Seminelí
Filipai; Kolose

Filipai; Kolose

Vakai Fakalūkufuá

Lolotonga hono tuku pōpula ʻo Paula ʻi Lomá, naʻá ne fakahoko ha ngaahi tohi ki he Kāingalotu ʻi Filipai mo Kolosé pea akoʻi kinautolu ke nau tafoki kia Sīsū Kalaisi ke maʻu ha mālohi. Naʻá ne akoʻi ko Kalaisi ʻa e maʻuʻanga ʻo e melinó mo e fiefiá, pea naʻá ne fakamamafaʻi ʻa e meʻa ʻe lava ke fai ʻe he Kāingalotú ke nau ongoʻi ai ʻa e fiefiá mo e “melino ʻo e ʻOtuá” (Filipai 4:7). Naʻá ne toe fakamanatu ange foki ke nau “tuʻu maʻu ʻi he tuí ʻo aka mo tuʻu fakamakatuʻu” (Kolose 1:23) pea ke “aka mo langa hake” (Kolose 2:7) ʻia Kalaisi.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Kakai Filipaí mo e Kakai Kolosé

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ʻiloʻi ʻe he kau akó te nau lava ʻo maʻu ʻa e mālohi ke fehangahangai mo honau ngaahi faingataʻaʻiá ʻo fakafou ʻia Sīsū Kalaisi.

  • Teuteu ʻa e tokotaha akó: Fakaafeʻi e kau akó ke nau ako maʻuloto ʻa e Filipai 4:13 .

  • Meʻa ke fakaʻaliʻali atú: Ko e ngaahi fakahinohino ki he kau akó ke fakakakato ʻenau lēsoni miniti ʻe nimá (kau ai e ngaahi sīpingá)

  • Fokotuʻu ki hono akoʻi he konifelenisi fakavitioó: Fakaafeʻi e kau akó ke tamateʻi ʻenau ongó mo e vitioó ʻi heʻenau teuteu ʻenau lēsoní. Hili e taimi kuo vahe angé, ʻai ke nau toe fakamoʻui ʻenau vitioó mo e ongó, pea vahe kinautolu ki ha ngaahi loki ngāue fakavitiō (breakout rooms). Fakaafeʻi ha toko taha pe toko ua te na loto-fiemālie ke akoʻi ʻena lēsoní ki he kulupu tokosiʻi angé.

Filipai 3

Taumuʻa ʻo e lēsoní: ʻE lava ke tokoni e lēsoni ko ʻení ke mahino ki he kau akó ʻa e mahuʻinga ʻo hono fakahoko e ngaahi feilaulaú ke ʻiloʻi ʻa Sīsū Kalaisí.

  • Teuteu ʻa e tokotaha akó: Kapau ʻe lava, fakaafeʻi e kau akó ke tānaki ha ngaahi fakamatala mei he kau mēmipa ʻo e fāmilí pe ngaahi kui ne nau fai ha ngaahi feilaulau ke muimui kia Sīsū Kalaisí. Poupouʻi kinautolu ke nau omi mateuteu ke vahevahe e ngaahi aʻusia ko ʻení mo e kalasí.

Filipai 4

Taumuʻa ʻo e lēsoní: ʻE feinga ʻa e kau akó ke ʻiloʻi ha ngaahi founga te nau lava ai ʻo maʻu ha fiefia mo ha melino lahi ange ʻia Sīsū Kalaisi ʻi heʻenau moʻuí.

  • Teuteu ʻa e tokotaha akó: Fakaafeʻi e kau akó ke fehuʻi ki ha niʻihi ʻo e ngaahi kaungāmeʻá pe kau mēmipa ʻo e fāmilí ʻa e founga ʻoku ʻomi ai ʻe Sīsū Kalaisi kiate kinautolu ʻa e melinó mo e fiefiá ʻi heʻenau moʻuí.

  • Meʻa ke fakaʻaliʻali atú: Ko e ʻīmisi ʻo Paulá mo e ngaahi meʻa te ne ala fakafeʻātungiaʻi mo taʻofi ʻene nongá mo e fiefiá

  • Fokotuʻu ki hono akoʻi he konifelenisi fakavitioó: Fakakaukau ke fakaʻatā ʻa e kau akó ke nau fakaʻaongaʻi e polokalama palakipoé ke tānaki ʻenau ngaahi fakakaukaú ʻi he screen ʻi heʻenau lisi e ngaahi founga ke maʻu ai ha fiefia mo e nonga ʻoku lahi angé ʻia Kalaisí.

Kolose 1–2

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ʻiloʻi ʻe he kau akó e ngaahi mālohi ʻokú ne fokotuʻu ʻenau tuí ʻi ha tuʻunga fakatuʻutāmakí mo e ngaahi founga te nau lava ai ʻo tuʻu maʻu ange ʻia Sīsū Kalaisí.

  • Teuteu ʻa e tokotaha akó: Fakaafeʻi e kau akó ke nau tā pe faitaaʻi e faʻahinga fuaʻiʻakau ʻoku nau saiʻia taha aí pea ʻomi e fakatātaá ki he kalasí. Kole ange ke nau fakakaukau ki he ngaahi lēsoni fakalaumālie te tau lava ʻo ako mei he ʻuluʻakaú.

  • Fokotuʻu ki hono akoʻi he konifelenisi vitioó: Fakakaukau ke fakaʻaongaʻi ha fakatātā pe polokalama palakipoé pea fakaafeʻi e kau akó ke nau tā ha fuʻu ʻakau mālohi ʻoku fakatefito ʻia Kalaisi pea fakahingoa ia lolotonga e lele ʻa e lēsoní.

Fakamanatu ʻo e Fakataukei Fakatokāteliné 21

Taumuʻa ʻo e lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke nau akoako fakaʻaongaʻi ha niʻihi ʻo e ngaahi potufolofola fakataukei fakatokāteline ʻo e Fuakava Foʻoú ʻi ha ngaahi tūkunga fakafaiako kehekehe.

  • Teuteu ʻa e tokotaha akó: Fakaafeʻi e kau akó ke fili ha potufolofola fakataukei fakatokāteline pau ʻo e Fuakava Foʻoú kuó ne tokoniʻi kinautolu mo mateuteu ke vahevahe mo e kalasí ʻa e founga kuó ne tokoniʻi ai kinautolú.

  • Naunau maʻá e kau akó: Ko ha laʻipepa mo ha naunau ke fai ʻaki ha tohi maʻá e tokotaha ako takitaha

  • Fokotuʻu ki hono akoʻi he konifelenisi vitioó: ʻE lava ke tuku ʻa e kau akó ʻi he ngaahi loki ngāue fakavitioó (breakout rooms) ke nau aleaʻi e sitepu 1 ki he 4 ʻi he ʻekitivitī tohi fakataukei fakatokāteliné. Ke ʻoange ha faingamālie ki he kau akó ke nau ngāue mo ha ngaahi kaungāako kehekehe, fakakaukau ke tuku kinautolu ki ha loki ngāue fakavitiō (breakout room) kehe ki he foʻi fehuʻi takitaha.