ការរំឭកចំណេះចំណានខាងគោលលទ្ធិទី ១៤

ស្វែងយល់ និងពន្យល់

Jesus Christ is standing on a hill over looking a river

គោលបំណងមួយនៃចំណេះចំណានខាងគោលលទ្ធិ គឺដើម្បីជួយអ្នកឲ្យយល់ពីការបង្រៀនរបស់ព្រះអង្គសង្គ្រោះ ដែលមាននៅក្នុងវគ្គបទគម្ពីរចំណេះចំណានខាងគោលលទ្ធិ ហើយអាចពន្យល់វាជាពាក្យសម្ដីផ្ទាល់របស់អ្នក ។ មេរៀននេះនឹងផ្តល់ឱកាសឲ្យអ្នកពង្រីកការយល់ដឹងរបស់អ្នក និងពន្យល់ពីសេចក្ដីពិតអំពីវគ្គចំណេះចំណានខាងគោលលទ្ធិមួយ ឬច្រើនចេញពីព្រះគម្ពីរសញ្ញាថ្មី ។  

ការរៀបចំរបស់សិស្ស ៖ សូមអញ្ជើញសិស្សឲ្យពិនិត្យមើលវគ្គបទគម្ពីរចំណេះចំណានខាងគោលលទ្ធិ ដែលនឹងត្រូវសិក្សានៅក្នុងមេរៀននេះ ហើយមករៀនដោយត្រៀមខ្លួនដើម្បីពិភាក្សាអំពីវគ្គទាំងនោះ ។ សិស្សអាចប្រើ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ឬកម្មវិធីចំណេះចំណានខាងគោលលទ្ធិ ដើម្បីជួយពួកគេរំឭកឡើងវិញ ។

សកម្មភាពរៀនសូត្រដែលអាចមាន

មេរៀនវគ្គចំណេះចំណានខាងគោលលទ្ធិ ប្រហែលជាត្រូវបង្រៀនជំនួសមេរៀនរំឭកឡើងវិញនេះ ។ សូមមើលតារាងកាលវិភាគល្បឿនដែលផ្តល់ដោយនាយកតំបន់ ឬអ្នកសម្របសម្រួលតំបន់ ដើម្បីធានាថា មេរៀនវគ្គបទគម្ពីរចំណេះចំណានខាងគោលលទ្ធិនីមួយៗនឹងត្រូវបានបង្រៀនអំឡុងពេលដែលថ្នាក់សិក្ខាសាលាកំពុងសិក្សា ។ ប្រសិនបើចាំបាច់ សូមជំនួសវគ្គបទគម្ពីរណាមួយដែលបានរំឭកនៅក្នុងមេរៀននេះជាមួយនឹងវគ្គបទគម្ពីរផ្សេងទៀត ដែលសិស្សប្រហែលជាត្រូវផ្តោតទៅលើ ។

រំឭកឡើងវិញ

សូមផ្តល់ឱកាសឲ្យសិស្សរំឭកវគ្គបទគម្ពីរចំណេះចំណានខាងគោលលទ្ធិនៃមេរៀននេះឡើងវិញ និងឃ្លាបទគម្ពីរគន្លឹះដែលពាក់ព័ន្ធរបស់ពួកគេ ។ សូមពិចារណាប្រើសកម្មភាពផ្គូផ្គងដូចខាងក្រោមនេះ ឬសកម្មភាពផ្សេងទៀត ។ ( ចម្លើយត្រឹមត្រូវសម្រាប់សកម្មភាពនេះគឺ ១-ខ, ២-ឃ, ៣-ក, ៤-គ ) ។

1. កូរិនថូស ទី១ ៦:១៩–២០

2. កូរិនថូស ទី១ ១១:១១

3. កូរិនថូស ទី១ ១៥:២០–២២

4. កូរិនថូស ទី១ ១៥:៤០–៤២

ក. សមាជិកគ្រួសាររបស់អ្នកមួយចំនួនកំពុងមានអារម្មណ៍រន្ធត់ ដោយសារតែមនុស្សជាទីស្រឡាញ់ម្នាក់ទើបតែបានទទួលមរណភាព ហើយពួកគេមានអារម្មណ៍ថាពួកគេនឹងមិនបានឃើញគ្នាទៀតទេ

