Santiago 1

“Humingi … sa Diyos”

Nadarama mo ba na maaari kang humingi ng tulong sa Diyos kapag may mga tanong ka na hindi pa nasasagot o nangangailangan ka ng Kanyang karunungan sa paggawa ng mahahalagang desisyon? Ipinahayag ni Santiago na ang sinumang nagkukulang ng karunungan ay maaaring “humingi siya sa Diyos, na nagbibigay nang sagana sa lahat … at iyon ay ibibigay sa kanya” (Santiago 1:5). Layunin ng lesson na ito na palakasin ang iyong patotoo na bibigyan ka ng Ama sa Langit ng karunungan bilang sagot sa iyong mga panalangin.

Pagtuturo ng mga banal na kasulatan at mga salita ng mga propeta nang may pananalig at layunin. “Ang inyong pangunahing gawain, ang mahalaga sa lahat at natatanging tungkulin ninyo, ay ituro ang ebanghelyo ng Panginoong Jesucristo dahil iyon ay inihayag sa mga huling araw na ito. Kayo ang dapat magturo ng ebanghelyong ito, gamit bilang mga mapagkukunan at mapagsasanggunian ang mga banal na kasulatan at mga salita ng mga tinawag ng Diyos na mamuno sa Kanyang mga tao sa mga huling araw na ito” (J. Reuben Clark Jr., The Charted Course of the Church in Education, rev. ed. [1994; mensahe sa mga tagapagturo ng relihiyon sa Church Educational System, Ago. 8, 1938], 10, ChurchofJesusChrist.org).

Paghahanda ng estudyante: Sabihin sa mga estudyante na basahin ang Santiago 1:5–6 at isipin ang mga aspeto sa kanilang buhay na nangangailangan ng karunungan o patnubay mula sa Diyos.

Mga Posibleng Aktibidad sa Pag-aaral

Mahahalagang sagot

Maaari mong ipakita ang mga sumusunod na opsiyon at tanong. Bigyan ng oras ang mga estudyante na tahimik na pag-isipan ang kanilang mga sagot bago magpatuloy.

Tingnan ang bawat isa sa mga sumusunod na tanong at isipin ang mga bagay na ito para sa bawat isa: (1) Nakatanggap na ba ako ng sagot mula sa Diyos? (2) Naghahanap ba ako ng sagot mula sa Diyos na hindi ko pa natatanggap? (3) Hindi ba ako interesadong maghanap ng sagot?

Ang Simbahan ni Jesucristo ng mga Banal sa mga Huling Araw ba ang tunay na Simbahan?
Si Jesucristo ba talaga ang aking Tagapagligtas?
Ano ang dapat kong pagtuunan upang maging mas mabuting tagasunod ni Jesucristo?

Maaari mong sabihin sa mga estudyante na ibahagi ang ilan sa iba pang mahalagang tanong na maaaring hinahanapan nila at ng mga tao sa palagid nila ng mga sagot.

Habang pinag-aaralan mo ang mga salita ni Apostol Santiago sa Santiago 1 , alamin ang mga alituntunin na makatutulong sa iyo na makahanap ng mga sagot sa mahahalagang tanong sa iyong buhay.

Magbahagi ng ilang impormasyon tungkol kay Santiago pati na rin sa konteksto ng kanyang sulat. Maaaring makatulong ang ilan sa sumusunod na impormasyon. Bilang alternatibo, maaaring ipabahagi sa mga estudyante ang maaaring nalalaman nila tungkol kay Santiago at sa kanyang sulat.

Basahin ang sumusunod na impormasyon tungkol kay Santiago. Pag-isipan ang mga tanong na maaaring hinanapan niya ng mga sagot sa buong buhay niya.

Malamang na kapatid siya ni Jesucristo sa ina (tingnan sa Gabay sa mga Banal na Kasulatan, “ Santiago, Kapatid ng Panginoon ,” SimbahanniJesucristo.org).
Tulad ng iba pang kapatid sa ina ng Panginoon, maaaring hindi siya naniwala noong una na si Jesus ang Cristo (tingnan sa Juan 7:3–5).
Kalaunan, naging Apostol siya at, ayon sa mga naunang Kristiyanong manunulat, siya rin ang unang bishop ng Simbahan sa Jerusalem (tingnan sa Mga Gawa 12:16–17 ; 21:17–18 ; Galacia 1:18–19 ; 2:9).

