Lucas 22:28–34, 54–61

“Ako ay Nanalangin Para sa Iyo Upang ang Iyong Pananampalataya ay Huwag Mawala”

Christ’s disciples are resting on a hill, Peter is sitting up and Jesus is walking and looking in his direction. Outtakes include Jesus walking, Peter sitting on the ground, and just Jesus and Peter walking and talking.

Kababanggit lang ni Jesucristo ang sakramento sa Kanyang mga disipulo nang magsimula silang mag-usap-usap tungkol sa kung sino ang magkakanulo sa Panginoon at kung paano mas nakalulugod ang paglilingkod sa iba kaysa sa mapaglingkuran. Sa gitna ng mga pag-uusap na ito sa silid sa itaas kung saan kumain si Jesus at ang mga Apostol ng Huling Hapunan, tinulungan ni Jesus si Pedro na maunawaan ang oposisyong mararanasan niya sa buong buhay niya. Itinuro ng Tagapagligtas kay Pedro na matutulungan lang niya ang iba kapag napalakas niya ang kanyang sariling pananampalataya kay Jesucristo. Ang lesson na ito ay ginawa upang tulungan kang malaman na kailangan mong umasa kay Jesucristo at patuloy na palakasin ang iyong pananampalataya sa Kanya.

Pagtuunan ang pagtulong sa mga estudyante. Habang naghahanda kang magturo, pagtuunan ang iyong mga estudyante at hindi lang ang sasabihin o gagawin mo. Habang inihahanda mo ang susunod na ilang lesson, itanong sa iyong sarili, “Ano ang gagawin ng mga estudyante ko sa klase ngayon?” at “Paano ko matutulungan ang aking mga estudyante na matuklasan kung ano ang kailangan nilang malaman?”

Paghahanda ng estudyante: Sabihin sa mga estudyante na maghandang magbahagi ng mga karanasan na nakatulong na mapalakas ang kanilang pananampalataya kay Jesucristo.

Mga Posibleng Aktibidad sa Pag-aaral

Palakasin ang iyong kakayahan

Upang simulan ang klase, magbahagi ng isang personal na karanasan tungkol sa isang kasanayan o kakayahan na maaaring mawala kung mapapabayaan ngunit maaaring mas mapalakas sa pamamagitan ng pagsasanay at palagiang pagsisikap.

Gumawa ng listahan ng mga kasanayan o kakayahan na maaaring mawala sa isang tao kung hindi niya patuloy na gagamitin o palalakasin ang mga kakayahang iyon (halimbawa, mga kasanayan sa paglalaro ng sports o kasanayan sa pagsusulat).

• Paano rin ito maiaangkop sa kakayahan mong manampalataya kay Jesucristo?

Sa lesson ngayon, matututuhan mo kung paano ninanais ni Jesucristo na palakasin mo ang kakayahan mong manampalataya sa Kanya.

Kung hiniling sa mga estudyante na maghanda para sa klase sa pamamagitan ng pag-iisip ng isang karanasan na nakatulong sa kanila na mapalakas ang kanilang pananampalataya kay Jesucristo, maaari mong sabihin sa ilang boluntaryo na ibahagi ang kanilang mga karanasan sa klase.

Pag-isipan sandali kung ano ang kasalukuyan mong ginagawa o gusto mong gawin upang mapalakas ang iyong pananampalataya kay Jesucristo. Maaari mong isulat sa iyong study journal ang ginagawa mo araw-araw, linggo-linggo, o kahit buwan-buwan. Maaaring kabilang sa mga gawaing ito ang anumang mithiing pinagsisikapan mong makamit sa kasalukuyan.

Habang nag-aaral ka ngayon, alamin ang mga pagbabago o pagpapabuti na magagawa mo upang mapalakas ang iyong pananampalataya kay Jesucristo upang makaasa ka sa Kanya anuman ang mga sitwasyong kinakaharap mo sa buhay.

Nauunawaan ni Jesucristo ang ating mga pangangailangan at tutulungan Niya tayo

Sinabi ni Jesucristo sa Kanyang mga disipulo ang tungkol sa kahariang darating na naghihintay sa kanila dahil tapat silang nagpatuloy na kasama Niya (tingnan sa Lucas 22:28–30). Gayunpaman, tinulungan din ng Panginoon si Simon Pedro na maghanda para sa mahirap na espirituwal na paglalakbay na kakaharapin niya kalaunan.

