កាឡាទី ៦

« ដ្បិតពូជណាដែលមនុស្សព្រោះចុះ នោះនឹងច្រូតបានពូជនោះឯងវិញ »

Woman and girl harvest and garden in Ecuador.

តើអ្នកធ្លាប់ឆ្ងល់ថាតើការខិតខំរបស់អ្នកដើម្បីរស់នៅតាមដំណឹងល្អនៃព្រះយេស៊ូវគ្រីស្ទ នឹងនាំទៅរកគោលដៅដ៏នៅអស់កល្បជានិច្ចរបស់អ្នកដែរឬទេ ? ប៉ុលបានសរសេរទៅពួកបរិសុទ្ធនៅកាឡាទី ដើម្បីជួយពួកគេឲ្យដឹងថា របៀបដែលយើងរស់នៅប្រចាំថ្ងៃជះឥទ្ធិពលថាតើព្រះអង្គសង្គ្រោះនឹងប្រទានពរដល់យើងនូវ « ជីវិតអស់កល្បជានិច្ច » ដែរឬទេ ( កាឡាទី ៦:៨ ) ។ មេរៀននេះអាចជួយអ្នកឲ្យស្គាល់សកម្មភាពដែលអ្នកត្រូវការដើម្បីសម្រេចបាននូវគោលដៅដ៏នៅអស់កល្បជានិច្ចរបស់អ្នក ។

ការលើកទឹកចិត្តឲ្យមានការអនុវត្ត ។ គោលបំណងនៃការបង្រៀនដំណឹងល្អគឺ ដើម្បីជួយសិស្សឲ្យអនុវត្តតាមគោលលទ្ធិ និងគោលការណ៍ទាំងឡាយដែលមាននៅក្នុងព្រះគម្ពីរ ។ សំណួរ និងសកម្មភាពនានាដែលលើកទឹកចិត្តឲ្យមានការអនុវត្ត អាចជួយសិស្សឲ្យឃើញពីរបៀបអនុវត្តតាមគោលការណ៍ទាំងនេះ ទៅតាមកាលៈទេសៈផ្ទាល់ខ្លួនរបស់ពួកគេ ។

ការរៀបចំរបស់សិស្ស ៖ សូមអញ្ជើញសិស្សឲ្យអាន កាឡាទី ៦:៧–៩ ហើយមករៀនដោយបានត្រៀមខ្លួនដើម្បីចែកចាយពីអារម្មណ៍របស់ពួកគេ អំពីការបង្រៀននៅក្នុងខគម្ពីរទាំងនេះអាចនឹងជះឥទ្ធិពលដល់ការសម្រេចចិត្តប្រចាំថ្ងៃរបស់ពួកគេ ។

សកម្មភាពរៀនសូត្រដែលអាចមាន

គោលដៅដ៏នៅអស់កល្បជានិច្ច

សេចក្តីថ្លែងការណ៍ខាងក្រោមដោយអែលឌើរ ឃ្វីនថិន អិល ឃុក អាចត្រូវបានប្រើ ដើម្បីជួយសិស្សឲ្យចាប់ផ្តើមគិតអំពីផលប៉ះពាល់នៃការសម្រេចចិត្តប្រចាំថ្ងៃរបស់យើង ចំពោះលទ្ធផលដែលយើងនឹងទទួលបាន ។ គំនិតមួយផ្សេងទៀតដើម្បីចាប់ផ្តើមមេរៀនអាចរកឃើញនៅក្នុងសកម្មភាព « កាឡាទី ៦:៧–៨ ។ ការដាំដុះ និងការប្រមូលផលគ្រាប់ពូជ » ដែលមាននៅផ្នែក « សកម្មភាពរៀនសូត្របន្ថែម » ។

អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់បានចែកចាយការសន្ទនាដែលមិនអាចបំភ្លេចបាន ដែលគាត់ធ្លាប់មានជាមួយយុវជនម្នាក់ ។

សូមមើលវីដេអូ « Choose Wisely » ដែលមាននៅលើគេហទំព័រ ChurchofJesusChrist.org ចាប់ពីលេខកូដម៉ោង ៣:០៣ ដល់ ៤:៥២ ឬអានសេចក្តីថ្លែងការណ៍ដូចខាងក្រោម ។ សូមរកមើលថាតើគោលដៅរបស់យុវជននេះជាអ្វី ហើយតើការយល់ខុសអ្វីដែលគាត់ប្រហែលជាមានអំពីការសម្រេចបានគោលដៅទាំងនោះ ។

Official portrait of Elder Quentin L. Cook. Called to the Quorum of the Twelve Apostles on 6 October 2007.

