ចំណេះចំណានខាងគោលលទ្ធិ ៖ អេភេសូរ ១:១០

ការស្ថារឡើងវិញនៃរបស់ទាំងអស់

នៅក្នុងការសិក្សារបស់អ្នកអំពី អេភេសូរ ១ អ្នកបានរៀនអំពីគោលលទ្ធិនៃការស្ដារឡើងវិញ ។ មេរៀននេះនឹងផ្តល់ឱកាសឲ្យអ្នកបង្កើនភាពស្ទាត់នៃការបង្រៀនរបស់អ្នកនៅក្នុង អេភេសូរ ១:១០ ដោយការទន្ទេញឲ្យចាំនូវសេចក្ដីយោង និងឃ្លាបទគម្ពីរគន្លឹះ ការពន្យល់ពីគោលលទ្ធិ និងការអនុវត្តគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតជាក់ស្ដែង ។

ការចងចាំពីគោលបំណងនៃចំណេះចំណានខាងគោលលទ្ធិ ។ ប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់បានពន្យល់ថា ចំណេះចំណានខាងគោលលទ្ធិ « នឹងផ្ដោតទៅលើការស្ថាបនា និងការពង្រឹងដល់សេចក្ដីជំនឿរបស់សិស្សយើងលើព្រះយេស៊ូវគ្រីស្ទ ហើយការពារពួកគេដោយសមត្ថភាពកាន់តែខ្លាំងដើម្បីរស់នៅ និងអនុវត្តដំណឹងល្អនៅក្នុងជីវិតពួកគេ ។ ពេលប្រើបទគម្ពីរ និងពាក្យសម្ដីរបស់ពួកព្យាការី នោះពួកគេនឹងរៀនអំពីរបៀបដើម្បីធ្វើសកម្មភាពដោយសេចក្ដីជំនឿទៅលើព្រះគ្រីស្ទ ដើម្បីទទួលបានចំណេះដឹងខាងវិញ្ញាណ និងការយល់ដឹងអំពីដំណឹងល្អរបស់ទ្រង់ ។ ហើយពួកគេនឹងមានឱកាសដើម្បីរៀនអំពីរបៀបអនុវត្តគោលលទ្ធិនៃព្រះគ្រីស្ទ និងគោលការណ៍ដំណឹងល្អចំពោះសំណួរ និងឧបសគ្គនានាដែលពួកគេស្ដាប់ឮ និងមើលឃើញជារៀងរាល់ថ្ងៃនៅក្នុងចំណោមមិត្តភក្ដិ និងប្រព័ន្ធផ្សព្វផ្សាយសង្គម » ( អិម រ័សុល បាឡឺដ « « The Opportunities and Responsibilities of CES Teachers in the 21st Century » [ សុន្ទរកថាទៅកាន់គ្រូបង្រៀនសាសនា ស៊ី.អ៊ី.អេស ថ្ងៃទី ២៦ ខែ កុម្ភៈ ឆ្នាំ ២០១៦ ] នៅលើគេហទំព័រ broadcasts.ChurchofJesusChrist.org ) ។

ការរៀបចំរបស់សិស្ស ៖ សូមអញ្ជើញសិស្សឲ្យមករៀនដោយបានត្រៀមខ្លួន ដើម្បីចែកចាយសេចក្ដីពិតយ៉ាងតិចចំនួនពីរដែលពួកគេមានអារម្មណ៍ថាមនុស្សគ្រប់គ្នាត្រូវដឹង និងយល់អំពីការស្ដារឡើងវិញនេះ ។

សកម្មភាពរៀនសូត្រដែលអាចមាន

វគ្គបទគម្ពីរចំណេះចំណានខាងគោលលទ្ធិនេះត្រូវបានរៀបចំឡើង ដើម្បីបង្រៀនបន្ទាប់ពីមេរៀន « អេភេសូរ ១ » ដែលជាមេរៀនបរិបទសម្រាប់វគ្គបទគម្ពីរចំណេះចំណានខាងគោលលទ្ធិ អេភេសូរ ១:១០ ។ ប្រសិនបើមេរៀនចំណេះចំណានខាងគោលលទ្ធិនេះត្រូវប្តូរទៅសប្តាហ៍ផ្សេង នោះសូមប្រាកដថា អ្នកបានបង្រៀនមេរៀនតាមបរិបទដែលដូចគ្នានៅអំឡុងសប្តាហ៍នោះផងដែរ ។