Basahin ang Santiago 1:1 upang matukoy kung kanino sumulat si Santiago.

Ipinaliwanag ni Elder Bruce R. McConkie (1915–85) ng Korum ng Labindalawang Apostol na “nagsalita si Santiago … sa mga taong titipunin pa lamang, sa mga tatanggap pa lamang ng ebanghelyo, sa mga papasok pa lamang sa kawan ni Cristo” (Doctrinal New Testament Commentary [1973], 3:243).

Ano ang ilang tanong na maaaring mayroon ang mga taong hindi pa nakatatanggap ng ebanghelyo?

Basahin ang Santiago 1:5–6 , at alamin ang mga katotohanang itinuro ni Santiago na makatutulong sa atin kapag may mahahalagang tanong tayo at makatutulong sa mga naghahanap ng mga katotohanan ng ebanghelyo. (Maaaring makatulong na malaman na ang ibig sabihin ng nanunumbat ay naghahanap ng mali o pinagagalitan.)

Ano ang nalaman mo?

Pakinggang mabuti ang mga sagot ng mga estudyante. Maaaring makatulong na itanong sa mga estudyante kung bakit mahalaga ang nalaman nila at kung ano ang nadarama nila tungkol dito. Kung hindi sila nagbahagi ng isang bagay na tulad ng alituntunin sa ibaba, itanong ang sumusunod:

Ano ang nalaman mo tungkol sa Ama sa Langit mula sa scripture passage na ito?

Maaari mong isulat sa pisara ang mga sagot ng mga estudyante.

Ang isang katotohanan na matatagpuan sa scripture passage na ito ay bibigyan tayo ng Diyos ng karunungan kung hihingi tayo sa Kanya nang may pananampalataya.

Ano ang ibig sabihin ng “humingi siyang may pananampalataya, na walang pag-aalinlangan”? ( Santiago 1:6).
Sa iyong palagay, bakit nais ng Ama sa Langit na humingi kayo sa Kanya ng mga sagot?

Habang ipinagpapatuloy mo ang iyong pag-aaral, pag-isipan ang mga saloobin, damdamin, at karanasan mo noong humingi ka ng karunungan, o ang mga sagot sa iyong mga tanong, mula sa Diyos.

Bago simulan ang susunod na bahagi ng lesson, makatutulong na malaman na sa susunod na lesson na “Doctrinal Mastery: Santiago 1:5–6,” sasabihin sa mga estudyante na pag-aralan ang Joseph Smith—Kasaysayan 1:8–17 .

Halimbawa ni Joseph Smith

Joseph Smith, Jr. depicted kneeling in the Sacred Grove during the First Vision. A ray of light can be seen coming from the sky down through the trees toward Joseph.

Makatutulong na isipin ang isang halimbawa ng alituntunin na bibigyan tayo ng Diyos ng karunungan kung hihingi tayo sa Kanya nang may pananampalataya. Ang paghingi ng karunungan mula sa Diyos ay may matinding epekto kay Joseph Smith.

62:4

Ano ang partikular na nakaantig sa iyo sa karanasan ni Joseph Smith?
Paano nakaapekto sa buhay ni Joseph ang sagot ng Diyos, na dumating sa Unang Pangitain? Paano ito nakaapekto sa mundo? Paano ito nakaapekto sa iyo?

