ការទទួលបានចំណេះដឹងខាងវិញ្ញាណ ផ្នែកទី ៣

ការស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព

គោលបំណងមួយនៃចំណេះចំណានខាងគោលលទ្ធិ គឺដើម្បីជួយអ្នកឲ្យរៀន និងអនុវត្តគោលការណ៍នៃការទទួលបានចំណេះដឹងខាងវិញ្ញាណ ។ មេរៀននេះអាចជួយអ្នកឲ្យយល់ពីសារៈសំខាន់នៃការស្វែងរកសេចក្តីពិត តាមរយៈប្រភពដែលព្រះវរបិតាសួគ៌ និងព្រះយេស៊ូវគ្រីស្ទបានប្រទានមកដោយសេចក្តីស្រឡាញ់ ។

ការរៀបចំរបស់សិស្ស ៖ សូមអញ្ជើញសិស្សឲ្យគិតអំពីកន្លែង ដែលពួកគេតែងតែទៅស្វែងរកព័ត៌មាន នៅពេលពួកគេមានសំណួរអំពីព្រះ ឬសាសនាចក្រ ។ សូមអញ្ជើញពួកគេឲ្យពិចារណាពីអត្ថន័យនៃសេចក្តីថ្លែងការណ៍នេះដោយអែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់ ៖ « សំណួរខាងវិញ្ញាណសមនឹងទទួលបានចម្លើយខាងវិញ្ញាណមកពីព្រះ » ( « Joseph Smith » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ២៨, ៣០ ) ។

សកម្មភាពរៀនសូត្រដែលអាចមាន

តើអ្នកស្វែងរកចម្លើយនៅឯណា ?

ប្រសិនបើធនធានក្នុងការស្វែងរកព័ត៌មានខាងក្រោមនេះមិនមាននៅក្នុងថ្នាក់ទេ សូមសួរសិស្សថា តើពួកគេនឹងទៅរកព័ត៌មាននោះនៅកន្លែងណា ។ ជម្រើសមួយទៀតគឺ ការជំនួសព័ត៌មានដែលពាក់ព័ន្ធ ឬគួរឲ្យចាប់អារម្មណ៍បន្ថែមទៀតដើម្បីឲ្យសិស្សស្វែងរក ។

• អាកាសធាតុសម្រាប់ចុងសប្តាហ៍ខាងមុខនេះ

• ឈ្មោះរាជធានីនៃកោះហ្រ្គីនលេន

• រូបមន្តសម្រាប់ម្ហូបប៉ាស្តា ឬម្ហូបជាបាយ

សូមពិចារណាសំណួរខាងក្រោម ។

• តើអ្នកបានប្រើ ( ឬជាធម្មតា តើអ្នកនឹងប្រើ ) ប្រភពអ្វីដើម្បីស្វែងរកព័ត៌មាន ?

• ហេតុអ្វីបានជាអ្នកទុកចិត្តលើប្រភពទាំងនេះ សម្រាប់ព័ត៌មានអំពីសំណួរប្រភេទនេះ ?

តើយើងអាចរកចម្លើយពីព្រះនៅឯណា ?

• តើអ្នកនឹងណែនាំឲ្យមនុស្សទៅស្វែងរកចម្លើយចំពោះសំណួរសំខាន់ៗអំពីព្រះ សាសនាចក្រ ឬផែនការនៃសេចក្ដីសង្គ្រោះនៅកន្លែងណា ?

សូមពិចារណាសរសេរចម្លើយរបស់សិស្សនៅលើក្ដារខៀនក្រោមចំណងជើងថា « ប្រភពដែលបានតែងតាំងដ៏ទេវភាព » ។ សូមពិចារណាបន្ថែមលើបញ្ជីនេះពេញមួយមេរៀននេះ នៅពេលសិស្សដឹងពីប្រភពនៃសេចក្តីពិតបន្ថែមទៀតមកពីព្រះ ។