ពន្យល់ និងទន្ទេញ

សូមស្រមៃថា មិត្តរួមថ្នាក់មួយចំនួនបានអវត្តមាននៅថ្ងៃដែលថ្នាក់សិក្ខាសាលារបស់អ្នកបានសិក្សាគោលលទ្ធិនៃការស្ដារឡើងវិញនៅក្នុង អេភេសូរ ១ ។ គ្រូបង្រៀនថ្នាក់សិក្ខាសាលារបស់អ្នកសុំឲ្យអ្នកចំណាយពេលពីរបីនាទី ដើម្បីសង្ខេបការបង្រៀនដ៏សំខាន់បំផុតដែលអ្នកមានអារម្មណ៍ថា សិស្សទាំងអស់ត្រូវដឹង និងចងចាំអំពីគោលលទ្ធិនៃការស្ដារឡើងវិញ និងការបង្រៀនពី អេភេសូរ ១:១០ ។

ដើម្បីឆ្លើយតប សិស្សអាចប្រើប្រាស់អ្វីដែលពួកគេបានធ្វើសម្រាប់ការរៀបចំរបស់សិស្សនៅមេរៀននេះ ។ សូមស្តាប់ដោយយកចិត្តទុកដាក់ចំពោះចម្លើយរបស់សិស្ស ហើយវាយតម្លៃការយល់ដឹងរបស់ពួកគេ ។ ប្រសិនបើចាំបាច់ សូមពិនិត្យមើលបទគម្ពីរ និងគោលការណ៍មកពីមេរៀនមុននេះ ។

• តើសេចក្ដីពិតសំខាន់ៗមួយណាអំពីការស្ដារឡើងវិញនៃដំណឹងល្អ ដែលអ្នកនឹងចែកចាយ ? ហេតុអ្វី ?

• តើអ្នកនឹងពន្យល់ពីការបង្រៀនដែលមាននៅក្នុង អេភេសូរ ១:១០ ដោយពាក្យសម្ដីផ្ទាល់របស់អ្នកយ៉ាងដូចម្ដេច ?

• តើការយល់ដឹងអំពីការស្ដារឡើងវិញអាចជះឥទ្ធិពលលើការយល់ដឹង និងអារម្មណ៍របស់នរណាម្នាក់ចំពោះព្រះវរបិតាសួគ៌ និងព្រះយេស៊ូវគ្រីស្ទយ៉ាងដូចម្តេច ?

សូមផ្តល់ឱកាសឲ្យសិស្សទន្ទេញសេចក្តីយោងសម្រាប់វគ្គបទគម្ពីរចំណេះចំណានខាងគោលលទ្ធិ អេភេសូរ ១:១០ និងឃ្លាបទគម្ពីរគន្លឹះដែលភ្ជាប់មកជាមួយវគ្គបទគម្ពីរនេះ ។ ខាងក្រោមនេះគឺជាឧទាហរណ៍មួយនៃរបៀបធ្វើដូច្នេះ ។

នៅក្នុងសៀវភៅកំណត់ហេតុការសិក្សារបស់អ្នក ឬនៅលើឧបករណ៍ឌីជីថលរបស់អ្នក សូមកត់ត្រាឃ្លាបទគម្ពីរគន្លឹះ និងសេចក្ដីយោងសម្រាប់វគ្គបទគម្ពីរចំណេះចំណានខាងគោលលទ្ធិ អេភេសូរ ១:១០ ដោយបែងចែកវាជាបួនផ្នែកដូចបានបង្ហាញខាងក្រោម ៖

• ការកាន់កាប់ត្រួតត្រាក្នុងកាលដែលពេលពេញកំណត់បានមកដល់

• ដើម្បីនឹងបំព្រួម

• គ្រប់ទាំងអស់ក្នុងព្រះគ្រីស្ទ

• អេភេសូរ ១:១០

សូមបាំងជួរទី ២–៤ ហើយនិយាយឡើងវិញនូវជួរទី ១ នៅក្នុងចិត្តរបស់អ្នក រហូតដល់អ្នកទន្ទេញវាចាំ ។ សូមប្តូរទៅជួរទីពីរ ហើយធ្វើដដែលឡើងវិញម្តងទៀត ។ សូមធ្វើដូចគ្នាសម្រាប់ជួរទី ៣ និងទី ៤ ។ នៅពេលអ្នកមានទំនុកចិត្តថា អ្នកបានទន្ទេញចាំពាក្យទាំងបួនជួរហើយ សូមសរសេរវាទាំងអស់នៅក្នុងសៀវភៅកំណត់ហេតុការសិក្សារបស់អ្នកដោយមិនមើល ។ សូមធ្វើដដែលៗឡើងវិញម្ដងហើយម្ដងទៀតប្រសិនបើចាំបាច់ រហូតដល់អ្នកអាចសរសេរឃ្លាបទគម្ពីរគន្លឹះទាំងមូល និងសេចក្ដីយោងចេញពីការចងចាំបាន ។

