Kalētia

Vakai Fakalūkufuá

‘I he tohi ʻa Paula ki he Kāingalotu ʻi Kalētiá, naʻá ne fakahā ‘ene hohaʻa lahi koeʻuhí ko e niʻihi tokolahi ne nau mavahe mei he ʻEikí ʻi heʻenau muimui ki he ngaahi akonaki ʻa e niʻihi naʻe feinga ke “fakakehe ʻa e ongoongoleleí” (Kalētia 1:6–7). Naʻá ne fakamamafaʻi ʻa e mahuʻinga ʻo e fakafanongo ki he ngaahi folofola ʻa Sīsū Kalaisi ʻoku fakafou mai ʻi Heʻene kau ʻAposetoló, ʻo e ʻaʻeva ʻi he Laumālié ke ikunaʻi e ngaahi holi ʻo e kakanó, pea mo e fono ʻo e ututaʻú.

Teuteu ke Akoʻi

ʻOku ʻoatu ʻe he fakamatala ko ʻení ha ngaahi fakakaukau ki he kau faiakó fekauʻaki mo e meʻa ʻe ala fiemaʻu ke teuteuʻi kimuʻa ki he lēsoni takitaha.

Kalētia 1

Taumuʻa ‘o e lēsoní: ʻE lava ke tokoni ʻa e lēsoni ko ʻení ke ako ʻe he kau akó ʻa e founga ke fakaʻehiʻehi ai mei he kākaá mo e puputuʻú ʻaki ʻenau fakafanongo ki he ngaahi folofola naʻe fai ʻe Sīsū Kalaisi ki he kau palōfita ʻi he kuonga muʻá mo onopooni fakatouʻosi.

• Teuteu ʻa e tokotaha akó: Fakaafeʻi e kau akó ke nau omi mateuteu ke ʻomi ha ngaahi sīpinga ʻo e ngaahi fakakaukau pe akonaki ʻoku fakaʻaongaʻi ʻe Sētane ke feinga ke kākaaʻi pe fakaheeʻi kinautolu mei he ongoongolelei moʻoni ʻo Sīsū Kalaisí.

•  

• Fokotuʻu ki hono akoʻi ʻi he konifelenisi vitioó: Fakakaukau ke faʻu ha savea ʻi he ‘initanetí ‘oku ʻikai fakahaaʻi ai e hingoa ʻo e tokotaha ʻokú ne fai e saveá ke fakaafeʻi e kau akó ke nau vahevahe ha taimi ne nau fetaulaki ai mo ha kakai pe ngaahi fakakaukau te ne ala tohoakiʻi kinautolu mei he moʻoni ʻo e ongoongolelei ʻo Sīsū Kalaisí. Fakaʻaongaʻi e ngaahi tali ʻa e kau akó ki he saveá ʻo fetongi ʻaki e ngaahi talanoa fakatātā ʻi he kamataʻanga ʻo e lēsoní.

Kalētia 5

Taumuʻa ‘o e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau hoko ʻo tatau ange mo Sīsū Kalaisí ʻaki hano ʻoatu ha ngaahi faingamālie ke nau ʻiloʻi ai e ngaahi founga te nau lava kakato ange ai ʻo “ʻaʻeva ʻi he Laumālié” ( Kalētia 5:16).

• Teuteu ʻa e tokotaha akó: Fakaafeʻi e kau akó ke nau ako ʻa e Mōsaia 3:19 pea ke nau fakahaaʻi ʻa e ngaahi akonaki ʻe lava ʻo tokoni ke nau maʻu ai ʻa e tokoni ʻa e Fakamoʻuí ke ikunaʻi hotau natula hingá, pe ko e “tangata fakakakanó.” ʻE ala ʻaonga foki ke fakaafeʻi e kau akó ke nau ako maʻuloto e potufolofola fakataukei fakatokāteline ko ʻení.

• ʻĪmisí: Fakaʻaliʻali e fakatātā ʻo ha kakai ʻi ha feʻauhi fusi maea.

Kalētia 6

Taumuʻa ʻo e lēsoní: ʻE lava ke tokoni ʻa e lēsoni ko ʻení ke fakatokangaʻi ʻe he kau akó ʻa e ngaahi ngāue ʻoku fiemaʻu ke nau fai ke aʻusia ai ʻenau ngaahi taumuʻa taʻengatá.

• Teuteu ʻa e tokotaha akó: Fakaafeʻi e kau akó ke nau lau ʻa e Kalētia 6:7–9 pea omi mateuteu ke vahevahe ʻa e founga ʻoku nau ongoʻi ʻe tokoni ai ʻa e ngaahi akonaki ʻi he ngaahi veesi ko ʻení ki heʻenau ngaahi fili fakaʻahó.