សូមគិតអំពីសំណួរណាមួយ ដែលអ្នកមានអំពីព្រះ សាសនាចក្រ ឬផែនការនៃសេចក្ដីសង្គ្រោះ ។ ការណ៍នេះអាចរាប់បញ្ចូលទាំងព័ត៌មាន ដែលអ្នកបានអាន ឬបានឮដែលអ្នកងឿងឆ្ងល់ ឬគិតថាច្របូកច្របល់ ។ សូមស្វែងរកព្រះវិញ្ញាណបរិសុទ្ធឲ្យដឹកនាំអ្នក នៅក្នុងការរៀនសូត្រអំពីគោលការណ៍នានានៅក្នុងមេរៀននេះ ដែលអាចជួយអ្នកបាន ។

សូមអានវគ្គបទគម្ពីរខាងក្រោម ដោយរកមើលរបៀបដែលប្រភពនៃសេចក្តីពិត ដែលត្រូវបានបង្រៀននៅក្នុងអត្ថបទទាំងនេះ អាចប្រទានពរដល់យើងបាន ។

សិស្សអាចធ្វើការជាដៃគូ ដោយឲ្យសិស្សម្នាក់ៗអានអត្ថបទពីរខាងក្រោមនេះ ហើយចែករំលែកអ្វីដែលពួកគេរកឃើញជាមួយដៃគូរបស់ពួកគេ ។

• អេភេសូរ ៤:១១–១៤

• ធីម៉ូថេ ទី២ ៣:១៥–១៧

• យ៉ាកុប ១:៥–៦

• កថាខណ្ឌទី ១១ នៃផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ )

នៅពេលសិស្សឆ្លើយសំណួរខាងក្រោម សូមពិចារណាបន្ថែមប្រភពដែលបានតែងតាំងដ៏ទេវភាពទៅក្នុងបញ្ជីនៅលើក្ដារខៀន ។

• តើប្រភពនៃសេចក្ដីពិតអ្វីខ្លះ ដែលអ្នកបានរកឃើញនៅក្នុងវគ្គបទគម្ពីរទាំងនេះ ? ហេតុអ្វីយើងអាចជឿជាក់ទាំងស្រុងលើប្រភពទាំងនេះបាន ?

• តើមនុស្សជាច្រើនអាចស្វែងរកព័ត៌មានអំពីសំណួរខាងវិញ្ញាណនៅកន្លែងណា ជាកន្លែងដែលអ្នកនឹងហាមប្រាមពួកគេមិនឲ្យទៅរកនោះ ? ហេតុអ្វីទៅ ?

ចុះបើខ្ញុំមិនប្រាកដថា ប្រភពព័ត៌មានមួយគួរឲ្យទុកចិត្តបានដែរឬអត់នោះ ?

សូមពិចារណាសួរសិស្សថា តើពួកគេនឹងផ្តល់ដំបូន្មានអ្វីខ្លះដល់អ្នកដែលប្រើអ៊ីនធឺណិត ដើម្បីស្វែងរកចម្លើយចំពោះសំណួរសំខាន់ៗខាងវិញ្ញាណ ។ ដោយផ្អែកលើចម្លើយរបស់ពួកគេ សូមកំណត់ថា តើព័ត៌មានមួយចំនួន ឬទាំងអស់នៅក្នុងកថាខណ្ឌខាងក្រោមនេះនឹងមានគុណប្រយោជន៍ដើម្បីចែករំលែកដែរឬទេ ។

វិធីសាមញ្ញបំផុតមួយក្នុងការស្វែងរកព័ត៌មាននៅសព្វថ្ងៃនេះ គឺតាមរយៈការប្រើប្រាស់អ៊ីនធឺណិត ។ តាមរយៈអ៊ីនធឺណិត យើងអាចទទួលបានប្រភពព័ត៌មានល្អៗជាច្រើន ។ ទន្ទឹមនឹងនេះ អ៊ីនធឺណិតក៏បង្ហាញដល់យើងនូវប្រភពព័ត៌មាន ដែលមិនអាចទុកចិត្តបាន និងមិនពិតផងដែរ ។ អែលឌើរ នែល អិល អាន់ឌើរសិន នៃកូរ៉ុមនៃពួកសាវកដប់ពីរនាក់បានព្រមាន ៖

ព័ត៌មានលើអ៊ីនធឺណិតពុំបានចម្រាញ់ភាពមិន « ពិត » ចេញទេ ។ ទោះជាវាទាក់ទាញគួរឲ្យជឿប៉ុណ្ណាក៏ដោយ ព័ត៌មានមួយចំនួនជាធម្មតាគឺមិនពិតទេ ។