ថ្មីៗនេះ ខ្ញុំបានជួបនឹងយុវជនដ៏សង្ហាម្នាក់ ។ គោលដៅរបស់គាត់គឺការទៅបម្រើបេសកកម្ម ទទួលការសិក្សា រៀបការក្នុងព្រះវិហារបរិសុទ្ធ ហើយមានក្រុមគ្រួសាររីករាយដ៏ស្មោះត្រង់មួយ ។ ខ្ញុំពេញចិត្តគោលដៅរបស់គាត់ ។ ប៉ុន្តែនៅពេលបន្តការសន្ទនា វាបង្ហាញថាការប្រព្រឹត្តិ និងជម្រើសរបស់គាត់ពុំស្របទៅនឹងគោលដៅគាត់ឡើយ ។ ខ្ញុំឃើញថាគាត់ពិតជាចង់ទៅបម្រើបេសកកម្ម ហើយចៀសវាងពីអំពើរំលងធ្ងន់ធ្ងរនានា ដែលនឹងបង្អាក់គាត់ពីបេសកកម្ម ប៉ុន្តែការប្រព្រឹត្តិរបស់គាត់ពីមួយថ្ងៃទៅមួយថ្ងៃពុំរៀបចំខ្លួនគាត់សម្រាប់ឧបសគ្គខាងសាច់ឈាម សតិអារម្មណ៍ សង្គម បញ្ញា និងខាងវិញ្ញាណដែលគាត់នឹងជួបប្រទះឡើយ ។ គាត់ពុំទាន់ចេះធ្វើការដោយព្យាយាមនៅឡើយទេ ។ គាត់ពុំយកចិត្តទុកដាក់នឹងការសិក្សា ឬចូលរៀនថ្នាក់សិក្ខាសាលាឡើយ ។ គាត់ទៅព្រះវិហារ តែពុំអានព្រះគម្ពីរមរមនទេ ។ គាត់ចំណាយពេលច្រើនលេងវីដេអូហ្គេម និងប្រើប្រព័ន្ធផ្សព្វផ្សាយសង្គម ។ គាត់ទំនងជាគិតថាការចេញបម្រើបេសកកម្មដ៏សាមញ្ញមួយគឺគ្រប់គ្រាន់ហើយមើលទៅ ។

( ឃ្វីនថិន អិល ឃុក « Choose Wisely » Ensign ឬ Liahona ខែ វិច្ឆិកា ឆ្នាំ ២០១៤ ទំព័រ ៤៧ )

• តើយុវជនម្នាក់នេះអាចយល់ខុសអ្វីខ្លះ អំពីការសម្រេចបាននូវគោលដៅរបស់ខ្លួន ?

នៅក្នុងសៀវភៅកំណត់ហេតុការសិក្សារបស់អ្នក សូមសរសេរសង្ខេបៗពីគោលដៅដែលអ្នកមាន ដែលអ្នកនឹងចាត់ទុកថាមានសារៈសំខាន់ដ៏អស់កល្បជានិច្ច ។ សូមគិតអំពីមូលហេតុដែលអ្នកចង់សម្រេចបាននូវគោលដៅទាំងនេះ ។ សូមសញ្ជឹងគិតពីរបៀបដែលការប្រព្រឹត្តិប្រចាំថ្ងៃរបស់អ្នកអាចនាំអ្នកឆ្ពោះទៅរក ឬចាកឆ្ងាយពីគោលដៅសំខាន់ៗដ៏នៅអស់កល្បជានិច្ចទាំងនេះ ។ កាលអ្នកសិក្សា សូមរកមើលសេចក្ដីពិតដែលអាចជួយអ្នកឲ្យសម្របសកម្មភាពប្រចាំថ្ងៃរបស់អ្នកបានកាន់តែប្រសើរឡើង ជាមួយនឹងលទ្ធផលដ៏សំខាន់អស់កល្បដែលអ្នកចង់បាន ។