• Vitiō: “Fili Fakapotopoto” (15:18; sio mei he taimi 3:03 ki he 4:52)

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ha taki fakalotofonua ʻo e Siasí (hangē ko ha pīsope, palesiteni fakakolo, palesiteni Fineʻofa, pe palesiteni ʻo e Kau Finemuí) ke haʻu ʻo lea ʻi ha ngaahi miniti siʻi ʻi he kamataʻanga ʻo e kalasí fekauʻaki mo e mahuʻinga ʻo e polokalama Fānaú mo e Toʻutupú pea mo hono fokotuʻu mo e feinga ke aʻusia ha ngaahi taumuʻá. Manatuʻi ke ke talanoa mo hoʻomou kouʻotineita fakalotofonua ʻo e Seminelí mo e ʻInisititiuti Fakalotú fekauʻaki mo e ngaahi fakangofua ʻe fiemaʻú.

ʻEfesō 1

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoni ke ʻiloʻi ʻe he kau akó ʻa e ngaahi tāpuaki ʻoku lava ke maʻu koeʻuhí he naʻe fakafoki mai ʻe Sīsū Kalaisi ʻEne ongoongoleleí ki he māmaní ʻi he ngaahi ʻaho fakaʻosí.

• Teuteu ʻa e tokotaha akó: Fakaafeʻi e kau akó ke hiki e ngaahi founga ʻoku nau ongoʻi ai kuo tokoniʻi ʻenau moʻuí ʻe hono Fakafoki Mai ʻo e ongoongolelei ʻo Sīsū Kalaisí. Kole ange ke nau omi mo e lisi ko ʻení ki he kalasí.

• ʻĪmisí: Fakaʻaliʻali pe tā ha fakatātā ʻo ha ngaahi vaitafe ʻoku tafe ki ha vai lahi.

• Naunau maʻá e kau akó: Teuteu ha tatau ʻo e “ Ko e Fakafoki Mai ʻa e Kakato ʻo e Ongoongolelei ʻo Sīsū Kalaisí: Ko Ha Fanongonongo ki Māmani ʻo e Taʻu Uangeaú ” (ChurchofJesusChrist.org) maʻá e kau ako ʻoku ʻikai ke nau lava ʻo maʻu ia mei ha meʻangāue fakaʻilekitulōniká.

•  

• Fokotuʻu ki hono akoʻi ʻi he konifelenisi vitioó: Fakaafeʻi e kau akó ke nau taufetongi ʻi hono vahevahe e ngaahi fakakaukau mahuʻinga ne nau maʻu ʻi heʻenau ako e fanongonongo ki hono Fakafoki Mai ʻo e Ongoongoleleí. ʻE lava ke fai ʻeni ʻi he breakout rooms pe fakataha mo e kalasí.

Fakataukei Fakatokāteliné: ‘Efesō 1:10

Taumuʻa ʻo e lēsoní: ʻE ʻoatu ʻe he lēsoni ko ʻení ʻa e faingamālie ki he kau akó ke fakatupulaki ʻenau taukei ki he ngaahi akonaki ʻi he ‘Efesō 1:10 ʻaki hano ako maʻuloto ʻa e fakamoʻoni fakafolofolá mo e kupuʻi lea mahuʻingá, fakamatalaʻi ʻo e tokāteliné, mo hono fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

• Teuteu ʻa e tokotaha akó: Fakaafeʻi e kau akó ke nau omi mateuteu ki he kalasí ke vahevahe ha moʻoni ʻe ua pe lahi ange ʻoku nau ongoʻi ʻoku fiemaʻu ke ʻilo mo mahino ki he tokotaha kotoa fekauʻaki mo hono Fakafoki Mai ʻo e Ongoongoleleí.

• Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi e kau akó ke nau fakakaukau ki ha ngaahi tūkunga kehe ʻe lava ke akoʻi ʻe he ngaahi akonaki ʻi he ʻEfesō 1:10 . ʻE lava leva ke fakaafeʻi e kau akó ke nau vahevahe ʻa e founga te nau lava ai ʻo fakaʻaongaʻi ʻa e tokāteline ʻoku akoʻi ʻi he ʻEfesō 1:10 mo e ngaahi tefitoʻi moʻoni ʻo hono maʻu ʻo e ʻilo fakalaumālié ke tokoni ki he ngaahi tūkunga ko iá.