Akó—Taimi Lōloa Tahá: Miniti ʻe 45
1. Hoko ko ha Tauhi Fakapotopoto mo Faivelenga
-
Fakalaulauloto:Tuku ha kiʻi taimi ke ke fakalaulauloto fakalongolongo ai ki he fehuʻi ko ʻení pea hiki hoʻo ngaahi fakakaukaú.
-
Ko e hā e lahi ʻeku falala ki hoku kahaʻu fakapaʻangá?
-
-
Lau:ʻOku akoʻi kitautolu ʻe Kalaisi ʻi he talanoa fakatātā ki he ngaahi talēnití kuo pau ke tau tokangaʻi ʻa e meʻa kuo foaki mai maʻatautolú. ʻOku tuku ʻe he ʻEikí ke tau hoko ko e kau tauhi (caretakers)—pe kau tauhi koloa (stewards)—ki Heʻene ngaahi meʻaʻofa maʻatautolú. ʻOku talaʻofa ʻe Kalaisi kiate kinautolu ʻoku tuitala ki Heʻene ngaahi meʻafoakí, “Mālō, ko e tamaioʻeiki lelei mo angatonu: kuó ke faitotonu ʻi he meʻa siʻi, te u fakanofo koe ke ke pule ki he meʻa lahi: hū koe ki he fiefiaʻanga ʻo hoʻo ʻeikí” (Mātiu 25:21).
-
Aleaʻi:Ko e hā ʻene ʻuhinga kiate koe ʻoku ʻa e ʻEikí ʻa e meʻa kotoa peé?
-
Lau:Ko e konga hotau fatongia tauhí, ʻoku poupouʻi ai kitautolu ke tau fakapotopoto ʻi heʻetau ngaahi meʻa fakapaʻangá. Naʻe akoʻi ʻe Palesiteni Gordon B. Hinckley:
“ʻOku ou kole atu … ke mou vakai ki he tuʻunga hoʻomou meʻa fakapaʻangá. ʻOku ou kole atu ke mou fakapotopoto ʻi hoʻomou ngaahi fakamolé; mapuleʻi hoʻomou ngaahi fakataú ke taʻofi ʻa e fakamoʻuá ʻi he lelei taha ʻe lava ke fakahoko ʻakí. Totongi ke ʻosi ho moʻuá ʻi he vave taha te ke lavá, pea fakatauʻatāinaʻi koe mei he pōpulá.
“Ko ha konga ʻeni ʻo e ongoongolelei fakatuʻasino ʻoku tau tui ki aí. ʻOfa ke tāpuekina kimoutolu ʻe he ʻEikí ke fakamaau homou falé. Kapau kuo ʻosi totongi ho moʻuá, kapau ʻoku ʻi ai haʻo paʻanga talifaki, neongo ʻene siʻisiʻí, ka faʻaki mai ha ngaahi matangi, ʻe ʻi ai ha maluʻanga ki ho [fāmilí] mo ha nonga ʻi [homou ngaahi] lotó” (“To the Boys and to the Men,” Ensign, Nov. 1998, 54).
ʻI hoʻo feinga ke ngāue fakapotopoto ʻaki hoʻo paʻangá, ʻe lava ke tupulaki ai hoʻo tui kia Kalaisí, ʻo tofa ʻa e hala ki he ngaahi tāpuaki ʻi he kahaʻú.
-
Aleaʻi:ʻOku founga fēfē hono ngaohi koe ʻe hoʻo levaʻi lelei hoʻo ngaahi meʻa fakapaʻangá ke ke hoko ai ko ha tauhi lelei angé?
Te Tau Lava ʻo Levaʻi Fakapotopoto ʻEtau Ngaahi Meʻa Fakapaʻangá
-
Lau:ʻOku ʻoatu ʻe he fakatātā he peesi 8—Mape Lavameʻa ʻi he Fatongia Tauhi ʻo e Ngaahi Meʻa Fakapaʻangá—ʻa e ngaahi tefitoʻi moʻoni ki hono levaʻi fakapotopoto mo faivelenga ʻo e meʻa fakapaʻangá. Te ke ako mo fakaʻaongaʻi e ngaahi tefitoʻi moʻoni ko ʻení ʻi he uike ʻe 12 ka hokó. Te ke ngāue ʻi he kalasí ni kakato ke fakatupulaki hoʻo tui kia Sīsū Kalaisí, langaʻi ʻa e uouangataha mo ho malí, mo fakamālohia hoʻo tukupā ke moʻui fakafalala pē kiate koé. ʻE nofotaha ʻa e lēsoni takitaha ʻi ha konga pau ʻo e Mape Lavameʻa ʻi he Fatongia Tauhi ʻo e Ngaahi Meʻa Fakapaʻangá.