ក្រឹត្យវិន័យនៃការប្រមូលផល

ពួកបរិសុទ្ធនៅកាឡាទីត្រូវបានទទួលការបង្រៀនខុសឆ្គង ដែលបណ្តាលឲ្យមនុស្សជាច្រើនត្រូវបានដឹកនាំឲ្យវង្វេង ( សូមមើល កាឡាទី ១:៦–៩ ) ។ អ្នកខ្លះបានជឿ ហើយបង្រៀនគោលលទ្ធិខុសឆ្គងដែលអ្នកប្រែចិត្តជឿជាសាសន៍ដទៃត្រូវកាត់ស្បែក ដើម្បីបានសង្គ្រោះ ( សូមមើល កាឡាទី ៦:១២ ; កិច្ចការ ១៥:១ ) ។ អ្នកផ្សេងទៀតបានជឿដោយខុសឆ្គងថា ព្រះគុណនៃព្រះគ្រីស្ទប្រទានឲ្យពួកគេរួចផុតពីអំពើបាប ( សូមមើល កាឡាទី ៥:១៣ ) ។ បន្ទាប់ពីនិយាយអំពីជំនឿខុសឆ្គងទាំងនេះ និងលើកទឹកចិត្តដល់ពួកបរិសុទ្ធឲ្យជួយអ្នកដែលវង្វេងខាងវិញ្ញាណ ប៉ុលបានបង្រៀនសេចក្ដីពិតសំខាន់មួយដើម្បីជួយប្រជាជនឲ្យយល់ពីឥទ្ធិពលនៃទង្វើរបស់ពួកគេ ។

សូមអាន កាឡាទី ៦:៧–៨ ។ សូមរកមើលសេចក្ដីពិតដែលប៉ុលបានបង្រៀន ដែលអាចជះឥទ្ធិពលលើសកម្មភាពប្រចាំថ្ងៃរបស់យើង ។ សូមចំណាំថា សាបព្រោះ សំដៅលើការដាំដុះ ហើយ ការច្រូតកាត់ សំដៅលើការប្រមូលផល ។

• តើអ្នកនឹងពន្យល់ពីការបង្រៀនរបស់ប៉ុលជាពាក្យសម្តីផ្ទាល់របស់អ្នកយ៉ាងដូចម្តេច ?

សេចក្តីពិតមួយដែលយើងអាចរៀនពី កាឡាទី ៦:៧ គឺថា ដ្បិតពូជណាដែលមនុស្សព្រោះចុះ នោះនឹងច្រូតបានពូជនោះឯងវិញ ។ ពេលខ្លះគំនិតនេះត្រូវបានហៅថាជាក្រឹត្យវិន័យនៃការប្រមូលផល ។

• តើគំរូអ្វីខ្លះដែលអ្នកបានឃើញពីសេចក្ដីពិតនេះក្នុងជីវិតរបស់អ្នក ឬជីវិតអ្នកដទៃ ?

• តើការយល់ដឹងអំពីសេចក្ដីពិតនេះអាចជះឥទ្ធិពលលើការសម្រេចចិត្ត ដែលអ្នកធ្វើនៅក្នុងជីវិតរបស់អ្នកយ៉ាងដូចម្តេច ?

របៀបមួយទៀតសម្រាប់ការសិក្សាខគម្ពីរខាងក្រោម សូមពិចារណាបង្ហាញវីដេអូ « Alma Teaches Corianton about Resurrection and Judgment | Alma 39–41 » ចាប់ពីលេខកូដម៉ោង ១:២៧ ដល់ ២:៣៥ ។ វីដេអូនេះមាននៅលើគេហទំព័រ ChurchofJesusChrist.org ។

ការបង្រៀនរបស់អាលម៉ាដល់កូនប្រុសរបស់លោក ដែលមានឈ្មោះថា កូរីអានតុន នៅក្នុងព្រះគម្ពីរមរមន អាចជួយយើងឲ្យយល់កាន់តែច្បាស់អំពីឥទ្ធិពលដ៏នៅអស់កល្បជានិច្ចនៃក្រឹត្យវិន័យនៃការប្រមូលផល ឬអ្វីដែល អាលម៉ាហៅថាជា « ផែនការនៃការកសាងឡើងវិញ » ។ សូមអាន អាលម៉ា ៤១:៣–៦, ១០–១៥ ដោយស្វែងរកសេចក្ដីពិតដែលពង្រឹងការយល់ដឹងរបស់អ្នកអំពីការបង្រៀនរបស់ប៉ុល ។

• តើពាក្យ ឬឃ្លាអ្វីខ្លះដែលអ្នករកឃើញថាមានសារៈសំខាន់ពីខគម្ពីរទាំងនេះ ? ហេតុអ្វី ?