សកម្មភាពពីមុនអាចត្រូវបានកែសម្រួលដោយបង្ហាញផ្នែកដែលបែងចែកទាំងបួន និងចាត់ក្រុមសិស្សផ្សេងគ្នាទៅផ្នែកនីមួយៗ ។ បន្ទាប់មកចង្អុលទៅក្រុមមួយ ហើយឲ្យសិស្សក្នុងក្រុមនោះសូត្រផ្នែករបស់ខ្លួនឲ្យឮៗ ។ សូមធ្វើបែបនេះម្តងហើយម្ដងទៀតសម្រាប់ក្រុមទាំងអស់ ។ សូមចង្អុលទៅក្រុមផ្សេងៗបីបួនដង ដើម្បីជួយសិស្សឲ្យហាត់និយាយ និងស្តាប់ឃ្លាទាំងនេះ ។ បន្ទាប់មក សូមឲ្យសិស្សហាត់សូត្រឃ្លាទាំងមូល និងសេចក្តីយោងជាមួយគ្នា ។ សូមធ្វើបែបនេះឲ្យបានច្រើនដងតាមតម្រូវការឲ្យសិស្សទន្ទេញវគ្គបទគម្ពីរចំណេះចំណានខាងគោលលទ្ធិនេះ និងឃ្លាបទគម្ពីរគន្លឹះរបស់វា ។

រៀនអនុវត្ត

សូមពិចារណាមើលកថាខណ្ឌទី ៥–១២ នៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ។ សូមជ្រើសរើសគោលការណ៍មួយក្នុងចំណោមគោលការណ៍ទាំងបីនៃការទទួលបានចំណេះដឹងខាងវិញ្ញាណ ហើយបង្កើតរូបតំណាង ឬការបង្ហាញរូបភាពសាមញ្ញ ដើម្បីរំឭកអ្នកអំពីគោលការណ៍នេះ និងគោលគំនិតរបស់វា ។ ឧទាហរណ៍ សម្រាប់គោលការណ៍នេះ « សូមពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច » អ្នកអាចពិចារណាបង្កើតរូបភាពដូចតទៅនេះ ៖

ដើម្បីធានាបាននូវពេលវេលាគ្រប់គ្រាន់សម្រាប់ការរៀនអនុវត្តខាងក្រោម សូមពិចារណាផ្តល់ឲ្យសិស្សនូវពេលវេលាកំណត់សម្រាប់ពីរទៅបួននាទី ដើម្បីបង្កើតជារូបភាពតំណាងដ៏សាមញ្ញមួយនៃគោលការណ៍នៃការទទួលបានចំណេះដឹងខាងវិញ្ញាណ ។ នៅពេលសិស្សបានបញ្ចប់ សូមអញ្ជើញសិស្សពីរបីនាក់ឲ្យចែកចាយរូបភាពរបស់ពួកគេ ហើយពន្យល់ពីអ្វីដែលពួកគេបានបង្កើតតំណាងឲ្យគោលការណ៍ដែលពួកគេបានជ្រើសរើស ។

សូមអានស្ថានភាពខាងក្រោម ដើម្បីជួយអ្នកឲ្យអនុវត្តគោលការណ៍នៃការទទួលបានចំណេះដឹងខាងវិញ្ញាណ និងគោលលទ្ធិដែលបានបង្រៀននៅក្នុង អេភេសូរ ១:១០ ថា អំឡុងគ្រាកាន់កាប់ត្រួតត្រា ក្នុងកាលដែលពេលពេញកំណត់បានមកដល់ ដើម្បីនឹងបំព្រួមគ្រប់ទាំងអស់ក្នុងព្រះគ្រីស្ទ ទាំងរបស់នៅស្ថានសួគ៌ និងរបស់នៅផែនដីផង ។ បន្ទាប់មកសូមប្រើស្ថានភាពនេះ ឬបង្កើតស្ថានភាពមួយរបស់អ្នកផ្ទាល់ ដើម្បីឆ្លើយសំណួរដែលមាន ។

មិត្តភក្តិរបស់អ្នកបានទទួលបុណ្យជ្រមុជទឹកជាមួយគ្រួសាររបស់នាង ហើយមានអារម្មណ៍ជឿជាក់នៅពេលនោះថា នាងកំពុងធ្វើតាមគំរូរបស់ព្រះយេស៊ូវគ្រីស្ទដោយចូលរួមនឹងសាសនាចក្ររបស់ទ្រង់ ។ ប៉ុន្តែនៅប៉ុន្មានឆ្នាំកន្លងមកចាប់តាំងពីនាងទទួលបុណ្យជ្រមុជទឹក ជាញឹកញាប់នាងត្រូវបានមិត្តភក្តិផ្សេងទៀតល្បួងឲ្យបំពានបទបញ្ញត្តិទាំងឡាយ ។ នាងចាប់ផ្ដើមងឿងឆ្ងល់ថា តើនេះពិតជាសាសនាចក្ររបស់ព្រះគ្រីស្ទឬអត់ ហើយតើវាមានតម្លៃដែរឬទេក្នុងការរក្សាភាពស្មោះត្រង់ចំពោះដំណឹងល្អនេះ ។