( នែល អិល អាន់ឌើរសិន « Joseph Smith » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ២៩ )

សូមអានកថាខណ្ឌទី ១២ នៃផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ។ សូមពិចារណាគូសចំណាំហេតុផលដែលវាមានគ្រោះថ្នាក់ ក្នុងការស្វែងរកចម្លើយចំពោះសំណួរខាងវិញ្ញាណចេញពីប្រភពដែលមិនស្គាល់ ឬមិនគួរឲ្យទុកចិត្តនោះ ។

នៅពេលអ្នកជួបប្រទះព័ត៌មានថ្មីអំពីព្រះ សាសនាចក្រ ឬផែនការនៃសេចក្តីសង្គ្រោះ នោះវាមានគុណប្រយោជន៍ក្នុងការសួរខ្លួនឯងនូវសំណួរដូចខាងក្រោម អំពីប្រភពនៃព័ត៌មាននោះ ។ នៅពេលអ្នកអានសំណួរទាំងនេះ សូមរកមើលសំណួរដែលអ្នកគិតថាមានគុណប្រយោជន៍បំផុត នៅពេលសម្រេចចិត្តថា តើប្រភពមួយគួរឲ្យទុកចិត្តបានឬអត់នោះ ។ ( អ្នកក៏អាចសិក្សាសេចក្ដីយោងបទគម្ពីរនីមួយៗ ដែលអមមកជាមួយផងដែរ ) ។

⁠សូមផ្តល់សំណួរដូចតទៅនេះជាសំណៅចែកឲ្យសិស្ស ។ សូមលើកទឹកចិត្តសិស្សឲ្យទុកសំណៅនេះ នៅកន្លែងណាដែលពួកគេអាចរកឃើញយ៉ាងងាយស្រួល សម្រាប់ការប្រើប្រាស់នាពេលអនាគត ។

សំណួរមួយចំនួនដើម្បីវាយតម្លៃព័ត៌មានថ្មី

• តើខ្ញុំមានអារម្មណ៍អ្វីពីព្រះវិញ្ញាណបរិសុទ្ធ នៅពេលខ្ញុំបានអាន ឬបានឮព័ត៌មាននេះ ? ( សូមមើល គោលលទ្ធិ និង សេចក្តីសញ្ញា ៥០:២៣–២៤ ) ។

• តើព័ត៌មាននេះនាំខ្ញុំឲ្យចូលទៅជិតព្រះយេស៊ូវគ្រីស្ទ និងសាសនាចក្ររបស់ទ្រង់ដែរឬទេ ? ( សូមមើល មរ៉ូណៃ ៧:១៥–១៧ ) ។

• តើព័ត៌មាននេះលើកទឹកចិត្តខ្ញុំឲ្យកាន់តាមបទបញ្ញត្តិរបស់ព្រះដែរឬទេ ?

• តើវាត្រូវគ្នានឹងអ្វីដែលព្រះគម្ពីរ និងព្យាការីសម័យទំនើបបង្រៀនដែរឬទេ ? ( សូមមើល ធីម៉ូថេ ទី២ ៣:១៥–១៧ ; គោលលទ្ធិ និង សេចក្ដីសញ្ញា ១:៣៨ ) ។

• តើវាបញ្ជាក់ពីអ្វីដែលខ្ញុំបានទទួលអារម្មណ៍រួចមកហើយ ដែលព្រះវិញ្ញាណបរិសុទ្ធប្រាប់ខ្ញុំថាជាការពិត ឬវាលើកទឹកចិត្តខ្ញុំឲ្យសង្ស័យពីសេចក្តីពិតនៃដំណឹងល្អ ? ( សូមមើល មរ៉ូណៃ ១០:៥ ) ។

• តើព័ត៌មាននេះចេញមកពីប្រភពដែលព្រះអង្គសង្គ្រោះ ឬថ្នាក់ដឹកនាំសាសនាចក្ររបស់ទ្រង់ចាត់ទុកថាគួរឲ្យទុកចិត្តបានឬ ?