• បន្ទាប់ពីបានមើលនូវអ្វីដែលអាលម៉ាបានបង្រៀន កូរីអានតុន តើការបង្រៀននេះអនុវត្តចំពោះពាក្យរបស់ប៉ុលដែលថា « ដ្បិតគ្រាប់ពូជណាដែលបុរស [ ឬស្ត្រី ] សាបព្រោះ នោះគាត់ [ ឬនាង ] ក៏ទទួលបានពូជនោះមកវិញដែរ » ដោយរបៀបណា ? ( កាឡាទី ៦:៧ ) ។

• តើការបង្រៀនដែលអ្នកបានសិក្សារហូតមកទល់ពេលនេះ ជួយអ្នកអ្វីខ្លះឲ្យយល់អំពីព្រះវរបិតាសួគ៌ និងព្រះយេស៊ូវគ្រីស្ទ ?

ការអញ្ជើញរបស់ប៉ុលដល់ពួកកាឡាទី

ប៉ុលបានបញ្ចប់ការបង្រៀនរបស់លោកអំពីក្រឹត្យវិន័យនៃការប្រមូលផលដោយមានការអញ្ជើញមួយ ។ សូមអាន កាឡាទី ៦:៩–១០ ដោយរកមើលអ្វីដែលប៉ុលបានអញ្ជើញពួកបរិសុទ្ធឲ្យធ្វើ ។

សូមពិចារណាដាក់បង្ហាញសំណួរខាងក្រោមនេះ ហើយអញ្ជើញសិស្សឲ្យពិភាក្សាពីសំណួរទាំងនេះជាគូ ឬជាក្រុមតូចៗ ។ បន្ទាប់មក សូមអញ្ជើញអ្នកស្ម័គ្រចិត្តពីរបីនាក់ឲ្យចែកចាយចម្លើយរបស់ពួកគេជាមួយសិស្សក្នុងថ្នាក់ ។

• តើអ្នកគិតថា « កុំឲ្យយើងណាយចិត្តនឹងធ្វើការល្អឡើយ » វាមានន័យយ៉ាងណា ? ( កាឡាទី ៦:៩ ) ។

• តើព្រះយេស៊ូវគ្រីស្ទជាគំរូដ៏ល្អឥតខ្ចោះនៃការណ៍នេះយ៉ាងដូចម្ដេច ?

• តើអ្នកគិតថា ប៉ុលចង់មានន័យយ៉ាងណា ពេលលោកមានប្រសាសន៍ថា យើងនឹងច្រូត « ដល់កំណត់ » ( កាឡាទី ៦:៩ ) ពេលយើងព្យាយាមធ្វើល្អសម្រាប់អ្នកដទៃ ? ហេតុអ្វីការណ៍នេះសំខាន់ដើម្បីស្វែងយល់ ?

ការអនុវត្តអ្វីដែលអ្នកបានរៀន

ប្រធាន ដាល្លិន អេក អូក ក្នុងគណៈប្រធានទីមួយបានលើកទឹកចិត្តយើងឲ្យគិតអំពីទីដៅដែលការជ្រើសរើសរបស់យើងនីមួយៗនឹងដឹកនាំយើង ( សូមមើល « Where Will This Lead? » Ensign ឬ Liahona ខែ ឧសភា ឆ្នាំ ២០១៩ ទំព័រ ៦០–៦២ ) ។

ដើម្បីអនុវត្តដំបូន្មាននេះពីប្រធាន អូក សូមធ្វើសកម្មភាពដូចខាងក្រោម ។

សូមបង្កើតតារាងស្រដៀងនឹងតារាងខាងក្រោម ៖

អ្វីដែលអ្នកកំពុងព្រោះ ( សកម្មភាពដែលអ្នកធ្វើជាប្រចាំ )

