Vlerësoni të Mësuarit Tuaj 7

Veprat e Apostujve 1–28

Pamja

Young women enjoying themselves in Ghana.

Ky mësim ka për qëllim të të ndihmojë t’i vlerësosh synimet që ke vendosur dhe të mësuarit dhe rritjen që ke përjetuar gjatë studimit të Dhiatës së Re.

Përgatitja e nxënësve: Ftojini nxënësit të vijnë të përgatitur për të treguar shembuj nga Veprat e Apostujve të njerëzve që u kthyen në besimin te Jezu Krishti.

Veprimtari të Mundshme të të Mësuarit

Ky mësim ka për qëllim t’i ndihmojë nxënësit të vlerësojnë synimet që kanë vendosur, aftësinë e tyre për të shpjeguar mësimet në Dhiatën e Re, ose mënyrën se si qëndrimet, dëshirat dhe aftësia e tyre për ta jetuar ungjillin po ndryshojnë. Studimi si klasë i kapitujve te Veprat e Apostujve 1–28 mund të ketë theksuar të vërteta të ndryshme nga ato në veprimtaritë vijuese. Nëse po, veprimtaritë mund të përshtaten për t’i përfshirë ato të vërteta.

Tema shtesë të vlerësimit gjenden te pjesa “Veprimtari Plotësuese të të Mësuarit”.

A mund të ndryshojnë njerëzit?

Përfytyro sikur shoku yt të thotë se ka gjëra që ai dëshiron t’i ndryshojë te vetja, por nuk mendon se mund t’i bëjë ato ndryshime.

Si do të përgjigjeshe?
Si ndikon në jetën tënde njohuria se mund të ndryshosh nëpërmjet Shlyerjes së Jezu Krishtit?

Kujtojuni nxënësve përgatitjen e tyre për mësim.

Reflekto për histori nga libri Veprat e Apostujve që e ilustrojnë mënyrën se si njerëzit mund të ndryshojnë për mirë ndërsa vijnë te Krishti dhe bëhen dishepujt e Tij.

Nëse nevojitet, merre parasysh të shqyrtosh një ose më shumë nga shembujt vijues.

Njerëzit që iu bashkuan Kishës: Veprat e Apostujve 2:14, 36–47
Eunuku etiopas: Veprat e Apostujve 8:26–40
Sauli (që u bë Pali): Veprat e Apostujve 9:1–22
Korneli: Veprat e Apostujve 10:1–8, 24–25, 44–48
Gardiani që ruante Palin dhe Silan: Veprat e Apostujve 16:25–36

Duke përdorur një prej këtyre shembujve ose një tjetër nga libri Veprat e Apostujve, përgatit një përgjigje për shokun tënd i cili nuk beson se mund të ndryshojë. Përfshi sa vijon:

Provën e një personi ose njerëzve që ndryshojnë me ndihmën e Shpëtimtarit.
Mënyrën se si Shpëtimtari dhe shërbëtorët që Ai dërgoi ndihmuan në kthimin në besim.
Atë që personi ose njerëzit bënë për të besuar Zotin dhe shërbëtorët e Tij.

Dëgjoni ndërsa nxënësit i thonë përgjigjet e tyre në dyshe ose në grupe të vogla. Nëse atyre u duhen udhëzime shtesë rreth kthimit në besim te Jezu Krishti, merreni parasysh të lexoni së bashku pjesë nga Veprat e Apostujve 9:3–20 dhe t’i ftoni nxënësit të gjejnë hollësi që i ndihmojnë të kuptojnë se si njerëzit mund të ndryshojnë me ndihmën e Shpëtimtarit.

Përsiat për kthimin tënd në besim te Jezu Krishti. Mendo për ftesat për të ndryshuar ose për t’u përmirësuar që ti ke ndier nga Zoti teksa ke studiuar librin Veprat e Apostujve. Përgjigju për pyetjet vijuese në ditarin tënd të studimit.

Paraqitini pyetjet vijuese që nxënësit t’i shohin ndërsa shkruajnë në ditarët e tyre.