• តើឪពុកម្តាយ ឬថ្នាក់ដឹកនាំសាសនាចក្ររបស់ខ្ញុំនឹងនិយាយអ្វីអំពីព័ត៌មាននេះ ? ( ប្រសិនបើខ្ញុំមានអារម្មណ៍ចង់លាក់បាំងរឿងនេះពីពួកគាត់ តើវាប្រាប់ខ្ញុំអ្វីខ្លះអំពីប្រភពនេះ ? )

• តើសំណួរទាំងនេះមួយណា ដែលអ្នកគិតថាមានគុណប្រយោជន៍បំផុតសម្រាប់អ្នក ? ហេតុអ្វីទៅ ?

• តើមានសំណួរអ្វីផ្សេងទៀត ដែលអ្នកគិតថា នរណាម្នាក់គួរតែសួរអំពីព័ត៌មានដែលពួកគេជួបប្រទះនោះ ?

ចំពោះសកម្មភាពអនុវត្តខាងក្រោមនេះ សិស្សអាចធ្វើការជាលក្ខណៈបុគ្គល ឬជាក្រុមតូចៗ ។ បន្ទាប់ពីមានពេលគ្រប់គ្រាន់ហើយ សូមអញ្ជើញសិស្សមួយចំនួនឲ្យឡើងចែករំលែកអ្វីដែលពួកគេបានរកឃើញផង និងឡើងបង្ហាញជាជំហានៗ ពីរបៀបដែលពួកគេរកឃើញព័ត៌មានដែលអាចទុកចិត្តបានផងដែរ ។

បើពេលវេលាអនុញ្ញាត សកម្មភាពជម្រើសមួយអាចជាការបង្ហាញវីដេអូ « Divinely Appointed Sources » នៅក្នុងផ្នែក « វិចារណកថា និង ព័ត៌មានសាច់រឿង » នៃមេរៀននេះ ។ វីដេអូនេះបង្ហាញពីបទពិសោធន៍ជីវិតពិតរបស់យុវវ័យ ដែលស្វែងរកចម្លើយអំពីព្រះ និងសាសនាចក្រ ។

សូមជ្រើសរើសព័ត៌មានមួយដែលអ្នកបានឮ ឬសំណួរមួយដែលអ្នកមានអំពីព្រះ សាសនាចក្រ ឬផែនការនៃសេចក្តីសង្គ្រោះ ។ បន្ទាប់មក សូមចំណាយពេលពីរបីនាទី ដើម្បីអនុវត្តស្វែងរកចម្លើយដោយប្រើប្រភពដែលបានតែងតាំងដ៏ទេវភាព ។ ក្នុងចំណោមចំណុចផ្សេងទៀត អ្នកអាចពិចារណា

• អធិស្ឋាន

• ស្រាវជ្រាវបទគម្ពីរដោយប្រើសេចក្ដីណែនាំដល់បទគម្ពីរទាំងឡាយ ឬវគ្គបទគម្ពីរចំណេះចំណានខាងគោលលទ្ធិ

• ស្រាវជ្រាវក្នុងសុន្ទរកថាសន្និសីទទូទៅ សិក្សា ប្រធានបទដំណឹងល្អ នៅលើគេហទំព័រ ChurchofJesusChrist.org ឬកម្មវិធីបណ្ណាល័យដំណឹងល្អ

• អានផ្នែកពាក់ព័ន្ធនៅក្នុងឯកសាររបស់សាសនាចក្រ ដូចជាដើម្បីកម្លាំងនៃយុវជន( កូនសៀវភៅ ឆ្នាំ ២០១១ ) ឬ ប្រធានបទដំណឹងល្អ នៅលើគេហទំព័រ topics.ChurchofJesusChrist.org

• ទាក់ទងនរណាម្នាក់ដែលអ្នកស្គាល់ និងទុកចិត្ត ដូចជាឪពុកម្តាយ ប៊ីស្សព អ្នកដឹកនាំយុវវ័យនៅក្នុងវួដ ឬសាខារបស់អ្នក ឬគ្រូបង្រៀនថ្នាក់សិក្ខាសាលា ដើម្បីជួយអ្នកឲ្យស្វែងរកចម្លើយ ។