។ខ. មនុស្សមួយចំនួនជឿថារាងកាយរបស់ពួកគេគឺជារបស់ពួកគេ ហើយថាពួកគេអាចធ្វើអ្វីដែលពួកគេចង់បានជាមួយរាងកាយរបស់ពួកគេ ។ ពួកគេមិនបានដឹងថា ព្រះអង្គសង្គ្រោះបានបង់ថ្លៃ ប្រោសលោះ យើង ដែលមានន័យត្រង់ថា « ទិញយកយើងវិញ » ។ ដោយហេតុនេះហើយ យើងមិនមែនជាខ្លួនយើងទេ ប៉ុន្តែត្រូវជំពាក់គុណព្រះអង្គសង្គ្រោះវិញ

។គ. មនុស្សជាច្រើនជឿលើស្ថានសួគ៌ និងស្ថាននរក ប៉ុន្តែយល់ខុសសេចក្ដីពិតអំពីជីវិតបន្ទាប់ពីសេចក្ដីស្លាប់ និងរូបកាយដែលរស់ឡើងវិញ

។ឃ. មិត្តភក្តិម្នាក់សួរអ្នកថា ហេតុអ្វីបានជាអ្នកឲ្យអាទិភាពដល់អាពាហ៍ពិពាហ៍ និងទំនាក់ទំនងគ្រួសារដ៏រឹងមាំ ជាងជោគជ័យអាជីព និងលុយកាក់ ។

ស្វែងយល់ និងពន្យល់

ប្រធាន រ័សុល អិម ណិលសុន បានបង្រៀនពីរបៀបដែលព្រះគម្ពីរអាចភ្ជាប់យើងទៅនឹងព្រះយេស៊ូវគ្រីស្ទ ។ អ្នកអាចនឹងចង់មើលវីដេអូ « President Nelson—The Scriptures Teach Us about Jesus Christ (for Youth) » ( ០:៥៩ ) មាននៅលើគេហទំព័រ ChurchofJesusChrist.org ឬអានសេចក្ដីថ្លែងការណ៍ដូចខាងក្រោមនេះ ។

Official portrait of President Russell M. Nelson taken January 2018

[ បទគម្ពី ] បង្រៀនយើងអំពីព្រះយេស៊ូវគ្រីស្ទ និងដំណឹងល្អរបស់ទ្រង់ វិសាលភាពនៃដង្វាយធួនរបស់ទ្រង់ និងផែនការនៃសុភមង្គល និងការប្រោសលោះដ៏មហិមារបស់ព្រះវរបិតាយើង ។ ការជ្រមុជទៅក្នុងព្រះបន្ទូលនៃព្រះជាប្រចាំថ្ងៃ គឺសំខាន់សម្រាប់ជីវិតខាងវិញ្ញាណ ជាពិសេសនៅក្នុងគ្រាដែលមានចលាចលកាន់តែខ្លាំងនេះ ។ នៅពេលយើងទទួលទានព្រះបន្ទូលនៃព្រះគ្រីស្ទជាប្រចាំថ្ងៃ ព្រះបន្ទូលនៃព្រះគ្រីស្ទនឹងប្រាប់យើងអំពីរបៀបដើម្បីឆ្លើយតបទៅនឹងការលំបាក ដែលយើងពុំធ្លាប់គិតថាយើងនឹងជួបនោះ ។

( រ័សុល អិម ណិលសុន « Hear Him » Ensign ឬ Liahona ខែ ឧសភា ឆ្នាំ ២០២០ ទំព័រ ៨៩ )

សូមជួយសិស្សឲ្យយល់កាន់តែច្បាស់អំពីគោលលទ្ធិនៅក្នុងវគ្គបទគម្ពីរចំណេះចំណានខាងគោលលទ្ធិ ។ សកម្មភាពដូចខាងក្រោមនេះគឺជាវិធីមួយដែលការណ៍នេះអាចសម្រេចបាន ។ សិស្សអាចផ្ដោតលើវគ្គបទគម្ពីរដែលបានរំឭកឡើងវិញខាងលើ ឬវគ្គបទគម្ពីរចំណេះចំណានខាងគោលលទ្ធិណាមួយសម្រាប់ព្រះគម្ពីរសញ្ញាថ្មី ។

ប្រសិនបើប្រើប្រាស់សកម្មភាពខាងក្រោម សូមនៅចាំដើម្បីជួយសិស្សឲ្យស្វែងរកទំនាក់ទំនងដ៏មានអត្ថន័យជាមួយព្រះយេស៊ូវគ្រីស្ទនៅក្នុងវគ្គបទគម្ពីរដែលពួកគេបានជ្រើសរើស ។ វាអាចមានប្រយោជន៍ក្នុងការចាប់សិស្សជាក្រុមតូចៗ ហើយអញ្ជើញពួកគេឲ្យចែកចាយចម្លើយរបស់ពួកគេចំពោះសំណួរជាមួយក្រុមរបស់ពួកគេ ។