Ang iyong karanasan

Bigyan ng oras ang mga estudyante na gawin ang sumusunod sa kanilang study journal:

Isulat ang mga saloobin, damdamin, at karanasan mo habang humihingi ka ng karunungan sa Diyos. Maaari mong isama ang ilan sa mga sumusunod:

Ang iyong mga saloobin at damdamin tungkol sa kahandaan ng Diyos na sagutin ang iyong mga tanong (tingnan sa Santiago 1:5–6).
Ang mga saloobin at damdamin mo tungkol sa karanasan ni Joseph Smith sa paghingi ng karunungan sa Diyos.
Ang mga naranasan mo o ang mga nararanasan mo ngayon sa paghingi ng karunungan sa Diyos at pagtanggap ng mga sagot. (Maaaring kabilang sa mga karanasang ito ang paghahanap ng mga sagot sa mga tanong sa simula ng lesson.)
Ang mga paraan na gusto mong humingi ng karunungan sa Diyos ngayon o sa hinaharap.
Ang mga impresyong natanggap mo mula sa Espiritu Santo sa lesson na ito na maaaring makatulong sa iyo.

Sabihin sa ilang estudyante na ibahagi ang kanilang mga saloobin. Sikaping maging bukas at pakinggan ang gusto nilang ibahagi. Pasalamatan sila sa kanilang mga sagot. Ang mga sumusunod ay ilang posibleng follow-up na tanong:

Anong kaibahan ang nagawa ng mga saloobin, damdamin, o karanasang ito sa iyong buhay?
Maaari bang magbahagi ng gayon ding karanasan ang sinuman sa klase?

Kung may mga tanong ang mga estudyante tungkol sa paghingi ng karunungan sa Diyos, maaari nilang alalahanin ang mga tanong na iyon para sa susunod na lesson na “Doctrinal Mastery: Santiago 1:5–6,” na nagsasaad kung paano maaaring makatulong ang mga alituntunin ng pagtatamo ng espirituwal na kaalaman sa paghingi ng karunungan.

Isipin ang iyong sariling mga gawi sa pagdarasal at paghingi ng karunungan at mga sagot mula sa Diyos. Kailan ka huling humingi sa Ama sa Langit ng karunungan o mga sagot sa iyong mga tanong? Ano ang magagawa mo ngayon upang magsimulang magtanong nang mas tapat at mas madalas? Isulat sa iyong journal kung ano sa iyong palagay ang nais ng Ama sa Langit na gawin mo dahil sa napag-aralan mo ngayon.

Maaaring makatulong sa mga estudyante na malaman na sa isang lesson sa hinaharap (“I-assess ang Iyong Pagkatuto 11”), magkakaroon ang mga estudyante ng pagkakataong pagnilayan ang ipinasiya nilang gawin dahil sa lesson na ito sa Santiago 1 .

Patotohanan ang pagmamahal ng Diyos sa bawat estudyante at ang Kanyang hangaring pagpalain ng karunungan ang bawat isa. Magpatotoo na ang kanilang buhay ay pagpapalain sa pamamagitan ng paghingi ng karunungan sa Kanya.

Komentaryo at Pinagmulang Impormasyon

Bakit mahalagang makatanggap ng karunungan mula sa Diyos at magkaroon ng sarili kong patotoo mula sa Kanya?

4:57

Itinuro ni Pangulong Russell M. Nelson:

Talaga bang nais ng Diyos na mangusap sa inyo? Oo! …

Hindi na ninyo kailangang itanong kung ano ang totoo [tingnan sa Moroni 10:5]. Hindi na ninyo kailangang isipin kung sino ang ligtas na mapagkakatiwalaan ninyo. Sa pamamagitan ng personal na paghahayag, magkakaroon kayo ng sariling patotoo na ang Aklat ni Mormon ay salita ng Diyos, na si Joseph Smith ay propeta, at ito ang Simbahan ng Panginoon. Anuman ang sabihin o gawin ng ibang tao, walang makapag-aalis ng patotoo na ikinintal sa inyong puso’t isipan sa kung ano ang totoo. …

Tayo ay mga tagasunod ni Jesucristo. Ang pinakamahalagang katotohanan na pagtitibayin sa inyo ng Espiritu Santo ay si Jesus ay ang Cristo, ang anak ng buhay na Diyos. Siya ay buhay!

(Russell M. Nelson, “Paghahayag para sa Simbahan, Paghahayag para sa Ating Buhay,” Liahona, Mayo 2018, 95–96)

Santiago 1:6 . Ano ang Ibig sabihin ng “humingi [nang] may pananampalataya”?