Basahin ang Lucas 22:31–34 , at alamin ang gustong ipaunawa ng Panginoon kay Pedro.

Maaari mong isulat sa pisara ang nalaman ng mga estudyante.

Upang mas maunawaan ang ibig sabihin ng hangad ni Satanas na “ligligin [si Pedro] gaya ng trigo” (talata 31), basahin ang paliwanag sa bahaging “Komentaryo at Pinagmulang Impormasyon” sa pagtatapos ng lesson.

• Ano ang napansin mo tungkol sa nauunawaan ng Tagapagligtas tungkol kay Pedro? Paano ito naiiba sa kung paano nakita ni Pedro ang kanyang sarili?

• Paano rin nauugnay sa iyong kaugnayan sa Tagapagligtas ang natutuhan mo tungkol sa kaugnayan ni Pedro kay Jesucristo?

• Matapos ipahayag ni Pedro ang kanyang pananampalataya at katapatan kay Jesucristo, ano ang inihayag ng Tagapagligtas na gagawin ni Pedro?

Maaari kang magpakita ng isang larawan na naglalarawan kay Pedro matapos niyang ikaila si Jesucristo.

The Apostle Peter standing at the base of a stone stairway outside the palace of the high priest (where Christ was taken to be tried by the chief priests, elders and scribes). Peter is turning his head away from Christ as Christ turns to look at him. Three other people are standing/and or sitting near Peter. One of the people, a young woman, is pointing her finger at Peter. Three cocks are on the stone stairs. One of the cocks is crowing.

Kalaunan nang gabing iyon, nang dakpin at dalhin si Jesucristo sa bahay ng mataas na saserdote upang litisin, sumunod si Pedro mula sa malayo (tingnan sa Lucas 22:54).

Basahin ang Lucas 22:55–62 upang malaman kung paano natupad ang propesiya ni Jesus tungkol kay Pedro.

Maaari mong bigyang-diin ang malungkot na reaksyon ni Pedro sa talata 62 upang matulungan ang mga estudyante na naising maiwasan ang mga resulta na katulad niyon .

• Ano ang natutuhan mo tungkol sa Tagapagligtas mula sa pakikipag-ugnayan Niya kay Pedro na naging dahilan para manampalataya ka kay Jesucristo?

Pagpapalakas sa ating pananampalataya kay Jesucristo

Hayaang magbahagi ang mga estudyante ng iba’t ibang katotohanan na natututuhan nila tungkol kay Jesucristo. Ang isang katotohanan na maaaring matukoy nila ay nais ni Jesucristo na palakasin ang ating pananampalataya sa Kanya upang madaig natin ang mga pag-atake ni Satanas.

Maaari mong ipakita ang mga sumusunod na pahayag at itanong sa mga estudyante kung anong mga pagkakatulad ang napansin nila sa mga salita ni Pangulong Nelson at sa mga babala ng Tagapagligtas kay Pedro.

Gaya ng pagpapaunawa ng Tagapagligtas kay Pedro tungkol sa mga hangarin ni Satanas (tingnan sa Lucas 22:31), binalaan tayo ni Pangulong Russell M. Nelson na “pinatitindi ng kalaban ang kanyang pag-atake sa pananampalataya at sa atin at sa mga pamilya natin sa napakabilis na paraan” (Russell M. Nelson, “Pambungad na Mensahe,” Ensign o Liahona, Nob. 2018, 7). Itinuro din niya na “lalong pinatitindi ng kaaway ang kanyang mga ginagawa para pahinain ang mga patotoo at hadlangan ang gawain ng Panginoon” (Russell M. Nelson, “Maaari Tayong Gumawa nang Mas Mahusay at Maging Mas Mahusay,” Ensign o Liahona, Mayo 2019, 68).

• Ano ang ilan sa mga paraan kung paano hinahangad ni Satanas na sirain ang ating pananampalataya kay Jesucristo ngayon?

Kung nahihirapan ang mga estudyante na mag-isip ng mga halimbawa, maaari kang magbigay ng ilan na tulad ng mga sumusunod:

• Tumiwalag ang isang mahal sa buhay sa Simbahan at gusto niyang sumama ka sa kanya.

• Kinokontra ng isang tao sa paaralan ang iyong pananampalataya.