Çfarë di ti rreth Jezu Krishtit që të shtyn ta duash dhe ta ndjekësh Atë më plotësisht?
Gjatë muajit të fundit apo më tej, çfarë ndryshimesh ke patur nxitjen nga Fryma e Shenjtë që të bësh? Si u përgjigje?
Si të ka bekuar Ati Qiellor për përpjekjet e tua? Çfarë bëre që solli ndryshimin më të madh?
Çfarë, nëse ka ndonjë gjë, ta ka bërë të vështirë t’i pranosh ftesat për të ndryshuar dhe për t’u përmirësuar? Si mund të kërkosh ndihmë të mëtejshme nga Ati Qiellor?

Vazhdo të kërkosh frymëzim nga Ati Qiellor nëpërmjet Frymës së Shenjtë ndërsa e studion këtë mësim. Përpiqu të përcaktosh atë që Ai dëshiron që ti ta bësh për të ndryshuar dhe për t’u bërë i kthyer më shumë në besimin te Jezu Krishti.Zgjidh një nga veprimtaritë vijuese për ta përfunduar ndërsa reflekton mbi mënyrën se si të afrohesh më pranë Krishtit.

Veprimtaria A: Parimet dhe ordinancat e para të ungjillit të Jezu Krishtit

Te Veprat e Apostujve, shumë njerëz morën ndihmë qiellore për të ndryshuar dhe për t’u bërë të kthyer më shumë në besimin te Jezu Krishti nëpërmjet marrjes së parimeve dhe ordinancave të para të ungjillit.

Udhëzuesi për Shkrimet e Shenjta shpjegon mënyrën se si këto parime dhe ordinanca na ndihmojnë të kthehemi në besimin te Jezu Krishti.

“Pendimi, pagëzimi për heqjen e mëkateve, marrja e Frymës së Shenjtë nëpërmjet vënies së duarve dhe besimi i vazhdueshëm në Zotin Jezu Krisht e bëjnë kthimin në besim të plotë. Një njeri i natyrshëm do të shndërrohet në një njeri të ri, i cili është i shenjtëruar dhe i pastër, i lindur përsëri në Jezu Krishtin ( 2 Kor. 5:17 ; Mosia 3:19).”

(Udhëzuesi për Shkrimet e Shenjta, “ Kthim, Kthyer (i) ”, scriptures.ChurchofJesusChrist.org)

Reflekto mbi ndodhinë që zgjodhe e cila ilustroi dikë që ndryshoi me ndihmën e Zotit.

Çfarë roli luajtën parimet dhe ordinancat e para të ungjillit në kthimin e tyre në besim?
Si të kanë ndihmuar parimet dhe ordinancat e para të ungjillit ty ose të tjerët të bëheni më shumë të kthyer në besimin te Shpëtimtari?

Përfytyro sikur misionarët vendorë të kërkojnë ndihmë për dikë që po i japin mësim. Ata duan që ti të tregosh mënyrën se si parimet dhe ordinancat e para të ungjillit mund të ndihmojnë për të forcuar kthimin në besim te Jezu Krishti dhe të ftojnë ndihmën e Tij për të bërë ndryshimet e nevojshme në jetën tonë. Shkruaj një shpjegim për këtë person sikur të flisje drejtpërdrejt me të. Përdor të paktën një shembull nga libri Veprat e Apostujve dhe ndonjë përvojë vetjake që ti e ndien se do të ishte e dobishme.

Jepuni nxënësve kohë që t’i hedhin në letër mendimet e tyre. Më pas ftojini ata t’ia japin një shoku shpjegimet e tyre. Ecni nëpër klasë dhe dëgjojini shpjegimet e tyre. Nëse nxënësve u nevojiten mësime të mëtejshme për parimet dhe ordinancat e para të ungjillit, merreni parasysh t’i përdorni këto fragmente: Veprat e Apostujve 19:1–7 ; 2 Nefi 31:13–21 ; 3 Nefi 27:13–22 .

Veprimtaria B: Studimi i shkrimeve të shenjta dhe kthimi në besim

Një veprim i rëndësishëm që mund të ndërmarrim për ta forcuar kthimin tonë në besim te Jezu Krishti është t’i studiojmë vazhdimisht shkrimet e shenjta. Mendo për mënyrën se si ndodhitë vijuese nga libri Veprat e Apostujve tregojnë rëndësinë e studimit të shkrimeve të shenjta për kthimin në besim.

Filipi dhe burri etiopas: Veprat e Apostujve 8:26–40

Pali dhe shenjtorët në Thesaloniki dhe Berea: Veprat e Apostujve 17:1–14

Përsiat për mënyrën se si studimi i shkrimeve të shenjta të ka ndihmuar në kthimin tënd në besim te Shpëtimtari.