អ្វីដែលអ្នកកំពុងច្រូតកាត់ ឬអាចរំពឹងថានឹងប្រមូលផលនាពេលអនាគត ( ទីទៅដែលសកម្មភាពទាំងនេះនឹងដឹកនាំទៅដល់ )

នៅផ្នែកខាងឆ្វេង សូមធ្វើបញ្ជីនៃកិច្ចការមួយចំនួនដែលអ្នកចំណាយពេលភាគច្រើនធ្វើ ឬចង់ចាប់ផ្តើមធ្វើជាប្រចាំ ។

នៅផ្នែកខាងស្តាំ សូមសរសេរអ្វីដែលអ្នកមានអារម្មណ៍ថា ជាលទ្ធផលនៃការធ្វើកិច្ចការទាំងនោះជាប្រចាំ ។ សូមគិតអំពីលទ្ធផលដែលអ្នកអាចរំពឹងទុក ប្រសិនបើអ្នកធ្វើកិច្ចការទាំងនេះម្តងទៀតជាប្រចាំអស់ពេលមួយសប្តាហ៍ មួយខែ មួយឆ្នាំ ប្រាំឆ្នាំ ឬសូម្បីតែពេញមួយជីវិតរបស់អ្នក ។

សូមសញ្ជឹងគិតអំពីការបំផុសគំនិតណាមួយដែលអ្នកបានទទួលពីព្រះវិញ្ញាណបរិសុទ្ធ ដូចអ្នកបានសិក្សានៅថ្ងៃនេះ ។ នៅខាងក្រោមតារាងរបស់អ្នក សូមសរសេររាល់ការកែសម្រួលណាមួយដែលអ្នកមានអារម្មណ៍ថា ត្រូវបានបំផុសគំនិតឲ្យធ្វើនៅក្នុងជីវិតរបស់អ្នក ដែលនឹងជួយអ្នកឲ្យមានលក្ខណៈគ្រប់គ្រាន់ដើម្បីទទួលពរជ័យដែលអ្នកចង់បាន ។ ព្រះនឹងជួយអ្នកពេលអ្នកធ្វើឲ្យអស់ពីសមត្ថភាព ( សូមមើល គោលលទ្ធិ និងសេចក្តីសញ្ញា ១២៣:១៧ ) ។

វិចារណកថា និងព័ត៌មានសាច់រឿង

កាឡាទី ៦:៨ ។ តើវាមានន័យយ៉ាងណា ប្រសិនបើមនុស្សម្នាក់ « សាបព្រោះខាងឯព្រះវិញ្ញាណ » ឬ « សាបព្រោះខាងឯសាច់ឈាម » ?

អែលឌើរ អូលីសេស សូរ៉េស ក្នុងកូរ៉ុមនៃពួកសាវកដប់ពីរនាក់បានបង្រៀន ៖

Elder Ulisses Soares, Quorum of the Twelve Apostles official portrait.

ការសាបព្រោះខាងវិញ្ញាណ មានន័យថាគំនិត ពាក្យសម្ដី និងសកម្មភាពរបស់យើងទាំងអស់ត្រូវលើកយើងឡើងឲ្យដល់កម្រិតដ៏ទេវភាពរបស់ព្រះមាតាបិតាសួគ៌ារបស់យើង ។ ទោះយ៉ាងណាក្ដី ព្រះគម្ពីរបានសំដៅទៅលើសាច់ឈាម ជាលក្ខណៈរូបកាយ ឬ រាងកាយនៃមនុស្សខាងសាច់ឈាម ដែលឲ្យមនុស្សត្រូវរងឥទ្ធិពលដោយចំណង់ ការចង់បាន ការស្រេកឃា្លន និងការជំរុញពីខាងសាច់ឈាម ជាជាងការស្វែងរកការបំផុសគំនិតពីព្រះវិញ្ញាណបរិសុទ្ធ ។ ប្រសិនបើយើងមិនប្រុងប្រយ័ត្ននោះទេ ឥទ្ធិពលទាំងនោះ រួមជាមួយនឹងសម្ពាធ នៃភាពទុច្ចរិតរបស់លោកិយ អាចនាំឲ្យយើងសម្ដែងអាកប្បកិរិយាមិនសមរម្យ និង ធ្វេសប្រហែស ដែលក្លាយជាទម្លាប់របស់យើង ។ ដើម្បីចៀសវាងពីឥទ្ធិពលអាក្រក់អស់ទាំងនោះបាន យើងត្រូវតែធ្វើតាមអ្វី ដែលព្រះអម្ចាស់បានបង្រៀនដល់ព្យាការី យ៉ូសែប ស្ម៊ីធ អំពីការសាបព្រោះខាងវិញ្ញាណដោយឥតឈប់ឈរ ៖ « ហេតុដូច្នេះហើយ ចូរកុំណាយចិត្តនឹងធ្វើការល្អឡើយ ដ្បិតអ្នករាល់គ្នាកំពុងតែដាក់គ្រឹះនៃកិច្ចការដ៏ធំ ។ ហើយចេញពីការណ៍ដ៏តូចតាច នោះបណ្ដាលឲ្យមានការណ៍ដ៏ធំធេងឡើង » ( គោលលទ្ធិ និងសេចក្ដីសញ្ញា ៦៤:៣៣ ) ។