Binanggit ni Elder David A. Bednar Korum ng Labindalawang Apostol ang Santiago 1:5–6 at ipinaliwanag niya:

Pansinin ang kinakailangan sa paghingi nang may pananampalataya, na sa palagay ko ay nangangahulugan ng pangangailangang hindi lamang sabihin kundi gawin, ang dalawang obligasyong kapwa humiling at magsagawa, ang pangangailangang makiusap at kumilos. …

Ang mga tanong ni Joseph ay nakatuon hindi lamang sa kung ano ang kailangan niyang malaman kundi pati na kung ano ang dapat gawin! Ang panalangin niya ay hindi lang simpleng, “Aling simbahan ang tama?” Ang tanong niya ay, “Aling simbahan ang sasapian ko?” Nagpunta si Joseph sa kakahuyan para humingi nang may pananampalataya, at determinado siyang kumilos.

Ang tunay na pananampalataya ay nakatuon sa Panginoong Jesucristo at laging nauuwi sa mabuting pagkilos. … Sumusulong tayo at nagtitiyaga sa sagradong gawaing manalangin, pagkatapos nating sambitin ang “amen,” kung kikilos tayo ayon sa mga bagay na ipinahayag natin sa Ama sa Langit.

Ang paghingi nang may pananampalataya ay nangangailangan ng katapatan, pagsisikap, pangako, at tiyaga.

(David A. Bednar, “Humingi nang May Pananampalataya,” Liahona, Mayo 2008, 94–95)

Mga Karagdagang Aktibidad sa Pag-aaral

Mga patotoo ng mga magulang

Upang mapalakas ang patotoo ng mga estudyante tungkol sa panalangin, maaari mong hilingin sa ilan sa kanilang mga magulang o lider ng Simbahan nang isa o dalawang araw bago ang klase na isulat ang mga karanasan nila sa pagtanggap ng karunungan mula sa Diyos bilang sagot sa panalangin. Basahin ang bawat salaysay sa klase. Sa ilang pagkakataon, maaaring makatulong na magbigay ng kopya ng salaysay sa mga estudyante kung ito ay kanilang magulang o lider ng Simbahan.

Payo ng propeta tungkol sa paghingi ng karunungan sa Diyos

Kung makatutulong sa mga estudyante na pag-aralan ang mga karagdagang payo ng propeta tungkol sa paghingi ng karunungan sa Diyos, sabihin sa kanila na mag-ukol ng ilang minuto upang maghanap ng mga makukuhang resource. Maaari silang maghanap ng mga salita tulad ng “Panalangin,” “Paghahayag,” o “Patotoo” sa Gabay sa mga Banal na Kasulatan, o Gospel Library App. Ang mga sumusunod ay ilang doctrinal mastery passage na maaari nilang piliin bilang bahagi ng kanilang pag-aaral: Mga Kawikaan 3:5–6 ; 2 Timoteo 3:15–17 ; 2 Nephi 28:30 ; Mosias 4:9 ; Moroni 10:4–5 ; Doktrina at mga Tipan 1:37–38 ; 8:2–3 .

Paglaban sa tukso

Ang sumusunod na ideya ay maaaring maging kapaki-pakinabang para sa isang lesson sa hinaharap:

Maaari mong sabihin sa mga estudyante na ilista sa pisara ang mga karaniwang tukso na kinakaharap ng mga kabataan.

Sabihin sa mga estudyante na basahin ang Santiago 1:12–16 upang mahanap ang mga katotohanang itinuro ni Santiago tungkol sa tukso. Maaaring makatulong na ipaliwanag na ang “nagtitiis ng pagsubok” ay pinalitan ng “nilalabanan ang tukso” sa Pagsasalin ni Joseph Smith ng Santiago 1:12 .

Maaari mong itanong ang tulad ng mga sumusunod:

Bakit mahalagang malaman na ang Diyos ay hindi kailanman pinagmumulan ng tukso?
Ano ang nakatulong sa iyo na paglabanan ang tukso?
Paano tayo makababaling sa Ama sa Langit at kay Jesucristo upang matulungan tayong mapaglabanan ang mga tukso sa atin?