Përfytyro sikur udhëheqësi i Të Rinjve ose udhëheqësja e Të Rejave të kërkon t’i ndihmosh të rinjtë në lagjen ose degën tënde të studiojnë shkrimet e shenjta dhe ta forcojnë kthimin e tyre në besim te Jezu Krishti. Çfarë burimi mund të krijosh për t’i shtyrë ata? Gjej disa minuta për ta përvijuar burimin tënd në ditarin tënd të studimit. Mund të jetë një material filmik, një artikull, një bisedë, një faqe interneti ose një burim tjetër.

Burimi yt mund të përfshijë cilindo nga burimet vijuese:

Një shembull nga libri Veprat e Apostujve ose një libër tjetër i shkrimit të shenjtë që tregon rëndësinë e studimit të shkrimeve të shenjta.
Një shembull ose model të një aftësie nga shkrimet e shenjta që ti e përdor, që të ndihmon ose një përshkrim të mënyrës se si ti studion.
Një përshkrim të një përvoje ku studimi i shkrimeve të shenjta të ndihmoi ty ose dikë që ti njeh të bëheni më shumë të kthyer në besimin te Shpëtimtari.
Dëshminë tënde vetjake për fuqinë e studimit të shkrimeve të shenjta.

Ftojini nxënësit të bëjnë sa vijon në ditarët e tyre të studimit.

Kërko ndihmën e Atit Qiellor nëpërmjet Frymës së Shenjtë ndërsa shkruan ndonjë veprim që ti e ndien se duhet të ndërmarrësh për t’u bërë më shumë i/e kthyer në besimin te Jezu Krishti. Shpëtimtari do të të ndihmojë teksa ti përpiqesh t’i ndjekësh këto mbresa. Merre parasysh t’ia tregosh mbresat e tua një prindi ose një udhëheqësi të besuar të Kishës. Kërkoju atyre të të ndihmojnë t’i ndjekësh këto mbresa.

Nxitini nxënësit të veprojnë sipas mbresave që morën nga Ati Qiellor nëpërmjet Frymës së Shenjtë. Dëshmoni që Perëndia do t’i ndihmojë ata ndërsa kërkojnë t’i ndjekin ato mbresa.

Veprimtari Plotësuese të të Mësuarit

Veprat e Apostujve 10 – 11 ; Veprat e Apostujve 15 ; Veprat e Apostujve 27 . Zbulesa

Merreni parasysh ta vlerësoni atë që nxënësit dinë rreth mënyrës se si zbulesa u vjen udhëheqësve të Kishës. Ftojini ata t’i shqyrtojnë shënimet që mbajtën nga mësimet që trajtojnë kapitujt te Veprat e Apostujve 10 ; 11 ; 15 dhe 27 . Jepuni nxënësve mundësi që t’i organizojnë dhe paraqesin mendimet e tyre. Një mënyrë mund të jetë që t’u kërkoni nxënësve të shkruajnë një artikull të shkurtër për revistën Për Forcën e Rinisë që shpjegon mënyrat se si merret zbulesa për të gjithë Kishën dhe përse këto të vërteta janë të rëndësishme për t’u kuptuar.

Gjetja e paqes te Krishti nëpërmjet mundimeve

Ftojini nxënësit të kujtojnë individë nga Veprat e Apostujve që patën mundësi të gjenin paqe në Krishti pavarësisht nga shtrëngimi, siç janë Pjetri dhe Gjoni te Veprat e Apostujve 5:40–42 , Stefani te Veprat e Apostujve 6 – 7 , Pjetri dhe anëtarë të tjerë të Kishës te Veprat e Apostujve 12:1–19 ose Pali te Veprat e Apostujve 22 – 28 . Ftojini nxënësit të tregojnë përvoja të mënyrës se si ata e kanë gjetur paqen në Krisht në kohë mundimesh. Ata mund të përcaktojnë veprime nga ndodhitë te Veprat e Apostujve dhe përvoja vetjake që mund t’i ndihmojnë të përballen me sprovat e ardhshme. Ftojini ata të kërkojnë frymëzim nga Ati Qiellor nëpërmjet Frymës së Shenjtë dhe të bëjnë një plan për atë që ata do të bëjnë në këto sprova të ardhshme për të gjetur paqe në Krisht.