( អូលីសេស សូរ៉េស « Abide in the Lord’s Territory! » Ensign ឬ Liahona ខែ ឧសភា ឆ្នាំ ២០១២ ទំព័រ ៣៩ )

ប្រធាន ដាល្លិន អេក អូក ក្នុងគណៈប្រធានទីមួយបានបង្រៀន ៖

Official Portrait of President Dallin H. Oaks taken March 2018.

ប្រសិនបើយើងបណ្ដោយខ្លួនទៅនឹងគ្រឿងញៀន ឬរូបភាពអាសអាភាស ឬអំពើអាក្រក់ផ្សេងទៀតដែលសាវក [ ប៉ុល ] បានហៅថា ការសាបព្រោះខាងឯសាច់ឈាម នោះក្រឹត្យវិន័យដ៏នៅអស់កល្បជានិច្ចនឹងកំណត់ថា យើងច្រូតបានសេចក្តីពុករលួយជាជាងច្រូតបានជីវិតដ៏នៅអស់កល្បជានិច្ច ។ នោះជាសេចក្ដីយុត្តិធម៌របស់ព្រះ ហើយសេចក្ដីករុណាមិនអាចប្លន់សេចក្ដីយុត្តិធម៌បានឡើយ ។ ប្រសិនបើក្រឹត្យវិន័យដ៏នៅអស់កល្បជានិច្ចមួយត្រូវបានបំពាន នោះការដាក់ទោសនៅក្នុងក្រឹត្យវិន័យនោះត្រូវតែទទួលរងទុក្ខ ។ កិច្ចការមួយចំនួនអាចបំពេញចិត្តដោយដង្វាយធួនរបស់ព្រះអង្គសង្គ្រោះ ប៉ុន្តែការលាងសម្អាតដោយសេចក្ដីករុណានៃមនុស្សមានបាបដែលកខ្វក់កើតមានតែបន្ទាប់ពីការប្រែចិត្តប៉ុណ្ណោះ ( សូមមើល អាលម៉ា ៤២:២២–២៥ ) ដែលសម្រាប់អំពើបាបមួយចំនួនគឺជាដំណើរការអូសបន្លាយ និងឈឺចាប់ ។

( ដាល្លិន អេក អូក « Be Not Deceived » Ensign ឬ Liahona ខែ វិច្ឆិកា ឆ្នាំ ២០០៤ ទំព័រ ៤៥ )

តើការប្រឹងប្រែងបន្តិចបន្តួចអាចផ្លាស់ប្តូរជីវិតរបស់ខ្ញុំ និងជីវិតអ្នកដទៃដោយរបៀបណា ?

សូមមើល « Of Seeds and Soils » ចាប់ពីលេខកូដម៉ោង ៧:០៦ ដល់ ៩:១១ ដើម្បីមើលឧទាហរណ៍ពីសកម្មភាពតូចៗដែលបានផ្លាស់ប្តូរជីវិតរបស់មនុស្សរាប់រយនាក់ ។ វីដេអូនេះមាននៅលើគេហទំព័រ ChurchofJesusChrist.org ។

