusan ng lesson at maaari kang magtanong ng tulad ng mga sumusunod.
Ano sa palagay mo ang ibig sabihin ng “maaliw natin ang nasa anumang kapighatian”? ( talata 4).
Sa iyong palagay, bakit inaasahan ito sa mga disipulo ni Jesucristo?
Kailan ka nakatanggap o kailan nakatanggap ang isang kakilala mo ng tulong at kapanatagan mula sa Ama sa Langit sa oras ng pagsubok?
Ano ang natutuhan mo o niya sa karanasang iyon?
Ano sa palagay mo ang magagawa mo upang makatanggap pa ng kapanatagan ng Diyos kapag kailangan mo ito?
Kung hindi masyadong personal ang mga sagot ng mga estudyante, ipabahagi sa ilang estudyante ang kanilang mga karanasan. Makatutulong sa mga estudyante na makarinig ng ilang paraan kung paano tayo pinapanatag ng Ama sa Langit. Maaari ka ring magdagdag ng personal na patotoo at mga personal na karanasan.
Basahin ang sumusunod na pahayag ni Pangulong Spencer W. Kimball (1895–1985).
Larawan
Portrait painting of President Spencer W. Kimball.
Tunay na napapansin tayo ng Diyos, at binabantayan Niya tayo. Ngunit karaniwan na sa pamamagitan ng ibang tao niya ibinibigay ang ating mga pangangailangan. Samakatuwid, lubhang mahalaga na paglingkuran natin ang bawat isa sa kaharian.
(Mga Turo ng mga Pangulo ng Simbahan: Spencer W. Kimball [2006], 100)
Sa iyong palagay, bakit madalas tayong gamitin ng Ama sa Langit para tulungan ang iba sa kanilang mga pagsubok upang madama nila ang Kanyang pagmamahal at kapanatagan?
Mag-isip ng isang taong kakilala mo na kasalukuyang nakararanas ng paghihirap. Pag-isipan nang may panalangin kung paano mo siya matutulungang madama ang kapanatagang ibinibigay ng Ama sa Langit habang ginagawa mo ang mga sumusunod:
A. Isipin ang natutuhan mo mula sa 2 Corinto 1:1–4 na maaaring makatulong sa taong ito.
B. Basahin ang dalawa o mahigit pa sa mga sumusunod na hanay ng mga talata, na naglalaman ng mga karagdagang turo ni Pablo sa mga taga-Corinto tungkol sa mga pagsubok. Maghanap ng parirala o talata na sa palagay mo ay magiging makabuluhan sa taong naisip mo.
C. Gumawa ngayon ng isang bagay upang matulungan ang taong ito na madama ang ibinibigay na kapanatagan ng Ama sa Langit. Maaari mo siyang ipagdasal tulad ng pagdarasal ng mga Banal sa Corinto para kay Pablo (tingnan sa 2 Corinto 1:11). Bukod pa rito, maaari kang sumulat sa taong ito ng isang nakahihikayat na mensahe tulad ng ginawa ni Pablo sa mga taga-Corinto, kahit ang iyong mensahe ay maaaring isang text, email, o maikling sulat o note sa halip na isang liham. (Maaari mong isama ang natutuhan mo sa lesson na ito mula sa 2 Corinto 1; 4, gayundin ang anumang personal na karanasang maaaring makatulong.)
D. Gumawa ng mga karagdagang plano upang matulungan ang taong ito. Maaaring ipadama sa iyo ng Ama sa Langit na gumawa ng mga karagdagang gagawin, tulad ng pagbisita sa kanya o paglilingkod sa kanya sa anumang paraan. Tiyaking isulat ang anumang planong maiisip mo sa isang lugar kung saan mapapaalalahanan kang gawin ito, tulad sa iyong kalendaryo, sa iyong smartphone, o sa isang papel na titingnan mo kalaunan.
Matapos bigyan ng sapat na oras ang mga estudyante, magpabahagi sa kanila ng isang bagay na plano nilang gawin upang matulungan ang taong naisip nila. Bagama’t maaaring angkop na ibahagi ng mga estudyante ang tungkol sa karaniwang pagsubok o kalagayan ng tao, ipaalala sa kanila na huwag ibahagi kung sino ang tao o maging napakapartikular na madaling mahuhulaan ng iba pang estudyante kung sino ito.
Patotohanan ang mga alituntuning itinuro sa lesson na ito at hikayatin ang mga estudyante na gawin ang kanilang mga plano upang panatagin ang iba.