សូមស្រមៃថា ដើម្បីចាប់ផ្ដើមសកម្មភាពយុវវ័យ អ្នកត្រូវបានសុំឲ្យចែកចាយបទគម្ពីរដែលបានជួយអ្នកឲ្យរៀន ឬទទួលអារម្មណ៍អ្វីមួយអំពីព្រះយេស៊ូវគ្រីស្ទ ។ សូមជ្រើសរើសវគ្គបទគម្ពីរចំណេះចំណានខាងគោលលទ្ធិមួយពីមេរៀននេះ ឬមេរៀនផ្សេងទៀតចេញពីព្រះគម្ពីរសញ្ញាថ្មី ។ សូមយាងអញ្ជើញព្រះវិញ្ញាណបរិសុទ្ធ ដើម្បីជួយអ្នកស្វែងរកសេចក្ដីពិតអំពីព្រះអង្គសង្គ្រោះ ដែលធ្វើឲ្យការយល់ដឹងរបស់អ្នកកាន់តែស៊ីជម្រៅអំពីទ្រង់ ដំណឹងល្អរបស់ទ្រង់ ដង្វាយធួនរបស់ទ្រង់ ឬផែនការនៃសេចក្តីសង្គ្រោះរបស់ព្រះវរបិតាសួគ៌ ។

• តើអ្នកបានជ្រើសរើសវគ្គបទគម្ពីរចំណេះចំណានខាងគោលលទ្ធិមួយណា ?

• តើសេចក្ដីពិត ឬគោលលទ្ធិអ្វីដែលអ្នករកឃើញពីវគ្គបទគម្ពីរនេះ ?

• តើជីវិតរបស់មនុស្សម្នាក់អាចខុសគ្នាយ៉ាងណា បើគេមិនបានដឹងពីសេចក្ដីពិតដែលអ្នកបានរកឃើញនេះ ?

• តើការយល់ដឹងពីសេចក្ដីពិតនេះ អាចជួយអ្នកឲ្យចូលទៅកាន់តែជិតព្រះអង្គសង្គ្រោះដោយរបៀបណា ?

សកម្មភាពរៀនសូត្របន្ថែម

ការរំឭកឡើងវិញជាមួយនឹងកម្មវិធីចំណេះចំណានខាងគោលលទ្ធិ

សូមពិចារណាអំពីវិធីប្រើប្រាស់កម្មវិធីចំណេះចំណានខាងគោលលទ្ធិ ដើម្បីជួយសិស្សរំឭកឡើងវិញ ឬទន្ទេញវគ្គបទគម្ពីរចំណេះចំណានខាងគោលលទ្ធិ ។

វិធីផ្សេងទៀតដើម្បីជួយសិស្សឲ្យស្វែងយល់ និងពន្យល់

ស្វែងយល់—សិស្សអាចរកមើលអត្ថន័យនៃពាក្យនៅក្នុងវគ្គបទគម្ពីរចំណេះចំណានខាងគោលលទ្ធិដែលពួកគេបានជ្រើសរើស ហើយរាយការណ៍អំពីការយល់ដឹងបន្ថែមដែលពួកគេទទួលបាន ។ សិស្សអាចប្រើវចនានុក្រម ឬសេចក្ដីណែនាំដល់បទគម្ពីរទាំងឡាយ ដើម្បីរកមើលពាក្យ ។

ស្វែងយល់—សិស្សអាចសរសេរវគ្គបទគម្ពីរចំណេះចំណានខាងគោលលទ្ធិឡើងវិញ ដែលពួកគេបានជ្រើសរើសជាពាក្យសម្ដីរបស់ពួកគេផ្ទាល់ ។

ពន្យល់—ដើម្បីជួយសិស្សពន្យល់ពីសេចក្តីពិតនៅក្នុងវគ្គបទគម្ពីរចំណេះចំណានខាងគោលលទ្ធិ សូមពិចារណាការយកវត្ថុតូចៗជាច្រើនប្រភេទមកក្នុងថ្នាក់ ហើយអញ្ជើញសិស្សឲ្យជ្រើសរើសវត្ថុមួយដែលពួកគេមានអារម្មណ៍ថាបង្ហាញពីសេចក្ដីពិតនៅក្នុងវគ្គបទគម្ពីរចំណេះចំណានខាងគោលលទ្ធិដែលពួកគេបានជ្រើសរើស ។ បន្ទាប់មក ពួកគេអាចប្រើវត្ថុដែលពួកគេបានជ្រើសរើស ដើម្បីជួយពន្យល់ពីសេចក្ដីពិតនេះ ។