ខណៈមានសេចក្ដីពិតមួយចំនួនដែលអាចជួយមិត្តភក្ដិរបស់អ្នក សូមពិចារណាអំពីរបៀបដែលគោលលទ្ធិនៃការស្ដារឡើងវិញ និងគ្រាកាន់កាប់ត្រួតត្រា ក្នុងកាលដែលពេលពេញកំណត់អាចពង្រឹង និងលើកទឹកចិត្តនាង ។

ជំនួសឲ្យការសួរសិស្សឲ្យឆ្លើយសំណួរខាងក្រោមទាំងអស់ក្នុងពេលតែមួយ សូមពិចារណាបន្ថែមភាពចម្រុះ ដើម្បីជួយសិស្សឲ្យមានបទពិសោធន៍ដែលមិនអាចបំភ្លេចបាន ។ ឧទាហរណ៍ សិស្សអាចត្រូវបានអញ្ជើញឲ្យធ្វើការជាគូ ឬជាក្រុមតូចៗ ដើម្បីពិភាក្សាពីសំណួរនេះ ។ ពួកគេក៏អាចសម្ដែងចេញពីស្ថាននេះដោយប្រើចម្លើយរបស់ពួកគេចំពោះសំណួរមួយចំនួនខាងក្រោម ។ ជាជម្រើសមួយផ្សេងទៀត ដៃគូ ឬក្រុមតូចៗអាចចាត់តាំងតែគោលការណ៍មួយនៃការទទួលបានចំណេះដឹងខាងវិញ្ញាណ ដើម្បីឆ្លើយតប និងបន្ទាប់មកបង្ហាញគំនិតរបស់ពួកគេទៅកាន់ថ្នាក់រៀន ។

ធ្វើសកម្មភាពដោយសេចក្ដីជំនឿ

• តើជំហានអ្វីខ្លះដែលអ្នកអាចលើកទឹកចិត្តមិត្តភក្តិរបស់អ្នកឲ្យធ្វើ ដើម្បីឲ្យនាងធ្វើសកម្មភាពដោយសេចក្ដីជំនឿ ?

• តើការធ្វើសកម្មភាពដោយសេចក្ដីជំនឿអាចជួយមិត្តភក្តិរបស់អ្នកដោះស្រាយសំណួរ និងកង្វល់របស់នាងយ៉ាងដូចម្ដេច ?

ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច

• តើអ្នកដឹងអ្វីខ្លះអំពីការបង្រៀនរបស់ព្រះអង្គសង្គ្រោះអំពីការស្ដារឡើងវិញ ?

• តើការរក្សាទស្សនវិស័យដ៏នៅអស់កល្បជានិច្ចមួយអាចជួយទាំងអ្នក និងមិត្តភក្តិរបស់អ្នកក្នុងស្ថានភាពនេះដោយរបៀបណា ?

ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព

• តើសេចក្ដីពិតដែលបានរកឃើញនៅក្នុង អេភេសូរ ១:១០ អាចជួយក្នុងស្ថានភាពនេះដោយរបៀបណា ?

• ប្រសិនបើអ្នកមានពេលបន្ថែមមុនឆ្លើយតបទៅមិត្តភក្តិរបស់អ្នក តើអ្នកអាចពិនិត្យមើល ឬសិក្សាអ្វីខ្លះ ? តើប្រភពអ្វីខ្លះដែលអ្នកអាចអញ្ជើញមិត្តភក្តិរបស់អ្នកឲ្យសិក្សាដោយខ្លួនឯង ? ហេតុអ្វី ?

បន្ទាប់ពីសិស្សមានពេលសម្រាប់សញ្ជឹងគិត និងឆ្លើយតបនឹងសំណួរខាងលើហើយ សូមពិចារណាអញ្ជើញពួកគេឲ្យចែកចាយនូវស្ថានភាពដែលពួកគេបានប្រើ និងដើម្បីពិភាក្សាអំពីចម្លើយរបស់ពួកគេ ។

ការរំឭកចំណេះចំណានខាងគោលលទ្ធិ

ដើម្បីជួយសិស្សឲ្យពិនិត្យមើលវគ្គបទគម្ពីរចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ អេភេសូរ ១:១០ នៅក្នុងមេរៀននាពេលខាងមុខ សូមពិចារណាប្រើសកម្មភាពការសូត្របួនផ្នែកដូចគ្នាដែលបានណែនាំនៅដើមមេរៀននេះ ។