Komentaryo at Pinagmulang Impormasyon
2 Corinto 1:4 . Bakit inaasahan ng Panginoon na tutulungan at papanatagin ko ang mga taong nangangailangan?
Itinuro ni Elder Gary E. Stevenson ng Korum ng Labindalawang Apostol ang sumusunod:
Larawan
Official portrait of Elder Gary E. Stevenson of the Quorum of the Twelve Apostles, 2015.
Noong umahon tayo mula sa mga tubig ng binyag, inatasan na tayo sa gawaing ito. Tumutulong tayo sa ating kapwa nang may pagmamahal dahil ito ang iniutos ng ating Tagapagligtas na gawin natin. … Kapag nahihirapan sa temporal o espirituwal ang ating kapwa, tumutulong tayo sa kanila. Pinapasan natin ang pasanin ng isa’t isa, nang ang mga ito ay gumaan. Nakikidalamhati tayo sa mga yaong nagdadalamhati. Inaaliw natin yaong mga nangangailangan ng aliw. Inaasahan ito ng Panginoon sa atin. At darating ang araw na mananagot tayo para sa pangangalagang ginawa natin sa paglilingkod sa Kanyang kawan.
2 Corinto 4:17 . Ano ang ibig sabihin ni Pablo nang tukuyin niya ang ating mga hamon sa buhay bilang “magaang kapighatian”?
Itinuro ni Elder Paul V. Johnson ng Panguluhan ng Pitumpu:
Larawan
Official portrait of Elder Gary E. Stevenson of the Quorum of the Twelve Apostles, 2015.
Sa gitna ng mga problema, halos imposibleng makita na ang paparating na biyaya ay mas higit sa pasakit, paghamak, o pasakit na maaaring nadarama natin sa oras na iyon. … Itinuro ni Apostol Pablo, “Sapagka’t ang aming magaang kapighatian, na sa isang sangdali lamang, ay siyang gumagawa sa amin ng lalo’t lalong bigat ng kaluwalhatiang walang hanggan” [ 2 Corinto 4:17 ]. Mapapansing ginamit ni Pablo ang salitang “magaang kapighatian.” Ito ay mula sa isang taong binugbog, binato, nasira ang barkong sinasakyan, ibinilanggo, at dumanas ng maraming iba pang pagsubok. Palagay ko marami sa atin ang hindi ituturing na magaang ang ating mga kapighatian. Subalit kumpara sa mga pagpapala at pag-unlad na tatanggapin natin sa bandang huli, kapwa sa buhay na ito at sa kawalang-hanggan, tunay ngang magaang ang ating mga kapighatian. …
Kung minsan gusto nating lumago nang walang mga pagsubok at lumakas nang walang kahirap-hirap. Ngunit hindi tayo lalago sa madaling paraan. Alam na alam natin na ang isang atletang ayaw magsanay nang lubos ay hindi kailanman huhusay. Ingatan nating huwag magdamdam sa mismong mga bagay na tutulong sa atin na maging banal.
Sabihin sa mga estudyante na maghanap ng iba pang salaysay sa mga banal na kasulatan o mula sa kasaysayan ng Simbahan na nagpapakita na makapagbibigay ng kaaliwan o kapanatagan ang Ama sa Langit. Halimbawa, maaaring ibuod ng mga estudyante ang salaysay sa Aklat ni Mormon nang pagaanin ng Panginoon ang mga pasanin ng mga tao ni Alma habang sila ay inaalipin ng mga Lamanita (tingnan sa Mosias 24), o maaari nilang talakayin kung paano pinanatag ng Panginoon si Joseph Smith sa Liberty Jail (tingnan sa Doktrina at mga Tipan 121). Bigyan ng oras ang mga estudyante na saliksikin ang mga banal na kasulatan at iba pang resource bago sila magbahagi.
Pag-alo sa pamamagitan ni Jesucristo
Matapos itanong sa mga estudyante kung bakit sa palagay nila ay madalas tayong gamitin ng Ama sa Langit upang panatagin ang iba, maaari mong basahin ang 2 Corinto 1:5–7 kasama ng mga estudyante at anyayahan sila na saliksikin ang mga talatang ito para sa isa pang pinagmumulan ng kapanatagan na ibinigay ng Ama sa Langit: ang Tagapagligtas na si Jesucristo. Itanong sa mga estudyante kung bakit sa palagay nila ay napakalakas na pinagmumulan ng kapanatagan si Jesucristo kapag dumaranas sila ng mga pagsubok. Maaari mong sabihin sa mga estudyante na ihambing ang mga talatang ito sa Alma 7:11–13 .