សិស្សអាចមានតែពេលវេលាគ្រប់គ្រាន់នៅក្នុងថ្នាក់ ដើម្បីចាប់ផ្តើមការសិក្សារបស់ពួកគេប៉ុណ្ណោះ ។ ប្រសិនបើដូច្នេះ សូមលើកទឹកចិត្តពួកគេឲ្យបន្តការសិក្សានៅខាងក្រៅថ្នាក់រៀន ។

• តើអ្នកបានរៀនអ្វីខ្លះនៅក្នុងមេរៀននេះ ដែលនឹងជួយអ្នកបាន នៅពេលអ្នកជួបនឹងព័ត៌មានថ្មីអំពីព្រះ ឬសាសនាចក្រនោះ ?

• ហេតុអ្វីអ្នកគិតថា ប្រភពដែលអ្នកងាកទៅរកចម្លើយ និងព័ត៌មាននោះ សំខាន់ចំពោះព្រះវរបិតាសួគ៌ និងព្រះយេស៊ូវគ្រីស្ទ ?

សូមពិចារណាថ្លែងទីបន្ទាល់អំពីសេចក្ដីស្រឡាញ់របស់ព្រះវរបិតាសួគ៌ និងព្រះយេស៊ូវគ្រីស្ទ ដែលបង្ហាញតាមរយៈការប្រទានដល់យើងនូវប្រភពដ៏ទេវភាពនៃសេចក្តីពិត ។

វិចារណកថា និង ព័ត៌មានសាច់រឿង

តើខ្ញុំគួរតែធ្វើដូចម្តេច ប្រសិនបើខ្ញុំមិនអាចរកឃើញចម្លើយចំពោះសំណួរ តាមរយៈប្រភពដែលបានតែងតាំងដ៏ទេវភាពទេនោះ ?

អែលឌើរ នែល អិល អាន់ឌើរសិន នៃកូរ៉ុមនៃពួកសាវកដប់ពីរនាក់បានបង្រៀន ៖

ពុំមែនគ្រប់ចម្លើយទាំងអស់នឹងបានទទួលភ្លាមៗនោះទេ ប៉ុន្តែស្ទើរតែគ្រប់សំណួរទាំងអស់អាចត្រូវបានទទួលចម្លើយតាមរយៈការសិក្សា និងការស្វះស្វែងរកចម្លើយពីព្រះ ។ …

សេចក្តីជំនឿពុំទាមទារនូវចម្លើយចំពោះគ្រប់សំណួរនោះទេ ប៉ុន្តែវាស្វែងរកការបញ្ជាក់ និងការលើកទឹកចិត្តឲ្យឈានឆ្ពោះទៅមុខ ទោះបីជាពេលខ្លះយើងអាចទទួលស្គាល់ថា « ខ្ញុំពុំចេះគ្រប់យ៉ាងនោះទេ ប៉ុន្តែខ្ញុំដឹងគ្រប់គ្រាន់ ដើម្បីបន្តដើរនៅលើផ្លូវនៃភាពជាសិស្ស » ។

ការបន្តមុជខ្លួនឯងនៅក្នុងភាពមន្ទិលសង្ស័យ នោះនឹងធ្វើឲ្យសេចក្តីជំនឿរបស់មនុស្សម្នាក់លើព្រះយេស៊ូវគ្រីស្ទ និងការស្តារឡើងវិញទន់ខ្សោយ ដោយសារចម្លើយមកពីមនុស្សដែលមានជំនឿតិច និងមនុស្សដែលគ្មានជំនឿ ។

( នែល អិល អាន់ឌើរសិន « Faith Is Not by Chance, but by Choice » Ensign ឬ Liahona ខែ វិច្ឆិកា ឆ្នាំ ២០១៥ ទំព័រ ៦៦ )

ហេតុអ្វីខ្ញុំគួរប្រុងប្រយ័ត្នក្នុងការស្វែងរកចម្លើយអំពីសាសនាចក្រ ពីអ្នកដែលបានចាកចេញពីសាសនាចក្រ ?