• May binabasa ka online na hindi tugma sa iyong mga paniniwala.

Upang makatulong na mapaganda ang talakayan sa klase tungkol sa susunod na tanong, maaari kang magbahagi ng isang maikling personal na kuwento o salaysay sa banal na kasulatan na makatutulong sa mga estudyante na makita ang kahalagahan ng patuloy na pagpapalakas ng kanilang pananampalataya kay Jesucristo. Isang halimbawa na maaaring makatulong ay si Kapitan Moroni, na “hindi tumigil sa pagsasagawa ng mga paghahanda para sa digmaan, o sa pagtatanggol sa kanyang mga tao ( Alma 50:1).

• Ano ang nakatulong sa iyo na mapalakas ang iyong pananampalataya kay Jesucristo?

Maaari mong ipakita ang sumusunod na pahayag mula kay Elder Andersen habang nag-iisip ang mga estudyante ng mga paraan upang mapalakas ang kanilang pananampalataya kay Jesucristo.

Nagbahagi si Elder Neil L. Andersen ng Korum ng Labindalawang Apostol ng ilan sa mga paraan kung paano natin mapapalakas ang ating pananampalataya kay Jesucristo.

Upang matulungan ang mga estudyante na makahanap ng mga paraan upang mapalakas ang kanilang pananampalataya kay Jesucristo, makatutulong na isama ang iba pang pahayag na matatagpuan sa bahaging “Komentaryo at Pinagmulang Impormasyon”.

Official portrait of Elder Neil L. Andersen of the Quorum of the Twelve Apostles, 2010, August.

Hindi lalakas ang pananampalataya ninyo nang wala kayong ginagawa, kailangan ninyong pumili.

Ang pananampalataya natin ay nadaragdagan o nababawasan batay sa pamumuhay natin. Ang panalangin, pagsunod, katapatan, kadalisayan ng pag-iisip at gawa, at pagiging di-makasarili ay nagpapalakas ng pananampalataya. Kung wala ang mga ito, manghihina ang pananampalataya. Bakit sinabi ng Tagapagligtas kay Pedro, “Ikaw ay ipinamanhik ko, na huwag magkulang ang iyong pananampalataya”? ( Lucas 22:32). Dahil mayroong kaaway na natutuwang sirain ang ating pananampalataya! Gawin ang lahat ng makakaya ninyo para maingatan ang inyong pananampalataya.

(Neil L. Andersen, “Ang Pananampalataya ay Hindi Matatamo Kung Wala Munang Pagpiling Gagawin,” Ensign o Liahona, Nob. 2015, 66)

• Ano ang natutuhan mo ngayon tungkol sa nais ni Jesucristo para sa iyo?

• Ano ang isang bagay na sisimulan o patuloy mong gagawin upang mapalakas ang iyong pananampalataya kay Jesucristo?

• Sa iyong palagay, paano ka pagpapalain ng mas malakas na pananampalataya kay Jesucristo?

Komentaryo at Pinagmulang Impormasyon

Lucas 22:31 . Ano ang ibig sabihin ng Tagapagligtas nang sabihin Niya kay Pedro na hangad ni Satanas na “ligligin [siya] gaya ng trigo”?

Upang ligligin ang trigo, ang mahahalagang butil ay inihihiwalay mula sa mga hindi nagamit na bahagi ng halaman. Ginamit ni Jesus ang analohiyang ito upang tulungan si Pedro (at ang bawat isa sa atin) na matukoy ang mga pagsisikap ni Satanas na sirain ang ating pananampalataya at hadlangan tayo sa pagiging mahalagang bahagi ng kaharian ng Diyos.

Ano ang makapagpapalakas ng aking pananampalataya kay Jesucristo?

Itinuro ni Elder Neil L. Andersen ng Korum ng Labindalawang Apostol:

Official portrait of Elder Neil L. Andersen of the Quorum of the Twelve Apostles, 2010, August.