-
Aleaʻi:Taufetongi ʻi hono lau e ngaahi meʻa ʻi he Mape Lavameʻa ʻo e Fatongia Tauhi ʻo e Meʻa Fakapaʻangá (peesi 8). ʻE founga fēfē ha lava ʻe he ngaahi meʻá ni takitaha ʻo tokoniʻi koe ʻi ho hala ki he lavameʻa ʻi he fatongia tauhi ʻo e ngaahi meʻa fakapaʻangá?
2. Fealeaʻaki mo e ʻEikí Fekauʻaki mo Hoʻo Ngaahi Meʻa Fakapaʻangá
-
Lau:ʻOku ʻikai ha veiveiua ʻe hoko ha ngaahi palopalema ʻi hoʻo fakaʻaongaʻi ʻa e ngaahi tefitoʻi moʻoni ko ʻeni ʻo e lavameʻa ʻi he fatongia tauhi ʻa e ngaahi meʻa fakapaʻangá. Ka ʻi hoʻo kole tokoni mei ho kaungā mēmipa he kulupú, mo kole tokoni maʻu pē ki he ʻEikí, ʻe fakamālohia koe ke ke ikunaʻi ʻa e ngaahi faingataʻa ko iá. Manatuʻi, ʻoku teuteu maʻu pē ʻe he ʻEikí ha hala ke fakahoko ai ʻEne ngaahi fekaú (vakai, 1 Nīfai 3:7).
Naʻe akoʻi ʻe ʻAmuleki ʻa e kau masiva ʻi he kakai Sōlamí ke nau “tangi [ki he ʻEikí] koeʻuhí ko e fua kotoa pē ʻo hoʻomou ngoué, koeʻuhí ke mou tuʻumālie ai. Tangi koeʻuhí ko e ngaahi tākanga monumanu iiki ʻi hoʻomou ngaahi ngoué, ke nau tupu ʻo tokolahi” ( ʻAlamā 34:24–25). ʻI hoʻo fealēleaʻaki mo e ʻEikí fekauʻaki mo hoʻo ngaahi fie maʻu fakatuʻasinó mo e ngaahi palopalemá, pea ngāue ke moʻui fakafalala pē kiate kita he ngaahi meʻa fakapaʻangá, te Ne tāpuakiʻi mo fakamālohia koe.
ʻOku ʻuhinga ʻa e fealeaʻaki mo e ʻEikí fekauʻaki mo hoʻo ngaahi meʻa fakapaʻangá, ke ke lotu ki he Tamai Hēvaní mo kole fakahinohino fekauʻaki mo hoʻo ngaahi meʻa fakapaʻangá. Ko e taha hoʻo ngaahi tukupā ʻi he uike ní, ke ke fealeaʻaki mo e ʻEikí ki hoʻo ngaahi meʻa fakapaʻangá.
Mape Lavameʻa ʻi he Fatongia Tauhi ʻo e Ngaahi Meʻa Fakapaʻangá
3. Muimuiʻi Hoʻo Paʻanga Hū Maí mo e Ngaahi Fakamolé
-
Lau:Ko e ʻuluaki sitepu ki he lavameʻa ʻi he fatongia tauhi ʻo e ngaahi meʻa fakapaʻangá, ko e mahino ho tuʻunga fakapaʻanga lolotongá. Ko e taimi te ke maʻu ai ha mahino lelei ange ki he meʻa ʻoku fakamoleki ki ai hoʻo paʻangá, te ke lava leva ʻo palani lelei ange ʻa e meʻa ke fakamole ki aí. Te ke kamata ʻaki haʻo muimuiʻi hoʻo paʻanga hū maí mo e ngaahi fakamole ʻi he ʻuluaki uike ʻe fā ʻo e kalasi ko ʻení.
-
Fakalaulauloto:Fakaʻaongaʻi ha kiʻi taimi ke ke fakakaukau fakalongolongo ai ki he ngaahi fehuʻi ko ʻení:
-
ʻOku ou ʻiloʻi nai ʻa e meʻa ʻoku fakamoleki ai ʻeku paʻangá he māhina takitaha?
-
ʻOku ou ongoʻi nai ʻoku ou mapuleʻi ʻa e meʻa ʻoku fakamoleki ai ʻeku paʻangá?
-
-
Aleaʻi:Ko e hā ha ngaahi palopalema te ke fepaki mo ia ʻi hono muimuiʻi hoʻo ngaahi fakamolé?
-
Fakalaulauloto:Hiki ha ngaahi founga te ke ikunaʻi ʻaki e ngaahi palopalemá ni.