សកម្មភាពរៀនសូត្របន្ថែម

កាឡាទី ៦:១–២ ។ ការស្ដារអ្នកដទៃឲ្យមករកព្រះគ្រីស្ទឡើងវិញ

សូមអញ្ជើញសិស្សឲ្យគិតអំពីរបៀបដែលព្រះអង្គសង្គ្រោះបានឆ្លើយតបចំពោះអ្នកដែលកំពុងរស់នៅក្នុងអំពើបាប ។ សូមឲ្យសិស្សអាន កាឡាទី ៦:១–២ ហើយរកមើលរបៀបដែលប៉ុលបានអញ្ជើញយើងឲ្យធ្វើតាមគំរូរបស់ព្រះអង្គសង្គ្រោះតាមរបៀប ដែលយើងឆ្លើយតបចំពោះមនុស្សមានបាប ។ សូមពិចារណាផ្តល់និយមន័យខាងក្រោមសម្រាប់សិស្សនៅពេលពួកគេសិក្សា ៖

• « មនុស្សណាធ្វើខុសអ្វី » ៖ នេះមានន័យថា ត្រូវគេចាប់បានពេលធ្វើអំពើបាប ។

• « ស្តារ » ៖ ពាក្យដើមជាភាសាក្រិក katartizete « មានន័យថាដាក់ឲ្យចូលគន្លាក់គ្នាវិញ ដូចជាការភ្លាត់ឆ្អឹង ហេតុដូច្នេះហើយ យើងគួរតែព្យាយាមដាក់ឆ្អឹងភ្លាត់ទាំងនោះឲ្យចូលគន្លាក់គ្នាឡើងវិញ » ឬនិយាយម្យ៉ាងទៀត « ត្រឡប់ [ ពួកវា ] ឲ្យទៅកាន់កាតព្វកិច្ចរបស់ពួកវាវិញ » ( Matthew Henry’s Commentary on the Whole Bible: Volume VI–II—First Corinthians–Second Timothy [ ឆ្នាំ ២០១៨ ] ទំព័រ ១៦៨ ) ។

• « ព្រមទាំងប្រយ័ត្នខ្លួនឯងផង » ៖ នេះមានន័យថា ត្រូវដឹងខ្លួន និងប្រយ័ត្នខ្លួន ។

សូមអញ្ជើញសិស្សឲ្យចែកចាយនូវអ្វីដែលពួកគេមានអារម្មណ៍ថា ប៉ុលចង់ឲ្យពួកកាឡាទីយល់ ។ សូមពិចារណាសួរសំណួរដូចខាងក្រោមនេះ ៖

• តើយើងអាចស្តារអ្នកដទៃឲ្យមករកព្រះគ្រីស្ទឡើងវិញ ដោយមិនធ្លាក់ចូលក្នុងការល្បួងជាមួយពួកគេដោយរបៀបណា ?

• តើការទ្រាំទ្របន្ទុករបស់អ្នកដទៃអាចជួយស្ដារពួកគេឲ្យមករកព្រះគ្រីស្ទឡើងវិញដោយរបៀបណា ?

• តើការធ្វើតាមដំបូន្មានរបស់ប៉ុលអាចជួយយើងឲ្យកាន់តែដូចជាព្រះអង្គសង្គ្រោះយ៉ាងដូចម្ដេច ? ( សូមមើល ម៉ូសាយ ១៨:៨–១០ ) ។

កាឡាទី ៦:៧–៨ ។ ការដាំដុះ និងការប្រមូលផលគ្រាប់ពូជ

សូមបង្ហាញគ្រាប់ពូជផ្លែឈើ ឬគ្រាប់ពូជបន្លែមួយចំនួនដែលសិស្សងាយនឹងស្គាល់ ។ សូមឲ្យពួកគេប្រាប់ថា តើនោះជាគ្រាប់ពូជអ្វី ។

តើអ្នកអាចរំពឹងចង់បានអ្វីខ្លះ ប្រសិនបើអ្នកដាំគ្រាប់ពូជទាំងនេះ ? សូមអញ្ជើញសិស្សម្នាក់អាន កាឡាទី ៦:៧–៨ ឲ្យឮៗ ។ សូមឲ្យសិស្សក្នុងថ្នាក់ផ្ទៀងតាម ហើយរកមើលថា តើប៉ុលបានបង្រៀនអ្វីខ្លះ អំពីអ្វីដែលយើងអាចរំពឹងចង់បាន នៅពេលយើងដាំគ្រាប់ពូជ ។