Ang ating pananampalataya ay nakasentro sa ating Diyos Ama at sa Kanyang Anak na si Jesucristo, na ating Tagapagligtas at Manunubos. Suportado ito ng ating kaalaman na ang kabuuan ng ebanghelyo ay ipinanumbalik sa mundo, ang Aklat ni Mormon ay salita ng Diyos, at ang mga propeta at apostol ngayon ang mayhawak ng mga susi ng priesthood. Pinakaiingatan natin ang ating pananampalataya, sinisikap na palakasin ito, ipinagdarasal na maragdagan pa ito, at ginagawa ang lahat ng kaya natin para protektahan at ipagtanggol ang ating pananampalataya. …

… Magtuon kayo sa mismong mga bagay na nagpalakas sa inyong pananampalataya: manampalataya kay Cristo, manalangin, pagnilayan ang mga banal na kasulatan, magsisi, sundin ang mga utos, at maglingkod sa kapwa.

(Neil L. Andersen, “Pagsubok sa Inyong Pananampalataya,” Ensign o Liahona, Nob. 2012, 39–40)

Ano ang maaaring sumira sa aking pananampalataya kay Jesucristo?

Itinuro ni Ahmad S. Corbitt, Unang Tagapayo sa Young Men General Presidency:

The official portrait of Ahmad S. Corbitt.

Mga kaibigan ko, ang sadyang pag-iisip o pagtingin sa mga bagay na salungat sa inyong tunay na identidad, lalo na sa pornograpiya, ay magpapahina sa inyong pananampalataya kay Cristo at, kung walang pagsisisi, mawawasak ito.

(Ahmad S. Corbitt, “Magagawa Ninyong Tipunin ang Israel!,” Liahona, Mayo 2021, 62)

Lucas 22:32 . Ano ang matututuhan natin tungkol sa pagbabalik-loob mula sa pag-unawa sa pahayag ng Tagapagligtas na nagpapahiwatig na hindi pa lubos na nagbalik-loob si Pedro?

Itinuro ni Elder David A. Bednar ng Korum ng Labindalawang Apostol:

Elder David A. Bednar, Quorum of the Twelve Apostles official portrait. 2020.

Nakatutuwa na ang dakilang Apostol na ito ay nakausap at nakasama ang Panginoon, nasaksihan ang maraming himala, at nagkaroon ng malakas na patotoo sa kabanalan ng Tagapagligtas. Gayunman, si Pedro ay nangailangan pa rin ng dagdag na tagubilin mula kay Jesus tungkol sa nakapagpapabalik-loob at nakadadalisay na kapangyarihan ng Espiritu Santo at sa kanyang tungkuling maglingkod nang tapat.

Ang pinakadiwa ng ebanghelyo ni Jesucristo ay humihingi ng mahalaga at permanenteng pagbabago sa ating katauhan na nagiging posible sa pamamagitan ng Pagbabayad-sala ng Tagapagligtas. Ang tunay na pagbabalik-loob ay nagdudulot ng pagbabago sa paniniwala, puso, at buhay ng isang tao upang tanggapin at sundin ang kagustuhan ng Diyos (tingnan sa Mga Gawa 3:19; 3 Nephi 9:20) at nakapaloob dito ang tapat na pangako na maging disipulo ni Cristo.

(David A. Bednar, “Nagbalik-loob sa Panginoon,” Ensign o Liahona, Nob. 2012, 106–7)

Mga Karagdagang Aktibidad sa Pag-aaral

Yakapin ang bukas nang may pananampalataya

Kasama sa isyu ng New Era noong Nobyembre 2020 ang mga sipi mula sa mensahe ni Pangulong Russell M. Nelson na “Yakapin ang Bukas nang may Pananampalataya.” Maaari mong ipakita ang pangunahing larawan ng artikulong iyon, na nagtatampok sa pariralang “kung kayo ay handa kayo ay hindi matatakot” ( Doktrina at mga Tipan 38:30). Sabihin sa mga estudyante na saliksikin ang payo ni Pangulong Nelson para sa mga paraan upang mapalakas ang kanilang pananampalataya kay Jesucristo upang hindi nila kailangang matakot sa anumang bagay na maaari nilang kaharapin sa hinaharap.

“Mga Bundok na Aakyatin”

Maaari mong ipapanood ang video na “Mga Bundok na Aakyatin” (19:38) at sabihin sa mga estudyante na pakinggan kung ano ang itinuro ni Pangulong Henry B. Eyring ng Unang Panguluhan tungkol sa pagpapalakas ng ating pananampalataya kay Jesucristo. Hayaang ibahagi ng mga estudyante ang natutuhan nila tungkol sa pananampalataya kay Jesucristo at kung saan tayo nito nabibigyan ng lakas sa ating buhay.