អែលឌើរ នែល អេ ម៉ាកស្វែល ( ឆ្នាំ ១៩២៦–២០០៤ ) នៃកូរ៉ុមនៃពួកសាវកដប់ពីរនាក់បានថ្លែង ៖

មនុស្សមួយចំនួនទទូចចង់សិក្សាអំពីសាសនាចក្រ ប៉ុន្ដែតែតាមរយៈក្រសែភ្នែកនៃអ្នកដែលបានចាកចេញពីសាសនាចក្រនេះតែប៉ុណ្ណោះ—គឺដូចជាការសម្ភាសពួកសាសន៍យូដាឲ្យយល់ពីព្រះយេស៊ូវគ្រីស្ទអញ្ចឹងដែរ ។ អ្នកចុះចូលតែងតែប្រាប់យើងអំពីខ្លួនពួកគេ ច្រើនជាងអ្វីដែលពួកគេបានចាកចោល ។

( នែល អេ ម៉ាកស្វែល « All Hell Is Moved » [ ការប្រជុំធម្មនិដ្ឋានសាកលវិទ្យាល័យ ព្រិកហាំ យ៉ង់ នៅថ្ងៃទី ៨ ខែ វិច្ឆិកា ឆ្នាំ ១៩៧៧ ] ទំព័រ ៣ នៅលើគេហទំព័រ speeches.byu.edu )

តើប្រភពព័ត៌មានដែលខ្ញុំជ្រើសរើស អាចប៉ះពាល់ដល់ខ្ញុំខាងវិញ្ញាណយ៉ាងដូចម្តេច ?

សូមមើលវីដេអូ « Divinely Appointed Sources » ( ៩:១៦ ) ដែលមាននៅលើគេហទំព័រ ChurchofJesusChrist.org ។ សូមរកមើលពីរបៀបដែលយុវវ័យនៅក្នុងវីដេអូនេះ ទទួលឥទ្ធិពលពីនរណាដែលពួកគេបានជ្រើសរើសស្តាប់ និងកន្លែងដែលពួកគេបានជ្រើសរើសទៅស្វែងរកចម្លើយ ។

វីដេអូ « In Search of Truth » ( ៣:០៣ ) ដែលមាននៅលើគេហទំព័រ ChurchofJesusChrist.org ក៏អាចមានអត្ថប្រយោជន៍ផងដែរ ។

សកម្មភាពរៀនសូត្របន្ថែម

មេរៀនដោយប្រើវត្ថុ

សូមពិចារណាបង្ហាញឃ្លា « សេចក្តីពិតមកពីព្រះ » នៅមួយចំហៀងបន្ទប់ និង « ការកុហកមកពីសាតាំង » នៅមួយចំហៀងបន្ទប់ទៀត ។

សូមអញ្ជើញសិស្សឲ្យស្រមៃថា រាល់ប្រភពព័ត៌មានទាំងអស់នៅលើផែនដី ( រួមទាំងប្រភពដែលបានតែងតាំងដ៏ទេវភាព ក៏ដូចជាប្រភពផ្សេងទៀតដូចជា សៀវភៅ ការចុះផ្សាយនៅលើប្រព័ន្ធផ្សព្វផ្សាយសង្គម ទស្សនៈ ការស្រាវជ្រាវ អត្ថបទព័ត៌មាន ជាដើម ) គឺត្រូវបានតំណាងដោយគម្លាតរវាងឃ្លាទាំងពីរនេះ ។ សូមពន្យល់ថា ប្រសិនបើប្រភពព័ត៌មានមួយផ្ដល់នូវសេចក្តីពិតមកពីព្រះ ច្រើនជាងប្រភពផ្សេងទៀត នោះវានឹងត្រូវបានដាក់នៅជិតឃ្លា « សេចក្តីពិតមកពីព្រះ » ជាងប្រភពដទៃទៀត ។ សូមសួរសិស្សនូវសំណួរខាងក្រោម ៖

• តើប្រភពនៃសេចក្តីពិតអ្វីខ្លះ ដែលគួរតែត្រូវបានដាក់នៅជិតឃ្លា « សេចក្តីពិតមកពីព្រះ » ?

• តើប្រភពណាដែលពិបាកដាក់នៅក្បែរឃ្លាណាមួយនៃឃ្លាទាំងពីរ ព្រោះវាមានទាំងសេចក្តីពិតផង និងកំហុសផង ?